O MARKUS4
1O Yesus wodoto'oli o Galilea ma talaga ma date'o'a, geena'a o nyawa duru manga lepe yoboa wihigilolitino. Mangale ayolepeli ho Una wopalene o ngootilie de wogogelu'u geena'a. De o nyawa duru manga lepe yomahigo'ono o talaga ma dete'o'a de yohigihene awi do-doto'o.2Geena'a o Yesus wo'idoto'o waini-ini'o'a de wapa'e de o hi'atero, 'onane wo'idoto'o ona'a.3<<Nioihene! Naga womatengo wotagi awi baili'a wohibarihi awi gihihi.4Wa'utu wohibarihi ma regu iota'a o nge'omo ma date'u'u. Ho o namo o ginita'a iboa de yaodomo hitigi yabooto.5Ma regu iota'a o tona'a ihe-heleo'u, nage ma tona'a 'iina-ina'u. Ma gihihi geena 'ao dataiti iwango hababu ma tona'a iina.6Ma 'a de o wange yodihiwa ena 'iooromo'au ho itoolenge, hababu imahingutu 'ai'a'ulu'uwa.7Ma reguoli iota'a o hihi'a ma doda'u. Ma hihi'a geena ihero de ihi'aduu'u ma gihihi geena hitigi 'aihowo'ua.8De ma reguoli iota'a o tona'a 'ira-rahai'u, ma gihihi geena iwango de idadi ilamo'o, ho ihowo'o, iliono munu'a ilape moruange'a, munu'a ilape moributanga'a, munu'a ilape o ratuhu moio'a.>>9O Yesus wotemoli, <<Nagonau de manga ngau'o'a tanu nioihene.>>10Ma oraha o Yesus 'awomatengoa'au, o nyawa-nyawa nage yoihe-iheno'au awi o dodoto'o geena, de awi ni-nii'i yamogio'o de yamididi ge ya'aino, de yohano o Yesusi'a ma mangariti ma hi'atero geena.11Ho o Yesus wotemo 'onane: <<Ma Jou ma Dutu niwi'ula'au ngini'a o cocatu la nihi'ana'o icara'iau ma Jou ma Dutu wopareta. Ma o nyawa ma homoa'a, to'idoto'o iani de o hi'atero,12la ngaro:<Ona yoda-dananohoma 'ayana'owa oiau idadi;La ngaro ona yoihe-ihenema 'ayoma ma ngaritiiwa,neena idadi la ona uwa yama'e de uwa yomamangariti.La uwa yoma'ilio ma Jou ma Dutu'ade ma Jou ma Dutu wo'iapongo.> >>13Geena'a de o Yesus wotemo ona'a, <<Na'o ngini 'animamangaritiiwa ma hi'atero neena, icara'iau done nimamamangariti o hi'atero ma homoali?14Ma hi'atero geena ma mangariti 'onane: O gihihi wohibari-barihi, geenala o nyawa nage ma Jou ma Dutu awi demo wohingahu-ngahu.15O gihihi ge iota'a o nge'omu'u, geena harage 'ao nyawa yoiheno'au ma Jou ma Dutu awi demo ma o to'ata ma 'oana iboa de yaehe ma Jou ma Dutu awi demo manga hininga'a.16O gihihi ge iota'a o tona'a iheheleo'u, geena harage 'ao nyawa yoihene ma Jou ma Dutu awi demo de yadawongo de manga hininga ma garago.17Ma, ma demo geena 'aimahingutu'ua manga hininga'a, ho wa'utu o huha de o hangihara yaohana mangale yanga'u ma Jou awi demo geena, ona 'ayonga'uwau ma Jou ma Dutu'a.18O gihihi ge iota'a o hihi'a ma doda'u, geena harage 'ao nyawa yoiheno'au ma Jou ma Dutu awi demo geena,19ma yododato mangale manga wowango, yodabali yo'aya. Manga hininga'a yodabali moi-moi. Mangale geenau ho o Habari ma Jouno ge ihi'aduu'u manga hininga'a hitigi 'aihowo'ua.20De o gihihi ge iota'a o tona'a 'ira-rahai'u geena harage 'ao nyawa yoihene ma demo geena yonga'u de yadawongo, de ihowo ma regu iliono 'ilape moruange'a maregu moributanga'a, de mareguoli o ratuhu moio'a.