Números1

Kyajlal aj Israel t-xe Witz Sinayi

1Tetzunj matxitoq b'ent jun ab'q'i tuk'i'l jun xjaw kyetzlen aj Israel toj Ejipt, najlqe'toq toj chq'ajlaj Sinayi, tzaj tma'n Qman Dyos te Moyses toju' Ja te mujb'ab'ltib'il kjalu:
2Kyiq'inktze' jun kyajlalju' aj Israel, kyajlal junjun k'loj kywitze'lilex kyib' ex toj kyja, tu'n tb'iyetju' kyb'i ex kyajlal jte'xi'xju' ichan kykyaqil3tu'n ttzaj qex kyi'ju' te winqi'n kyab'q'i, aye'ju' b'a'n qe'tl te q'oj. Tz'ib'anku'xa kyb'i toju' kyajlal xjal te q'oj, k'onil Aaron tuk'i'la4ex kche onil junjun nejenel te junjun tnej kyyajajil kyuk'i'le'.5A kyb'i nejenel che onilkyeye' aye' ja'lu:
A Elisur, tk'wal Sedewr
kyxolu' tyajajil Rub'en.
Atzun Selumyel, tk'wal Surisaday
kyxolu' tyajajil Simeon.
Atzun Naason, tk'wal Aminadab'
kyxolju' tyajajil Juda.
Atzun Natanael, tk'wal Swar
kyxolju' tyajajil Isakar.
Atzun Elyab', tk'wal Elon
kyxolju' tyajajil Sab'ulon.
Atzu'n kyxol tyajajil Jse:
a Elisma, tk'wal Amyud kyxol tyajajil Eprayin; ex Kamalyel, tk'wal Pedasur kyxol tyajajil Manases.
Atzun Ab'idan, tk'wal Kedeoni
kyxolju' tyajajil B'enjamin.
Atzun Ayeser, tk'wal Amisaday
kyxolju' tyajajil Dan.
Atzun Pakel, tk'wal Okran
kyxolju' tyajajil Aser.
Atzun Elyasap, tk'wal Rewe
kyxolju' tyajajil Gad.
Atzun Ayra, tk'wal Enan
kyxolju' tyajajil Neptali chi Qman Dyos.
16Aye'tzun nejenel ja'lu e'jaw sk'o'n kyxolju' tnam Israel teylex junjun tnej kyyajajil.17Tojtzu'n tnejel q'ij teju' tkab' xjaw te ab'q'i, eb'aj kyb'u'yi'n Moyses ex Aaron ju' ichan lu echa'nqe'tl tu'n Dyos, kyuk'i'l kykyaqilju' tnam, ex jawkyiq'i'n kyajlal aj Israel, e'kytz'ib'aju' kyb'i toj k'loji'n kywitze'l kyib' ex toj kyjakyib', ex kyajlal jte'xi'xju' ichan tzyet-x kyuk'i'lju' te winqi'n ab'q'iqe' tojawtl,19kse'nx ojetoq tchaq' Qman Dyos te Moyses, atzu' b'incheta'ju' kyajlal lu toj chq'ajlaj Sinayi.
20Tej tb'aj b'entju' kyajlal toj tneji'n te junjun kyyajajil, toj k'loji'n kywitze'lile kyib' ex toj kyjakyib', ex tej ttz'ib'etju' kyb'i teyle junjun ex kyajlal kykyaqilju' ichan b'a'nqe' te q'oj, tzajx kyuky'i'lju' te winqi'n kyab'q'i tojawtl, ex a japuna' ja'lu:
Tnej Kyyajajil Kyajlal
Jo'mutx' qaqlajk'al jo'naq (46,500) tyajajil Rub'en.
Wuqmutx' wajxaqk'al jo'naq (59,300) tyajajil Simeon.
Jo'mutx' kyajlajk'al kab'naqlajoj (45,650) tyajajil Kad.
B'eljojmutx' qaqk'al lajnaq (74,600) tyajajil Juda.
Qaqmutx' qaqlajk'al (54,400) tyajajil Isakar.
Wuqmutx' oxk'al lajnaq (57,400) tyajajil Sab'ulon.
Jo'mutx' junk'al jo'naq (40,500) tyajajil Eprayin.
Oxmutx' lajnaq (32,200) tyajajil Manases.
Oxmutx' wajxaqk'al lajnaq (35,400) tyajajil B'enjamin.
Wuqmutx' qaqlajk'al o'lajnaq (62,700) tyajajil Dan.
Jo'mutx' oxk'al o'lajnaq (41,500) tyajajil Aser.
Qaqmutx' oxlajk'al lajnaq (53,400) tyajajil Neptali.
Oxnaq o'lajoj mutx' wajxaqk'al wuqlajnaq lajoj (603,550) tu'n tkyaqil. Kyaq'un aj Leb'i
47Minti' xi' kyajlalju' tyajajil Leb'i kyxolju' kyyajajil kychman,48qu'n ojetoq tzaj tma'n Qman Dyos te Moyses ikjalu:
49Ajtjaw tiq'inju'ya kyajlal aj Israel, lalun che oktq'o'na tyajajil Leb'i toj tajlal.50Aye'kye' aj Leb'i che okyel tq'o'na aq'unal ti'ju' ja xjan teju' yol kyejni b'entti'j ex tkyaqilju' inche ajb'en toj, ex tkyaqilju' inche ajb'en teju' ja xjan. Aye' kche ik'el iqanteju' ja xjan exqe'ju' inche ajb'en toj, ex tkyaqilxju' inche ajb'en te. Ex atzu' kche najala' ti'jileju' ja xjan,51ex ajtik' iqet, aye' kche jawil xitunte ex aye' kche jawil b'inchante junmajtl ajkykub' ten puntle'. Alkyexku' jun xjal mapon lq'e tk'etzju' ja xjan extzun mixti' toklen ti'j, ati tu'n tkyim.52Aye'tzu'n txqantl aj Israel kche najal kse'nxkye xjal te q'oj, teyile junjun tojxju' kynajb'il ex tuk'i'lilex kyb'ander.53Aye'tzu'n aj Leb'i che najal ti'jileju' ja xjan teju' yol kyejni b'entti'j, ex aye' kche xq'uqilte tu'ntzun lalun tzaj ntx'u'jile' kyi'ju' aj Israel, chi Dyos.
54Kyb'inchatzu'n aj Israel tkyaqil kse'nx tzaj tma'n Qman Dyos te Moyses. Nuk'jtib'il ti'ju' xmuj
1Tzaj tma'n Qman Dyos kye Moyses ex Aaron ikjalu:
2Ati tu'n kynajan aj Israel najchaq ch'i'n ti'jileju' ja te mujb'ab'ltib'il, teyile junjun tjaq'x tb'ander ex tuk'i'l kyechel te toj kyja.
3Che kb'eltenju' xjal te q'oj toj tjawetzq'ij, kche b'etel tjaq' tb'ander Juda, aye' ja'lu:
B'eljojmutx' qaqk'al lajnaq (74,600) tyajajil Juda, a Naason tk'wal Aminadab', nejenel kye.
Atzun qaqmutx' qaqlajk'al (54,400) tyajajil Isakar, a Natanael tk'wal Swar nejenel kye.
Atzun wuqmutx' oxk'al lajnaq (57,400) tyajajil Sab'ulon, a Elyab' tk'wal Elon nejenel kye.
Junaq oxemutx' qaqk'al (186,400) tu'n kykyaqil toju' kyxmuj tyajajil Juda.
10Aye'tzu'n xjal te q'oj kche b'etel tjaq' tb'ander Rub'en, atzu' tu'n kynajana' toj tnayajkya'j, aye' ja'lu:
Jo'mutx' qaqlajk'al jo'naq (46,500) tyajajil Rub'en, a Elisur tk'wal Sedewr nejenel kye.
Atzun wuqmutx' wajxaqk'al jo'naq (59,300) tyajajil Simeon, a Selumyel tk'wal Surisaday nejenel kye.
Jo'mutx' kyajlajk'al kab'naqlajoj (45,650) tyajajil Kad, a Elyasap tk'wal Rewel nejenel kye.
Wajxaqlajmutx' wajxaqlajk'al kab'lajnaq lajoj (151,450) tu'n kykyaqil toju' kyxmuj tyajajil Rub'en.
17Ex kche b'etel aj Leb'i kyxolju' kyaje' xmuj, q'i'nju' Ja te Mujb'ab'ltib'il kyu'n. Aye'tzu'n kyaje' xmuj: kche b'etel jun xmuj ti'jxi' juntl xmuj, tojxju' ttxolil kse'nx nuk'b'enkye jate'qe' tjaq'ilex kyb'ander.
18Aye'tzu'n xjal te q'oj kche b'etel tjaq' tb'ander Eprayin, che b'elten toj tkub'exq'ij, aye' ja'lu:
Jo'mutx' junk'al jo'naq (40,500) tyajajil Eprayin, a Elisama tk'wal Amyud nejenel kye.
Kyajmutx' lajnaq (32,200) tyajajil Manases, a Kamalyel tk'wal Pedasur nejenel kye.
Kyajmutx' wajxaqk'al lajnaq (35,400) tyajajil B'enjamin, a Ab'idan tk'wal Widoni nejenel kye.
Oxlajmutx' lajk'al jo'naq (108,100) tu'n kykyaqil toju' kyxmuj tyajajil Eprayin.
25Aye'tzunju' xjal te q'oj kche b'etel tjaq' tb'ander Dan, atzu' tu'n kytena' toj tb'a'nq'ob'kya'j, aye' ja'lu:
Wuqmutx' qaqlajk'al o'lajnaq (62,700) tyajajil Dan, a Ayeser tk'wal Amisaday nejenel kye.
Jo'mutx' oxk'al o'lajnaq (41,500) tyajajil Aser, a Pawyel tk'wal Okran nejenel kye.
Qaqmutx' wajxaqk'al lajnaq (53,400) tyajajil Neptali, a Ayra tk'wal Enan nejenel kye.
B'eljlajmutx' kyajlajk'al (157,600) tu'n kykyaqil toju' kyxmuj tyajajil Dan.
A chaqtzun kyb'aj xjalju' te q'oj tu'n kyb'et toj tneji'n lepchqe'x ti'jilex kyb'ander, chi Qman Dyos.
32Japun kyajlalju' xjal te q'oj kyxol aj Israel toj oxnaq o'lajoj mutx' wajxaqk'al wuqlajnaq lajoj (603,550) ichan.33Aye'tzu'n aj Leb'i min e'ok toju' tajlal lu kse'nx tzaj tma'n Qman Dyos te Moyses.
34Kyb'inchatzu'n aj Israel tkyaqilju' tzaj tma'n Qman Dyos te Moyses: teyile junjun tnej e'kub'ten tjaq' kyb'ander ex eb'et kyuk'i'lju' kywitze'l ex e'toj kyja. Kyajb'eb'l aj Leb'i
1Aye' tyajajil Moyses ja'lu ex tyajajil Aaron tej ttzaj yolin Qman Dyos te Moyses twi' witz Sinayi:2Aye' tk'wal Aaron: Nadab' ju' tzikb'aj, Ab'yu, Eleasar ex Itamar.3Kykyajil e'xjanset ex e'ok toj kyoklen tu'n kyajb'en te pale,4aye'tzunkye' Nadab' ex Ab'yu e'kyim twitz Qman Dyos, qu'n kub' kyq'o'n jun q'aq' junxiku' twitz toju' chq'ajlaj Sinayi. Mixti' ten kyk'wal. Aye'tzunkye Eleasar ex Itamar e'ajb'en te pale tjaq' tkawb'il Aaron, ju' kyman.
5Tzaj tma'n Qman Dyos te Moyses kjalu:
6Txkonqe'tza tyajajil Leb'i tu'ntzun kyq'onte kyib' tjaq' tkawb'ilju' pale Aaron ex tu'n kyajb'en te.7Kche ajb'el te Aaron ex te tkyaqilju' tnam twitzju' Ja te Mujb'ab'ltib'il, ex aye' kche ajb'el toju' ja xjan.8Ex che kxe'l kyka'yi'n ti'xti' kche ajb'el toju' Ja te Mujb'ab'ltib'il, ex che ajb'elkye' aj Israel toju' ajb'eb'l toju' ja xjan.9Pa'nqe'milju'ya aj Leb'i kyi'ju' txqantl aj Israel, tu'ntzun kyajb'en o'kxtzu' te Aaron ex kyeju' tyajajil,10atzunju' ajb'eb'l te pale q'onkja toj tq'ob' Aaron ex toj kyq'ob'ju' tyajajil. Qatzun a'lo' jun matb'inchaju' taq'un pale extzun mya pale, ati tu'n tkyim, chi Dyos. Te Qman Dyos qe' aj Leb'i
11Tzaj tma'n Qman Dyos te Moyses kjalu:
12Matxi' che jawnsk'o'ne' aj Leb'i kyxol aj Israel te kyxelju' tnejel kyk'wal kykyaqil aj Israel. We qe'we'ye',13qu'n we qe'ju'ye' tnejel k'wal. Tej kyb'ajkyimju' tnejel kyk'wal aj Ejipt wu'ne', e'kyaj nklo'ne' tnejil kyk'wal aj Israel weye' exqe' tnejel kyal alu'mj. Qu'mtzun weqe'ye'. Ayine' Dyos Manb'aj, chi Dyos. Jaw kyajlal aj Leb'i
14Tzaj tma'n Qman Dyos te Moyses toju' chq'ajlaj Sinayi, kjalu:
15Q'inktza jun kyajlal aj Leb'i kse'nx kyb'aj toj junjun ja ex toj k'loji'n kywitze'l kyib', tz'ib'anqeku'xa kykyaqil aj Leb'i q'aqe', ktzajelx kyi'ju' matxi' che el jun xjaw, chij.
16Jawtzun tiq'i'n Moyses kyajlal kse'nxju' tchaq' Qman Dyos te.
17Aye' tk'wal Leb'i ja'lu: Kerson, Koat ex Merari.
18Aye' tyajajil Kerson ja'lu, kywitze'l kyib': Lib'ni ex Semey.
19Aye' tyajajil Koat ja'lu, kywitze'l kyib': Amram, Isar, Eb'ron ex Usyel.
20Aye' tyajajil Merari ja'lu, kywitze'l kyib': Mali ex Musi.
Kykyaqil ja'lu tyajajil Leb'i, kse'n ttxolil toj kyja.
