Leviuüa18
1CHAKRAMANG tek pe Mosi mih, “Israeluüa kowi kowtek pe diah: Ang dow CHAKRAMANG enni kowh Thurai chekhai.3Naiawng rakowi enni uowila akat mih Aigupta pren kowi kowh maru-uüa chang iawng enni nachang kown nadowi, now ang napawla enni kown mih Kanan pren kowi kowh maru-uüa chang iawng paw enni nachang kown nadowi. Naiawngün maru-uüa kowh chowm krang uowi krang iawng enni nauowi kown nadowi.4Enni dow ang kowh ari aiang iawng chowtaih nauowi kown; ang pe enni mih ari arow chowtaih enni nachünah kaneu kown. Ang dow CHAKRAMANG enni kowh Thurai chekhai.5Ang kowh ari arow hai ari aiang chün mih dow naka singra kown. Ang dow CHAKRAMANG chekhai.6“Kowmatia hown pabuk panga chak miuüa hown enni nataphua taiua kown nadowi. Mami dow ang kowh ana pek chekhai.7“Enni pungmadawng kowi amia iawng mih paw kowmatia u hown nataphua taiua kown nadowi. Kowmatia u hown taphua taiua mih dow kowmatia pa kowi peah rukrai mih chekhai. Kowmatia u hown dow nataphua taiua kown nadowi.8“U-uai hown paw enni nataphua taiua kown nadowi. U-uai hown taphua taiua mih paw kowmatia pa kowi peah rukrai mih chekhai.9“Kowmatia tuamow sin hai tuamow tawng mih hown paw enni nataphua taiua kown nadowi. Pa-uai kowh chama chepaw, u-uai kowh chama chepaw, pakimsang dia mih chepaw, kim langma dia mih chepaw — tuamow hown dow enni nataphua taiua kown nadowi.10“Kowmatia chu-uüa hown paw enni nataphua taiua kown nadowi. Kowmatia chapa kowh chama chepaw, kowmatia chama kowh chama chepaw — kowmatia chu hown taphua taiua mih dow kowmatia kowi tape rukrai mih chekhai.11“U-uai kowh chama paw tuamow tawng chekhai rakowi u-uai kowh chama hown paw enni nataphua taiua kown nadowi.12“Kowmatia nawkaw hown paw enni nataphua taiua kown nadowi. Tawngplawng kowchow panow nawkaw dow kowmatia pa hown pabuk panga chak chekhai.13“Urammow hai pama hown paw enni nataphua taiua kown nadowi. Tawngplawng kowchow panow urammow hai pama dow kowmatia u hown pabuk panga chak chekhai.14“Kowmatia pahi pama masi hown paw enni nataphua taiua kown nadowi. Kowbüah dow kowmatia pama hai urammow chekhai.15“Kowmatia iaumow hown paw enni nataphua taiua kown nadowi. Aia dow kowmatia chapa kowh masi chekhai.16Kowmatia taimow masi hown chepaw, kowmatia naumow masi hown chepaw enni naia taphua taiua kown nadowi. Kowbüah hown taphua taiua mih dow kowmatia taimow hai kowmatia naumow kowi peah rukrai mih chekhai.17“Kowmatia phuaah iuaah khowk mih masiuüa kowh chama hown chepaw, achu — chama kowh chama, chapa kowh chama — hown chepaw enni nataphua taiua kown nadowi. Kowbüah dow en phua iuaah khowk mih masiuüa hown pabuk panga chak chekhai. Naiawngünuüa hown taphua taiua mih dow suiiai kaniaima mih lup chekhai.18“Kowmatia masi sing uowi reng tak khe kowmatia masi naumow hown enni natachawng kown nadowi.19“Now uisawng uowi khe kowh asür alawkma mih khin khe tawng iawng mih masiuüa hown paw enni nataphua taiua kown nadowi.20“Maru masi hown paw hang cham taphua taiua büa diah. Maru masi hown cham taphua taiua mih dow enni matia kowi enni sürlawkah mih chekhai.21“Now Molek pami arup kowi naphuchuala kownkow enni kowh chauüa kowi maih kowi enni naia nawmah kown nadowi. Naiawng enni chang mih dow ang kowh ming chimsaima mih enni piak ang mih chekhai. Ang dow CHAKRAMANG chekhai.22“Masiuüa hown taphua taiua khe kowh iawng kachakuüa lala enni nataphua taiua kown nadowi. Kachakuüa lala taphua taiua mih dow suiiai kaniaima mih lup chekhai.23“Masiuüa chepaw, kachakuüa chepaw — tawncher hown taphua taiua hanow enni naia tasür talawk kown nadowi. Tawncher hown taphua taiua mih dow suiiai kaniaima mih lup chekhai.24“Enni pur kowi kowh ang naprütah kown mih prenchakuüa dow naiawng mih lup ngak chap maten chang hai kowmatia kowi sürlawkah büah khai. Naiawng rakowi amatni kowh pren khowm padow tasür talawk khai bowt. Amatni kowi ang ripah mih hai amatni kowi pren nuata mih dow naiawng chang ngak büah rakowi chekhai. Naiawng rakowi enni dow naiawng mih lup ngak chang hai kowmatia kowi enni nasürlawkah kown nadowi.26Enni dow ang kowh ari arow hai ang kowh ari aiang nachün kown takla. Enni matia hai enni tut-e kowh tawi uowi mih akeng chenchapuüa dow naiawng mih suiiai kaniaima mih lup nachang kown nadowi.27“Enni kowuowiah kown mih pren kowi kowh hawt iawng uowi miuüa dow naiawng mih lup ngak maten chang rakowi amatni kowh pren sürlawkta nak khai.28Enni paw naiawng che pren kowi sürlawkah khai hanow hawt rik uowi mih chenchapuüa kowi iawng dow enni kowi paw pren nahükta enni kown.29“Naiawng suiiai kaniaima mih lup chang mih maru kowi dow aiamat chenchap hownia nabatta kown takla.30Enni nakowuowiah kown mih pren kowi enni kowting khe nakowi kowh hawt rik uowi mih chenchapuüa kowh suiiai kaniaima mih uowi krang enni natawi iua kown nadowi. Naiawng mih lup ngak chap maten hown enni matia kowi enni nasür nalawkah kown nadowi. Enni dow ang kowh ana pek enni nachün kown takla. Ang dow CHAKRAMANG enni kowh Thurai chekhai,” pakhai.
The Seed Company