>>21Geena'a de o Yesus wotemoli ona'a, <<'Amoiwa o nyawa manga poci yatuu'i'a de yatamunu'u de o udi 'e'ola yanoa'u manga daha ma timio'a la ma dararono uwa ihupu. Ma maraio'au yatamide to ena ma nonoa'a.22O iwa ge iyu-iyuni'a 'aima'ewa; de ihipongo-pongono 'aihupuwa.23Mangale geena, nagoonau de niangau'o'a, tanu nioihene!>>24Geena'a de o Yesus wotemoli, <<Nioihene nihidi-diai, o 'iau 'aano ge nioiheno'au! O duduga nage o nyawa'a ni'ihituga, ma Jou ma aha niwihituga ma duduga geena ngini'a, ma ngini'ahi iholoi.25Hababu to nagoonau de maena aha yo'i'ulali ona'a, ma to nagoonau 'a'oiwa, ngaro 'aihowono'au ma aha yaeheli onano.>>26Geena'a de o Yesus wotemoli 'onane, <<Na'o ma Jou ma Dutu wodadi Wo'oana, geena idadi harage 'ao hi'atero nage womatengo wohibarihi awi gihihi awi bailo'a.27O wutu'u womaidu, de o wange womomi'i, de ma gihihi geena iwango de 'age'au 'i'a'ulie, ma baili ma dutu guuna 'awana'owa icara'iau hitigi idadi 'ogeena.28'O tona'a mahirete ihihowo'o; Ididihila'a itooli de aha ijaga hitigi ihowo'o.29Na'o ma howo'o geena iumu'o'au, ma baili ma dutu guuna wautu'u, hababu o gugutu'u ma oraha yaadono'au.>>30O Yesus wotemoli ona'a, <<Na'o ma Jou ma Dutu wopareta done de oiau pohi'ataili? E'ola pohitota de o hi'atero o iau?31Ma Jou wopareta geena harage 'ao hi'atero neena: Naga o nyawa womatengo waehe o sawi ma mui de watudu'u awi bailo'a. Moi-moi o gihihi o dunia'a, 'ao sawi ohi ma mui iete'e.32Ma na'o iwangode, moi-moi aenahi 'iamo'o de o joro-joro ma homoa, ma jaga-jaga ma 'ila-laagomo ho o namo ginita'a ma imadiigutu, de imataluhu geena.33'Ogeena o Yesus wo'idoto'o o nyawa-nyawa'a de wapa'e de o hi'atero geena, ho'o'ia to ona manga ma-ma'e.>>34Ma noimi o Yesus wo'idoto'o o nyawa-nyawa'a Una wapa'e de o hi'atero. Ma na'o awi ni-nii'i'a geena wo'ihito-tongoti'a moi-moi.35Ma wange geena italuhou, o Yesus wotemo awi ni-nii'i'a, <<Niainou potagi o talaga ma hononga'a.>>36Geena'a de ona yo'imada o nyawa yolepe-lepe o talaga ma date'o'a, o Yesus de awi ni-nii'i wopalene 'ao ngootili, de yotagi, o ngootili ma reguohi gedau ma yonii'i.37Aitaaowa, yo'idarato ho, o mo'umo'u yapo'a manga ngootili, hitigi o a'ele ma iohama, ho manga ngootili yaomango'au de a'ele.38Wa'utu geena o Yesus womaiduo'a ngootili dai ma ulino'a de awi hae'e wapanginie de o babangini. Geena'a de awi ni-nii'i witomanga de yotemo o Yesusi'a, <<Aba guru, dodoau ho anohaduli'awa, ngone poboditou de?>>39O Yesus womomi'i de wataaele o rato de o mo'umo'u geena, de wotemo, <<Nomatogumu! Nomaliili!>> Geena'a de ma rato de ma mo'umo'u geena imatogumu, de ma talaga geena duru 'ao lii-li.40Geena'a de o Yesus wotemo awi ni-nii'i'a, <<Dodoau ho nio hawana? Dodoau ho aninga'uwa Ngoino?>>41Awi ni-nii'i duru yohawana de yoma'atemo moi de moi, <<Nuuna naguunaue, ho o rato de o mo'umo'u ma yanii'i Awi pareta?>>
The Seed Company