21Aye' tyajajil Kerson, Lib'ni ex Simey.22Wajxaqlajk'al o'lajnaq (7,500) kyb'aju' q'a tz'ib'et, tzajx kyuk'i'lju' matoq che el jun xjaw.23Aye'ju' jun tnej lu kywitze'l kyib' atzu' ekub'a' najan tkub'exq'ij ti'jxi'ju' ja xjan.24Atoq Elyasap tk'wal Lael nejenel kyeju' tyajajil Kerson.25Toj kyq'ob'toq ta'ju' ja xjan tu'n t-xi' kyka'yi'n toju' Ja te Mujb'ab'ltib'il, exju' ja xb'alun, exju' tz'u'n tib'aj, exju' xb'alun ttziju' ja,26exqe'ju' xb'alun te twi' pe'n, exju' xb'alun te ttziju' pe'n jpulte ti'ju' ja xjan ex q'olb'eb'l, exqe'ju' aqwil inche ajb'en te.
27Aye' tyajajil Koat ja'lu: Amram, Isar, Eb'ron ex Usyel,28junmutx' o'lajnaq kyb'aju' q'a tz'ib'et, tzajx kyuk'i'lju' matoq che el jun xjaw. Toj kyq'ob'u' k'loj kywitze'l kyib' lu ta'ju' ja xjan tu'n t-xi' kyka'yi'n29ex atzu' e'kub'a' najan toj tnayajkya'j teju' ja xjan.30Atoq Elisapan tk'wal Usyel nejenel kyeju' k'loj lu.31Tojtoq kyq'ob'ju' k'loj lu ta'ju' kax k'ub'lteju' yol kyejni b'entti'j tu'n t-xi' kyka'yi'n, exju' mes, kykb'el kandil, e' q'olb'eb'l, e'ti'xti' xjanqe' tu'n kyajb'en toju' ja xjan, xb'alun ex kykyaqilyu' inche ajb'en.
32Atoq Eleasar tk'walju' pale Aaron, nejenel nim toklen kye aj Leb'i, ex atoq taq'unju' xq'uqilkyeju' ka'yilte ja xjan.
33Aye' tyajajil Merari ja'lu, Mali ex Musi.34O'lajk'al lajnaq (6,200) kyb'aju' q'a tz'ib'et, tzajx kyuk'ilju' ma'toq che el jun xjaw.35Atoq Suryel tk'wal Ab'yayil nejenel kye, atzu' e kub'a najan toj tb'a'nq'ob'kya'j teju' ja xjan.36Tojtoq kyq'ob' tyajajil Merari ta'qe' ttz'lanilju' ja xjan tu'n t-xi' kyka'yi'n, kyuk'i'lju' tqul, e'tqan, e' kyq'uqb'ilju' tqan ex tkyaqilju' ati kyajb'en toj,37ikqe'xju' tqan ti'jileju' tpen, e' kyq'uqb'il tqan, e' t-stakyil ex taqwilil.
38Xi' najlqe'toq Moyses tuk'i'l Aaron exqe' tk'wal Aaron toj tjawetzq'ij twitzju' ja xjan ex twitzju' Ja te Mujb'ab'ltib'il, intoq kyxq'uqi'n ja xjan toj kyb'iju' txqantl aj Israel. Qa ati jun matb'inchaju' taq'un pale extzun mya pale, intoq kub' b'yo'n.
39Tej tjaw kyiq'i'n Moyses tuk'i'l Aaron kyajlalju' aj Leb'i kse'nx ttxolil kyyajajil, kse'nxju' tchaq' Qman Dyos te, japun toj kab'mutx' o'lajk'al (22,000) q'a tzajx kyuk'i'lju' matoq che el jun xjaw. Kywi' tnejel tyk'wal aj Israel
40Tzaj tma'n Qman Dyos te Moyses kjalu:
Iq'i'nktza jun kyajlalju' tnejel kyk'wal aj Israel, tzajx kyuk'i'lju' matxi' che el jun xjaw, tz'ib'anku'xa kyb'i.41Ex pa'nqe'kja aj Leb'i weye' te kyxelju' tnejel kyk'wal aj Israel, ayine' Dyos Manb'aj. Ex ikx pa'nqe'kja kyalu'n aj Leb'i weye' te kyxelju' tnejel kyal kyalu'n aj Israel, chi Dyos.
42Jawtiq'i'n Moyses kyajlalju' tnejel kyk'wal aj Israel, kse'nxju' tchaq' Qman Dyos te,43kab'mutx' o'lajk'al oxlajnaq oxlajoj (22,273) q'a tz'ib'et, tzajx kyuk'i'lju' matxitoq che el jun xjaw.
44Tzajtzun tma'n Qman Dyos te Moyses kjalu:
45Q'inqe'tza aj Leb'i te kyxelju' tnejel kyk'wal aj Israel exqe' kyalu'n aj Leb'i te kyxelju' kyalu'n aj Israel, qu'n weqe'we' aj Leb'i. Ayine' Dyos Manb'aj.46Tu'ntzunju' nimxi'x kyb'aju' tnejel kyk'wal aj Israel kyekywitz aj Leb'i, qaninxa jun oyaj kye te jwe' saqpwaq ti'j junjun tnejel k'wa'lb'aj, aju' saqpwaq ch'inxmi tz'aqla' nik'jan ons talal, kse'nx malb'il in ajb'en toju' ja xjan, tu'ntzun tb'ant kylq'etju' oxlajnaq oxe' (263) tnejel kyk'wal tib'ajxi' kyajlal aj Leb'i,48q'onxtzu'na medi lu te Aaron ex kyeju' tk'wal te chojb'il kyi'ju' tnejel k'wa'lb'aj lu, chi Dyos.
49Jaw tb'u'yi'n Moyses pwaq te chojb'il kywi' tnejel kyk'wal aj Israel nche ik' tib'aju' kyajlal aj Leb'i,50oxk'al wajxaqnaq jwe' (1,365) saqpwaq jaw tb'uyi'n, kse'nx talalju' pwaq toju' ja xjan.51Xitq'o'ntzuntz te Aaron ex kye'ju' tk'wal, kse'nxju' tchaq' Qman Dyos te. Kyaq'un aj Leb'i
1Tzaj tma'n Qman Dyos kye Moyses ex Aaron kjalu:
2Kyiq'i'nktze' jun kyajlal aj Leb'i tyajajil Koat kse'nx junjun tnej kwitze'lilexkyib' ex tojx kyja.3Ktzajelx kyuk'i'lju' te junaq lajoj (30) kyab'q'i tu'n tpon kyuk'i'l te kab'naqlajoj (50), ex b'a'nqe' tu'n kyajb'en teju' Ja te Mujb'ab'ltib'il.
4Xjanxi'xte' kyaq'unju' tyajajil Koat, ex aye' ja'lu:5Qa ati tu'n kyik'b'etju' tnam, aye' Aaron kyuk'i'lju' tk'wal kche elel q'inteju' xb'alun ati ttziju' ja xjan ex k'okyel kyktxu'n ti'ju' kax k'ub'lteju' yol q'ma'tl tu'n tjapun.6Oktzun kjawix kyq'o'n jun tz'u'n tz'umin tib'aj te kutxb'ilte, ex kb'el kyslik'u'n jun xb'alun morad ka'yin te junplajx tib'aj, ex kche elex kyq'o'nju' tqul te iqb'ilte.7Ex kb'el kyslik'un jun xb'alun morad tib'aju' mes kb'el q'et twitz Qman Dyos, ex tib'ajtzun che b'elkyq'o'nju' pik'laq, e' pak'b'il, e'k'wab'l exqe' xar tkb'el oyaj ta'l lob'j ub'a, ex ikxju' wab'j nxiq'et kukxju'.8Kb'el kyslik'un jun xb'alun kyaq ka'yin tib'aj tkyaqil ja'lu, ex kb'el kyktxu'n tu'n jun kutxb'ilte tz'u'n tz'umin, ex kche okyex kyq'o'n tze tjaq' te iqb'ilte.9Ex kb'el kyktxu'nju' kykb'el kantil tu'n jun xb'alun morad, kyuk'i'lxi' kantil, b'inchb'il kymechil, e' tplatil ex tkyaqilju' kykb'el k'wab'j inche ajb'en teju' aseyt.10Tkyaqil ja'lu che kb'el kyktxu'n tu'n jun kutxb'ilkye tz'u'n ex tz'umin, kb'el kyq'o'ntzuntz kyib'aj junjun tze tu'n kyxi' iq'et.
11Ex kjawix kyslik'u'n jun xb'alun morad tib'aju' q'olb'eb'l qa'npwaq, okb'el kyktxu'n tu'n jun kutxb'ilte tz'u'n ex tz'umin, ex che elix kyq'o'nju' tqul te iqb'ilte.12Ex che kjawil kyb'u'yi'nju' ti'xti' matxitoq che ajb'en toju' ja xjan ex che kb'el kyq'o'n toj jun xb'alun morad, ex che kb'el kyptzo'n toj jun patzb'ilkye tz'u'n ex tz'umin, ex che kxe'l kyiq'i'n kyib'aj tze.13K'elil kytxjo'n seb' ex tza'j ti'ju' q'olb'eb'l, kjawix kyslik'u'ntzun jun xb'alun kyaq smo'n tk'i' cha'x tib'aj.14Kykyaqiltzunju' inche ajb'en te xjanb'il tib'aju' q'olb'eb'l kb'el kyq'o'n tib'aj: e'kyb'el ttxalq'aq', xokb'il, jotb'il, nimaqlaq; kykyaqilju' inche ajb'en teju' q'olb'eb'l. Kb'el kyktxu'n tkyaqil ja'lu tu'n jun kutxb'ilte tz'u'n ex tz'umin, ex che elex kyq'o'nju' tqul te iqb'ilte.15Tb'ajlenxi'tzun kyptzo'n Aaron kyuk'i'lju' tk'wal kykyaqilju' ti'xti' xjanqe', ex b'entni kyten tu'n tkub' b'e kyu'n, b'a'ntzun kyul tyajajil Koattz tu'n t-xi' kyiqa'n tkyaqilju' ti'xti' lu. Naq o'kx mixti' tu'n t-xi' kytzyu'nju' ti'xti' xjan tu'n kyq'ob', tu'n lalun che kyim. Aye'tzun che kxe'l kyiq'i'n tyajajil Koat kykyaqilju' ti'xti' lu teju' Ja te Mujb'ab'ltib'il.16A Eleasar tk'walju' pale Aaron, kxe'l ka'yinkye kyaseytilju' kandil, sturak k'ok'jsa'n, twitz awal k'ok'e'kywitz tu'n tkub' q'o'n kukxju' te oyaj nwitze', exju' aseyt te xjanb'il. Ex kxe'l tka'yi'nju' ja xjan ex tkyaqilu' ati toj, ex tkyaqilju' ti'xti' xjanqe' nche ajb'en toj, chi Dyos.
17Tzaj tma'n Qman Dyos kye Moyses ex Aaron kjalu:
18Lalun kyaje' tu'n kykub'naju' tyajajil Koat kyxolju' aj Leb'i.19Tu'ntzun lalun kub' tz'e'yset kywitz tu'n kamik tu'n tpaj qama txi' kytzyu'n ti'xti' xjan, a kkyb'incha'ju'ye' lu: ate Aaron kyuk'i'lju' tk'wal che kxel q'mante teyle junjunkye titi' ati tu'n kyb'inchante ex titi' kxel kyiqa'n.20Laytzun che ik'xtz ka'yilkyeju' ti'xti' xjan, ex lay che kyim, chi Dyos.
21Tzaj tma'n Qman Dyos te Moyses kjalu:
22Ex ikx iq'i'nktza jun kyajlal tyajajil Kerson, kse'nxju' ttxolil toj kyja ex kywitze'lx kyib'23tzajx kyuk'i'lju' te junaq lajoj (30) kyab'q'i tu'n tpon kyuk'i'lju' te kab'naqlajoj (50), ex b'a'nqe' tu'n kyajb'en toju' Ja te Mujb'ab'ltib'il.
24A kyaq'un tyajajil Kerson ja'lu:25Che kxel kyiqa'nju' xb'alun teju' ja xjan, teju' Ja te Mujb'ab'ltib'il, kutxb'il tz'u'n tz'umin in jaxq'et tib'aj, exju' xb'alun tok ttziju' Ja te Mujb'ab'ltib'il,26e'xb'alun ti'jileju' tpen, ju' xb'alun ttziju' pe'n ti'jeleju' ja xjan ex q'olb'eb'l, exqe'ju' taqwilil ex tkyaqilju' aq'unb'il inche ajb'en teju' kyajb'eb'l ex kyaq'un.27Ate Aaron kyuk'i'lju' tk'wal che kxel nk'unkyeju' tyajajil Kerson ti'ju' aq'untl kxel kyb'incha'n exqe' ti'xti' tu'n kyxi' kyiqa'n. Toj kyq'ob' kjela' kyq'o'na'ye kxel kyb'incha'n.28Atzun kyaq'un tyajajil Kerson ja'lu tu'n kyb'inchante toju' Ja te Mujb'ab'ltib'il tjaq' tkawb'il Itamar, tk'walju' pale Aaron.
29Ex iq'i'nktza jun kyajlalju' tyajajil Merari kse'nxju' ttxolil toj kyja ex kywitze'lx kyib'.30Tz'ib'anqe'ku'xa kykyaqil, ktzajelx kyuk'i'lju' te junaq lajoj (30) kyab'q'i ex kpomel b'aj kyuk'i'lju' te kab'naqlajoj (50) kyab'q'i, aye'ju' b'a'nqe' tu'n kyajb'en teju' Ja te Mujb'ab'ltib'il.31A kyaq'unju' ti'ju' Ja te Mojb'ab'ltib'il tu'n t-xi' kyiqa'n ttz'lanilju' ja xjan, e' tqul, e'tqan, e' tq'uqlil,32e'tqan ti'jileju' pe'n ti'ju' ja xjan kyuk'i'lju' tq'uqlil, t-stakyil, taqwilil ex tkyaqilju' che ajb'el teju' aq'untl. Kxe'l tma'na b'a'nxi'x teyle junjun titi' kxe'l kyiqa'n.33Atzun kyaq'un tyajajil Merari ja'lu tu'n kyb'inchante ti'ju' Ja te Mujb'ab'ltib'il tjaq' tkawb'il Itamar, tk'walju' pale Aaron, chi Dyos te Moyses.
34Jawkyiq'i'n Moyses ex Aaron kyuk'i'lju' nejenel te tnam jun kyajlalju' tyajajil Koat, kse'nxju' ttxolil toj kyja ex kywitze'lx kyib'35tzajx kyuk'i'lju' ichan te junaq lajoj (30) kyab'q'i ex ponb'aj kyuk'i'lju' te kab'naqlajoj (50) kyab'q'i, ex b'a'nqe' tu'n kyajb'en teju' Ja te Mojb'ab'ltib'il, a japuna' kyajal ja'lu:
Qaqk'al wuqlajnaq lajoju' (2,750) k'loj tyajajil Koat.
