Aganebo Kolidi2
1Aulugulu, gine libo saabia no higinilosiba hiliselugulu, na miyomo afolu.2Enebamo, nahe gine libo higinimesi molosunaga, na-da heneba ufiyo uleno male miliyobafe. Gili miliyobafe, amo seale, auluso, gine libo higinilu ligia, gili na heneba ufiyodoluale alebaiye.3Sowi na samini gilifea seleba mebailu ogo, mau ewe alefasia mebailu. Gili aso ne libo higiniba ufia labi, na mialeba hiliselu. Ne liboda heneba ofolo idele inolomo, gili koleba. Auluso, na mulubiaga, gilihe ne libo higiniba ofaiye. Auba aumesialene, na sowi amodale seleba mebailu. Sowi amo alegafasia, gili gine sese aleba ami, kegele isomesifia mebailu. Enebamo, na hilisebu, ne henelomone mauda, gine henelomone mauda, ule hamagane koleba.4Sowi ogo, na gilifea samini seleba mebailumo, ne libo usu bule keleba hilisefia, higiniba ligia, si hano wedinale daaba labi, selelu. Auluso, na gine libo ogo higinimesi seleluale. Aubale. Na sowi ogo selelumo, gilihe na gilidai bule koleba hamesebuba asigimesi, seleba mebailu.5Doma. Maugaba liboda higiniba ufulu inolo amo ehe, na-su higiniba ufuluale. Aubale. Ehe gili suniafeada wedino libo higiniba ufulu. Sulu wedinoba na iwi selesumo, muguba ofelesia selesu.6Gili aleba ami, inolo bule wedinalehe, efea mana solu amo, isobu.7Aufia, aga e-mo bule keleba hilisesia, ene asigi ule ufulumo afa anosi, gilihe wolu e mololu amo waagi hamalesia, efea kanuluba homale. Aufia, e uluba disia, ene libo aeaba homale.8Auba isofasiamo, gilihe hameselo manamo, efea saabia molomalesu.9Sowi samini na selelu ogomo, gilihe ne sulu amo sunia kuliba maiyobafebileba dedeba babiyone selelu.10Gilihe efea kanuluba ofelesia, ene wolumo hamasia heesia galisenaga, nada efea kanuluba ofelesia, wolu halagulu mololumo hamasia heesia galisu. Yesu Kelisone si saabia ligiamo, gili sagoba ofelesia, na auba molosu.11Enebamo, Sedenehe mana wolu mololabia anomo, nini asigiba dulugulu, ehe nini gegesiamo e kaamo adosine, ninihe no anogone wolumo hamasia heesia galisu.12Na Kelisone awalu sulu nafulu saeyone, Dolase dauno ami goasimo, Saminilohe na dabalu ewe molomesi eno sogoba ufulu.13Auluso, nelewo Daidasa ene misimo ami besabale baafia, na keleba hiliselu bule alolugulu, nahe Dolase idele inolofea hawiyoba saafia, Daidasa isaeyone Masedonia maiyone daalu.14Nini Godefea henelu buleba selesu. Maumo, Yesu Keliso kaamo alefasia, henesia ibaba diasilabia, saminiba aafe. Godehe ninida Yesudai auba henelabia kuliba milesi, uluba dibia aafe. Nini Yesu hiliseba asigiba lolumo alefasia, Ene kasine nine domala heeba ofologuba, ninida aafea ami, Ene kasineda hele sunia dedaleba yaafe. Godehe nini auba molomesi mololumone, nini Efea henesu.15Seale, idele inolo suniahe Kelisone kasine domesine, ninimo Godefea alefasia, Ene kasine nafulu lolu. Idele inolo afiyo alebaibu ilihe, kasine amo dobelesi, ili olalomone kasine dobelesia, olalofealo maiyobafe. Auluso, idele inolo gasiba dafelagoba obegeba diyo alebaibu ilihe, kasine amo dobelesi, miliyolumone kasine dobelesia, miliyolufealo maiyobafe. Dabalu amogulu moloyodolumo, abe ilililubi?17Inolo noolohe Godene sulu mana amofea mole huliane dibaiyesia, magede elegelo inolo amogulu adesia, Godene sulu mana walelabia siba labe. Auluso, ninimo aubale. Godehe nini dabalu ewe molomesi iminifia hilibailugulu, ninimo Yesu Kelisofea helegeba ligia, Godene si saabiamo, Ene sulu walesiamo, asigi aidaba ligiale walelo.
Wycliffe Bible Translators, Inc.