Přečtěte si 𐴔𐴡𐴃𐴞 9

𐴔𐴡𐴃𐴞9

𐴀𐴠𐴎𐴧𐴡𐴕 𐴀𐴝𐴣𐴃𐴟𐴌𐴡𐴌𐴠 𐴒𐴡𐴔 𐴒𐴡𐴙𐴅𐴧𐴠𐴥

¹𐴀𐴞𐴏𐴝𐴤 𐴕𐴡𐴦𐴃𐴢 𐴀𐴟𐴍𐴞𐴤, 𐴋𐴞𐴀 𐴉𐴝𐴌𐴝𐴤𐴘 𐴕𐴞𐴎𐴡𐴌 𐴐𐴡𐴥𐴀𐴌𐴡𐴃𐴢 𐴀𐴝𐴙𐴐𐴧𐴠𐴥.²𐴇𐴠𐴥𐴃𐴟𐴕𐴡𐴃𐴢 𐴇𐴡𐴊𐴟𐴥𐴕 𐴔𐴝𐴙𐴕𐴐𐴠𐴥 𐴁𐴞𐴏𐴝𐴥𐴕𐴝𐴃𐴢 𐴕𐴠𐴙𐴄𐴧𐴝 𐴀𐴠𐴑 𐴀𐴝𐴣𐴃𐴟𐴌 𐴔𐴝𐴕𐴟𐴥𐴙𐴐𐴡𐴌𐴠 𐴀𐴞𐴥𐴁𐴝𐴌 𐴇𐴝𐴣𐴏𐴠 𐴀𐴝𐴙𐴕𐴧𐴠𐴤. 𐴀𐴞𐴥𐴃𐴝𐴌𐴝𐴌 𐴀𐴞𐴔𐴝𐴕 𐴊𐴠𐴑𐴞𐴥 𐴀𐴞𐴏𐴝𐴤𐴘𐴠 𐴀𐴝𐴣𐴃𐴟𐴌 𐴔𐴝𐴕𐴟𐴥𐴙𐴐𐴧𐴗𐴝𐴌𐴠 𐴈𐴡𐴀𐴌 𐴊𐴠, ”𐴀𐴡𐴥 𐴉𐴟𐴃𐴢, 𐴇𐴞𐴥𐴔𐴧𐴡𐴃𐴢 𐴒𐴡𐴌; 𐴃𐴡𐴌 𐴒𐴟𐴕𐴝𐴤 𐴔𐴝𐴉𐴢 𐴒𐴡𐴌𐴞𐴥𐴊𐴞𐴘𐴝 𐴒𐴞𐴥𐴘𐴠.“

³𐴇𐴞𐴥𐴘𐴝𐴕 𐴉𐴟𐴥𐴕𐴞 𐴇𐴡𐴦𐴎𐴧𐴡𐴕 𐴀𐴝𐴓𐴠𐴔𐴠 𐴊𐴞𐴓𐴠-𐴊𐴞𐴓𐴠 𐴈𐴡𐴀𐴌 𐴊𐴠, ”𐴀𐴠 𐴔𐴝𐴕𐴟𐴥𐴙𐴐𐴧𐴗𐴝𐴘𐴠 𐴃𐴡 𐴑𐴟𐴉𐴠𐴥𐴌𐴞 𐴒𐴡𐴌𐴠𐴥𐴌!“

⁴𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌 𐴁𐴝𐴥𐴉𐴝𐴕𐴞𐴌𐴠 𐴎𐴝𐴕𐴞 𐴈𐴡𐴀𐴌 𐴊𐴠, ”𐴃𐴟𐴣𐴀𐴝𐴥𐴌𐴝 𐴊𐴞𐴓𐴠-𐴊𐴞𐴓𐴠 𐴈𐴡𐴥𐴌𐴝𐴉𐴢 𐴑𐴞𐴘𐴝𐴥 𐴁𐴝𐴥𐴉𐴡𐴌؟⁵𐴈𐴡𐴘𐴃𐴠𐴤 𐴇𐴡𐴕 𐴕𐴝𐴥𐴕 𐴀𐴝𐴏𐴝𐴤𐴕, 𐴑𐴞 ’𐴃𐴡𐴌 𐴒𐴟𐴕𐴝𐴤 𐴔𐴝𐴉𐴢 𐴒𐴡𐴌𐴞𐴥𐴊𐴞𐴘𐴝 𐴒𐴞𐴥𐴘𐴠,‘ 𐴀𐴝𐴦𐴌 𐴕𐴝𐴥𐴑𐴞 ’𐴀𐴟𐴍𐴞𐴤 𐴀𐴝𐴥𐴣𐴄𐴢‘؟⁶𐴓𐴠𐴑𐴞𐴕 𐴀𐴝𐴣𐴀𐴃𐴧𐴟 𐴃𐴟𐴣𐴀𐴝𐴥𐴌𐴝𐴌𐴠 𐴘𐴝𐴀𐴕 𐴎𐴝𐴕𐴝𐴘𐴊𐴞𐴃𐴡 𐴔𐴡𐴕𐴠𐴈𐴡𐴀𐴌, 𐴀𐴠 𐴊𐴟𐴕𐴞𐴘𐴝𐴙𐴃𐴢 𐴒𐴟𐴕𐴝𐴤 𐴔𐴝𐴉𐴢 𐴒𐴡𐴌𐴞𐴥𐴁𐴝𐴌 𐴑𐴠𐴥𐴔𐴡𐴃𐴝 𐴔𐴝𐴕𐴟𐴥𐴙𐴐𐴡𐴌 𐴉𐴟𐴖𐴝𐴃𐴧𐴟 𐴀𐴝𐴏𐴠𐴤.“𐴃𐴡𐴥𐴘 𐴀𐴞𐴥𐴁𐴝𐴘𐴠 𐴀𐴝𐴣𐴃𐴟𐴌 𐴔𐴝𐴕𐴟𐴥𐴙𐴐𐴧𐴗𐴝𐴌𐴠 𐴈𐴡𐴀𐴌 𐴊𐴠, ”𐴀𐴟𐴄𐴢, 𐴃𐴡𐴌 𐴁𐴞𐴏𐴝𐴥𐴕𐴝 𐴃𐴟𐴓𐴞𐴤 𐴓𐴡𐴦𐴘𐴢 𐴒𐴡𐴥𐴌𐴡𐴃𐴢 𐴎𐴝𐴒𐴡𐴥𐴘.“⁷𐴇𐴠𐴥𐴃𐴟𐴕𐴡𐴃𐴢 𐴘𐴡𐴥𐴒𐴧𐴗𐴝 𐴀𐴟𐴍𐴞𐴤 𐴒𐴡𐴥𐴌𐴡𐴃𐴢 𐴒𐴞𐴦𐴘𐴠𐴥𐴒𐴡𐴘.⁸𐴇𐴞𐴥𐴘𐴝𐴕 𐴊𐴠𐴑𐴞𐴥 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴢 𐴋𐴡𐴦𐴌𐴝𐴘𐴒𐴞𐴘𐴡𐴥𐴘, 𐴀𐴝𐴦𐴌 𐴀𐴝𐴓𐴧𐴝𐴌 𐴃𐴝𐴦𐴌𐴞𐴉𐴢 𐴒𐴡𐴌𐴝𐴥𐴃𐴢 𐴊𐴡𐴙𐴅𐴧𐴠, 𐴎𐴞𐴁𐴝𐴤𐴘𐴠 𐴀𐴞𐴕𐴏𐴝𐴥𐴕𐴡𐴌𐴠 𐴇𐴠𐴥𐴕𐴊𐴞𐴓𐴧𐴝 𐴑𐴠𐴥𐴔𐴡𐴃𐴝 𐴊𐴞𐴦𐴘𐴠𐴥.

