Leviuüa17
1CHAKRAMANG tek pe Mosi mih,2“Mami ang kowh ana pek mih Arawn hai achapauüa hown Israeluüa maten kowi kowtek pe diah. En tek pe kown mih,3‘Chia chepaw, rua chepaw, ruapur chepaw — Israeluüa che ngen kown nau khai hanow taklowp taklangra te plawt re-e CHAKRAMANG kowi ap-ah now nangenah kown takla,’ pape diah. Naiawng chang dowi kowi amatni uowi rah te lak kowi chepaw, te uat kowi chepaw ngen hanow naiawng chang mih maru kowi dow sai maru sak mih aprek natang pe kown. Naiawng chang mih maru kowi dow aiamat chenchap hownia nabatta kown takla.5Israeluüa mih taklowp taklangra te hown alakma kowi cham ngen tawncher dowi bowt kowi CHAKRAMANG tut-e nauang pawla bowt kownkow mami ana ang pe enni mih chekhai. Amatni mih taklowp taklangra te plawt re-e uamowuüa tut-e nauang pawla hanow CHAKRAMANG hown taking tasangra nauowila kownkow taking tasangra uanap iawng nauang ap bowt kown takla.6Nami tawncher vi dow taklowp taklangra te plawt re-e kowh phuchuara kowi uamow nakrawi thetah kown takla, now nami tawncher sau kam nam hown dow CHAKRAMANG naawmrawmla kownkow phuchuara kowi natikah kown takla.7Kawmat hownia now CHAKRAMANG kaah sakowm dowi iawng uowi hai rua powm iawng mih arup kowi ngen pe tawncher hanow naphuchua büah kown nadowi bowt. Arup kowi phuchua mih dow chang iang mih chekhai. Mami rirow dow chowngchowng saksakma enni nachünah kown takla.8“CHAKRAMANG vüi tikah mih uanap chepaw, akeng mih uanap chepaw, enni nachang kown now taklowp taklangra te plawt re-e enni uang pawla kown takla. Akeng kowi che cham pawla hanow naiawng chang mih maru kowi dow aiamat chenchap hownia enni nabatta kown takla. Mami rirow dow enni Israeluüa hai enni tut-e kowh tawi uowi mih akeng chenchapuüa vüi katsang naown kown.10“Enni Israeluüa lah, enni tut-e kowh tawi uowi mih akeng chenchap lah cha vi mih maru che uowi khai hanow nami maru kowi ang namüah kown nadowi, now aia kowi dow aiamat chenchap hownia ang nabatta kown.11Buk nga kowh sing müa dow vi chekhai. Naiawng rakowi enni vüi angak lawt lük müa nachangla kownkow vi dow phuchuara kowi ang pe khük enni mih chekhai. Vi dow sing müa chekhai rakowi angak kowi ia sia sau chekhai.12Naiawng rakowi Israeluüa lah, Israeluüa tut-e kowh tawi uowi mih akeng chenchapuüa lah enni naiung cha vi kown nadowi.13“Israeluüa lah, Israeluüa tut-e kowh tawi uowi mih akeng chenchapuüa lah iung chaah mih asadua chap nachaah kownkow enni uang pawla chepaw enni nangenah kown takla, now avi dow enni nachüngta bowk hanow bawn hown enni naphumah kown takla.14Asak uowi mih chap maten sing mih dow vi hown chekhai. Naiawng rakowi nacha vi dowi kown mih hai cha vi mih maru kowi aiamat chenchap hownia nabatta kown mih Israeluüa kowi ang tek pe mih chekhai.15“Aiawnglowma kowng mih chepaw, kaurawng uaramchak makah kowh kowng mih chepaw, asadua kowng nga dow enni naiung cha kown nadowi. Cha mih maru dow nachuta tawnguat hanow nalu kown takla, now aia mih sat kup dowi mowr asür alawkma nauowi kown. Nami kung kowi dow aia mih sürlawkma naown kown nadowi bowt. Nachenganchepaw aia che chuta tawnguat dowi hai lu dowi hanow aia kowh angak sung mih aia naka ripra kown. Nami rirow dow enni Israeluüa hai enni tut-e kowh tawi uowi mih akeng chenchapuüa vüi katsang naown kown,” pakhai.
The Seed Company