2 Krungchakuüa33
1Mang Manase dow laipre ning khe chowm mang khai, now aia dow 55 ning mowr Jerusalem marow kowi chowmla mang khai.2Manase dow Israeluüa pur hownia kowh CHAKRAMANG prütta mih chenchapuüa iawng CHAKRAMANG mik kowi suiiai kaniaima mih lup tawi chang khai.3A-pa Hezekia krawi piakta khowk mih arah kroma mih kowi kowh chupiiara ün aia krawi plan chang khai iawk. Nami klen kowi aia dow Baal thuraiuüa vüi thawp phuchuara ün khai, now Asera limpu ün tawi thawp khai. Aia dow kuang dawng kowi kowh krek ün kowi chupiia khai.4“Jerusalem marow kowi ang nauowi kown” pahai CHAKRAMANG tekah mih CHAKRAMANG kowh nami kim kowi Manase dow akeng thuraiuüa vüi thawp phuchuara ün khai.5Aia dow kuang dawng kowi kowh krek maten kowi nachupiiala kownkow CHAKRAMANG kim kowi kowh viadawng pre buk mih kowi thawp phuchuara ün khai.6Aia dow Hinawm lawngrawi kowi aia kowh chapauüa kowi maih kowi nawmah hanow phuchuala arup khai. Now mantan chang miuüa, hawra mük miuüa, süngnam hai lümla ngak hown taklawp taiua miuüa tut-e aia dow cham paw prengia khai. Aia dow CHAKRAMANG mik kowi angakma mih lup chang hai CHAKRAMANG kowi towkah kunmarau khai.7Aia thawpah mih arup dow Thurai kim kowi aia towah khai. Nami kim lawnguan kowi David hai achapa Sawlawmawn kowi Thurai tek pe mih, “Jerusalem marow kowi kowh ang kowh kim kowi dow maru kawmuüa mih chowngchowng saksakma nauang chupiia ang kown. Nami marow dow Israel laipre chen hownia kowh ang lang kloah mih chekhai.8Mosi hownia kowh Israeluüa kowi ang peah mih ari aiang, ari arow hai ana maten che kaneuma amatni chün khai hanow amatni pipu-uüa kowi kowh ang peah mih pren hownia amatni kowi dow ang naprütah kown nadowi,” pakhai.9Nachenganchepaw Judauüa hai Jerusalem marowchakuüa kowi dow Manase pe changla angak khai. Amatni dow amatni pur hownia CHAKRAMANG prütta mih chenchapuüa lak-e lang chang angak khai.10CHAKRAMANG dow Manase hai aia maru-uüa kowi uang klangah khowk chowdiah. Nachenganchepaw amatni dow CHAKRAMANG kowh laiklow sünta pe dowi chekhai.11Naiawng rakowi CHAKRAMANG dow amatni kowi nauang senah kownkow Asuria pren mang kowh siphai aluchowuüa kowi uang pawla pe khai. Now nami siphai aluchowuüa dow Manase kowi khümah hanow rut kowi krua pe lawngha kua khai, now kri leng hown tawmla hanow Babulawn pren kowi pawla khai.12Kla phih khin khe Manase dow CHAKRAMANG aia kowh Thurai tut-e awr lü khowng khai, now aia dow aia pipu-uüa kowh Thurai pur kowi uang khamsum khamdaw khai.13Naiawng hai Manase dow CHAKRAMANG tut-e awr lü awr leng hanow CHAKRAMANG dow hawt sünta pe khai. Now Jerusalem marow hai aia kowh pren dow mang Manase kowi CHAKRAMANG plan peah khai iawk. Nami hownia bowt now Manase dow CHAKRAMANG chowtaih Thurai pami tuk khai bowt.14Nami kung kowi aia dow David marow uat kowi kowh tap mih alowngma plan thawpah hanow akhawtma changah khai. Aia dow lawngrawi kowi kowh Gihawn tuikuam hownia Dam Tapplawt mowr krawi plan thawpah khai, now Dam Tapplawt hownia Ofel hungh mowr krawi plan thawp khai. Aia dow Judauüa kowh tap uowi mih marow ün kowi siphai aluchowuüa kowi towah khai.15Now akeng thuraiuüa kowh arup aren ün dow CHAKRAMANG kim hownia aia cham kuakta khai. Nami klen kowi Jerusalem marow hai CHAKRAMANG kim uowi rah hungh kowi kowh aia thawpah mih phuchuara maten paw marow uat kowi aia cham kuakta khai.16Nami kung kowi aia dow CHAKRAMANG kowh phuchuara mih plan rawah khai iawk, now nami phuchuara luk kowi dow taking tasangra uanap hai tekla awmrawm lai mih uanap pawi chang pe khai. Aia dow CHAKRAMANG Israeluüa kowh Thurai kowi nachupiia kownkow Juda maru-uüa kowi peah ana khai.17Nakhowk khe paw maru kawmuüa dow arah kroma mih kowi kowh chupiiara kowi chang tawncher phuchua reng tak chekhai. Tawkche amatni chang mih nami phuchua dow CHAKRAMANG Thurai vüi chowtaih.18Manase kowh akeng mih lup lawnguan maten, Thurai tut-e kowh aia awr lü awr leng mih lawnguan hai CHAKRAMANG Israeluüa kowh Thurai ming hown risiuüa tek pe mih laiklow maten dow “Israel Manguüa Lawnguan” pami bowih kowi arui uowi bowk chekhai.19Now aia awr lü awr leng mih lawnguan, aia awr lü mih khin khe Thurai hawt sünta pe mih lawnguan, aia kowh angak maten hai CHAKRAMANG kaah sakowm dowi mih lup aia chang mih lawnguan maten dow Risiuüa Lawnguan pami bowih kowi arui uowi bowk chekhai. Nami klen kowi Thurai pur kowi aiamat khamsum khamdaw dowi rawn khe kowh arah kroma mih kowi kowh chupiiara aia thawpah mih lawnguan, Asera limpu hai aia thawpah mih arup lawnguan maten paw Risiuüa Lawnguan pami bowih kowi arui uowi bowk chekhai.20Akung kowi Manase dow kowng hanow aia kim kowi maru dupah khai. Now aia takcha kowi dow achapa Amawn mih ta chowm mang khai.21Juda pren kowi Amawn chowm mang mih dow 22 ning khe chekhai. Aia dow pre ning mowr Jerusalem marow kowi chowmla mang khai.22Amawn dow a-pa Manase iawng CHAKRAMANG mik kowi angakma mih lup tawi chang khai. A-pa Manase thawpah mih arup maten kowi Amawn dow chupiia khai, naiawngün arup kowi dow aia phuchua pe tawncher khai.23Tawkche aia dow a-pa Manase iawng CHAKRAMANG pur kowi khamsum dowi; aia dow chang angak rengreng chekhai.24Aia kowh maru iukuüa dow aia kowi nasaita kown sangkrang hanow aia kim kowi aia kowi dow saita khai.25Tawkche mang Amawn kowi sai miuüa maten kowi dow prenchakuüa mih saita bowk khai. Now aia takcha kowi dow achapa Josia kowi amatni ta pe chowmah mang khai.
The Seed Company