𐴀𐴞𐴏𐴝𐴤𐴘𐴠 𐴔𐴡𐴃𐴞𐴌𐴠 𐴋𐴝𐴙𐴑𐴧𐴠𐴥

⁹𐴀𐴞𐴏𐴝𐴤 𐴇𐴞𐴥𐴘𐴝𐴕𐴃𐴟 𐴎𐴝𐴘𐴃𐴠-𐴎𐴝𐴘𐴃𐴠 𐴊𐴠𐴑𐴠𐴥𐴌 𐴊𐴠, 𐴔𐴡𐴃𐴞 𐴕𐴝𐴔𐴡𐴌 𐴀𐴠𐴎𐴧𐴡𐴕 𐴔𐴝𐴕𐴟𐴥𐴙𐴐𐴢 𐴇𐴝𐴥𐴎𐴝𐴕𐴝 𐴃𐴟𐴓𐴠𐴥 𐴊𐴠 𐴒𐴡𐴥𐴌𐴡𐴃𐴢 𐴁𐴡𐴀𐴘𐴢 𐴃𐴝𐴥𐴙𐴑𐴧𐴠. 𐴀𐴞𐴥𐴁𐴝𐴘𐴠 𐴘𐴡𐴥𐴒𐴧𐴗𐴝𐴌𐴠 𐴈𐴡𐴀𐴌 𐴊𐴠, ”𐴀𐴝𐴣𐴀𐴌 𐴉𐴞𐴏𐴝𐴥𐴓𐴞 𐴊𐴡𐴌𐴡.“𐴇𐴠𐴥𐴃𐴟𐴕𐴡𐴃𐴢 𐴘𐴡𐴥𐴒𐴧𐴗𐴝 𐴀𐴟𐴍𐴞𐴤 𐴀𐴞𐴥𐴁𐴝𐴌 𐴉𐴞𐴏𐴝𐴥𐴓𐴞 𐴊𐴡𐴙𐴅𐴧𐴠.

¹⁰𐴘𐴝𐴥𐴌𐴁𐴝𐴦𐴊𐴠 𐴀𐴠𐴀𐴕 𐴀𐴡𐴥𐴘𐴧𐴠, 𐴀𐴞𐴏𐴝𐴤 𐴎𐴠𐴣𐴃𐴧𐴠𐴥 𐴔𐴡𐴃𐴞𐴌 𐴒𐴡𐴥𐴌𐴡𐴃𐴢 𐴈𐴝𐴥𐴕𐴝 𐴈𐴝𐴥𐴀𐴌, 𐴁𐴡𐴀𐴗𐴃𐴢 𐴎𐴡𐴕 𐴇𐴝𐴥𐴎𐴝𐴕𐴝-𐴃𐴟𐴓𐴡𐴥𐴘𐴝 𐴀𐴠𐴊𐴧𐴠 𐴒𐴟𐴕𐴝𐴤𐴒𐴝𐴌 𐴀𐴡𐴥𐴑𐴧𐴡𐴓𐴢 𐴀𐴡𐴥 𐴀𐴝𐴀𐴘𐴢 𐴀𐴞𐴏𐴝𐴤 𐴀𐴠𐴊𐴧𐴠 𐴀𐴞𐴥𐴁𐴝𐴌 𐴀𐴟𐴔𐴧𐴡𐴃𐴢 𐴀𐴡𐴥𐴑𐴧𐴡𐴓𐴡𐴌 𐴉𐴟𐴥𐴖𐴝𐴣𐴃𐴞 𐴈𐴝𐴥𐴘𐴃𐴡 𐴁𐴡𐴙𐴐𐴧𐴠𐴥.¹¹𐴉𐴠𐴥𐴌𐴡𐴐𐴞 𐴀𐴡𐴥𐴑𐴧𐴡𐴓𐴠 𐴇𐴞𐴥𐴘𐴝𐴕 𐴊𐴠𐴑𐴞𐴥 𐴀𐴞𐴥𐴁𐴝𐴌 𐴀𐴟𐴔𐴧𐴡𐴃𐴢 𐴀𐴡𐴥𐴑𐴧𐴡𐴓𐴡𐴃𐴧𐴟 𐴉𐴟𐴏𐴝𐴥𐴌 𐴒𐴡𐴌𐴠𐴥𐴌 𐴊𐴠, ”𐴃𐴟𐴣𐴀𐴝𐴥𐴌𐴝𐴌 𐴀𐴟𐴏𐴃𐴝𐴃𐴠 𐴇𐴝𐴥𐴎𐴝𐴕𐴝-𐴃𐴟𐴓𐴡𐴥𐴘𐴝 𐴀𐴡𐴥𐴑𐴧𐴡𐴓𐴡𐴌 𐴀𐴠𐴊𐴧𐴠 𐴒𐴟𐴕𐴝𐴤𐴒𐴝𐴌 𐴀𐴡𐴥𐴑𐴧𐴡𐴓𐴡𐴌 𐴉𐴟𐴥𐴖𐴝𐴣𐴃𐴞 𐴑𐴞𐴘𐴝𐴥 𐴈𐴝𐴥𐴕𐴝 𐴈𐴝𐴥𐴀؟“