Qaqk'al junlajnaq lajoju' (2,630) k'loj tyajajil Werson.
Wajxaqk'alu' (3,200) k'loj tyajajil Merari.
Junmutx' junk'al b'eljojnaq (8,580) tu'n kykyaqil.
Atzun kyajlal tyajajil Koat jaw kse'nxju' ttxolil toj kyja ex kwitze'lxkyib', b'a'nqe' tu'n kyajb'en toju' Ja te Mujb'ab'ltib'il.
49B'inchetju' kyajlal lu kse'nxju' tchaq' Qman Dyos te Moyses, ex xiq'ma'n teyile junjun titi' ati tu'n tb'inchante ex titi' tu'n t-xi' tiq'i'n, kse'nxju' tma Qman Dyos te Moyses. Chaq'b'il tu'n kyex xla'jetju' tz'ilqe'
1Tzaj tma'n Qman Dyos te Moyses kjalu:
2Q'manxa kye aj Israel tu'n kyex kyxla'ja'ne' kykyaqilju' xjal yab'qe' tu'n xlemtx'a'k mujqa nqojli chik' kyi'j, mujqa mache kyej tz'ilix tu'ntpaj matz'ok kytzyu'n jun kyimni.3Tu'n kyex kyq'o'ne' ti'jxi'ju' najb'il, ichan mujqa qya. Tu'n lalun ten tz'il toju' najb'il janajlqina'ye' kyxole', chi Dyos.
4Xikyb'i'n aj Israel tchaq' Qman Dyos te Moyses, eb'je'x kyiq'i'nju' xjal lu ti'jxi'ju' najb'il. Kawb'il tu'n tq'et t-xel jun ti'xti' mab'o'lj
5Tzaj tma'n Qman Dyos te Moyses tu'n t-xitma'n kye aj Israel kjalu:
Qa ati jun ichan mujqa jun qya myab'a'n tten nwitze' ex matb'incha jun taq'wix te juntl xjal, il ntb'incha'n7ati tu'n toktq'o'n ti'j. Expe' ati tu'n t-xi' tq'o'n tu'me'l t-xel teju' xjal alqi'j xb'inchana' il, kse'nxju' xtb'incha tk'i'tzun jun tjwe'yi'n tnejtl.8Qatzun oje kyimju' xjal xb'inchanjtz taq'wix ti'j exqa mixti' jun twitze'l nqaku' jatu'n txa' q'etju' tu'me'l t-xel te, atzu' ktzajel q'eta' weye' tu'n tajb'en teju' pale, tib'ajxi'tlju' rit kb'eltq'o'n tu'n tkub' tq'o'nju' pale tu'n najset tilju' xjal lu.
9Te palete' tkyaqilju' o'nb'il ex oyaj kb'el kyq'o'n aj Israel nwitze' ex kpomel kyiq'i'n twitz pale.10Tkyaqilju' makub' q'o'n nwitze' ex mapon q'i'n teju' pale, tete' paleju', chi Dyos. Kawb'il tib'aj xky'aqli'n
11Tzaj tma'n Qman Dyos te Moyses tu'nt-xitma'n kye aj Israel kjalu:
Qa ati jun qya makub' t-sb'u'n tchmil13ex makub' kẍe tuk'i'l juntl ichan ex min b'i'n tu'nju' tchmil, maskye matz'ilix tu'nju' tb'inchb'aj lu toj ewaj, naq ktxu'n tib' qu'n mixti'x jun twitzlalil sel knet tu'n tpaj mixti' sel yal toju' tb'inchb'aj.14Qatzun maxky'aqlinju' chmilb'aj ti'ju' t-xu'jil. Mujqa matz'okten jun chmilb'aj xky'aqlil extzunqa mixti' ntb'incha'nju' t-xu'jil.15Alkyexku' mab'aj kyxolju' kab'e' tu'me'l lu, ati tu'n t-xitiq'i'n ichanju' t-xu'jil twitz pale, ex kxe'l tiq'in kyaje' lib'r tk'i' nik'jan arin ti'j seb'ad te jun oyaj. Naq aju' lay txitqo'n aseyt ex sturak tib'aju' arin, qu'n jun oyajte' tu'ntpaj xky'aqli'n, jun oyaj tu'n tel q'ancha'lixju' il
16Kxel tma'nju' pale tu'n ttzaj lq'eju' qya, kb'el tq'o'ntzuntz nwitze'.17Ktzajeltzun tiq'i'n ch'i'n a' xjansa'n toj jun tx'otx' xar ex kjawil tiq'i'n ch'i'n quq toju' ja xjan, kxel t-smo'ntzuntz toj.18Ex ktzajel tiq'i'nju' qya tu'n tkub' we' nwitze', kxel tchitq'u'n twi' ex kb'el tq'o'nju' oyaj tu'n tpaj xky'aqli'n toj tq'ob' tu'n tq'ancha'lix jun il; atzunte' pale ktzajel ttzyu'nju' a' k'a iqa'n qanb'en taq'wix tu'n.19Ktb'incha'tzuntz tu'n ttziyanteju' qya, kxe'l tma'n te kjalu: Qa b'ajx txa' kytzyu'nkyib'e' tuk'i'l juntl ichan ex b'ajx kub'a' tjyo'n juntl ichana twitz tchmila, ex b'ajx kub'a' tkuẍb'a'ntib'a tuk'i'l juntl ichan tu'n ttz'ilixa tu'n, mixtzunti' kb'ajeltetza aj t-xi' tk'wa'nju'ya a' k'a lu iqa'n qanb'en taq'wix tu'n.20Qatzun matxi' kub'tjyo'n juntl ichana twitz tchmila, qa matxi' kub'kẍeya tuk'i'l juntl ex matxi' ttz'ilsatib'a tu'ntpaj xkub' tkuẍb'a'ntib'a tuk'i'l juntl ichan,21tz'okxtzuntza te jun yek'b'il tjaq' qanb'en taq'wix tu'n Qman Dyos kywitz tnam, tu'n t-xi' malju' tk'u'ja, ex k'elelju' tala.22Atzun tz'e'ysb'il twitzju'ya tzul aj t-xi' tk'wa'nju'ya a' lu iqa'n qanb'en taq'wix tu'n, chiku'ju' pale, atzu'n qya kxe'l ttzaq'we'n: B'ent-xwit ikju', chiku'.
23Kb'eltzun ttz'ib'a'n paleju' qanb'en taq'wix lu ex k'elel ttxjo'n tu'nju' a' k'a.24Kxe'l tq'o'ntzuntz teju' qya tu'n t-xitk'wan, tu'ntzun tk'ayix toj tk'u'j tu'n,25ex kxel ttzyu'nju' oyaj tu'n tpaj xky'aqli'n toj tq'ob'ju' qya tu'ntzun tkub' tq'o'n nwitze', kb'el tq'o'ntzuntz tib'aju' q'olb'eb'l,26ex ktzajel tiq'i'n jun jot ti'ju' oyaj twitz awal k'ok'e'kywitz, kb'el ttz'e'ysa'ntzuntz tib'aju' q'olb'eb'l te jun oyaj te nab'ab'l.
T-xilenxi'tzun tq'o'n paleju' a' k'a teju' qya tu'n t-xitk'wan,27qa matxi'toq kub'tjyo'n juntl ichan twitz tchmil, kb'ajel k'ayix toj tk'u'ju' qya tu'nju' a' lu iqa'n qanb'en taq'wix tu'n, kxel malju' tk'u'j ex k'elelju' tal, k'okeltzun qyatz te jun yek'b'il te qanb'en taq'wix toju' ttanam.28Qatzun mixti'te qya til mixti'te k'ik'ela' ex k-alal.
29A kawb'il ja'lu tib'aj jun qya qa makub'tjyo'n juntl ichan twitz tchmil ex maxky'aqlin tchmil ti'j,30mujqa jun chmilb'aj naqx maxky'aqli'n ti'j t-xu'jil. Ktzajel tiq'i'n ichan t-xu'jil nwitze', ex ktb'incha' pale ti'ju' qya kse'nx ntma'n kawb'il lu.31Mixtzunti'te chmilb'ajtz til, qatzun matz'elyalju' qya toj til, ktk'ma'ju' tz'e'ysb'il twitz, chi Qman Dyos. Nuk'b'il kye Nasarey
1Tzaj tma'n Qman Dyos te Moyses tu'n t-xitma'n kye aj Israel kjalu:
Qama ttziya jun ichan mujqa jun qya tu'n t-xjansantetib' nwitze' te jun nasarey, 3mixti' tu'n tk'wan ta'l lob'j mujqa juntl k'wab'j tx'amsa'n, ex b'inayr tzajni ti'j b'in mujqa ti'j juntl k'wab'j tx'amsa'n, mujqa ti'j ta'l lob'j ub'a; ex lalun txi' tlo'nju' ub'a ex ub'a tzqijsa'n.4Mixti' tu'n t-xi' tlo'n twitz ub'a mujqa alkyexku' juntl lob'j toju' tq'ijlalil tajb'eb'l te nasarey.5Ex lalun tz'el tjonju' twi', kb'el tch'isa'n tzmaxi'j ajtjapunju' q'ij q'ma'n tu'n toju' ttziyb'il nwitze'.6Ex mixti' tu'n tpon lq'e tk'etz jun kyimni toju' tq'ijlalil lu,7maskyepe' makyimju' tman mujqa ttxu, jun ttzik mujqa tanab', tu'n lalun kyej tz'ilix, qu'n ilti'j tu'n tten xjansa'n nwitze', ayine' Dyos Manb'aj.8Kt-xjansa'tib' nwitze' toj tkyaqilju' tq'ijlalil tziya'n tu'n.
9Qa naqx minab'en makyim jun xjal tk'etz ex makyej tz'ilixju' t-xya'mal twi' xjansa'ntoq tu'n, ati tu'n tel tjonju' twi' toj twuq q'ijtl, toju' q'ij q'ma'ntl tu'n t-ẍtilsantetib'.10Kxe'l tiq'i'n kab'e' xlak'uk' mujqa kab'e' tal paloms teju' pale toj twajxaqi'n q'ij ttziju' Ja te Mujb'ab'ltib'il.11Juntzun kb'el tq'o'nju' pale te chojb'il tu'n tpaj il, atzu'n juntl te chojb'il k'ok'sb'il, ex kxel tb'incha'nju' tu'me'l tu'n tnajsetju' il tb'incha tej t-xi' ttzyu'nju' kyimni. Kt-xjansa' jumajtlju' twi' nwitze' toju' q'ij lu,12ex ktzyetel juntl tq'ijlalil xjansa'ntib' nwitze'. Lay tz'oktlju' tq'ijlalil xkyaj toj tajlal, qu'n matz'ilixju' twi' ojetoq t-xjansa. Ex ktzajel tq'o'n jun rit weye' te jun ab'q'i te chojb'il tu'n tten b'a'n wuk'i'le'.
13Ajtzun tb'aj tq'ijlalilju' xjansb'iltetib' nasarey, kxe'l ttziju' Ja te Mujb'ab'ltib'il14ex kb'el tq'o'n jun qpoj tman rit te jun ab'q'i mixti' ttzakajil te jun chojb'il k'ok'sb'il, ex jun ttxu rit te jun ab'q'i mixti' ttzakajil te jun chojb'il tu'n tpaju' il, ex jun tman rit mixti' ttzakajil te jun chojb'il te b'inchjtib'il.15Ex kb'eltq'o'n jun tal chi'l wab'j b'incha'n tu'n arin tb'anilxi'x, mixti' ttx'amal ex xyuq'i'n tuk'i'l aseyt; e'muqin slik' tx'i'li'n toj aseyt mixti' ttx'amal, junx kyuk'i'lju' toyaj twitz awal k'ok'e'kywitz ex ta'l ub'a.16Kb'eltq'o'n paleju' chojb'il tu'n tpaj il exju' chojb'il k'ok'sb'il nwitze' ayine' Dyos Manb'aj,17kb'el tq'o'ntzun tman rittz te jun chojb'il te b'inchjtib'il, junx tuk'i'lju' tal chi'l wab'j mixti' ttx'amal, ex kb'el tq'o'nju' oyaj twitz awal k'ok'e'kywitz ex ta'l ub'a.18K'elel tjon nasareyju' twi' ttziju' Ja te Mujb'ab'ltib'il, ex ktzajel tiq'i'nju' txya'mal twi' xjansa'ntoq tu'n ex k'okyex tq'o'n toju' q'aq' ink'ant tjaq'ju' chojb'il te b'inchjtib'il.19Ktzajel tiq'i'n pale tchib'jil ttze'lti'ju' tman rit tzq'ajtel, ex jun wab'j mixti' ttx'amal toju' tal chi'l ex jun muqin slik' tx'i'li'n toj aseyt mixti' ttx'amal, che kb'el tq'o'ntzuntz tkyaqil toj tq'ob'ju' nasarey tb'ajlenxi' tjonju' twi'.20Kxeltzun tb'incha'n paleju' tu'me'l tu'n tkub' tq'o'n nwitze'. Xjanqe'kye' ttzitk'u'ju' alu'mj inche kub' q'o'n nwitze' exju' tkux intzaj q'o'n te oyaj weye', tete' paleju'. Tb'ajlenxi'tzun ja'lu, b'a'n tu'n tk'wan ta'l ub'aju' nasarey.
21A kawb'il ja'lu teju' nttziya'n tu'n t-xjansantetib' nwitze' te jun nasarey, ex aye' oyaju' tu'n tq'onte kyib'ajxi'tlju' ti'xti' ati tu'me'l tu'n tq'onte, ati tu'n tjapunju' oje ttziya tu'n, kse'nxju' b'antniti'j, chi Dyos te Moyses. Qanb'il b'a'n tu'n pale
22Tzaj tma'n Qman Dyos te Moyses kjalu:
23Q'manxa te Aaron ex kyeju' tk'wal, aj t-xi' kyqani'n b'a'n kyib'aju' aj Israel, tu'n kmante kjalu:
24Awt Qman Dyos ky'iwlanteya ex xq'uqinteya;
25tzaxjwit ka'yi'na tu'n Qman Dyos tuk'i'l tzalajb'il
ex tzajxwit q'aq'an tk'u'j ti'ja;
26tzaxjwit ka'yina tu'n Qman Dyos tuk'i'l tk'u'jlalil
ex tz'anq'inxwita toj nak'b'il tu'n, chechiku'.
