Genesis4
1आदम अपन मेहरारू हव्वा भीर गेलन, आउर ऊ गर्भवती होलन आउर उनकर एगो बेटा पईदा होल, आउर ऊ ओकर नाम कैन रखलन, जेकर माने पईदा कईलन, काहेकि ऊ कहलन, यहोवा के मदत से हम एगो बेटा पईली हे।2कुछ समय के बाद उनकर एगो आउर बेटा पईदा होल, आउर ओकर नाम हाबिल रखलन। लईकन से सियाना होला के बाद हाबिल भेड़-बकरियन के झुंड के चरावे लगलन आउर कैन किसान बन गेलन।3आउर एक दिन अईसन होल कि कैन अपन पईदा कईल कुछ अनाज यहोवा भीर भेंट ला लइलन,4आउर हाबिल अपन भेड़-बकरियन के झुंड में से कुछ पहिलका भेड़ी के बच्चा लेलन जे पईदा होल हल आउर ओकरा बलि कईलन आउर यहोवा के भेंट के रूप में निमन से निमन चरबीवाला भाग देलन। यहोवा हाबिल आउर उनकर भेंट से खुश होलन,5बाकि कैन आउर उनकर भेंट से खुश नऽ होलन। तऽ कैन बड़ी गोस्सा गेलन, आउर उनकर मन चिढ़िया गेल।6यहोवा कैन से कहलन तोरा गोस्साय के नऽ चाही! तोरा अईसे चिढ़ियाय के नऽ चाही।7जदि तूँ भलाई करबऽ, तऽ हम तोरा सकार करम। बाकि जदि तूँ ऊ नऽ करबऽ जे भलाई हे, तऽ जे बुराय तूँ करे ला चाहऽ हऽ ऊ तोरा खा जायेत जईसे शेर तोर दुआरी के बहारसी तोरा पर हमला करे ला राह ताकते हे। पाप करे के इच्छा तोरा वश में करे ला चाहऽ हे, बाकि तोरा एकरा वश में करे के चाही।8बाकि एक दिन कैन अपन छोटका भाई हाबिल से कहलन, हमरा जौरे खेत में चल। तऽ ऊ जौरे चल गेलन। आउर जखनी ऊ देहात में हलन तऽ कैन अपन भाई हाबिल पर चढ़ाई कर के उनका मार देलन। 9तऽ जबकि यहोवा जानऽ हलन कि कैन कौची कईलन हे, ऊ कैन से कहलन, "का तूँ जान हऽ कि तोर छोटका भाई हाबील कहाँ हथन?" कैन जबाब देलन, "नऽ हम नऽ जानऽ ही। हमर काम अपन छोटका भाई के रक्षा करे ला नऽ हे!"10यहोवा कहलन" तूँ जे कईलऽ हे ऊ डेरावना हे! तोर भाई के खून जमीन पर जमा होल हे, तोरा तोर पाप ला सजा देवे लागी चींचीयईते हे। 11तूँ अपन छोटका भाई के मार देलऽ हे, आउर जखनी धरती तोर छोटका भाई के खून सोख लेलक हे, येहिसे ओकरा दने से तूँ श्रापित हऽ तऽ तोरा ईहाँ रहे ला निमन नऽ होत, आउर ओकरा पर अनाज उपजावे के तोर कोशिश बेकार होत।12जखनी तूँ जमीन के खेती करेलागी जोतबऽ, तऽ आगे जमीन तोरा अपन तागत तोरा देत। “तूँ हमेशा धरती पर इधर उधर भटकल चलबऽ, आउर तोरा रहे लागी कोई जगह नऽ मिलत।”13कैन यहोवा से कहलन, कि तूँ हमरा सहन से बाहर सजा दे रहलऽ हे।14जे जमीन में हम जोतते अईली हे, ओकरा पर से तूँ हमरा निकाले वाला हऽ, आउर फिन हम तोरा सामने नऽ आ सकली हे। एकर अलावे, हम सबदिना लागी कोई जगह नऽ होवे के चलते हमेशा धरती पर घूमते रहम, आउर जे कोई हमरा देखतन ऊ हमरा मार देतन।