O MATIUS15
1Geena'a de, yamuluo naga o Farisio'a ma nyawa, de agama'a yodoto-doto'o, nage o Yerusalemo'a yo'aino o Yesusino. Ona yohano Una'a,2<<Idodoau ho ani ni-nii'i yapalene nanga balu ma hila-hila manga adata? Ho wa'utu yoodomo de manga giama ayaiho'ua ihila, imote'e nanga 'autoranga!>>3O Yesus wopaluhu, <<De idodoau ho ngini ma, nia palene ma Jou ma Dutu awi 'autoranga? Mangale ania nii'i nia baluhu ma hila-hila manga adata?4Hababu ma Jou wotemo, <Ni'i horomati, nia dea de nia eha,> de <Nagonau yo'ihilolai manga dea bolo manga eha, ona halingou yo'ihu'umu yo'iho-honenge.>5Ma ngini nii'i doto'o o nyawa: Na'o o nyawa yotemo manga baluhi'a, <O 'iau nage halingou to'ula 'ai dea de 'ai eha'a, geena tohihuba'au ma Jou'a,>6Ma nyawa goona 'ayo'ihoromatiwau manga baluhi'a. Hababu mangale nia dotumu manga autoranga ho, ngini nia ete-ete'e ma Jou awi pareta.7Ayo tengelu'u! Itiaio'au, hara de o nabi Yesaya ma hila awi demo, mangale ngini, geenalah:8<O nyawa-nyawa noona ipuji 'amanga ulu ma 'aio'a,Ma manga hininga'a yomatinga'a de de Ngoi.9O iwa ma faeda ipuji Ngoino,Hababu o 'iau yo'ihidoto'o o nyawa-nyawa'a,Yanii'i ato nyawa manga autoranga, de yotee bali geena to Ngoi 'ai 'autoranga.> >>10Geena'a de o Yesus, wo'iaho'o o nyawa-nyawa, de wotemo ona'a, <<Nio ihene la nima ma mangariti!11O 'iau nage iohama manga ulu'o, geena 'ai ma dadiwa o baradoha, duga o'iau nage ihupu manga uluha, geenala imadadi o baradoha.>>12Geena'a de o Yesus awi ni-nii'i yomahidutu Una'a, de yotemo, <<Ee Aba noma na'o bolo 'ouwa! O'iau 'aano ge noma ade-ade, manga hininga ayadaenua o Farisio'a ma nyawa-nyawa?>>13O Yesus wopaluhu, <<Nage o joro 'ai Deawa o horoga'a wotudu'u, geena aha yaapu'u hitigi ma ngutu-ngutu'u'u.14Uwa ni'i daali'a o Farisi ma nyawa'a. Hababu ona geena harage 'ao daera ma balu-baluhu yopilo-pilo'o; de na'o yopilo-pilo'o yoma 'atuda de yopilo-pilo'o, maraio'au goona yamididi yoota'a o guhu'u.>>15O Petrus wotemo, <<Aba guru, tanu nimihimangaratinou ma hi'atero geena!>>16O Yesus wopaluhu, <<O ho ngini ma 'ani ma mangaritiwahi?17Ania na'owa? O 'iau nage iohama nanga ulu'o, iuti nanga po'o'u, geena'a de aha pohidagioli?18Ma nage ihupu nanga uluha, geenala ipuda manga hiningade; Geenau ina hibaradoha o nyawa.19Hababu manga hiningade ipuda o dibanga iti-tiiha, ho idadi o nyawa yotooma, yohowono, itiyoma'apa'e'a, yotohi'i, yodadi o ha'ihi ma ngelu'u, de yo'ironga ma diiha.20Geenau moi-moi yo'ihibaradoha o nyawa, ma ge yoodomo de manga giama ayaiho'ua, geena 'a'o uwa.>>21Geena'a de o Yesus wamada ma dingii geena, de wotagi o Tirus de o Sidon ma bendara ma date-dateino.22Ma daera'a geena, o Kana'an ma nyawa momatengo, maino o Yesusino de mogaaho'o, <<ee Yesus o Dautu awi guti'u, tanu noidora! 'Ai ngoa'a o ngewe'a do'a midongohami'a o to'ata. De duru 'a amidohau'o'a.>>23Ao demo o ngale moi ma o Yesus awopaluhua. Geena'a de Awi ni-nii'i ya'ai'a de yogaaho'o yotemo, <<Aba guru, nomihulo'i'au ma ngewe'a gumuna motagi. Muna amuna di-digigorino nanga duduniha!>>24O Yesus wopaluhu, <<Ngoi ma Jou ma Dutu woihulo'o, 'ao Israel ma nyawa to'iduhunu, nage o nge'omo yangowu-ngowu'a.