27Tu'ntzun ttzajkna'n nb'iye' kyib'aju' aj Israel, che b'el nky'i'wla'ntzuntze', chi Dyos. Oyaj tu'n t-xjansetju' ja xjan
1Kub' t-xjansa'n Moyses ja xjan tu'n aseyt toju' q'ij tej tb'aj b'ent tu'n, kyuk'i'lxi'ju' ti'xti' inche ajb'en toj, exqe'ju' inche ajb'en teju' q'olb'eb'l.2Aye'tzunju' nejenel kyeju' junjun tnej kyyajajil, aye' e'onin tu'n tjawju' kyajlal, exi'3q'olkye waqaq karet ktxu'n kyi'j ex kab'lajoj (12) wakx te oyaj twitz Qman Dyos, jun karet kye kab'e' nejenel ex jun wakx te junjun nejenel, tkyaqil ja'lu kub' kyq'o'n twitzju' ja xjan.
4Tzajtzun tma'n Qman Dyostz te Moyses ikjalu:
5K'mo'nqe'mju'ya karet kyuk'i'lju' wakx kye, q'onqe'xtzuntza kye aj Leb'i tu'n kyajb'en kye toju' aq'untl nb'inchet teju' Ja te Mujb'ab'ltib'il, kse'nxju' aq'untl tu'n tb'inchante junjun, chi Dyos.
6E'tk'amtzun Moyses karet exqe'ju' wakx, xi' t-sipa'ntzuntz kxolju' aj Leb'i.7Xitq'o'n kab'e' karet ex kyaje' wakx kyeju' tyajajil Kerson, qu'n atoq in nojqelanju' kye toju' kyaq'un.8Xitq'o'n kyaje' karwaj ex wajxaq wakx kyeju' tyajajil Merari, qu'n atoq nojqelanju' kye toju' kyaq'un tjaq' tkawb'il Itamar tk'walju' pale Aaron.9Atzu'n kyeju' tyajajil Kyeat mixti' xitq'o'n karet ex wakx, qu'n atitoq tu'n kxi' kyiqa'nju' ti'xti' xjanqe' ti'j kyqul.
10Tetzunj t-xjansetju' q'olb'eb'l, tzaj kyiq'i'n nejenel kyeju' junjun tnej kyyajajil kyoyaj ex kub' kyq'o'n twitzju' q'olb'eb'l.11Tmatzun Qman Dyostz te Moyses tu'n kypon junxi'chaq junjun nejenel kye junjun kyyajajajil toj junjun q'ij q'olteju' toyaj te xjansb'ilteju' q'olb'eb'l.
12Qu'mtzun teyle junjunju' kab'lajoj (12) nejenel kye junjun tnej kyyajajil pon kyiq'i'n kyoyaj: jun saqpwaq pik'laq, masch'i'n oxe' lib'r talal, ex jun ninlaq saqpwaq, ch'inxmi tz'aqla' kab'e' lib'r talal (kse'nxju' malb'il najb'en toju' ja xjan), nojniqe' tu'n tb'anilxi'x arin xyuq'i'n tuk'i'l aseyt, te jun oyaj twitz awal k'ok'e'kywitz; ex jun qa'npwaq pak', kyaje' ons talal, nojni tu'n sturak, jun qpoj tman wakx, jun tman rit, jun qpoj tman rit te jun ab'q'i tu'n tkub' q'et te chojb'il k'ok'sb'il, jun chib' te chojb'il tu'ntpaj il, ex kab'e' tman wakx te chojb'il te b'inchjtib'il, jwe' tman rit, jwe' chib' ex jwe' qpoj tman rit te jun ab'q'iqe'. Iky e'pona' nejenelju' q'olte kyoyaj kjalu:
Toj tnejel q'ij,
a Naason tk'wal Aminadab', kye tyajajil Juda.
Toj tkab' q'ij,
a Natanael tk'wal Swar, kye tyajajil Isakar.
Toj toxi'n q'ij,
a Elyab' tk'wal Elon, kye tyajajil Sab'ulon.
Toj tkyaji'n q'ij,
a Elisur tk'wal Sedewr, kye tyajajil Rub'en.
Toj tjwe'yi'n q'ij,
a Selumyel tk'wal Surisaday, kye tyajajil Simeon.
Toj tqaqi'n q'ij,
a Elyasap tk'wal Rewel, kye tyajajil Kad.
Toj twuqi'n q'ij,
a Elisama tk'wal Amyud, kye tyajajil Eprayin.
Toj twajxaqi'n q'ij,
a Kamalyel tk'wal Pedasur, kye tyajajil Manases.
Toj tb'eljoji'n q'ij,
a Ab'idan tk'wal Kedeoni, kye tyajajil B'enjamin.
Toj tlajoji'n q'ij,
a Ayeser tk'wal Amisaday, kye tyajajil Dan.
Toj tjunlajoji'n q'ij,
a Pakyel tk'wa' Okran, kye tyajajil Aser.
Toj tkab'lajoji'n (12) q'ij,
a Ayra tk'wal Enan, kye tyajajil Neptali.
84Ikytzun xjanseta q'olb'eb'l, ju' kub' kyq'o'n nejenel kyeju' tyajajil aj Israel, kab'lajoj (12) pik'laq saqpwaqqe', kab'lajoj (12) nimaqlaq saqpwaqqe', ex kab'lajoj (12) pak' q'anpwaqqe'.85Teyile junjun pik'laq saqpwaqqe' masch'i'n oxox lib'r talal, teyile junjun nimaqlaq saqpwaqqe' ch'intlmi tz'aqla' kakab' lib'r talal. Kab'naq wajxaqlajoj (58) lib'r saqpwaq tu'n kykyaqilju' pik'laq ex nimaqlaq, kse'nxju' malb'il toju' ja xjan.86Exju' kab'lajoj (12) pak' q'anpwaqqe' nojniqe' tu'n sturak, kyaje' ons talal junjun, kse'nxju' malb'il toju' ja xjan. Oxe' lib'r q'anpwaq tu'n kykyaqilju' pak'.
87Tu'n kykyaqilju' alu'mj te chojb'il k'ok'sb'il, kab'ljoj (12) qpoj tman wakx, kab'ljoj (12) tman rit, kab'lajoj (12) qpoj tman rit te jun ab'q'iqe', kyuk'i'lxi' kyoyaj twitz awal k'ok'e'kywitz, ex kab'lajoj (12) chib' te chojb'il tu'n tpaju' il.88Atzu'n tu'n kykyaqilju' alu'mj te chojb'il te b'inchjtib'il, junaq kyaje' (24) qpoj tman wakx, oxnaq (60) tman rit, oxnaq (60) chib' ex oxnaq (60) qpoj tman rit te jun ab'q'iqe'. Aye'tzun oyaju' kub' te xjansb'ilteju' q'olb'eb'l, tb'ajlenxi' xjanset.
89Tej tokx Moyses toju' Ja te Mujb'ab'ltib'il tu'n tyolin tuk'i'l Qman Dyos, tb'i nyolin Qman Dyos te tib'aju' tjpel kax k'ub'lteju' yol kyejni b'entti'j, kyxolju' kab'e' kyerb'in. Chik'b'ab'l tu'n kytxqet kantil
1Tzaj tma'n Qman Dyos te Moyses tu'n t-xitma'n2te Aaron, qa aj t-xi' b'inchalkyeju' kandil, tu'n kyokx tq'o'nju' tal kyq'aq'al tu'n kyk'ant twitzxi'ju' kykb'el.3Tb'inchatzun Aaron kse'nxju' tma Qman Dyos te Moyses, eb'aj tb'incha'nju' kandil tu'n kypon k'ant twitzxi'ju' kykb'el.4Q'anpwaq toqju' kykb'el kandil tx'no'n tu'n pojb'il, txi'x ti'ju' tq'uqlil ex japunx kywi'ju' tub'chil. Tb'incha Moyses kykb'el kandil kse'nxju' tilb'ilal tzaj tyek'u'n Qman Dyos te. E'xjanset aj Leb'i
5Tzaj tma'n Qman Dyos te Moyses kjalu:
6Pa'nqemilju'ya aj Leb'i kyi'ju' txqantl aj Israel, ex ẍtilsamqe'ya.7A tu'me'l ja'lu tu'n kẍtilset: Kjawix twitxk'a'na a' te ẍtilsab'l kyib'aj, k'eleltzun kyjso'n kytzmaltz, ex kytxja'ju' kyxb'alun; che kjeltzuntz ẍtilsa'nqe'.8Ktzajel kyiq'i'ntzun jun qpoj tman wakxtz ex ch'i'n tb'anil arin xyuq'i'n tuk'i'l aseyt tu'n tb'inchetju' oyaj te twitz awal k'ok'e'kywitz, ex juntl qpoj tman wakx teju' chojb'il tu'n tpaj il.9Kxe'l tma'na tu'n kytzaj lq'e aj Leb'i tk'etzju' Ja te Mujb'ab'ltib'il, ex tu'n ttzaj kyb'u'yi'n kyib' kykyaqilju' aj Israel.10Che tzajeltzun tiq'i'na aj Leb'i nwitze' ex nche kub'xi' kyq'o'n aj Israel kyq'ob' toj kywi'.11Kxel tb'incha'n Aaron tu'me'l tu'n kytzaj tq'o'n aj Leb'i weye' te kyoyaj aj Israel, che kyjeltzun aj Leb'itz ajb'el weye'.12Kb'el kyq'o'ntzun aj Leb'itz kyq'ob' tib'aj kywi'ju' qpoj tman wakx, juntzunju' qpoj tman wakx kb'el q'et te chojb'il tu'n tpaj il, atzu'n juntl te chojb'il k'ok'sb'il tu'n kyẍtilsetju' aj Leb'i.13Kche tzajel tiq'i'ntzuntza twitz Aaron ex kywitzju' tk'wal, kche kb'el tq'o'ntzuntza nwitze' tu'n kytzaj tq'o'na weye';14ikytzu'n che elel tpa'na aj Leb'i kyi'ju' txqantl aj Israel tu'n kyok te weye'.15Che kxe'ltzuntz ajb'el toju' Ja te Mujb'ab'ltib'il. Che t-ẍtilsa'ya ex che tzajel tq'o'na weye' te jun oyaj nim toklen,16qu'n aye' che ajb'elju' weye' kyxol kykyaqil aj Israel. Mache nk'ame' te kyxel kykyaqilju' tnejel kyk'wal aj Israel,17qu'n weqe'we' kykyaqilju' tnejel kyk'wal aj Israel, exqe' tnejel kyal kyalu'n. Tej kykub' nb'yo'ne' tnejel kyk'wal aj Ejipt, e'kyaj nklo'ne' tnejel kyk'wal aj Israel te weye'.18Matzun che nk'ame' aj Leb'i te kyxel.19E'jaw nsk'o'ne' aj Leb'i kyxolju' txqantl aj Israel, exi nq'o'ntzuntze' te Aaron ex kyeju' tk'wal, tu'ntzun kyaq'unan toj kyb'i aj Israel toju' Ja te Mujb'ab'ltib'il, ex tu'n kyk'monteju' najsb'il kyil aj Israel nwitze'. Mixtzunti'te kche ik'e'la' aj Israeltz tu'nju' lay che'x lq'e tk'etzju' ja xjan, Chi Dyos te Moyses.
20Kyb'inchatzun Moyses tuk'i'l Aaron ex tkyaqilju' tnam Israel kse'nxju' tchaq' Qman Dyos te Moyses kyi'ju' aj Leb'i.21Kyẍtilsa kyib'ju' aj Leb'i ex kytx'aju' kyxb'alun, exitzun tiq'i'n Aarontz te oyaj nim toklen twitz Qman Dyos, xitb'incha'nju' tu'me'l tu'n kyẍtilset.22Tb'ajlenxi'tzun b'ent tkyaqil ja'lu, exi' aj Leb'i b'inchalte kyaq'un toju' Ja te Mujb'ab'ltib'il, tjaq' kykawb'il Aaron kyuk'i'lju' tk'wal. Ikx b'inchetju' kye aj Leb'i kse'nxju' tchaq' Qman Dyos te Moyses. Kyab'q'i aj Leb'i tu'n kyajb'en
23Tzaj tma'n Qman Dyos te Moyses kjalu:
24Te junaqjo' (25) ab'q'iqe' aj Leb'i ajttzyet kyajb'en toju' Ja te Mujb'ab'ltib'il,25ex te kab'naqlajoj (50) ab'q'iqe' ajkyel.26Ajtzun tik'ju' kyab'q'i lu b'a'n tu'n kyonin kyi'ju' kyuk'i'l toju' Ja te Mujb'ab'ltib'il, naq aju' mixti' tu'n kyajb'entl kse'n tnejel. Iktzun che tnk'u'ju'ya aj Leb'i toju' kyaq'un, chi Dyos. Ik'sb'ilte Tq'ij Tzaqpib'l
1Tzaj yolin Qman Dyos te Moyses toju' chq'ajlaj Sinayi tb'ajlenxi' jun ab'q'i kyetzlen aj Israel Ejipt, toj tnejel xjaw teju' ab'q'i, tma kjalu:
2Ati tu'n kyik'sante aj Israel q'ij te Tzaqpib'l toju' tq'ijlalil q'ma'ntl,3ajtok qale toj tkyajlajoji'n q'ij teju' xjaw lu, kb'el kyik'sa'ne' kse'nxju' nuk'b'il tz'ib'a'n, chij.
4Tchaq'tzun Moysestz kye aj Israel tu'n tkub' kyik'sa'nju' q'ij te tzaqpib'l,5ex kub'kyik'sa'n toj tkyajlajoji'n q'ij teju' xjaw lu tej tok qale toju' chq'ajlaj Sinayi, kyb'incha kse'nxju' tchaq' Qman Dyos te Moyses.
6Ate'toqtzun junjun ichan mixti' b'ent kyik'santeju' q'ij te Tzaqpib'l toju' q'ij lu, qu'n tz'ilqe'toq tu'n tpaj xi' kytzyu'n jun kyimni. Textzunju' q'ij lu exi' jyolkye Moyses ex Aaron,7ex xikyma'n te Moyses ikjalu:
—Matxi qtzyu'ne' jun kyimni, qu'mtzun tz'ilqo'ye'. ¿Ma laytzun tz'ajli tu'n t-xi' qiq'i'ne' qoyaje' twitz Qman Dyos toju' q'ij q'ma'ntl junx kyuk'i'lju' txqantl aj Israel? chechij.
8Atzunte Moyses xittzaq'we'n kye ikjalu:
—Kyyome' nej tzmaxi'j aj nk'monteye' tzaq'web'l tu'n Qman Dyos kyi'je', chij.
