২ কোরোন্থি9
1য়হুদিয়াতা নিওয়া সেংজাকো দিংঙাবিহিং কাইপুদাংওয়া দানকো বিষয়তা কাহা ইতা জাংদিংমঘ্যইরোওয়া।2নাবিকোতাহা সেওয়া জোকোহা হাসেকো ইচ্ছা নিমমে, আকুহা কা গেমি নিও। নাবিকো বিষয়তা কাহা মাকেডোনিয়াকো দিংঙাবিহিংনে পুংটা জোমসা জাংমি নিও। আনিংমাসোরাং নাবি আকাইয়াতা নিওয়াবিহা পিচাকো তৈয়ার নিমগা তামসা আবিহিং হিংপায়ে। নাবিকো জোশকো সোতারাং আবিকোতাহা সিওপারাং নেহা জোসিলো জিংপুমি নিও।3নাবিকো বিষয়তা কাবিকো জোওয়া পুংটাহা ব্যর্থ মাজিংকো, আসা কুং জাংমি ত্যাবাপা নাবি তৈয়ার জিংকো তামসা কা এবিহিং নিংপুদাংয়ো।4কাবিহা এসেপাকো টেবো ভরসা নাবিকোতা এমি নিও, আদো মাকেডোনিয়াকো দিংঙাবিহা কাহিংপা ওয়াংনুওয়া নাবিমি পিচাকো তৈয়ার মাতানাহা কাবিহা হাসেকো লেফেনেকোগা। নাবিরে লেফেনেরোওয়া।5আকো সোতা কা ওয়াংনুরোমা নাগাই ই এবিহিংয়া নাবিকোতা নিংপুকোরাং এনতাওয়া নোয়ে। এপা জিংপুনুওয়া নাবিকো পিচারো তাওয়া দান জুউমসা তিতিপা জোয়েরোওয়া আসা ইহা সুজানেওয়া দান মোকো, আদো য়াংতাওয়াকো দান জিংরোওয়া।6আদো ই নুওয়াং মালারিং, “আস্যস্যই মিওয়াহা আস্যস্যইরাং আসা উইসে মিওয়াহা উইসেরাং নিংপারোওয়া।”7হাংসুহিং হাসে পিচাদাংবেপা তিং, আসেরাং পিচা। তুংসিং চিচপামসা দোসরাকো সুজাওয়াতা মিচা, হাংপাতানাহা য়াংতামসা পিচামবিহিংয়া সেংজাহা জেজেংপা জোমগা।8সেংজাহা নাবিহিংয়া সিওপা জিংপক্যইপা পুরা পিচাকো চুমগা আসা ঘ্যইওয়ারোমা সিওপারাং পিচারোওয়া। নাবিহা হাই নুওয়াংকোরে হাত্রংরে মাতেংপা মাজিংরোওয়া, আসা সিওপারাং দোসরাহিং লাভ জিংওয়া কাম জোক্যইরোওয়া।9তাংজিকো হিগাতারে এপারাং লামি নিও,“হাংসু মি আসা তুংসিং ওয়েমসা জোরোংবিহিং পিচা,আকো জোওয়া এনতাওয়া কামহা তুতেংজু চোইপা য়ুংরোওয়া।”10অংটি মিকো আসা চাকো কোব্রেংহা সেংজারাং পিচামগা। আকুহা নাবিহিং ঘ্যইওয়া তাংসা অংটি পিচারোওয়া, আসা নিংপারোওয়া। তুংসিং ওয়েমসা পিচাওয়াকো সোতা নাবিকো তুংসিংহিংয়া সিওপা ঘ্যইমবিহিং পিচাওয়া বানাইরোওয়া।11নাবিহা হাত্রংদো তুংসিং ওয়েমসা পিচাকো ছুক্যইপা সেংজাহা নাবিহিংয়া পুপুউ বানাইরোওয়া। নাবিকো পিচাওয়া দানহা কাবি দোসরা মন্ডলিতা চোনুহা, আবিহা সেংজাহিং গারানি তামসা জাংরোওয়া।12নাবিকো দানসোহা সেংজাকো দিংঙাবিকো দরকার পরেনু পেংপাওয়া মেংচে মোকো, আদো ইসোহা সেংজাহিং সিওপারাং গারানি তামসা জাংরোওয়া।13সেওয়াকো ই জাঁচ অন্তর্গত নাবিহা খ্রীষ্টকো এনতাওয়া দেরেং স্বীকার জোকো আপনিকো নোচেংকো আজ্ঞাকারিতাসো অর্থাৎ নাবি আসা দোসরা তাংসাকো সোতা নাবিকো তুংসিং ওয়েমসা পিচাওয়া ভেটিসো সেংজাকো মহিমা জিংরোওয়া।14সেংজাহা এসেকো টেবো অনুগ্রহ নাবিহিং তিংপাওয়াকো সোতা আবিহা নাপোসো জেজেংপা জোমসা নাবিকো সোতা পাচাইরোওয়া।15আকো বর্নণ জোকো মাছুওয়া ঙেরোংকো সোতা সেংজাহিং গারানিকো।
The Seed Company