Joel3
1Naiawng rakowi nami ni hai nami khin khe dow Juda hai Jerusalem maru-uüa kowi alai kowh iawng ang natowah iawk kown.2Nakhowk khe dow akeng prenchakuüa maten kowi ang nakuaah kown, now tara chetra lawngrawi kowi ang nauang klala kown. Amatni dow ang kowh dawngthawnguan, ang maru Israeluüa kowi akeng pren kowi cham uetah khai, now ang kowh pren dow amatni taretah khai. Naiawng rakowi nami lawngrawi kowi dow amatni kowi ang nachet pe tara kown.3Amatni dow ang maru-uüa kowi nakala kownkow taretah khe kuak plang büah khai. Amatni dow nakala chawkkrawma kownkow Israel kachakuüa ngeuuüa kowi sumah büah khai, now naka khamla grep tui kownkow Israel masiuüa ngeuuüa kowi paw sumah büah khai.4Aw Sur, Sidawn hai Filistin marow riaret kowi kowh uowi mih maten, tawng chow nachang ang kownkow enni kamrüt? Enni sat ang klai kownkow enni kamrüt mih bow? Enni che sat ang klai khai hanow enni sat ang klai hown akrowksang enni luk kowi nauang kla kown. Nami dow enni chang ang iawng rowprowp enni luk kowi paw alenma ang nachang enni kown.5Ang kowh kuh hai tai enni pawta ang khai, now ang kowh asung lang khak mih uanh paw enni pawla hanow enni kowh thurai chup kim kowi enni kowtowah khai.6Juda hai Jerusalem maru-uüa kowi dow enni henta kownkow amatni pren hownia alakma mih Grisuüa pren kowi enni cham sumah khai.7Nachenganchepaw kawmat dow enni cham sumah mih arah hownia amatni kowi ang nauang pawla bowt kown; amatni kowi enni changah iawng enni luk kowi paw ang nachang enni bowt kown.8Enni kowh chauüa kowi dow Juda maru-uüa tut-e maru nacham sumah kown, now amatni kowi dow alakma mih Sabean chenchapuüa tut-e Juda maru-uüa nacham sumah kown. Mami laiklow dow CHAKRAMANG tekah mih chekhai.9Akeng prenchakuüa tut-e maiawng kowkrawi tek büa diah:“Dowk tasen kownkow kamrüt büa diah;akürma mih maru-uüa kowi uang hawla büa diah,now nadowk tasen kownkow tarü büa diah.10Enni kowh laithawn tim dow thawpla saidawng büa diah,now enni kowh tangchen dow thawpla reh büa diah.Kür uowi dowi miuüa kowi khowm sangah tasen büa diah.11Aw akeng prenchak maten,lawngrawi kowi alenma uang takua büa diah,” pape diah.Aw CHAKRAMANG, en kowh maru akürma mih kowi uang chin diah.12CHAKRAMANG tek mih,“Akeng prenchakuüa maten pacham uang lah;amatni dow Tara Chetra Lawngrawi kowi pakowkowi lah.Nakowi dow chenchapuüa maten kowi ang nachet pe tara kown.13Amatni kowh dow angak lainowmma hu khai;naiawng rakowi cha min khe kowh ngen cha iawng bowkbowk kowi ngenta büa diah,now grep uih thuara kowi atui towk pat thua grep uih iawng amatni kowi thuaah büa diah.Grep uih küara dow ue prang towbowt;tawngplawng kowchow panow amatni kowh dow angak lainowmma hu khai,” pakhai.14Tara Chetra Lawngrawi kowi maru kawm lai bowt kowbow!Nakowi dow CHAKRAMANG kowh tara chetra ni nauang towm kown chowbowt.15Sat hai lama dow naiu kown chowbowt,krek ün paw nanowi kown nadowi bowt.16CHAKRAMANG dow Zaiawn hungh hownia nahek kown;aia dow Jerusalem hownia atünma natek lai kown.Naiawng rakowi krawng hai mukuang mih nachür kown.Nachenganchepaw CHAKRAMANG mih aia maru-uüa vüi tatung tanimra naown kown,aia dow Israeluüa vüi akhawtma mih kangchawngra kim nachowng kown.17CHAKRAMANG tek mih,“Nami khin khe dow ang chowtaih enni kowh CHAKRAMANG Thurai pami enni natuk kown,now ang kowh hungh chimsaima mih Zaiawn kowi ang uowi reng pami enni natuk kown.Jerusalem marow dow nachim nasai bowt kown;asür alawkma mih prenchakuüa katpaw nauang nowng kown nadowi bowt.18“Nami ni khe dow hungh aiuk aiukma mih hownia grep tui sar ahuma naka kown,now hungh asowm asowmchow mih hownia dow iawn tui ahuma naka kown.Juda pren kowi kowh awchawng awlang maten hownia dow tui nahawr iawk kown;CHAKRAMANG chup kim hownia dow tui nauang lawt parah kown,now Sittim lawngrawi kowi nape kaah tui kown.19Nachenganchepaw Aigupta pren dow nachowng mawngchawng kuakra kown,now Edawm pren dow tapiak khowk mih süngrüp süngkangma iawng naown kown.Tawngplawng kowchow panow amatni dow Judauüa kowi changah anowng apowng khai;Juda pren kowi amatni dow aprek uowi dowi mih maru-uüa kowi krawi sai büah khai.20Nachenganchepaw Juda pren kowi dow maru nauowi reng kown,Jerusalem kowi paw chowngchowng saksakma maru nauowi kown.Ang krawi paw pe lu klai dowi tak miuüa vüi ang nakrawi paw pe lu klai kown;tawngplawng kowchow panow ang CHAKRAMANG mih Zaiawn hungh kowi ang maru-uüa hown nauowi reng kown,” pakhai.
The Seed Company