9Tzajtzun tma'n Qman Dyos te Moyses tu'n t-xitma'n kye aj Israel kjalu:
Ati tu'n kyik'sante'ye' Q'ij te Tzaqpib'l kykyaqilxe' kyuk'i'lju' kyyajajile' te ninb'ilweye'. Aye'tzu'n tz'ilqe' tu'n tpaj matxi kytzyu'n jun kyimni, mujqa mache'x toj kyb'e najchaq,11kb'el kyik'sa'n ajtok qale toj tkyajlajoji'n tajlalju' tkab' xjaw. Kxel kych'yo'nju' rit tuk'i'l k'a itzaj ex wab'j mixti' ttx'amal,12mixti' tu'n tkyaj kyklo'n te juntl q'ij ex mixti' tu'n tkub' kytoqi'n jun b'aq. Kb'el kyik'sa'nju' Q'ij te Tzaqpib'l kse'nxju' nuk'b'il matxi' b'ajx nq'o'ne'.13Alkyetzunte min xtik'saju' Q'ij te Tzaqpib'l extzun mya tz'il ex min xini toj tb'e najchaq, ati tu'n tex iq'et kyxolju' twanaqil. Mina'jon xtaq'ju' toyaj weye' ayine' Dyos Manb'aj toju' tq'ijlalil q'ma'ntl, kb'el tz'e'yset twitz tu'n tpaju' til.
14Exqe' najchaq xjal ate'qe' kyxole' ati tu'n kyik'santeju' Tq'ij Tzaqpib'l te ninb'ilweye' kse'nxju' nuk'b'il matxi' b'ajx nq'o'ne'. Aye'x nuk'b'ilju' che ajb'el kye te najchaq xjal ex kyeju' itz'jniqe' tojxju' tx'otx', chi Dyos. Muj tib'aj tjaju' yol kyejni b'entti'j (Ex 40.34-38)
15Kub' jupe' muj tib'aju' ja xjan toju' q'ij tej tjaw b'incha'n, aju' ja teju' yol kyejni b'entti'j tu'n Qman Dyos. Ajtzun qok yupj intoq jawb'ent jun tnej q'aq' tib'aju' ja xjan ex inten tzmaxi'j ajqsqix.16Ikytoqtzun in b'aj ju' kukxju': intoq kub' jupe' muj tib'aju' ja xjan te q'ijl, atzu'n te qonik'an jun tnej q'aq'.17Aj tjawju' muj tib'aju' ja xjan, intoq che ik'b'etju' aj Israel, jatzun makub'a' tena'ju' muj, atzuntzu' inche kub' tena'puntl.18Intoq che ik'b'etju' aj Israel ajtmante Dyos, mujqa intoq che kub'ten ja matmaya' Qman Dyos, axtzuntzu' nche kyeja' ten tkyaqilu' tq'ijlalil qa atiju' muj tib'aju' ja xjan.19Qama kyej tenju' muj nimtoj tib'aju' ja xjan, axtoqtzu' ta'qe' aj Israel tu'n kyajb'en te Qman Dyos.20Qatzun naqjte'x q'ij nkyajtenju' muj tib'aju' ja xjan, tu'n tchaq'b'il Qman Dyos nkub' b'e kyu'n ex tu'n tchaq'b'il nche kub' tentl.21Ati maj naqtoq jun qonik'an in kyej tenju' muj, ex intoq jaw te prim; intoq che ik'b'ettzuntz. Qa q'ijl mujqa qonik'an, aj tjawju' muj, intoq kub' b'e kyu'n.22Qatzun makub' ten kab'e' q'iju' muj, mujqa jun xjaw mujqa jun ab'q'i tib'aju' ja xjan, intoq che kyejten aj Israel ex min nxikyljo'n kyb'e. Naqtzun qa xjawju' muj, intoq xikyljo'n aj Israel kyb'e.23Ajtmante Qman Dyos, intoq che kub'ten, ex ajtmantetl Qman Dyos, intoq kub' b'e kyu'n. Nche ajb'enxi' te Qman Dyos, kse'nxju' tchaq' te Moyses. Chun saqpwaqqe'
1Tzaj tma'n Qman Dyos te Moyses kjalu:
2B'inchanku'ya kab'e' chun saqpwaqqe' tx'no'nqe' tu'n pojb'il, che ajb'el tu'na txokb'ilkye xjal ex tu'n t-xi' q'et techlal tu'n kyik'b'et.3Ajtzun kyq'ajtzetju' kab'e' chun, kykyaqilju' tnam kyb'uyi'kyib' twitza ttziju' Ja te Mujb'ab'ltib'il tuk'i'l Dyos.4Qatzun naq jun xxi'q'ajtzet, o'qe'kxju' nejenel kye junjun tnej kyyajajil kyb'uyi'kyib'.5Qatzun mujliju' kyq'ojq'ojel chun kyuk'i'l sich' kuw, kche ik'el b'etju' ate'qe' toj tjawetzq'ij,6tojtzun tkab' tq'ojq'ojel chun kche ik'el b'etju' ate'qe' toj tnayajkya'j. Qa mujliju' kyq'ojq'ojel chun kyuk'i'l sich', a intma'nju' tu'n kyik'b'ete'.7Qatzun naq o'kxju' kyq'ojq'ojel chun, a intma'nju' tu'n kyb'uyinte kyib' xjal.8Aye'ju' pale tyajajil Aaron kche q'ajtzalkyeju' chun. Jun kawb'ilte' lu majx kjelten kyeye'.
9Qama tz'ok tzaqpaj jun ajq'oj q'ojil kyi'je' toju' kytx'otx'e' ex ati tu'n kyexe' q'ojil, kyq'ajtzanqe'xe' chun ex che ẍch'inqe'ye' kuw. Kche tzajel nna'ntzuntze' ex kche kletele' wu'ne' kyeju' kyajq'oje', ayine' Dyos Manb'aj.10Ex che kyq'ajtzanqe'xju'ye' chun kyoj q'ij te tzalajb'il, kse'nqe' ninq'ij mujqa q'ij te ak'a'j xjaw, aj t-xi' kyq'o'ne' chojb'il k'ok'sb'il ex chojb'il te b'inchjtib'il. Oktzun che tzajel nna'ne'. Ayine' Dyos Manb'aj, chi Dyos te Moyses. Tej kyik'b'et aj Israel toj chq'ajlaj Sinayi
11Toj tjunaqi'n (20) q'ij teju' tkab' xjaw te tkab' ab'q'i, jawju' muj tib'aju' ja xjan teju' yol kyajni b'antti'j.12Kub' b'e kyu'n aj Israel, e'ik'b'et toju' chq'ajlaj Sinayi. Atzu' we'ya'ju' muj toj chq'ajlaj Paran.13Kse'nx ojetoq tchaq' Qman Dyos te Moyses,14nejlqe' xjal te q'oj nche b'et tjaq' tb'ander Juda, atoq Naason tk'wal Aminadab' nejenel kye.15Nejlitoq Natanael tk'wal Swar kywitzju' xjal te q'oj kye tyajajil Isakar.16Nejlitoq Elyab' tk'wal Elon kywitzju' xjal te q'oj kye tyajajil Sab'ulon.17Kub'tzun kyxitu'nju' ja xjan, ex e ik'b'etju' tyajajil Kerson ex tyajajil Merari, aye' iqalte' ja xjan.
18Kyi'jxi'tzuntl, lepchqe'xtoqju' xjal te q'oj inche b'et tjaq' tb'ander Rub'en, ju' atoq Elisur tk'wal Sedewr nejenel kye.19Nejlitoq Selumyel tk'wal Surisaday kywitzju' xjal te q'oj kye tyajajil Simeon.20Nejlitoq Elyasap tk'wal Rewel kywitzju' xjal te q'oj kye tyajajil Gad.21Kyi'jxi'tltzun lepchqe'xtoqju' tyajajil Koat, aye' iqalkyeju' ti'xti' xjanqe'. Ajtzun kypon matxi'toq b'aj b'incha'nju' ja xjan.
22Kyi'jxi'tl ja'lu lepchqe'xtoqju' xjal te q'oj inche b'et tjaq' tb'ander Eprayin, ju' atoq Elisama tk'wal Amyud nejenel kye.23Nejlitoq Kamalyel tk'wal Pedasur kywitzju' xjal te q'oj kye tyajajil Manases.24Nejlitoq Ab'idan tk'wal Gedeoni kywitzju' xjal te q'oj kye tyajajil B'enjamin.
25Tetzun b'asb'il, kyi'jxi'ju' txqantl xjal te q'oj, lepchqe'xju' inche b'et tjaq' tb'ander Dan, ju' atoq Ayeser tk'wal Amisaday nejenel kye.26Nejlitoq Pakyel tk'wal Okran kywitzju' xjal te q'oj kye tyajajil Aser.27Nejlitoq Ayra tk'wal Enan kywitzju' xjal te q'oj kye tyajajil Neptali.
28Atzun nuk'b'enkye xjalju' te q'oj kxol aj Israel tej tkub' b'e kyu'n. Xitk'le'n Moyses tb'alok
29Jun q'ij xitma'n Moyses teju' tb'alok Ob'ab', tk'wal Rewel ju' aj madyan:
—Maqo'xqe' toju' tx'otx' oje tma Qman Dyos tu'n ttzaj tq'o'n qeye'. Qo'ya quk'i'le' ex kqb'incha'qe' b'a'n teya, qu'n oje tma Qman Dyos tu'n tb'inchante b'a'n kye aj Israel, chij.
30Atzunte Ob'ab' xittzaq'we'n te ikjalu:
—Lay, awe' wajb'il tu'n tanjwi'je' toj ntx'otx'e' ja ta'qe' nwitze'le', chij.
31Lalun txi'ya, chi Moyses te. Tojtzqi'nta b'a'nxi'x ja b'a'n tu'n qkub' tena' toj chq'ajlaj, ex b'a'n tu'n tkub'neja qwitze'.32Qama tzaja quk'i'le', kkotzila quk'i'le' ti'ju' tb'anil ktzajel tq'o'n Qman Dyos qeye', chi Moyses te.
33E'ik'tzuntz tk'etzu' witz te Qman Dyos, oxe' q'ij eb'et. Nejlitoqju' kax k'ub'lteju' yol kyejni b'entti'j tu'n Qman Dyos kywitz, jyolte jun najb'il jatu'n kyojlana'.34Naq inb'ent kyik'b'et te q'ijtl, intoq b'etju' muj te Qman Dyos kyib'aj.35Ajtik' iqa'nju' kax, intoq tma'n Moyses ikjalu:
¡Iq'i'nktz tib'a Na'n Dyos! ¡Che kub'xwit sputju' tajq'oja!
¡Che kub'xwit oqju' inche el ik'unteya aj t-xi' ka'yi'na kyu'n! chij.
36Ajtzun twe'ju' kax, intoq tma'n Moyses ikjalu:
¡Kutzaja ja'lo Nman Dyos, kyuk'i'lju' txqan kyxjal aj Israel te q'oj! chij. Ttziya Qman Dyos tu'n ttzaj tq'o'n kychi' aj Israel
1Jun q'ij e'aq'wi aj Israel yolil ti'j Qman Dyos tu'n tpaju' yajb'il intoq che ik'a'. Tej tb'inte Qman Dyos, tzaj ttx'u'jil kyi'j ex tzaj tq'o'n jun q'aq' ti'jileju' najb'il jata'qe'toq.2E' b'jawtzun ẍch'inju' tnam ex xikyqani'n o'nb'il te Moyses, atzunte Moyses kub'san twitz Qman Dyos kyi'j, kub'tzun yupj q'aq'tz.3Qu'mtzun okq'o'n tb'iju' najb'il lu, Tab'era, qu'n atzu' k'anta' tq'aq' Qman Dyos kyi'j.
4Nim xjal ojetoq che tzaj kyuk'i'l aj Israel naq o'kxtzu' nche ximana' ti'j kychi'. Aye'tzu'n aj Israel elkykno'n kyi'ju' xjal lu, e'aq'witzuntz oq'el, intoq kyma'n: ¡Noqwit ati qchi' tu'n qch'yon chib'j!5¡Majx nche ul julky'ajkye' kyiẍ toj qk'u'j intoq qch'yo'n Ejipt noq kukx! Ex atitoq qlo' pepin, melon, pwer, ex qchi' seb'oy ex anẍ.6Atzunte' ja'lo in qo kyim tu'n we'yaj, ex mixti' juntl tu'n t-xiqwan, noq o'kx mana nqwan, chechij.
7(Ch'intlmi ika' mana kse'n tijajil kulantr; q'aninin ka'yin kse'n q'ol,8ik tk'ok'jalu' kse'n muqin te arin b'incha'n tuk'i'l aseyt. Intoq che exju' xjal iq'ilte, ex inkub' kychen mujqa inkub' kytx'no'n, in kux kytzq'ajsa'ntzuntz mujqa inkub' kyb'incha'n kse'n wab'j.9Ajtzun tkub' ta'l che'w te qonik'an, in kub'tlju' mana.)
10Tb'i Moyses qa intoq che oq' aj Israel kyuk'i'lju' toj kyja ttziyile kyja. Matxitoq tzaj ttx'u'jil Qman Dyos b'a'nxi'x kyi'j. Ex ikxte Moyses tzaj toj twitz,11ex xitma'n te Qman Dyos kjalu:
—¿Tiqu'n myab'a'n wilwiye' tu'na, extzun ayine' tmajina? ¿Titi' wile' teya, matxi' tz'ok tq'o'na tnam lu te wiqatze'?12¿Ma ayintzunwe' manb'aj mujqa txub'aj kye, tu'nju' intzaj tma'na tu'n kyxi' wiq'ine' chle'nqe' toj nq'ob'e' kse'n jun ne'ẍ akxtoq in ch'u'n, tzmajx toju' tx'otx' tzaj ttziya'na kyeju' qchmane'?13¿Jatzun ktzajela' kychi' kykyaqilju' xjal lu wu'ne' tu'n t-xi' nq'o'ne' kye? Inxi'x che ul oq'el nwitze' ex inkyma'n: q'ontza qchi'ye', chechij.14Layx tzik'xtl wu'ne' tu'n kyxi' wiq'i'nju'ye' tnam lu; nimxi'xte' jun iqtz lu weye'.15Qa kukx machinxa'ju'ye' tu'na, masb'a'n iq'imila nchwinqlale' qa majx b'a'n wilwiye' tu'na. Tu'ntzun lalun chin yajtitle', chi Moyses.