>>25Ma ngewe'a gumuna ma'aino de ma tilabu'u'u o Yesus awi biono'a, de motemo, <<Tuanga, tanu noiduhunu.>>26O Yesus wopaluhu, <<Ayadaenua o ngoa-ngoa'a manga inomo, de po'ula o'aho'a.>>27Ma ngewe'a gumuna mopaluhu, <<Itiai tuanga, duga ma 'aho geena yaodomo ma inomo 'a ma rue-rue nage iota'a ani ama'u'u.>>28Geena'a de o Yesus wotemo muna'a, <<Bilanga, ani ngonga'u 'ao guata! Pamada'au la idadi harage ani ga-gaaho'o!>> 'Ageena ena ma ngewe'a gumuna ami ngo'a itogumo'au.29O Yesus wamada ma dingii geena, de wotagi waboa o Galilea ma talaga ma uluno. Geena'a de Una wohawu o de'ude moi de wogogelu'u geena'a.30O nyawa manga lepe yo'iaha o Yesusino, yocuga-cuga, yopilo-pilo'o, yopa-paluga, yomou-mou, de manga lepehi o nyawa yopa-panya'e ma regu. Ona yo'inoa o Yesus awi biono'a, geena'a de Una wo'ihiai'i ma nyawa-nyawa goona.31Geena'a o nyawa yolepe-lepe duru yoheranga, wa'utu yo'ima'e yomou-mou yomaade-ade, yocuga-cuga yotogumu, yopa-paluga yomadagi, de yopilo-pilo'o yomahima'e. Geena'a de ona wipuji ma Jou ma Dutu'a nage, o Israelo'a ma nyawa wihuba-huba.32Geena'a de o Yesus wo'iaho'o awi ni-nii'i'a de wotemo, <<Ngoi duru to'idora o nyawa yolepe-lepe'a noona. O wange haangenou ona inii'i, de o oraha neena o iwau manga inomo. Ngoi ato ihigumadawa ona yolio de manga hawino'a, done o nge'omo ma goronano de yohalautu.>>33Geena'a de awi ni-nii'i yohano o Yesusi'a, <<Ma dingii neena 'ao ga'ulino o hoana yatinga'a, la done ia'a po'idama'e o inomo o nyawa manga lepe neena?>>34Ho o Yesus wohano ona'a, <<Muluo'a gena'anaga nia roti?>>
Ona yopaluhu, <<Tumudingo'a, de mia nao'o ile-leete'e muluo'a naga.>>35Geena'a de o Yesus wo'ihulo'o o nyawa yolepe-lepe yogogele o tona'u'u.36Una waehe o roti tumudiingi de o na'o geena, de Una wotemo amaowa'a ma Jou ma Dutude. Una wapela-pela'a ma roti de ma nao'o de Awi giama, de wo'ula awi ni-nii'i'a. Ona yo'ihi'ado'u o nyawa yolepe-lepe'a.37Ma nyawa moi-moi geena'a yoodomo hitigi yo'ipunuhu. Geena'a de awi ni-nii'i yalomu ma inomo ma holoi. Moi-moi o bokolo tumudingi yaoma-omanga.38Manga lepe yoodomo wa'utu geena 'ao nau-naulohi yaribuhu hoata, geena ayo'idoimuahi o nge-ngewe'a de o ngoa-ngoa'a.39Geena'a de o Yesus wo'ihulo'o ma nyawa-nyawa goona yolio. Una ma hirete wopalene o ngootilie de wotagi o Magadan ma daera'a.
Ona yopaluhu, <<Tumudingo'a, de mia nao'o ile-leete'e muluo'a naga.>>35Geena'a de o Yesus wo'ihulo'o o nyawa yolepe-lepe yogogele o tona'u'u.36Una waehe o roti tumudiingi de o na'o geena, de Una wotemo amaowa'a ma Jou ma Dutude. Una wapela-pela'a ma roti de ma nao'o de Awi giama, de wo'ula awi ni-nii'i'a. Ona yo'ihi'ado'u o nyawa yolepe-lepe'a.37Ma nyawa moi-moi geena'a yoodomo hitigi yo'ipunuhu. Geena'a de awi ni-nii'i yalomu ma inomo ma holoi. Moi-moi o bokolo tumudingi yaoma-omanga.38Manga lepe yoodomo wa'utu geena 'ao nau-naulohi yaribuhu hoata, geena ayo'idoimuahi o nge-ngewe'a de o ngoa-ngoa'a.39Geena'a de o Yesus wo'ihulo'o ma nyawa-nyawa goona yolio. Una ma hirete wopalene o ngootilie de wotagi o Magadan ma daera'a.
The Seed Company