¹²𐴇𐴞𐴥𐴘𐴝𐴕 𐴉𐴟𐴥𐴕𐴞 𐴀𐴞𐴏𐴝𐴤𐴘𐴠 𐴈𐴡𐴀𐴌 𐴊𐴠, ”𐴀𐴝𐴌𐴝𐴙𐴔𐴧𐴝 𐴀𐴡𐴥𐴑𐴧𐴡𐴓𐴡𐴃𐴧𐴟 𐴃𐴡 𐴋𐴝𐴑𐴄𐴡𐴌 𐴕𐴡 𐴓𐴝𐴒𐴠, 𐴔𐴡𐴕𐴃𐴡𐴌 𐴁𐴞𐴘𐴝𐴌𐴝𐴙𐴔𐴧𐴝 𐴀𐴡𐴥𐴑𐴧𐴡𐴓𐴡𐴃𐴧𐴟 𐴁𐴠 𐴓𐴝𐴒𐴠.¹³𐴃𐴟𐴣𐴀𐴝𐴥𐴌𐴝 𐴎𐴝𐴘 𐴀𐴠 𐴈𐴡𐴃𐴝𐴤𐴌 𐴔𐴝𐴀𐴕𐴞 𐴑𐴞𐴦 𐴐𐴞𐴥𐴑𐴡𐴒𐴡𐴘, ’𐴀𐴝𐴀𐴛 𐴑𐴟𐴌𐴁𐴝𐴕𐴞 𐴏𐴝𐴀𐴘𐴢 𐴊𐴠 𐴕𐴡, 𐴁𐴡𐴥𐴓𐴑𐴠 𐴌𐴝𐴇𐴝𐴥𐴔 𐴏𐴝𐴀𐴘𐴢 𐴊𐴠.‘ 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴀𐴛 𐴊𐴝𐴖𐴡𐴃𐴢 𐴊𐴞𐴃𐴡 𐴀𐴝𐴙𐴐𐴧𐴞𐴤 𐴊𐴠 𐴉𐴡𐴌𐴇𐴠𐴥𐴏𐴒𐴝𐴌 𐴀𐴡𐴥𐴑𐴧𐴡𐴓𐴡𐴌𐴠 𐴕𐴡, 𐴁𐴡𐴥𐴓𐴑𐴠 𐴒𐴟𐴕𐴝𐴤𐴒𐴝𐴌 𐴀𐴡𐴥𐴑𐴧𐴡𐴓𐴢 𐴀𐴡𐴌𐴠.“

𐴌𐴟𐴎𐴝𐴌 𐴁𐴝𐴦𐴁𐴟𐴃𐴠 𐴏𐴟𐴥𐴖𐴝𐴓𐴢

¹⁴𐴇𐴠𐴥𐴃𐴟𐴕𐴡𐴃𐴢 𐴘𐴝𐴇𐴝𐴥𐴘𐴝𐴌 𐴀𐴟𐴔𐴧𐴡𐴃𐴢 𐴀𐴡𐴥𐴑𐴧𐴡𐴓𐴢 𐴀𐴞𐴏𐴝𐴤𐴌 𐴇𐴝𐴣𐴏𐴠 𐴀𐴝𐴀𐴘𐴢 𐴀𐴞𐴥𐴁𐴝𐴃𐴧𐴟 𐴉𐴟𐴏𐴝𐴥𐴌 𐴒𐴡𐴌𐴠𐴥𐴌 𐴊𐴠, ”𐴀𐴝𐴣𐴀𐴌𐴝 𐴀𐴠𐴊𐴧𐴠 𐴉𐴠𐴥𐴌𐴡𐴐𐴞 𐴀𐴡𐴥𐴑𐴧𐴡𐴓𐴠 𐴃𐴡 𐴕𐴞𐴃𐴧𐴞 𐴌𐴟𐴎𐴝 𐴌𐴝𐴑𐴞𐴥, 𐴔𐴡𐴕𐴃𐴡𐴌 𐴃𐴟𐴣𐴀𐴝𐴥𐴣𐴌 𐴀𐴟𐴔𐴧𐴡𐴃𐴢 𐴀𐴡𐴥𐴑𐴧𐴡𐴓𐴠 𐴑𐴞𐴘𐴝𐴥 𐴌𐴟𐴎𐴝 𐴕𐴡 𐴌𐴝𐴑𐴠𐴥؟“