16Atzunte Qman Dyos tzaj ttzaq'we'n te kjalu:
—B'uyinqe'tza oxnaq lajoj (70) tijwnaq aj Israelqe', aye'ju' b'i'nqe' tu'na qa ati kyoklen toju' tnam ex q'inqe'tza toju' Ja te Mujb'ab'ltib'il ex tu'n kyayon tk'etza atzu'.17Kchin b'eletze' ex kchin yolile' tuk'i'la, ex k'elel wiq'i'n jni'ju'ye' xewb'aj ati teya ex kxe'l nq'o'ne' kye, tu'ntzun kyonin tuk'i'la tu'n t-xi' iq'etju' tnam lu. Myatzun tjunaltza.18Ex q'manxa kyeju' tnam tu'n kyẍtilsante kyib' te najchi'j, ex che ch'yol chib'j. Matxi' nb'iye' nche oq' ex inkyma'n kjalu: ¡Noqwit ati qchi'ye' tu'n qch'yonteye'! ¡B'a'ntoq ta'qo'ye' Ejipt!, chechij. Ja'lotzun kxe'l nq'o'ne' kychi' tu'n kych'yon chib'j,19ex myanoq jun q'ij mujqa kab'e' q'ij, mo noq jwe' q'ij, mo lajoj (10) q'ij mujqa junaq (20) q'ij, mya.20Kche ch'yol ale'x toj jun xjaw, tzmax ajtb'je'tz toj kytxa'n ex tzmax ajtik'on kyk'u'j te, qu'n matxi' chin el kyik'o'ne' ayine' Dyos Manb'aj atinqine' kyxol, matxi' che oq' ex matxi' kyma nwitze': ¿Tiqu'n xqo etza' toj Ejipt? chechij, chi Dyos.
21Atzunte Moyses xittzaq'we'n te Dyos kjalu:
—Oxnaq o'lajoj mutx' (600,000) kyb'aju' ichan toju' tnam nche b'et wuk'i'le', ¿extzun intma'na qa ktzajel tq'o'na qchi'ye' ale'x te jun xjaw?22¿Jatzun ktzajela' txqan rit ex wakx tu'n kykub' b'yet ex tu'n kykanun te kykyaqil? Maskyepe' mache'x qq'o'ne' tkyaqilju' kyiẍ toj ninnjab' layx kanun kye, chij.
23Atzunte Qman Dyos tzaj ttzaq'we'n te kjalu:
—¿Manaqch'i'n wipumale' teya? Ktla'ya ja'lo qama japunju' xnmaye' mujqa lay, chij. Oxnaq lajoj (70) tijwnaq e'yolin kse'nqe' t-sanjelal Dyos
24Etztzun Moyses ex xitma'n kye tnam tkyaqilju' tma Qman Dyos, ex e'tzaj tb'u'yi'n oxnaq lajoj (70) tijwnaq aj Israelqe', e'xi' ttxoli'ntzuntz ti'jileju' Ja.25Ku'tztzun Qman Dyostz toj muj ex yolin tuk'i'l Moyses, eltzun tiq'i'n nik'janju' xewb'aj ati te Moyses, ex xitq'o'n kyeju' oxnaq lajoj (70) tijwnaq. Naqtzun nb'ant ttenju' xewb'aj kyib'aj, e'aq'wi yoli kse'nqe' t-sanjelal Dyos; atzunju' lu mixti' b'inchet jumajtl.
26Ate'tzun kab'e' ichan, Eldad tb'iju' jun, atzu'n juntl Medad, aye'jun e'jaw sk'o'n kyxolju' oxnaq lajoj (70), extzun min e'xi' toju' Ja, axtzu' e'kyaja'ten toju' xmuj. Ex kub' tenju' xewb'aj kyib'aj, e'aq'witzuntz yolil kse'nqe' t-sanjelal Dyos toju' xmuj.27Xi'tzun jun q'atz ojqel q'malte te Moyses ikjalu:
—¡Aye'kye' Eldad ex Medad inche yolin kse'nqe' t-sanjelal Dyos toju' najb'il! chij.
28Atzunte Joswe, tk'wal Num, ju' intoq onin tuk'i'l Moyses atxi'x toj tku'xumal, tma kjalu:
—¡Qman Moyses, myonqe'xa tu'n lalun kyb'incha! chij.
29Atzunte Moyses xitzaq'we'n te:
—¿Ma inaj xkyaq'lina wi'je'? ¡B'a'n pena' nawit tzaj tq'o'n Qman Dyos t-xew kye kykyaqilju' ttanam ex tu'nwt kyok kykyaqil te t-sanjelal! chij.
30Anjtzun kyi'j Moysestz kyuk'i'lju' tijwnaq aj Israel toju' najb'il. E'tzaj tq'o'n Qman Dyos tz'chin
31Tzajtzun t-xupi'n Qman Dyos jun kyq'iq' toj ninnjab', tzaj tiqa'n txqan tz'chin, eb'aj kub' tz'aq toj ex ti'jile kyxmuj aj Israel ex ti'jile, qapelo jun q'ij b'e eb'jik'a' ti'jileju' kynajb'il, ex qapelo jun metr e'jawa' ten twitz tx'otx'.32B'ajku' kab'e' q'ij ex jun qonik'an kyu'nju' xjal intoq che jawkyiq'i'n tz'chin. Aju' noq jni'x b'uyet tu'n, lajoj chquj tz'chin b'ent tu'n, b'ajkub' kytzqijsa'n ti'jeleju' kynajb'il.33Akxtoqtzun ttzyet kych'yonte aj Israel kychi' tz'chin tej ttzaj tx'u'jil Qman Dyos kyi'j ex kub' tz'e'ysa'n kywitz, nim xjal e'kyim tu'n.34Qu'mtzun oka' q'o'n tb'iju' najb'il lu, Kyib'rot-ataab'a, qu'n atzu' e ku'xa' kymqu'nju' noq o'kxtzu' toka' kyk'u'j ti'j kychi'.
35E ik'b'ettzun tnamtzu' Kyib'rot-ataab'a ex tzmaxtzu' epona' Aserot, atzuntzu' e'kyaja' ten. E'yolin Mariy tuk'i'l Aaron ti'j Moyses
1E' aq'wi Mariy tuk'i'l Aaron yolil taq'wix ti'j Moyses, qu'n mje tuk'i'l jun qya aj Etyope.2Expe' kyma kjalu: Myana' o'kx tuk'i'l Moyses matxi' yolina' te Qman Dyos; ex ikx matxi' yolin quk'i'le', chechij. Ex tb'i Qman Dyos kyol.
3O'kxtoq te Moyses jun ichan me'sxi'x twitz tx'otx'.4Qu'mtzun tzaj tma'n Qman Dyos kye Moyses tuk'i'l Aaron ex Mariy tu'n kyxi' kyoxil toju' Ja te Mujb'ab'ltib'il.
Exi'tzuntz kyoxil atzu'.5Ku'tztzun Qman Dyostz toj jun tnej muj jupli ex kub'ten ttziju' Ja; exi' ttxko'ntzun Aarontz tuk'i'l Mariy, tetzunj kypon twitz6tzaj tma'n Qman Dyos kye kjalu:
kyb'intzju'ye' kxe'l nma'ne' kyeye' lu: Qa ati jun nsanjelale' kyxole', inchin yoline' tuk'i'l toj naku'j witzik' ex inchin yoline' tuk'i'l toj witzik';7atzu'n tuk'i'lju' nmajine' Moyses mikxa' nb'incha'nju'ye'. Nxi'x japunte tu'n kyekywitz kykyaqilju' nmajine',8mojli qwitze' inchin yoline' tuk'i'l ex toj jun yol chik'lixi'x. Qatzun inchin tka'yi'ne', ¿tiqu'ntzun inche yolina'ye' taq'wix ti'j?, chi Dyos.
9Tzaj ttx'u'jil Qman Dyos b'a'nxi'x kyi'j, xi'tzuntz.10Naqtzun in jawju' muj tib'aju' Ja, etz b'ent xlemtx'a'k ti'j Mariy, majx kyej saqaxju' tchib'jil. Tetzunj t-xi' ka'yin Aaron te Mariy, til qa matxitoq kub' b'ent toj xlemtx'a'k,11xitma'ntzuntz te Moyses kjalu: B'inchama xtalb'il, lan kub' ttz'e'ysa'na qwitze' tu'nju' qile' lu, qu'n mixti' qnab'le' xqb'inchaye'.12Lalun taja tu'n tkyejten kse'n jun ne'ẍ kyimnitl ajtitz'ji, ju' in itz'ji tuk'i'lu' tchib'jil naqx in t'uqjtl, chij.
13Kub'santzun Moysestz te Qman Dyos ex tma: Nman Dyos, b'inchama t-xtalb'il, q'anama, chij.
14Atzunte Qman Dyos tzaj ttzaq'we'n te kjalu:
Naqwit tz'ok tzub'a'n toj twitz tu'n tman, kb'el ch'ixwi wuq q'ij. Kyq'omix wuq q'ije' ti'jxi'ju' najb'il, yajxi'tzuntel b'a'n tu'n tanjtztlti'j kyxole', chij.
15Exq'i'ntzun wuq q'ij Mariy ti'jxi'ju' najb'il. Tojtzunju' tq'ijlalil lu minti' e' ik'b'etju' tnam atzu'.16Tetzunj tpon jumajtlju' Mariy kyuk'i'l, e'ik'tzun b'ettz e'tzajx Aserot, ex e'kub' tenpuntl toju' chq'ajlaj Paran. E'xitchq'o'n Moyses jte' ichan ka'yilteju' tx'otx' kanaan (Dt 1.19-25)
1Tzaj tma'n Qman Dyos te Moyses kjalu:
2Chq'onqe'xa jte' ichan tu'n kyka'yinteju' tx'otx' Kanaan kxe'l nq'o'ne' kye aj Israel. Chq'onxa junjun ati toklen kyxol junjun tnej kyyajajil, chij.
3Exi'tzun tchq'o'n Moyses kse'nx tchaq' Qman Dyos te, e'tzajx toj chq'ajlaj Paran. Kykyaqil atitoq kyoklen kyxol aj Israel,4aye' ja'lu:
a Samuwa tk'wal Sakur,
kye tyajajil Rub'en;
ex Sapat tk'wal Ori,
kye tyajajil Simeon;
ex Kaleb' tk'wal Jekoni,
kye tyajajil Juda;
ex Ikar tk'wal Jse,
kye tyajajil Isakar;
ex Osey tk'wal Num,
kye tyajajil Eprayin;
ex Palti tk'wal Rapu,
kye tyajajil B'enjamin;
ex Kadyel tk'wal Sodi,
kye tyajajil Sab'ulon;
ex Kadi tk'wal Susi,
kye tyajajil Jse (Aju' tyajajil Manases);
ex Amyel tk'wal Wemali,
kye tyajajil Dan;
ex Setur tk'wal Mikael,
kye tyajajil Aser;
ex Nab'i tk'wal B'apsi,
kye tyajajil Neptali;
ex Kewel tk'wal Makyi,
kye tyajajil Kad.
16Aye'tzun kyb'i ichan ja'lu exi' tchq'o'n Moyses ka'yilteju' tx'otx'. El tch'exb'e'n tb'iju' Osey, tk'wal Num, ex oktq'o'n te Joswe.
17Exi'tzun tchq'o'n Moyses ka'yilteju' tx'otx' Kanaan, ex xitma'n kye ikjalu:
—Kukyxi'ye' tu'me'l Neweb' ex kukyjawxe' toju' tx'otx' twi' witz.18Kyka'yime' kse'n tx'otx' ex kse'nqe'ju' xjal najliqe' atzu', qa kuw xjalqe' mujqa mya, exqa naqjni'x kb'aj mujqa nim kyb'aj.19Kyka'yime' qa pach xb'alunqe' nimaqktanam mujqa kuwsa'nqe' tu'n nimaqtapi, ex qa b'a'nju' tx'otx' janajla'qe' mujqa taq'wix,20ntzaj tawal mujqa min, ate' tze toj mujqa mixti'. Lalun che xob'e'; kyiq'intz junjun lob'je' ntq'o'nju' tx'otx' lu, chij kye.
Akxtoq njaw tnejel twitz ub'a tej kyxitchq'o'n.21E'xi'tzuntz ka'yilteju' tx'otx', tzajx toju' chq'ajlaj Sin toj tb'a'nq'ob'kya'j, e'pon tzmax Reob' toj tnayajkya'j, ttzi Amat.22E'okx toj Neweb', ex e'pon tzmax Eb'ron. Janajla' qe'toq Ayman, Sesay ex Talmay, tyajajil Anak qe' ex nimaq kywe'. Wuq ab'q'i nejtl tjaw b'incha'n Eb'ron kyetwitz Soan toj Ejipt.23E' pon tzmax jata'ju' a' Eskol, tzaj kytx'emu'n jun tq'ob' ub'a txijli twitz atzu', kab'e'tzun kyb'aj e'tzaj iqante yob'a'n ti'j jun tze, ex tzaj kyiq'i'n kranad ex lob'j iw.24Eskol tb'iju' a' lu okkyq'o'n, qu'n atzu' tzaja' kytx'e'mu'n aj Israel tq'ob' lob'j.
25Tb'ajlenxi'tzun kyka'yi'nju' tx'otx' toj kawnaq q'ij, anjtzkyi'j26Kades, toju' chq'ajlaj Paran. Atoqtzu' ta'qe' Moyses, Aaron ex kykyaqil aj Israel. B'ajx kyma'n kye tkyaqilju' kyil ex xikyek'u'n lob'j ntzaj toju' tx'otx' lu.27Xikyma'n te Moyses kjalu:
—Maqo tx'anje' toju' tx'otx' jaxqo'xa' tchq'o'na. Axxi'x jun tb'anil tx'otx'te' lu, ex aye' lob'ju' lu nche tzaj toj.28Naqtzun aye'ju' xjal najliqe' atzu' kuwqe', ex nimaqqe' nimaqkytanam kuwsa'nqe' kyu'n nimaqtapi. Expe' e qile' tyajajilju' Anak nim twe'.29Atzu' najlqe' amalek toju' tx'otx' Neweb', aye'tzu'n itit, jeb'usey ex amorey, najlqe' kywi' witz, aye'tzu'n aj Kanaan najlqe' ttzi ninnjab' tk'etzju' nin a' Jordan, chechij.
30Atzunte Kaleb' majx e'kub' numeju' tnam ate'toq twitz Moyses tu'n, ex tma kjalu:
—¡Kqo xe'l q'ojil ti'ju' tx'otx' lu! ¡Kb'elte'ti'j qu'n! chij.
31Aye'tzuntlju' exi' tuk'i'l, xikytzaq'we'n:
—¡Lay, layxna' b'entte' qq'ojin kyi'ju' xjal lu! Kuw qe'xi'xnakye' xjal lu kyeqwitzqe, chechij.