15बाकि यहोवा उनका से कहलन, “नऽ अईसन नऽ होत। हम तोरा पर एगो चिन्हासी लगायेम, जेकरा से जे कोई तोरा देखतन उनका चितौनी देत, कि जदि ऊ तोरा मार देतन तऽ हम ओकरा कड़ा से कड़ा सजा देम। हम तोरा जेतना सजा दे रहली हे ओकरा से सात गुना जादे सजा देम।” तऽ यहोवा कैन लागी एगो चिन्हासी ठहरइलन।16तऽ कैन यहोवा के छोड़ के नोद नाम देश में रहे ला चल गेलन जेकर माने 'भटकल', हे जे अदन के पूरुब में हल। 17कुछ समय के बाद जखनी कैन अपन मेहरारू भी गेलन, तऽ ऊ गर्भवती होल आउर उनकर एगो बेटा जनम लेलक, आउर ऊ ओकर नाम हनोक रखलन। तऽ कैन एगो नगर बनावे ला शुरू कईलन, आउर ऊ नगर के नाम 'हनोक' रखलन, ओही नाम जे उनकर बेटा के हल।18हनोक बड़ा होलन आउर ऊ बियाह कईलन आउर एगो बेटा के बाप होलन जेकर नाम ऊ ईराद रखलन। जखनी ईराद बड़का होलन तऽ उनकर एगो बेटा के जनम होल जेकर नाम ऊ महूयाएल रखलन। महूयाएल बड़का होलन आउर उनकर एगो बेटा होल, जेकर नाम ऊ मतूशाएल रखलन। मतूशाएल बड़का होलन आउर लेमेक के पिता बनलन।19जखनी मेलेक बड़का होलन तऽ ऊ दूगो औरत से बियाह कईलन। एगो के नाम आदा आउर दोसरकी के नाम सिल्ला हल।20आदा याबाल नाम के एगो बेटा के जनम देलन। बाद में, याबाल तम्बूअन में वाला पहिलका अादमी बन गेलन काहेकि ऊ सभे जानवर के देख-रेख लागी एक जगह से दोसरा जगह चलते रहऽ हलन।21उनकर छोटका भाई के नाम युबाल हल। ऊ पहिलका अादमी हलन जे बीणा आउर बाँसुरी बनईलन हल।22मेलेक के दोसरकी मेहरारू सिल्ला एगो बेटा के जनम देलन, जेकर नाम ऊ तूबल-कैन रखलन। बाद में ऊ काँसा आउर लोहा के औजार बनावे ला सीखलन। तूबल-कैन के छोटकी बहिन के नाम नामा हल।23एक दिन मेलेक अपन दूनो मेहरारू से कहलन, "हमर दूनो मेहरारू आदा आउर सिल्ला, जे हम कहऽ रहली हे ओकरा गौर से सुनऽ। एगो लईका हमरा मारलन आउर हमरा जख्मी कर देलन, एहिगुने हम ओकरा मार देली।24यहोवा बड़ी पहिलहीं कहलन हल कि जे कोई कैन के मारतन ओकर बदला ऊ लेतन आउर ओकरा ओतने सजा देतन जेतना ऊ लेमेक के सजा देलन हल। एहिगुने कोई उनका मारे के कोशिश करऽ हे, तऽ ओकरा सतहत्तर गुना जादे सजा देबल जायेत।25आदम अपन मेहरारू हव्वा भीर गेलन आउर फिन ऊ पेट से रहलन आउर ओकर एगो आउर बेटा जनम लेलक, आउर ओकर नाम सेत रखलन। ऊ कहलन, “हम ओकर नाम शेत रखऽ ही, काहेकि परमेश्वर हाबिल के जगह पर हमरा एगो आउर संतान देलन हे, काहेकि कैन ओकरा मार देलक हल।”26जखनी शेत बड़का गो होलन, तऽ उनकर एगो बेटा जनम लेलक, जेकर नाम ऊ एनोश रखलन। ऊ समय के आस-भीर लोग यहोवा के उपासना करे लगलन।
Bridge Connectivity Solutions Pvt. Ltd.