¹⁵𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴊𐴟𐴓𐴝𐴤 𐴉𐴟𐴥𐴖𐴝𐴣𐴃𐴞 𐴃𐴝𐴥𐴑𐴞𐴃𐴠 𐴑𐴞𐴥 𐴁𐴡𐴘𐴌𐴝𐴙𐴃𐴧𐴝 𐴀𐴡𐴥𐴑𐴧𐴡𐴓𐴢 𐴉𐴠𐴌𐴠𐴐𐴝𐴕 𐴀𐴡𐴥𐴘 𐴉𐴝𐴌𐴠؟ 𐴔𐴡𐴕𐴃𐴡𐴌 𐴀𐴠𐴀𐴕 𐴊𐴞𐴕 𐴀𐴝𐴘𐴁𐴡𐴤, 𐴎𐴠𐴣𐴃𐴧𐴠𐴥 𐴊𐴟𐴓𐴝𐴤𐴌𐴠 𐴀𐴞𐴥𐴃𐴝𐴌𐴝𐴌 𐴇𐴝𐴣𐴏𐴡𐴥𐴃𐴧𐴟 𐴓𐴡𐴘𐴉𐴠𐴥𐴓𐴝 𐴎𐴝𐴘𐴁𐴡, 𐴇𐴠𐴥𐴣𐴃𐴧𐴠 𐴀𐴞𐴥𐴃𐴝𐴌𐴝 𐴌𐴟𐴎𐴝 𐴌𐴝𐴑𐴞𐴥𐴁𐴡.

¹⁶”𐴇𐴡𐴕𐴡𐴤𐴑𐴞𐴘𐴠 𐴃𐴡 𐴉𐴟𐴌𐴝𐴕 𐴉𐴟𐴐𐴝𐴥𐴑𐴡𐴃𐴢 𐴕𐴡𐴘𐴝 𐴇𐴡𐴦𐴌 𐴃𐴝𐴓𐴞 𐴊𐴠𐴊𐴠 𐴕𐴝𐴥𐴘; 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴇𐴠𐴥 𐴉𐴟𐴐𐴝𐴥𐴑𐴡𐴃𐴧𐴟 𐴃𐴝𐴓𐴞 𐴒𐴝𐴥𐴕 𐴎𐴡𐴥𐴌𐴞𐴎𐴝𐴘𐴁𐴡𐴘, 𐴀𐴝𐴦𐴌 𐴉𐴝𐴥𐴍𐴝 𐴇𐴞𐴥𐴘𐴝𐴕 𐴀𐴝𐴌𐴡𐴤 𐴋𐴡𐴣𐴀𐴌 𐴀𐴡𐴥𐴘𐴎𐴝𐴘𐴁𐴡𐴘.¹⁷𐴇𐴠𐴥𐴕𐴊𐴞𐴓𐴧𐴝, 𐴇𐴡𐴕𐴡𐴤𐴑𐴞𐴘𐴠 𐴕𐴡𐴘𐴝 𐴀𐴝𐴚𐴒𐴟𐴌𐴡𐴌 𐴌𐴡𐴐𐴡𐴌𐴠 𐴉𐴟𐴌𐴝𐴕 𐴏𐴝𐴔𐴝𐴌𐴝𐴌 𐴇𐴡𐴥𐴙𐴓𐴧𐴝𐴃𐴢 𐴌𐴝𐴑𐴠𐴥 𐴊𐴠 𐴕𐴝𐴥𐴘; 𐴎𐴡𐴊𐴞 𐴌𐴝𐴑𐴞𐴥𐴓𐴠 𐴃𐴡 𐴇𐴡𐴥𐴙𐴓𐴧𐴝 𐴒𐴟𐴥𐴕 𐴉𐴝𐴥𐴍𐴞 𐴌𐴡𐴐𐴧𐴟𐴥𐴕 𐴒𐴡𐴓𐴞𐴎𐴝𐴘𐴁𐴡𐴥𐴘, 𐴀𐴝𐴦𐴌 𐴇𐴡𐴥𐴙𐴓𐴧𐴝 𐴒𐴟𐴥𐴕 𐴀𐴡𐴥 𐴁𐴡𐴌𐴁𐴝𐴊𐴢 𐴎𐴝𐴘𐴁𐴡𐴘. 𐴇𐴠𐴥𐴃𐴡𐴓𐴧𐴝, 𐴕𐴡𐴘𐴝 𐴀𐴝𐴚𐴒𐴟𐴌𐴡𐴌 𐴌𐴡𐴐𐴡𐴌𐴠 𐴕𐴡𐴘𐴝 𐴏𐴝𐴔𐴝𐴌𐴝𐴌 𐴇𐴡𐴥𐴙𐴓𐴧𐴝𐴃𐴢 𐴌𐴝𐴑𐴠𐴥 𐴊𐴠, 𐴃𐴡𐴥𐴘 𐴊𐴟𐴕𐴞𐴥 𐴒𐴟𐴥𐴕 𐴈𐴠𐴥𐴉𐴝𐴎𐴡𐴃𐴢 𐴃𐴝𐴥𐴑𐴠.“