32Ex e'okten q'malte kye aj Israel qa mya'l qe'ju' xjal toju' tx'otx' ext'anj ka'yilte. Intoq kyma'n ikjalu:
—Aye'kye' tnam oxt'anje' ka'yilte nche kyb'yo'nju' xjal najlqe' toj, ex kykyaqilju' ichan e'qile' atzu' nimaqqe' b'a'nxi'x.33Expe' e qile' xjal nimaq kywe', aye' tyajajil Anak. Ajqkub' we'ye' kytxlaj, naku'j ẍt'ikt'u'lqoye' kye toj qwitze', ex ikx in qo ela'ye' toj kywitz, chechij. Jawkyi'nkyib' aj Israel ti'j Qman Dyos (Dt 1.26-33)
1E'aq'witzu'n aj Israel ẍch'il, ex b'aj qonik'an kyu'n tu'n kyoq'.2Kykyaqil e'aq'wi q'mal taq'wix kyi'j Moyses ex Aaron. Nkyma'n: ¡Noqwit axtzu' xqo kyaja' kyime' toj Ejipt, mujqa tzalu toj chq'ajlaj!3¿Titiqu'n xqo tzaja' tiq'i'n Qman Dyos toju' tnam lu? ¿Ma tu'n qkyim toj q'oj, tu'n kykyaju' qxu'jil exqe' qk'wal toj kyq'ob' ajq'oj? ¡Ate b'a'nju' tu'n tanjqi'j Ejipt! chechij.4E'aq'witzuntz q'malte kyxolilex: ¡Qq'ok jun nejenel qe tu'n tanjqi'j Ejipt! chechij.
5E'kub' meje Moyses tuk'i'l Aaron, majx ku'punju' kyplaj twitz tx'otx' kywitz tkyaqilju' tnam,6aye'tzu'n Joswe ex Kaleb', ju' exi' ka'yilteju' tx'otx', kub' kylaqu'nju' kyxb'alun te techlal k'ixk'oj7ex xikyma'n kye kykyaqil aj Israel kjalu:
—¡Tb'anilxi'xnate' tx'otx' o'xi'ye' ka'yilte!8Qama tzaj q'aq'an tk'u'j Qman Dyos qi'j, kqo toni' tu'n qokx toju' tx'otx' lu ex ktzajel tq'o'n qe. Tb'anilte' tx'otx' lu tawal ntzaj.9Naqtzun aju' lalun jaw kyi'nkyib'e' ti'j Qman Dyos, ex lalun che xob'e' kyeju' xjal toju' tx'otx' lu, qu'n kche b'ajelkye' qu'n kse'n qwa, mixna'ti'kye klol kye, atzunqe ati Qman Dyos quk'i'l. ¡Lalun che xob'e'! chechij.
10Tuk'i'lxi'petzu'n chik'b'ab'l lu, kyajb'iltoqju' xjal tu'n kyb'aj kyxon toj ab'j. Kub'tzun tyek'u'ntib' tajwalil Qman Dyos toju' Ja te Mujb'ab'ltib'il, kywitzku' kykyaqil aj Israel,11ex tzaj tma'n Qman Dyos te Moyses kjalu:
—¿Ma kukx wel kyik'o'n tnamju'ye' lu? ¿Ma kukx kyjawjeju' wi'je', extzun matxi' che nb'inchaju'ye' b'a'nq'ob'aj kyxol?12Ktzajel nq'o'n jun yab'ile' kyib'aj tu'n kykyim, tu'ntzun lalun b'ent kyokx toju' tx'otx' lu; ti'jtzunta k'elela' jun nintnam wu'ne' ex kuwqe'xi'x kyekywitz, chi Dyos.
13Atzunte Moyses xittzaq'we'n te Qman Dyos:
—Tuk'i'l tipumala etza' tiq'i'nju'ya tnam lu Ejipt. Ajtzunlo kyb'inte aj Ejiptju' ktb'incha'ya,14Oklo kxe'l kyma'n kyeju' najliqe' toju' tx'otx' Kanaan. Expena' oje kyb'i qa atiya Nman Dyos kyxolju' tnam lu, exqa in tyek'u'nku' tib'a' kywitz ex atiju' tmuja kyib'aj, exqa nejliya kywitz toj jun tnej muj te q'ijl, atzu'n te qonik'an toj jun tnej q'aq'.15Qama kub' tb'yo'na tnam lu te jun kmujx, ktzunlo kyma' nimaqtnam b'ilte b'a'n yolb'ilteya kjalu:16Min xb'ent kyokxju' tnam lu tu'n Dyos Manb'aj toju' tx'otx' ojetoq ttziya tu'n ttzaj tq'o'n kye, qu'mtzun ẍe kub'a' tb'yo'n toj chq'ajlaj, chechilo.17Qu'mtzun Nman Dyos, yek'uma tipumala nim ja'lo kse'nxju' oje ttziyaya. Ojena' tmaya18qa minti' intzaj ttx'u'jila lwiy, qa nimxi'x tk'u'jlalila ex inkub' tnajsa'na il ex pi'sil, ex myanaqwit in ka'yina ti'ju' ati til, ilti'j intq'o'na tz'e'ysb'il witzb'aj tu'n tpaj til manb'aj kyi'ju' tk'wal, kyi'ju' tchman, kyi'j kyk'wal tchman ex kyi'j kychmanju' tchman.19Nimna'ta tk'u'jlalil, najsanku'ya tilju' tnam lu, matxina' tenxi' tpasensi kyi'j atxi'x kyetzlen Ejipt ex atix ja'lo toju' najb'il lu, chi Moyses te Dyos. Kub' ttz'e'ysa'n Qman Dyos kywitz aj Israel (Dt 1.34-40)
20Tzaj ttzaq'we'n Qman Dyos te Moyses kjalu:
—B'a'natzun, kb'el nnajsa'ne' kyil, kse'nxju' ntzajtqani'na weye'.21Naqtzun aju', axxi'x itz' qine' ex nojni tkyaqil twitz tx'otx' tu'n wajwalile',22mix-a'lo' jun kka'yilteju' tx'otx' xintziya'ne' kyeju' ojtxi' kyyajilb'en, kyxolju' oje che ka'yinte wajwalile' eb'a'nq'ob'aj nb'inchaye' Ejipt ex toj chq'ajlaj, ex b'a'npun maj xkyjoy wi'je' toj chq'ajlaj, ex min kyajb'il tu'n kyxikyb'i'nju' nchaq'b'ile'. Mix-a'lo' jun kyeju' matxi' chin el kyik'o'ne' kka'yilte.24Naq o'kx nmajine' Kaleb' junxi'tlte, ma chinx tb'i'ne' b'a'nxi'x. Qu'mtzun k'okyex wu'ne' toju' tx'otx' xi' ka'yilte, ex kche najalju' tyajajil atzu'.25(Najl qe'kye' aj Amalek exqe' aj Kanaan toju' plan tx'otx'.) Aye'tzunkye', kutanjtl kyi'je' najchi'j ex kyljonx kyb'eye' tojx chq'ajlaj tu'me'lju' ninnjab' kyaq tb'i, chi Dyos.
26Tzaj tma'n Qman Dyos kye Moyses ex Aaron kjalu:
27—¿Ma kukx tik'x kyjk'ujyoli'n ttx'anqa'n aj Israel wu'ne'? Matxi' b'aj nb'i'ne' kyyol taq'wix wi'je'.28Kutxi'ya q'malte kye qa kntziya'ye' axxi'x, ayine' Dyos Manb'aj, qa axche ik'ela'ju'ye' wu'ne' kse'nxju' kyole' matxi' nb'iye'.29Kykyaqilju' matxitoq che el winqi'n ab'q'i eb'aj tz'ib'et tej tjaw kyajlal, matxi' che yolin taq'wix wi'je', kche kyimel ex che kjel woqonje toju' chq'ajlaj lu.30Mix-a'lo' junkye' k'okex toju' tx'otx' xintziya'ne' toj junkmuj nim toklen kyeye' jatu'n kykub' najane', naq o'kx Kaleb' ex Joswe che okex toj.31Aye'tzunju' kyk'wale', intoq che ximane' kyi'j qa oktoq che kb'eltz'aq toj kyq'ob'ju' kyajq'oje', che kxe'l wiq'i'ne' tu'ntzun kynajan toju' tx'otx' sel kyik'o'ne'.32Aye'tzunkye' che kjel woqonjeye' toju' chq'ajlaj lu,33ja kche anq'ila' kab'naq (40) ab'q'iju' kyk'wale' naku'j k'ik'lelqe'. Ikytzu'n kychja'ya' kyilju' kyman, tzmaxi'j aj kyb'aj kyim tzalu toj chq'ajlaj.34Kab'naq (40) q'ij e'ten nenulteju' tx'otx'; ex kab'naq (40) ab'q'i kche tenb'ilju' kyk'wale' chjolteju' tz'e'ysb'il kywitz: jun ab'q'i tu'n junjun q'ij. K'eleltzun kynik'tz tu'nju' injaw kyiq'i'n kyib' wi'je'.35Ayine' Dyos Manb'aj nchin q'mante: Iktzun knb'incha'ju'ye' ti'ju' tnam pi's lu, ju' matxi' tmojb'atib' tu'n tok miltz'uj wi'je'. Tojxju' chq'ajlaj lu che kjela' b'aj; axtzu' che kyimela', chi Dyos. E'kyimju' lajoj nenul taq'wixqe'
36Aye'tzunju' ichan e'xitchq'o'n Moyses ka'yilteju' tx'otx', ju' kyaq' jun tqanil taq'wix tej tanjtzkyi'j ex eb'jaw wulju' xjal kyu'n, naq mikynab'en tej kyb'ajkyim tu'n Qman Dyos.38Noq oqe'kx Joswe ex kaleb' e'kyaj anq'in kyxol kykyaqil. Kub'kyi'j aj Israel toj tnam Orma (Dt 1.41-46)
39Tetzunj t-xi' tchik'b'a'n Moyses kye aj Israel titi' tman Qman Dyos, kykyaqilx tzaj kyb'is.40B'a'n prim kyjawe' te juntl q'ij, e' jawx twi' witz jata' nimaq k'ul ex kyma ikjalu:
—¡Matxi' qojawu'l tzalu! Qo'qe' toju' najb'il oje tma Qman Dyos tu'n ttzajtq'o'n qe, qu'n axxi'x matxi' qo b'inchan il, chechij.
41Atzunte Moyses xitma'm kye kjalu:
—¿Tiqu'n min nche'x kyb'i'nju'ye' tchaq'b'il Qman Dyos? ¡Layxna' b'entte' nkyxima'ne' tu'n kyb'inchanteye'!42Lalun txikyljo'n kyb'eye', qu'n mix alo'tlte Qman Dyos kyuk'i'le'. Kb'elkyi'je' kyu'n kyajq'oje'.43Luqe'ju' aj Amalek exqe' aj Kanaan nche' ayon kyeye' chix, tu'n kyq'ojin kyuk'i'le' ex tu'n kykub' b'yo'ne' kyu'n. Qu'n matxi'na' kyej kytzaqpi'ne' Qman Dyos, ex mixti'tl kyuk'i'le', chij kye.
44Aye'tzunkye minti' xikyb'i'n, eb'jax twi' witz jawlxi'x toju' nimaq k'ul; atzun teju' kax k'ub'lteju' yol kyej b'entti'j tu'n Qman Dyos, ex Moyses, min e'jaw b'et jata'qe'toq.45Eb'je'tztzun aj Amalektz exqe' aj Kanaan najlqe'toq toju' tx'otx' lu, eb'jo'kten q'ojil ex kub'kyi'j aj Israel kyu'n, ex eb'jik'lpe xla'jalkye tzmax kypon Orma. Kawb'il kyib'aju' chojb'il
1Tzaj tma'n Qman Dyos te Moyses tu'n t-xitma'n kye aj Israel kjalu:
Ajkyokxe' toju' tx'otx' kxe'l nq'o'ne' kyeye' tu'n kynajane' toj,3ex ajttzaj kyq'o'ne' jun tman wakx mujqa jun rit tu'n tkub' kytz'e'ysa'ne' te ninb'ilweye' te jun chojb'il mujqa chojb'il k'ok'sb'il, qa tu'n tjapun jun kyyole' tziya'ntl kyu'ne', jun oyaj tu'n tb'is kyk'u'je', mujqa te jun ninq'ij,4aju' makub'q'onte oyaj lu, ati tu'n tkub' tq'o'ntl kyaje' lib'r tk'i' nik'jan tb'anil arin xyuq'i'n tuk'i'l jun litr aseyt.5Expe' ikx ati tu'n tkub' tq'o'n jun oyaj ta'l ub'a, jun litr kb'el tib'aj junjun qpoj tman rit.6Qatzun tman ritju' chojb'il, kb'eltq'o'n ch'inxmi b'eljoj lib'rtl arin xyuq'i'n tuk'i'l masch'i'n jun litr aseyt7ex masch'i'n jun litr ta'l ub'a, te jun oyaj k'ok'j weye'.8Qatzun qpoj tman wakxju' chojb'il makub', te jun chojb'il k'ok'sb'il mujqa jun chojb'il te b'inchjtib'il, mujqa tu'n tjapun jun yol tziya'ntl,9kb'eltq'o'n masch'i'n oxlajoj (13.2) lib'rtl arin xyuq'i'n tuk'i'l kab'e' litr aseyt,10tuk'i'l kab'e' litr ta'l ub'a, te jun oyaj tz'e'ysa'n tb'anil tk'ok'jal weye'.11Atzun tu'n tb'inchetju' ti'j junjun tman wakx, junjun tman rit, junjun qpoj tman rit, mujqa junjun qpoj tman chib' ajtkub' q'o'n.12Kb'el q'etju' oyaj kse'nxju' q'ma'ntl ti'jile junjun alu'mj ajtkub' q'et, kse'nxju' kyajlal alu'mj.13Ati tu'n kyjapunju' nuk'b'il lu kyu'n kykyaqil aj Israel ajtkub' kyq'o'n jun kyoyaj tz'e'ysa'n tb'anil tk'ok'jal nwitze'.
14Qatzun jun te najchaq xjal, qa jun ajb'etu'n mujqa majx najli kyxole', tajb'il tu'n tq'onte jun toyaj weye' tz'e'ysa'n tb'anil tk'ok'jal, aye'x nuk'b'ilju' ati tu'n tjapun kyu'n kse'nxju' kye'.15Aye'xkye nuk'b'ilju' kche ajb'el kyeye' ex kyeju' te najchaq xjal; majx kjelten te jun kawb'il tu'n tajb'en kyeye' ex kjel kyma'ne' kye kyk'wale' toj wiqi'nwiq.16Junx kawb'il ex junx nuk'b'il k-ajb'el kyeye' ex kyeju' te najchaq xjal, chi Dyos te Moyses.
