O MARKUS3
1Geena'a de o Yesus woma'ilioli o dodoomu ma woa'a. Geena'a o nyawa womatengo awi giama ma hononga ihonengo'au.2Geena'a ma yaino o nyawa-nyawa nage yohali-hali'i o Yesus awi hala. Ho ona wige-gelelo na'ola ho wihitogumo'a ma nyawa guuna o hiani ma wange'u, la ona wihihala.3O Yesus wotemo awi giama ma hononga ihone-honengi'a ge, <<Naino nomagoa'ie nengo'a ma biono'a.>>4Geena'a de o Yesus wohano o nyawa-nyawa'a geena'a ge, <<Imote'e to ngone nanga agama ma behehongo o 'iau halingou podiai o hiani ma wange'u? Podiai o haala ma owa bolo o haala ma diiha? O nyawa po'ihihalamata bolo po'itooma?>> Ma ona 'ayomali-lilo'a.5O Yesus awi hininga duru ihuha hababu ona yopihi, ho Una wo'idadananoho de awi hininga'a duru wongamo, Una wotemo ge awi giama ma hononga o hone-honengi'a, <<Bee'a ani giama nari'oto.>> Geena'a de ma nyawa guuna awi giama wari'oto, de 'aigila-gila iai'i awi panya'e.6Geena'a de o Farisio'a ma nyawa yohupu de yamada o dodoomu ma woa. Yoma'adatoro de o Herodes awi nyawa-nyawa la witooma o Yesusi'a.7O Yesus de awi ni-nii'i yomahidiato'o, de yotagi o Galilea ma talaga'a. Ma o Galilea ma nyawa manga lepe winii'i o Yesusi'a. De o Yudea'a ma nyawa, ma manga lepe yoboa.8O Yerusalem ma bendarino, o Idumea ma daerano, o Yordan ma daera dina ma honongaha, de o Tirus de o Sidon ma Bendara ma date-dateino. Ona noona ma winii'i, hababu ona yoiheno'au o 'iau o Yesus wadiai.9O nyawa ayolepeli ho o Yesus wohulo'o awi ni-nii'i'a widahali'i o ngootili la wopalene, uwa hiadono wihi'aduu'u o nyawa yolepe-lepe.10O nyawa yopa-panya'e ma manga lepe wo'ihiai'i, ho yopa-panya'e 'age'au yolepe de yomahihihu la yomau wigagao o Yesusi'a.11O nyawa nage o to'ata yo'ido-dongohami'a, ma noimi wima'e o Yesus. Ona 'ayogila-gila yatilabu'u'u o Yesus awi biono'a, de yomaorehe, <<Ngonau neena ma Jou ma Dutu awi ngoa'a.>>12Ma o Yesus wataaele ma to'a-to'ata geena la uwa ihingahu o nyawa-nyawa'a, na'o una geena naguunau.13Geena'a de o Yesus wohawu o de'ude, de wo'iaho'o o nyawa-nyawa imote'e to Una awi mau, de ona ma yo'ai'a Una'a.14Geena'a de Una wo'iili'i yamogio'o de yamididi, la winii'i Una'a de wo'ihulo'o la ihingahu O Habari ma Owa.15De Ngoi ma aha tinii'ula o 'uaha la niadadi niaginii'i o to'ata.16Yamogio'o de yamididi ge wo'iili'oau manga ronga-ronga geenala: O Simon (Nage wihironga o Petrus),17O Yakobus de awi do-doto o Yohanes, (ona noona o Zebedeus awi ngoa-ngoa'a. Noona yamididi o Yesus wo'ihi ronga, Boanerges ma mangariti o da'arata ma ngoa'a)18O Andreas, o Filipus, o Bartolomeus, o Matius, o Tomas, o Yakobus (o Alfeus awi ngoa'a) o Tadeus, o Simon ge o Zelot ma nyawa, 19De o Yudas o Iskariot ma nyawa, unau nuuna o Yesus wihigiama ma hoa-hoata.20Geena'a de o Yesus woohama o woa moi'a. Geena'a o nyawa manga lepe yoboa de yomalomuno, hitigi o Yesus de awi ni-nii'i ma 'ayadadiwau yoodomo.21O nyawa-nyawa yotemobali, <<Una witogohango'au,>> Wa'utu awi riado-doto yoihene ona ya'ai'a wiehe.22O agama'a yodoto-doto'o o Yerusalemo'a de yaino de yotemo, 'onane: <<Una widongahami'a'au o Belzebul, geenau ho Una wadadi waginii'i ma to'a-to'ata geena.>>23O Yesus wo'iaho'o o agama'a yodoto-doto'o de wo'iade-ade de o hi'atero, <<Bote 'aidadi imahi to'a-to'ata ima'aginii'i?24Na'o o pareta'u moi la yoma'abuhulu maraio'au ma pareta'u geena aha ihoroma.25De na'o o woa'u moi 'ayorimoiwa de yoma'abuhulu, maraio'au yoma'atinga'a,26'Ogeenali de o to'a-to'ata, na'o ima'ahaturu imahi to'a- to'ata maraio'au 'aitaowa ena ma pareta'u geena ihoroma.27De 'amoiwa yadadi yoohama, o nyawa wo'ua-uata awi woa'a, de yaehe awi arata moi-moi, na'o awilio'owa ma nyawa guuna, ma halingou wili'o ihila de aha yadadi yaehe awi arata.28Nio ihene nihidi-diai! Na'o o nyawa yodiai o baradoha e'ola yo'ihohedu o nyawa'a, ona ayama'e'ahi o apongo.29Ma na'o nagoonau yahohedu o Omaha 'Iofi-ofi, ma nyawa goona ayama'ewau o apongo 'ahiado-adoni'a, hababu ona yodiai o baradoha o iwa ma apongo.>>30O Yesus Womaade-ade 'ogeena, hababu naga o nyawa-nyawa yotemo, o Yesus widongohami'a o to'ata.31Geena iduangino o Yesus ma eha de awi ria dodoto yoboa. Ona yoda-damaa do'a ma duduno'a, ho yo'ihulo'o o nyawa'a la wiaho'o o Yesusi'a.32Wa'utu geena o nyawa manga lepe yogogelu'u wihigilolitino o Yesus. Ona yotemo Una'a, <<Aba guru, ani eha de ani riadodoto do'a ma duduno'a. Ona nihali'i.>>33Ma o Yesus wopaluhu, <<Nagumunau 'ai eha? De nagoonau 'ai riadodoto?>>34Geena'a de o Yesus wo'ige-gelelo o nyawa-nyawa nage yogogelu'u wihigilolitino, de wotemo, <<Noona moi-moi 'ai eha de 'ai riadodoto!35Ho nagoonau yadiai ma Jou ma Dutu awi mau, ona geena to Ngoi 'ai riadodoto de 'ai eha de bilanga.>>
The Seed Company