𐴏𐴡𐴥𐴊𐴧𐴝𐴌𐴡𐴌 𐴎𐴠𐴥𐴌𐴉𐴟𐴖𐴝 𐴀𐴠𐴊𐴧𐴠 𐴀𐴞𐴏𐴝𐴤𐴌 𐴇𐴡𐴦𐴌 𐴏𐴟𐴥𐴘𐴧𐴠 𐴊𐴠 𐴔𐴝𐴘𐴝𐴉𐴟𐴖𐴝

¹⁸𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴇𐴞𐴥𐴀𐴕 𐴈𐴡𐴀𐴌 𐴊𐴠 𐴀𐴡𐴑𐴃𐴡𐴥𐴃𐴢, 𐴔𐴟𐴅𐴞𐴓𐴞𐴥𐴐𐴢-𐴈𐴝𐴥𐴕𐴝𐴌 𐴀𐴠𐴥𐴎𐴧𐴡𐴕 𐴏𐴡𐴥𐴊𐴧𐴝𐴌 𐴀𐴝𐴀𐴘𐴢 𐴀𐴞𐴥𐴁𐴝𐴌𐴠 𐴏𐴡𐴥𐴘𐴊𐴝 𐴒𐴡𐴌𐴞𐴥 𐴈𐴡𐴀𐴌 𐴊𐴠, ”𐴀𐴝𐴣𐴀𐴌 𐴎𐴠𐴥𐴌𐴉𐴟𐴖𐴝 𐴖𐴝 𐴀𐴠𐴇𐴡𐴥𐴕-𐴀𐴠𐴇𐴡𐴥𐴕 𐴔𐴡𐴌𐴞𐴒𐴞𐴘𐴡𐴥𐴘. 𐴔𐴡𐴕𐴃𐴡𐴌 𐴃𐴟𐴀𐴛 𐴀𐴝𐴀𐴘𐴢 𐴇𐴞𐴥𐴁𐴝𐴌 𐴖𐴡𐴌𐴠 𐴀𐴝𐴥𐴃𐴢 𐴊𐴡𐴦𐴒𐴝𐴥𐴘, 𐴃𐴡𐴥𐴘 𐴇𐴞𐴥𐴁𐴝 𐴎𐴞𐴕𐴊𐴝 𐴀𐴡𐴥𐴘𐴎𐴝𐴘𐴁𐴡𐴘.“¹⁹𐴇𐴠𐴥𐴃𐴟𐴕𐴡𐴃𐴢 𐴀𐴞𐴏𐴝𐴤 𐴀𐴟𐴍𐴞𐴤 𐴘𐴡𐴥𐴒𐴧𐴗𐴝𐴌 𐴉𐴟𐴥𐴖𐴝𐴣𐴃𐴞 𐴎𐴝𐴦𐴃𐴢 𐴊𐴡𐴙𐴅𐴧𐴠, 𐴉𐴟𐴥𐴖𐴝𐴣𐴃𐴞 𐴀𐴞𐴥𐴁𐴝𐴌 𐴀𐴟𐴔𐴧𐴡𐴃𐴢 𐴀𐴡𐴥𐴑𐴧𐴡𐴓𐴢 𐴀𐴡𐴥 𐴒𐴞𐴦𐴘𐴠𐴥.

²⁰𐴎𐴝𐴘𐴃𐴠-𐴎𐴝𐴘𐴃𐴠 𐴀𐴠𐴒𐴧𐴗𐴝𐴤 𐴁𐴝𐴌𐴡𐴥 𐴁𐴡𐴏𐴡𐴥𐴌 𐴉𐴡𐴙𐴅𐴧𐴡𐴕𐴃𐴡 𐴑𐴟𐴥𐴕𐴎𐴝𐴌𐴞 𐴎𐴝𐴥𐴌 𐴊𐴠 𐴔𐴝𐴘𐴝𐴉𐴟𐴖𐴝 𐴀𐴞𐴏𐴝𐴤𐴌 𐴉𐴞𐴏𐴡𐴥𐴃𐴧𐴟 𐴀𐴝𐴀𐴘𐴢 𐴀𐴞𐴥𐴁𐴝𐴌 𐴇𐴡𐴦𐴌𐴡𐴌 𐴇𐴝𐴣𐴌𐴝 𐴏𐴟𐴥𐴘𐴧𐴠.²¹𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴇𐴞𐴥𐴁𐴝𐴘𐴠 𐴁𐴝𐴥𐴙𐴂𐴧𐴞𐴓𐴢 𐴊𐴠, ”𐴎𐴡𐴊𐴞 𐴀𐴝𐴀𐴛 𐴏𐴞𐴌𐴞𐴥𐴉𐴢 𐴀𐴞𐴥𐴁𐴝𐴌 𐴇𐴡𐴦𐴌 𐴏𐴟𐴥𐴘, 𐴀𐴝𐴀𐴛 𐴒𐴡𐴔 𐴀𐴡𐴥𐴘𐴎𐴝𐴘𐴧𐴟𐴔𐴁𐴡𐴘.“

²²𐴀𐴞𐴏𐴝𐴤𐴘𐴠 𐴉𐴞𐴥𐴌𐴞 𐴇𐴞𐴥𐴁𐴝𐴌𐴠 𐴊𐴠𐴑𐴞𐴥 𐴈𐴡𐴀𐴌 𐴊𐴠, ”𐴀𐴡𐴥 𐴎𐴞𐴥𐴀, 𐴇𐴞𐴥𐴔𐴧𐴡𐴃𐴢 𐴒𐴡𐴌! 𐴃𐴡𐴌 𐴀𐴞𐴔𐴝𐴕𐴠 𐴃𐴡𐴌𐴠𐴥 𐴒𐴡𐴔 𐴒𐴡𐴙𐴅𐴧𐴠𐴥.“𐴃𐴡𐴥𐴘 𐴀𐴠𐴥𐴇𐴡𐴕𐴡𐴌 𐴁𐴟𐴥𐴃𐴡𐴌𐴠 𐴔𐴝𐴘𐴝𐴉𐴟𐴖𐴝 𐴖𐴝 𐴒𐴡𐴔 𐴀𐴡𐴥𐴘𐴒𐴞𐴘𐴡𐴘.

