Chanlai Lawng5
1Chapa ow, ang tekah mih chanlaira lai sünta kaneu diah,prengia lai ang tek mih kowi pe ching diah.2Nahanow tawng mih chow na mih en natuk kown towbowt,now en nawr hownia tukra laiklow nalawt reng kown towbowt.3Chang iang mih masiuüa kowh laiklow dow kuai tui iawng adingma chekhai,iang chang mih masiuüa kowh laiklow dow sau lak-e khowm lang klai chekhai.4Nachenganchepaw naiawngün laiklow dow achur khe mih akhakma chekhai,naiawngün laiklow dow bürdawng saidawng iawng achukma chekhai.5Naiawng mih masiuüa dow kowngra prakowi atengma mang mih chekhai.Naiawng rakowi naiawng mih masiuüa dow kowngra prakowi napawla en kown.6Amatni dow singra tia prakowi namang kown mih tuak khowm hing tuak dowi chekhai,amatni dow amatni kowh tiama atawima pami tuk khowm hing tuk büah dowi chekhai.7Chapa ow, ang kowh laiklow sünta diah,ang tek en mih laiklow hangkow tamata diah.8Naiawng mih masiuüa hownia dow alakma uowiah diah,naiawng mih masiuüa kimplawt re-e khowm hang cham kowi diah.9En che cham kowi hanow en kowh ringkawra natama kown,now maru ngakuüa rut kowi en nalüa kowng kown.10Nahanow en kowh dawngthawnguan dow en tukah dowi miuüa nata powngta kown,en kowh kawm rak dow akeng mih maru-uüa rut kowi nacham ta powt kown towbowt.11En dow phangbek kowi mawk iowklowk se en nachawng kowng kown,en kowh buk hai nga dow piak rürü rakowi en nanguk runrun kown.12Nakhowk khe en natek kown mih, “Uh! Maiawng ang own mih ang chün lai dowi kowh lowmow,pring ang hawi ang mih laiklow kowi ang nüah klowkah dowi kowh lowmow.13Tüngsang ang miuüa kowh laiklow ang sünta dowi chekhai,tüngsang ang miuüa tek ang mih prakowi ang pe ching dowi chekhai.14Naiawng rakowi kawmat dow ang piak mih chowbowt lowmow,maru kawmuüa pur kowi ang ka rukrai mih chowbowt lowmow,” napa kown.15En matia masi tut-e kaah sakowmma hown uowiah reng diah,en matia kowh masi lowk iachow kowi phai sakrauah reng diah.16Akeng mih masiuüa hown kowh en cham kaah mih chah dow,en vüi tawngpaw mrawkra nauowi kown nadowi.17En kowh chauüa dow en malowkchow kowh pachowng lah,en chauüa dow hang pacham chowng iang chah lah.18Naiawng rakowi en chawngah mih masi hown apiawma uowi reng diah,piawra dow en chawngah mih masiuüa hown phai krawi cham rowt diah.19Sakraura hai klangiungra atekma mih en masi luk kowi sak-ih reng diah,aia dow aia kowh sakraura hown atungma pacham pe en sak-ihra reng lah.20Chapa ow, tawng rakowi chow akeng mih masiuüa kowi en cham sakrau?Tawngplawng kowchow maru masi hown en nacham taphua taiua kown?21Lusa maru kowh chowm krang uowi krang dow CHAKRAMANG tang mü reng,aia dow lusa maru kowh chowm krang uowi krang maten tuk bowk chekhai.22Maru ngakuüa dow amatni kowh lup ngak rakowi kla phih reng chekhai,maru ngakuüa dow amatni kowh angak leng kowi cham tasowk reng chekhai.23Amatni dow pringhawira ka dowi rakowi kowng reng chekhai,amatni dow buala lai rakowi tiama tawi kowi mang mih chekhai.
The Seed Company