Aganebo Kolidi3
1Ninihe sulu selesu ewemo, gilihe nini isolu inoloba bamesi gilifea hahanoba selesuale. Inolo noolohe fadaba bamesi sowi selelu dibia ano. Aulugulu, fadaba bamesi sowi selelu amogulu uleno, ninihe gilifea waleyobile? Me noolohe fadaba bamesi, gilifea sowi amogulu seleba homafasia, nini dibia maiyobile?2Aubale. Gine gilimo, nine sowi selelugulu nine libo usu seleba dobu. Idele inolo suniahe amo alegafia, fadaba eloba babiyobafe.3Nini dabalu mololu amo alefasia, gili asigi ule ufiyomo ami holobagalugulu, gilimo Kelisofeafia sowi selelu mulu amogulu labe. Sowi ewe seleba ofelesiamo, benene ibi seleba ufuluale. Aubale. Bebea miliyoluda labe Gode Ene Asubane seleba ufulu. Sowi ewe abane balelefea seleba ufuluale. Aubale. Idele inolo bebea labene libo usu ami, seleba ufulu dobu.4Sulu ewene maumo, ewe. Ninihe Godene si saabiamo, Yesu Kelisofea alefasia dabalu moloba lolu. Aulugulu, Godehe Ene dabalumo nafulusu holobagaba ofoloba hilisesia, nini kiwigaaba kalugaasu.5Seale koleba, dabalu amo, nine kiwihe mololuba saeyodoluale koleba. Enebamo, nine ninihe dabalu ewe moloyodolu amone ilililuale lolu. Aubale. Godehe nini dabalu ewe molomesine ililiba moloba ufulu.6Seale, Gode Ene alefasia ninimo, Ene oloba huliale dabalu hili amo isoba molomesi, ililiba moloba ufulu. Oloba huliale dabalu amakelelumo, sulu muguli amo seleba ufulu dobu. Auluso, hilimo, seleba ufuluale dobu. Aubale. Oloba huliale dabalu hili aga molofe ewemo, Asubane Ene dabalu. Sulu muguli seleba ufulu amohe, idele inolo dufa olalo. Auluso, Asubane Ehe, idele inolofea bebea melesi miliyolu melo.7Asigima. Godehe sulu muguli abanefea imini seleba ofasia, Mosesefea melu. Aufia, idele inolohe sulu muguli amo kuliba aasalenaga, sulu muguli amohe, ili amo olaeyone enofealo uluba dibia daalu. Godehe sulu muguli ami diba ofelesimo, Ene elalelu nokenedai dibia holobagalu. Ausi, Mosese ene olegida elalelu nokene koleba fofagesi, Isolaele idele inolo ilihe ene olegi si galiba babiyodoluale alolu. Aufia dufiamo, elalelu amo hamagi asigilelu.8Olaeyofealo uluba dibia ano sulu muguli amohe, elalelu amogulu holobagamesi moloba ufiyodolunaga, amo Asubanene dabalu amone elalelumo bule fofageyobafe. Amohe amakelumone elalelumo wasolu miliyobafe koleba.9Sulu muguli amone dabalumo idele inolo fadaasia hodobaiyo aloluso, Gode Ene elalelumo ami aso alolu. Aulugulu, asigima. Dabalu hili ewehe, idele inoloda isolu melesine eno uluba dibia aafe amo, ene elalelumo, bule bule wasolu koleba labe.10Godehe oloba huliale dabalu hili mololu ewe, elalelu bule bule koleba holobagalu amomo, dabalu amakele mololu amone elalelumo wasolu adesia, fofagelu koleba. Hilimo aga auba koleba fofagesi, amakelelumo asigilelu besabe.11Elalelumo Mosesene olegifea holobagalu amo asigilelugulu, sulu muguli amone dabalu amoda, asigilelo kegele. Auluso, Asubanene dabalumo asigilelale koleba. Asigima. Asigilelo kegele elalelu buledai holobagalunaga, asigilelale kegele amone elalelu bule bule koleba fofageba labe.12Aulugulu, ninihe elalelu auba fofageyobafeba hame diba ofogofia yasiba lolugulu, ninimo sagilisiale, ulufa kiwigaafia kalugaafia lolu.13Ninihe Mosese mololuguba mololale. Elalelu ene olegia ufulumo aso asigilebale labimo, Isolaele idele inolo ilihe asigilelo elalelu ewe asigilefeba bolosifia, ehe fagulo haisi no difasia, ene olegimo haguba ufulu.14Ausi, Isolaele idele inolo ine asigimo kaaba dafia alolu. Ausi, hilia amifia inigia agada, ilihe oloba huliale dabalu amakele mololu amone sulu alegasimo, fagulo hamagahe, sulu amone kiwi sisamo aso haguba ufiasu dobu. Fagulo ogo aso diba dafuluale dobu. Kelisofea asigi ule ofelesi, amisu diba dafiyobafe.15Seale, saminifia inigia, aga iwida, Mosesene sulu muguli selelu amo alegasimo, ine libomo fagulo haguba ufulugulu alolune, ilimo nafuluba babiyale adefe.16Auluso, idele inolo abehe Saminilofea nolofia besisimo, ine libofea fagulo haguba dobumo diba dafolo.17Nahe lagi Saminiloba selesenaga, amo na Asubaneba amone iminiba selesu. Enebamo, Saminilone Asubanemo inolo ulenofea adesenaga, amo kegele ulenohe inolo amo haguba ufuluale dobu. Aubale. Inolo amo beega labe.18Aulugulu, nini sunia olegi haguba ufulumone fagulo amomo diba dafulu lolugulu, Saminilone elalelu ninifea miliyo saabimo, ninimo hewogulu adesia, elalelu amohe idele inolo noolofea neeba doweba labe. Elalelu kolelu amomo Saminilofeafia saabe. Elalelu amohe nini dedegeba ofolabasu ligia, ninimo Saminilone mimisililu melesi gadefalabia aafe. Saminilo E-mo Asubane labene, Ehe auba moloba labe.
Wycliffe Bible Translators, Inc.