²³𐴀𐴞𐴏𐴝𐴤 𐴎𐴠𐴣𐴃𐴧𐴠𐴥 𐴏𐴡𐴥𐴊𐴧𐴝𐴌 𐴒𐴗𐴝𐴌 𐴒𐴡𐴥𐴌𐴡𐴃𐴢 𐴀𐴝𐴀𐴘𐴢 𐴁𐴝𐴐𐴞𐴤-𐴁𐴝𐴎𐴡𐴘𐴝 𐴀𐴡𐴥𐴑𐴧𐴡𐴓𐴡𐴌𐴠 𐴀𐴠𐴊𐴧𐴠 𐴔𐴝𐴙𐴕𐴐𐴡𐴥𐴌 𐴇𐴡𐴓𐴇𐴡𐴓𐴝𐴕𐴞 𐴊𐴠𐴙𐴑𐴧𐴠𐴥,²⁴𐴀𐴞𐴥𐴁𐴝𐴘𐴠 𐴈𐴡𐴀𐴌 𐴊𐴠, ”𐴃𐴟𐴣𐴀𐴝𐴥𐴌𐴝 𐴕𐴠𐴦𐴓𐴡𐴒𐴡𐴥𐴘. 𐴎𐴠𐴥𐴌𐴉𐴟𐴖𐴝 𐴔𐴡𐴌𐴞𐴒𐴞𐴘𐴡𐴥𐴘 𐴊𐴠 𐴕𐴡, 𐴁𐴡𐴥𐴓𐴑𐴠 𐴒𐴟𐴥𐴔 𐴎𐴝𐴌 𐴊𐴠.“𐴇𐴠𐴥𐴃𐴟𐴕𐴡𐴃𐴢 𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌𐴠 𐴓𐴡𐴥𐴘 𐴀𐴝𐴥𐴣𐴐𐴝𐴃𐴢 𐴊𐴡𐴙𐴅𐴧𐴠.²⁵𐴔𐴡𐴕𐴃𐴡𐴌 𐴔𐴝𐴕𐴟𐴥𐴙𐴐𐴧𐴟𐴥𐴕𐴡𐴌𐴠 𐴁𐴝𐴀𐴌𐴠 𐴕𐴠𐴦𐴓𐴝𐴘 𐴊𐴞𐴉𐴠𐴥𐴓𐴝𐴘 𐴁𐴝𐴦𐴊𐴠, 𐴀𐴞𐴥𐴁𐴝 𐴁𐴟𐴥𐴃𐴡𐴌𐴠 𐴒𐴡𐴥𐴓𐴞 𐴎𐴠𐴥𐴌𐴉𐴟𐴖𐴝 𐴖𐴝𐴌 𐴀𐴝𐴥𐴃𐴢 𐴊𐴡𐴥𐴙𐴅𐴧𐴠, 𐴃𐴡𐴥𐴘 𐴇𐴞𐴥𐴁𐴝 𐴀𐴟𐴍𐴞𐴤𐴒𐴞𐴘𐴡𐴘.²⁶𐴇𐴠𐴥 𐴈𐴡𐴥𐴁𐴡𐴌 𐴇𐴞𐴥𐴘𐴝𐴕 𐴇𐴠𐴥 𐴀𐴠𐴓𐴝𐴑𐴝𐴌 𐴀𐴝𐴒𐴝𐴒𐴟𐴌𐴝𐴃𐴢 𐴉𐴡𐴥𐴓𐴞𐴒𐴞𐴘𐴡𐴘.

𐴊𐴟𐴘 𐴎𐴡𐴕 𐴀𐴝𐴣𐴊𐴝𐴤𐴌𐴠 𐴒𐴡𐴔 𐴒𐴡𐴙𐴅𐴧𐴠𐴥

²⁷𐴀𐴞𐴏𐴝𐴤 𐴇𐴞𐴥𐴘𐴝𐴕𐴃𐴟 𐴎𐴝𐴦𐴌𐴒𐴡𐴥𐴘 𐴊𐴠 𐴀𐴡𐴑𐴃𐴡𐴥𐴃𐴢, 𐴊𐴟𐴘 𐴎𐴡𐴕 𐴀𐴝𐴣𐴊𐴝𐴤 𐴔𐴝𐴕𐴟𐴥𐴙𐴐𐴢 𐴀𐴞𐴥𐴁𐴝𐴌 𐴉𐴞𐴏𐴝𐴥 𐴊𐴡𐴙𐴅𐴧𐴠. 𐴀𐴞𐴥𐴃𐴝𐴌𐴝 𐴋𐴝𐴑 𐴔𐴝𐴌𐴞-𐴔𐴝𐴌𐴞 𐴈𐴡𐴀𐴌 𐴊𐴠, ”𐴀𐴡𐴥 𐴊𐴝𐴖𐴟𐴊𐴡𐴌 𐴉𐴟𐴖𐴝, 𐴀𐴝𐴣𐴀𐴌𐴝𐴌 𐴖𐴡𐴌𐴠 𐴌𐴝𐴇𐴝𐴥𐴔 𐴒𐴡𐴌𐴡𐴤!“

²⁸𐴎𐴠𐴣𐴃𐴧𐴠𐴥 𐴀𐴞𐴏𐴝𐴤 𐴒𐴡𐴥𐴌𐴡𐴃𐴢 𐴒𐴡𐴥𐴙𐴓𐴧𐴠, 𐴀𐴝𐴣𐴊𐴝𐴤 𐴔𐴝𐴕𐴟𐴥𐴙𐴐𐴧𐴟𐴥𐴕 𐴀𐴞𐴥𐴁𐴝𐴌 𐴇𐴠𐴥𐴍𐴠 𐴀𐴝𐴙𐴐𐴧𐴠𐴥. 𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴃𐴧𐴟 𐴉𐴟𐴏𐴝𐴥𐴌 𐴒𐴡𐴌𐴠𐴥𐴌 𐴊𐴠, ”𐴀𐴝𐴀𐴛 𐴘𐴝𐴀𐴕 𐴒𐴡𐴌𐴞𐴥 𐴉𐴝𐴙𐴅𐴧𐴟𐴔 𐴊𐴠 𐴃𐴟𐴣𐴀𐴝𐴥𐴌𐴝 𐴁𐴞𐴐𐴧𐴝𐴥𐴐𐴢 𐴒𐴡𐴌𐴡𐴤 𐴕𐴠؟“
𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌𐴠 𐴎𐴟𐴖𐴝𐴁𐴢 𐴊𐴠𐴌 𐴊𐴠, ”𐴅𐴞𐴦 𐴔𐴝𐴓𐴞𐴑, 𐴒𐴡𐴌𐴞𐴥.“

