Lai Ching12
1En kowh klanguüa chownglawng kowi thawp en miia kowi tukah reng diah.Tawngplawng kowchow panow en nalawngtang kown mih khin nauang ting kown.Nakhowk khe dow akawm akratma hown en nauowi kown,now en natek kown mih, “Lawngtang chowng kowi piawra uowi dowi lai le,” napa kown.2Nami khin khe dow sat, lama hai krek nowi ün klimthupma en nakhi kown,now uangchak uang kung kowi paw uangnim plan uowi mih en nakhi kown.3En towkala kow mih klowng nauak bowt kown,now kawmat kowh akürma mih kumlawng paw natakui bowt kown.En taila chakkham mih iüng paw a-echow towbowt nauowi kown,now en kowh mik paw achimma nakhi kown nadowi bowt.Naiawngün phaw dowi tak khe thawp en miia kowi tukla reng diah.4En kowh param paw tiama kowi kowh tünteu nata kown nadowi bowt,now masiuüa mi tung tün paw en nata kaneu kown nadowi bowt.Rau-e kowh uakling laiklow hown en nathowr bowt kown.Nachenganchepaw plung tün hai meng tün dow en tut-e nasa bowt kown.5Nami khin khe dow alowngma mih rah kowi cham mang kown mih en nakram kown,now en lu kowi kowh sam paw anumma nauowi kown nadowi bowt.Cham mang cham kat chepaw lainowmma en nakawm bowt kown,now en kowh naura hai prüara paw nauowi kown nadowi bowt.Nami kung kowi dow achowngma tadupra kuam kowi en namang bowt kown,now uowila uiting uangtak miuüa tiama kowi mang iualua natawi sa en kown.6Tai hown kowh leng tarai dowi rawn hai kuh hown kowh bia teu dowi rawn,now tui chawt kowi tuikawng teu dowi rawn hai tuikuam kowi tui towng müa leng tarai dowi rawnthawp en miia kowi tukah reng diah.7Bawn hown kowh thawpah mih en kowh buk dow bawn kowi naplan iawk kown,now Thurai pe en mih lümla dow Thurai tut-e naplan iawk kown.8Naiawng rakowi prengia pek mih tek mih,“Tawng chap paw auan uowi dowi chekhai,” pakhai.9Prengia pek mih dow aiamat mih chanlaima chekhai, now aia dow maru kowi paw chanlaira lawnguan tüngsangla khai. Aia dow chanlaira laiklow maten tuakah kaneu hai chaingah kaneu hanow arasang towah khai.10Aia dow lahawm takama mih laiklow krawi cham khai, now aia ruiah mih laiklow maten dow achangma hai anowmma chekhai.11Chanlaima mih maru kowh laiklow dow ruapur thing mih kowh müa iawng chekhai. Amatni kowh laiklow dow pe arau chepaw khowng a-i reng chekhai.12Chapa ow, kaneu diah. Ang kowh laiklow kowi phai pe ching diah. Tawngplawng kowchow panow cha dow rui reng chepaw chur dowi, now cha phat paw hu lai now kow uak reng chekhai.13Kawmat dow ang tek mih maten en tuk bowk khowk. Tawkche achur kowi ang tek kown mih dow maiawng: Thurai kowi ringkawma hown kramah diah, now aia kowh ana pek maten chün diah. Tawngplawng kowchow panow naiawng nachang kownkow Thurai thawp a-i mih chekhai.14Thurai dow lusa maru changah mih lup maten luk kowi nachet tara kown. Aia dow lup iung hai lup ngak luk kowi ün nachet tara kown, now kukpa changah mih lup luk kowi khowm padow nachet tara kown.
The Seed Company