²⁹𐴃𐴡𐴥𐴘 𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌 𐴏𐴟𐴑 𐴊𐴡𐴥𐴌𐴞 𐴈𐴡𐴀𐴌 𐴊𐴠, ”𐴃𐴟𐴣𐴀𐴝𐴥𐴌𐴝𐴌 𐴀𐴞𐴔𐴝𐴕 𐴔𐴡𐴎𐴞𐴕 𐴇𐴞𐴥𐴘𐴝𐴕 𐴃𐴟𐴣𐴀𐴝𐴥𐴌𐴝𐴓𐴧𐴝 𐴀𐴡𐴥𐴑.“³⁰𐴇𐴠𐴥𐴃𐴟𐴕𐴡𐴃𐴢 𐴀𐴞𐴥𐴃𐴝𐴌𐴝𐴌 𐴏𐴟𐴑 𐴑𐴟𐴥𐴓𐴞𐴒𐴞𐴘𐴡𐴘. 𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴀𐴠𐴀𐴕 𐴈𐴡𐴀𐴘𐴢 𐴊𐴡𐴌𐴡𐴤𐴒𐴡𐴌𐴞 𐴔𐴝𐴕𐴝𐴥 𐴒𐴡𐴙𐴅𐴧𐴞𐴥𐴓𐴢, ”𐴏𐴝𐴘𐴧𐴡𐴥, 𐴘𐴝𐴀𐴕𐴡𐴌 𐴁𐴝𐴦𐴁𐴟𐴃𐴠 𐴇𐴡𐴕𐴡𐴤𐴑𐴞𐴘𐴠 𐴕𐴡 𐴎𐴝𐴕𐴠 𐴉𐴝𐴥𐴕.“³¹𐴔𐴡𐴕𐴃𐴡𐴌 𐴀𐴞𐴥𐴃𐴝𐴌𐴝 𐴎𐴝𐴘 𐴇𐴠𐴥 𐴀𐴠𐴓𐴝𐴑𐴝𐴌 𐴀𐴝𐴒𐴝𐴒𐴟𐴌𐴝𐴃𐴢 𐴀𐴞𐴥𐴁𐴝𐴌 𐴁𐴝𐴦𐴁𐴟𐴃𐴠 𐴈𐴡𐴥𐴁𐴡𐴌 𐴉𐴡𐴥𐴓𐴝𐴘𐴊𐴞𐴘𐴠.

𐴀𐴠𐴎𐴧𐴡𐴕 𐴁𐴟𐴑 𐴔𐴝𐴕𐴟𐴥𐴙𐴐𐴡𐴌𐴠 𐴒𐴡𐴔 𐴒𐴡𐴙𐴅𐴧𐴠𐴥

³²𐴀𐴞𐴥𐴃𐴝𐴌𐴝 𐴁𐴝𐴀𐴌𐴠 𐴎𐴝𐴦𐴌𐴒𐴡𐴥𐴘 𐴊𐴠 𐴀𐴡𐴑𐴃𐴡𐴥𐴃𐴢, 𐴑𐴠𐴏𐴧𐴟𐴥 𐴔𐴝𐴙𐴕𐴐𐴠𐴥 𐴀𐴞𐴏𐴝𐴤𐴌 𐴇𐴝𐴣𐴏𐴠 𐴀𐴠𐴎𐴧𐴡𐴕 𐴁𐴟𐴥𐴃𐴠-𐴉𐴝𐴘𐴧𐴝 𐴁𐴟𐴑 𐴔𐴝𐴕𐴟𐴥𐴙𐴐𐴢 𐴀𐴝𐴙𐴕𐴧𐴠𐴤.³³𐴀𐴞𐴏𐴝𐴤𐴘𐴠 𐴁𐴟𐴥𐴃𐴧𐴗𐴝 𐴊𐴝𐴥𐴉𐴝𐴘𐴧𐴠 𐴌𐴝𐴥𐴌, 𐴇𐴠𐴥 𐴁𐴟𐴑 𐴔𐴝𐴕𐴟𐴥𐴙𐴐𐴧𐴗𐴝 𐴔𐴝𐴃𐴞 𐴉𐴝𐴙𐴅𐴧𐴠𐴥. 𐴇𐴞𐴥𐴘𐴝𐴕𐴠 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴢 𐴃𐴝𐴦𐴅𐴟𐴂𐴢 𐴀𐴡𐴥𐴘𐴒𐴞𐴘𐴡𐴘, 𐴀𐴝𐴦𐴌 𐴈𐴡𐴀𐴌 𐴊𐴠, ”𐴀𐴠𐴕𐴊𐴞𐴓𐴧𐴝 𐴃𐴡 𐴀𐴞𐴏𐴌𐴝𐴥𐴙𐴓𐴡𐴌 𐴁𐴟𐴥𐴃𐴡𐴌𐴠 𐴇𐴡𐴕𐴡𐴤𐴊𐴞𐴕 𐴊𐴝𐴈𐴝𐴤 𐴒𐴞𐴥𐴘𐴠 𐴊𐴠 𐴕𐴝𐴥𐴘.“

³⁴𐴔𐴡𐴕𐴃𐴡𐴌 𐴉𐴠𐴥𐴌𐴡𐴐𐴞 𐴀𐴡𐴥𐴑𐴧𐴡𐴓𐴠 𐴈𐴡𐴀𐴌 𐴊𐴠, ”𐴀𐴞𐴁𐴝𐴤𐴘𐴠 𐴁𐴟𐴥𐴃𐴢 𐴀𐴡𐴥𐴑𐴧𐴡𐴓𐴢 𐴊𐴝𐴥𐴉𐴝 𐴊𐴠 𐴁𐴟𐴥𐴃𐴢 𐴀𐴡𐴥𐴑𐴧𐴡𐴓𐴡𐴌 𐴏𐴡𐴥𐴊𐴧𐴝𐴌𐴡𐴌 𐴃𐴝𐴦𐴑𐴡𐴃𐴠.“

𐴀𐴞𐴏𐴝𐴤𐴌 𐴉𐴠𐴄𐴉𐴟𐴌𐴝𐴕𐴞

³⁵𐴀𐴞𐴏𐴝𐴤 𐴉𐴡𐴃𐴧𐴞𐴥 𐴐𐴡𐴥𐴀𐴌𐴠-𐴐𐴡𐴥𐴀𐴌𐴠 𐴀𐴠𐴊𐴧𐴠 𐴉𐴝𐴌𐴝-𐴉𐴝𐴌𐴝 𐴎𐴝𐴘 𐴘𐴡𐴇𐴟𐴥𐴊𐴞𐴌 𐴔𐴟𐴅𐴞𐴓𐴞𐴥𐴐𐴢-𐴈𐴝𐴥𐴕𐴝 𐴀𐴡𐴥𐴑𐴧𐴡𐴓𐴡𐴃𐴢 𐴃𐴝𐴦𐴓𐴞𐴔 𐴊𐴞𐴘𐴝𐴃𐴢, 𐴀𐴝𐴏𐴔𐴝𐴕𐴞 𐴌𐴝𐴙𐴅𐴧𐴡𐴌 𐴑𐴟𐴥𐴐𐴈𐴡𐴥𐴁𐴡𐴌 𐴃𐴡𐴁𐴡𐴓𐴞𐴑 𐴒𐴡𐴌𐴝𐴥𐴃𐴢, 𐴀𐴠𐴊𐴧𐴠 𐴉𐴡𐴃𐴧𐴞𐴥 𐴑𐴞𐴏𐴞𐴥𐴔𐴡𐴌 𐴁𐴞𐴘𐴝𐴌𐴝𐴔 𐴀𐴠𐴊𐴧𐴠 𐴉𐴡𐴃𐴧𐴞𐴥 𐴑𐴞𐴏𐴞𐴥𐴔𐴡𐴌 𐴀𐴡𐴐𐴟𐴥𐴑 𐴀𐴡𐴥𐴑𐴧𐴡𐴓𐴢 𐴒𐴡𐴔 𐴒𐴡𐴌𐴝𐴥𐴃𐴢 𐴀𐴝𐴐𐴧𐴞𐴥𐴓𐴢.³⁶𐴔𐴝𐴕𐴟𐴥𐴙𐴐𐴡𐴌 𐴊𐴡𐴓𐴢 𐴊𐴠𐴑𐴞𐴥 𐴀𐴞𐴥𐴁𐴝𐴃𐴧𐴟 𐴉𐴠𐴄𐴉𐴟𐴙𐴅𐴧𐴞𐴥𐴓𐴢, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴃𐴝𐴌𐴝 𐴏𐴡𐴌𐴡𐴘𐴝 𐴏𐴝𐴥𐴌𐴝 𐴁𐴠𐴥𐴌𐴝𐴏𐴡𐴥𐴀𐴓𐴡𐴌 𐴋𐴡𐴥𐴙𐴓𐴧𐴝 𐴀𐴡𐴐𐴝𐴥𐴕𐴃𐴞𐴃𐴢 𐴀𐴠𐴊𐴧𐴠 𐴔𐴡𐴊𐴡𐴃𐴢 𐴏𐴝𐴥𐴌𐴝 𐴀𐴝𐴐𐴧𐴞𐴥𐴓𐴢.³⁷𐴇𐴠𐴥𐴃𐴟𐴕𐴡𐴃𐴢 𐴀𐴞𐴥𐴁𐴝𐴘𐴠 𐴕𐴞𐴎𐴡𐴌 𐴀𐴟𐴔𐴧𐴡𐴃𐴢 𐴀𐴡𐴥𐴑𐴧𐴡𐴓𐴡𐴌𐴠 𐴈𐴡𐴀𐴌 𐴊𐴠, ”𐴉𐴡𐴥𐴏𐴡𐴓𐴢 𐴊𐴠 𐴁𐴞𐴐𐴞𐴤 𐴀𐴝𐴏𐴠𐴤, 𐴔𐴡𐴕𐴃𐴡𐴌 𐴊𐴡𐴦𐴘𐴝 𐴁𐴞𐴐𐴞𐴤 𐴈𐴡𐴔.³⁸𐴇𐴠𐴥𐴃𐴡𐴓𐴧𐴝 𐴉𐴡𐴥𐴏𐴡𐴓𐴡𐴌 𐴔𐴝𐴓𐴞𐴑𐴡𐴌𐴠 𐴉𐴡𐴥𐴌𐴞𐴘𐴝𐴃𐴢 𐴒𐴡𐴌𐴡𐴤, 𐴀𐴞𐴥𐴁𐴝𐴌 𐴉𐴡𐴥𐴏𐴡𐴓𐴢 𐴊𐴝𐴘𐴃𐴡 𐴊𐴡𐴦𐴘𐴝 𐴀𐴡𐴥𐴑𐴧𐴡𐴓𐴢 𐴊𐴞𐴉𐴠𐴍𐴝𐴥𐴘 𐴁𐴡𐴓𐴧𐴝.“

The Word for the World International

https://app.library.bible/content/87faca8b51c22590