17Tzaj tma'n Qman Dyos te Moyses tu'n t-xitma'm kye aj Israel kjalu:
Ajkyokxe' toju' tx'otx' ja che kxe'la' wiq'i'ne',19ex ajttzyet kywanteju'ye' triy intzaj toj, ati tu'n tel kypa'ne' ch'i'n tu'n tkub' kyq'o'ne' nwitze'.20Kse'n intzaj kyq'o'ne' tnejel tnej triy aj tb'je'l kytriyi'ne', ikxtzu'n ti'ju' tnejel q'otj makyb'inchaye', kb'el kyb'incha'ne' wab'j te oyaj weye'.21Ati tu'n kyb'inchanteju'ye' oyaj lu kukxju'.
22Qatzun naqx myanim matzik' tna'l kyu'ne' tu'n kyb'inchanteye' junju' xnchaq'e' te Moyses23kxe'l qex toju' q'ij aj t-xi' q'ma'n kyeye' tu'n tjapun kyu'ne' ex kyu'nju' kyyajajile', ati tu'n kyb'inchanteju'ye' lu:
24Qa kykyaqilju' tnam ẍe kyej myab'a'n wuk'i'le' ex mya xima'nju' kyu'n, kykyaqilju' tnam kb'el kyq'o'n jun qpoj tman wakx te jun chojb'il k'ok'sb'il tb'anil tk'ok'jal weye', kyuk'i'lxi'ju' oyaj twitz awal k'ok'e' ex ta'l ub'a kse'nxju' nchaq'e'; expe' kb'el kyq'o'ne' jun chib' te chojb'il tu'n tpaj il.25Oktzun ktb'incha' pale aq'untl nwitze' tu'n kyk'monte tkyaqil tnam Israel najsb'ilte kyil, ex kb'el nnajsa'ne' kyil, qu'n naq tu'n tpaju' sik'tna'l kyu'n ẍe kyaja' toq'wix wuk'i'le' ex matzaj kyiq'i'nju' kyoyaj weye' ex chojb'il tu'n tpaj il.26Kb'el nnajsa'ne' kyil tkyaqilju' tnam Israel kyuk'i'lju' te najchaq xjal najliqe' kyxole', qa naq tu'n tpaju' matzik' tna'l kyu'n tnam.
27Qatzun naq junju' xjal xkyaj toq'wix tu'n tpaj matzik' tna'l tu'n, aju' xjal lu kb'eltq'o'n jun qpoj ttxu chib' te jun ab'q'i te chojb'il tu'n tpaj il.28Kxel tb'incha'n paleju' aq'untl nwitze' tu'n tk'met najsb'il tilju' xjal lu tu'n tpaj matzik' tna'l tu'n, ex kb'el nnajsane'.29Ax nuk'b'ilju' k'ajb'el kye' aj Israel ex kyeju' te najchaq xjal najliqe' kyxole', qa naq tu'n tpaju' matzik' tna'l ẍe kyaja' toq'wix.
30Qatzun jun xjal mab'inchan il ex xima'na tu'n, aj Israel mujqa jun najchaq xjal, il xtb'incha nwitze'. Qu'mtzun mixti' tu'n ttentlju' xjal lu kyxolju' ttanam,31qu'n matz'el tik'o'nju' nyole' ex min ẍe japunju' nnuk'b'ile' tu'n; majx k'elex iq'et kyxol kykyaqilju' ttanam ex kjeltenju' til tib'ajx, chi Qman Dyos. Tz'e'ysb'il witzb'aj qa min xjapunju' q'ij te ojlab'l
32Tej ate'toq aj Israel toj chq'ajlaj, knet jun ichan kyu'n intoq b'uyin si toju' q'ij te ojlab'l.33Aye'tzunju' e'okyalsante xikyiq'i'n kywitz Moyses ex Aaron, ex kywitz kykyaqilju' tnam,34ex okx kyjpu'n, qu'n na'mtoq tb'entti'j titi' kb'inchetel ti'j.35Tzajtzun tma'n Qman Dyostz te Moyses kjalu:
Ati tu'n tkub' b'yette' ichan lu. Kykyaqil aj Israel che b'ajel xonte toj ab'j ti'jxi'ju' xmuj, chij.36Etztzun q'i'ntz kyu'n aj Israel ti'jxi' kyxmuj, e'oktentzuntz xolte toj ab'j tzmaxi' tkyim, kse'nxju' tchaq' Qman Dyos te Moyses. Ttxa'n kyxb'alun aj Israel
37Tzaj tma'n Qman Dyos te Moyses tu'n t-xitma'n kye aj Israel kjalu:
K'okyel kyb'incha'ne' kytxa'nju' kyxb'alune' exqe'ju' kyyajajile'. K'okyel kyb'incha'ne' ttxa'n tu'n q'in morad.39Ajtzun t-xi' kyka'yi'ne' ttxa'n, che tzajel kyna'ne' tkyaqilju' chaq'b'il b'ajx nma'ne' kyeye', ex che kyb'incha'ye' tu'ntzun lalun che anq'intle' kse'nxju' kynab'le' ex kyajb'ile', qu'n kyu'ntzunju' jaku' tz'ela' kypa'n kyib'e' wi'je'.40Ktzajel kyna'ntzuntze' tkyaqilju' nchaq'b'ile' ex kche kyb'incha'ye', ex kyxjansa' kyib'e' weye'.41Ayine' Dyos Manb'aj, inetz iq'inkyeye' toj Ejipt tu'n kyk'ulune' weye', chi Dyos. Jawtiq'i'ntib' Kore ex kub' tz'e'ysa'n twitz
1Jawkyi'nkyib' kyaje' ichan ti'j Moyses: jun aj Leb'i tyajajil Koat, Kore tb'i, tk'wal Isar, ex oxe' ichan kyxol tyajajil Rub'en, aye' Datan ex Ab'iram, tk'wal Elyab', ex On, tk'wal Pelet. Ex kymujb'a kyib' kab'lajnaq lajoj (250) ichan aj Israel kyuk'i'l, ati kyoklen toju' tnam, ate'ktoq kyxolju' q'ol nab'l toj tnam ex b'a'ntoq kyolinjtz.3B'jaw kyb'u'yi'n kyib' kyi'j Moyses ex Aaron ex xikyma'n kye kjalu:
—¡Tuk'i'lxtzun oklenju' kyeye'! Tkyaqilxnate' tnam matxi' che xjanset tu'n Qman Dyos, ex ati te Qman Dyos quk'i'l qkyaqil. ¿Tiqu'n nche oka'ye' te nimaq kyoklene' kyib'aju' ttanam Qman Dyos? chechij.
4Tetzunj tb'inte Moyses ja'lu, kub' meje majx ku'punju' tpaj twitz tx'otx',5ex xitma'n te Kore ex kyeju' lepchqe'ktoq ti'j ikjalu:
—Ktma' Qman Dyos najchi'j te prim alkyeju' te ex alkyeju' xjansa'n tu'n, tu'n kykub' tq'o'nju' oyaj. O'kxte kb'el q'onte oyaju' twitz aju' kjawil t-sk'o'n.6A kyb'ichamju'ye' lu: kyiq'inqe'tzju'ye' kyxq'aq'b'il Kore kyuk'i'lju' tuk'i'l,7kyq'onku'xe' ttxalq'aq' kyoj, ex kyq'onku'xe' sturak kyoj, kyq'onku'tzuntze' twitz Qman Dyos najchi'j. Alkyetzu'n ichan majaw t-sk'o'n Qman Dyos, atzun xjansa'nju' tu'n. ¡Tk'i'xtzunloju' ja'lo, e'aj Leb'i! chij.
8Xi'tzun tma'n Moysestz te Kore kjalu:
—Chin kyb'intzpe'ye' aj Leb'i:9¿Ma naqtzun ch'i'n toj kywitze' tu'nju' mache jaw sk'o'ne' tu'n Qman Dyos kyxol aj Israel, ex tu'n kytene' nqaku' tk'etz ex tu'n kyaq'unane' toju' tja xjan ex tu'n kyajb'ene' kye tnam?10Atoq tajb'il Qman Dyos tu'n ttena tk'etz kyuk'i'lju' txqantl aj Leb'i twitze'lqe'xa, tu'n kytene' nqaku' tk'etz, ¿atzu'n ja'lo kyajb'ile' tu'n kyoke' te pale?11Axxi'x mixna' ti'te Aaron toklen tu'n kyoline' taq'wix ti'j; ti'jku' te Qman Dyos matxi' jawa' tiq'i'ntib'a kyuk'i'lju' tuk'i'la, chij te.
12Tchaq'tzun Moysestz tu'n kytzaj txket Datan ex Ab'iram tk'wal Elyab', aye'tzunkye tzaj kytzaq'we'n kjalu:
—Lay qo'xqe'.13¿Ma naq ch'i'ntoj twitza tu'n xqo' etztiq'i'na toj jun tb'anil tx'otx', tu'n qkyime' tu'na toju' chq'ajlaj, extzun tajb'ila tu'n toka te nejenel nim toklen qeye'?14Ex minti' xqo'x tiq'i'na toj jun tb'anil tx'otx' ex b'ajx tzaja' tq'o'na qtx'otx'e' ex awb'il ub'a. ¿Ma tajb'ila tu'n qxi' tiq'i'na naku'j moẍqo'ye' teya? Lay, lay qo'xqe' tk'etza, chechij.
15Tzajtzun ttx'u'jil Moysestz ex xitma'n te Qman Dyos kjalu:
—¡Lalun tk'amju'ya kyoyaj! B'ajx tz'ela' wiq'i'nwe' tk'i'xpe'wt jun b'ur kye, ex b'ajx nb'inchawe' jun taq'wix te junkye, chij.
16Xitzun tma'n Moysestz te Kore ikjalu:
—Kutzaja najchi'j kyuk'i'lju' tuk'i'la twitz Qman Dyos. Ex ktenb'el Aaron atzu'.17Teyile junjun kxe'l tiq'i'nju' txq'aq'b'il ex kb'elex tq'o'n sturak toj. Ex kxe'l kyiq'i'ne' kyxq'aq'b'ile' kykab'ile' tuk'i'l Aaron ex kb'el kyq'o'ne' junx kyuk'i'lju' kab'lajnaq lajojtl (250) twitz Qman Dyos, chij te.
18Teyiletzun junjun tzaj tiq'i'n txq'aq'b'il ex kux tq'o'n ttxalq'aq' ex sturak toj, e'kub'tentzuntz junx tk'etz Moyses ex Aaron, twitzju' Ja te Mujb'ab'ltib'il.19Matxitoq che b'ajtb'u'yi'n Kore kykyaqilju' tnam kyi'j Moyses twitzju' Ja te Mujb'ab'ltib'il. Kub'tzun tyek'u'tib'ju' tajwalil Qman Dyos kywitz kykyaqilju' tnam.20Tzajtzun tma'n Qman Dyostz kye Moyses ex Aaron ikjalu:
21—¡Kypa'mil kyib'e' ti'ju' tnam lu, che kb'el nxitu'ne' toj jun kmujx! chij.
22Aye'tzunkye e'kub' meje majx ku'punju' kyplaj twitz tx'otx', xikyma'n te Qman Dyos:
—Nman Dyos, a na'ta inq'onte kychwinqlal kykyaqil xjal, ¿ma ktzajel ttx'u'jila kyi'j kykyaqilju' tnam naq tu'n tpaj til jun ichan? chechij.
23Atzunte Qman Dyos tzaj ttzaq'we'n te Moyses:
24—Q'manxa kye kykyaqil aj Israel tu'n tel kypa'n kyib' ti'ju' ja, ja ta'qe' Kore, Datan ex Ab'iram, chij.
25Jawtzun we' Moyses, xi' jata'qe'toq Datan ex Ab'iram, exi' lpeju' tijwnaq aj Israel ti'j.26Xitma'ntzuntz kyeju' tnam kjalu:
—Kypa'mil kyib'e' ti'j kyja ichan pi'sqe' lu, ex lalun txikytzyu'n jun ti'xti'ye' kye, qu'n jaku' aye'x junkye' che kyim tu'n tpaju' kyil, chij.
27Eltzun kypa'n kyib'ju' tnam jataqe'toq Kore, Datan ex Ab'iram. Ate'toqtzun Datan ex Ab'iram ttziju' kyja kyuk'i'lju' kyxu'jil e'kyk'wal.28Ex xitma'n Moyses kye kjalu:
—Atzuntzu' kxe'l nyek'una' kyeye' qa ate Qman Dyos saj chq'onweye' tu'n nb'inchante qe'ju'ye' ti'xti' lu, ex min nb'incha'nwe' tu'nx nnab'le'.29Qama che kyimju' ichan lu kse'nx nche kyima' txqantl xjal tu'n yab'il, myatzun Dyostz saj chq'onweye';30qatzun matb'incha Qman Dyos jun ti'xti' junxi'tl, qama txi' k'ab'chaju' tx'otx' tu'n kyxi' qob'chaj toj kyuk'i'lxi'ju' ati kye, exqa mache'x tz'aq itz'qe' t-xexi' tx'otx', k'eleltzun kynik'tze' qa aye'ju' ichan lu matz'el kyik'o'n Qman Dyos, chij kye.
31Naqtzun inb'aj yolin Moyses, xi' k'ab'chaju' tx'otx' kyjaq'32kykyaqiltzu'n xjal kymujb'a kyib' tuk'i'l Kore exi' qob'chaj toj kyuk'i'lxi' toj kyja ex tkyaqilju' ati kye.33Itz'qe'x tej kyku'pun tz'aq t-xexi' tx'otx' kyuk'i'lxi' kyti'xti', ex tjup jumajtl tib'u' tx'otx'. Iktzu'n e'kub'najsa'n kyxol aj Israel.34Kykyaqiltzu'n aj Israel ate'toq kyi'jile eb'je'tz oq t-xikyb'i'n kyb'jaw ẍch'inju' xjal lu, ex kyma: ¡Naq qo'x qoptz'ajqe toju' tx'otx'! chechij.35Expe' tzaj t-sma'n Qman Dyos jun q'aq', majx eb'aju' kab'lajnaq lajoj (250) xjal kub' kyq'o'n sturak tu'n.
36Tzajtzun tma'n Qman Dyos te Moyses kjalu:
37Q'manxa te Eleasar tk'wal Aaron tu'n kyetz tiq'i'n xq'aq'b'il toju' xb'aj kyej tu'nju' q'aq', ex tu'n kyxi' t-xonju' ttxalq'aq' atix kyoj najchaq.38Mache kyej xjanset kyxq'aq'b'ilju' ichan matxi' che kyim tu'n tpaj mache b'inchan il, qu'n mache ajb'en tu'n kykub' q'et sturak nwitze'. Kyb'inchanku'ju'ye' k'uxb'il lu toj plaji'n tu'n kyajb'en te kutxb'ilteju' q'olb'eb'l, ex tu'n tajb'en tejun ab'tzib'l kye aj Israel, chi Dyos.
39E'jaw tb'u'yi'n pale Eleasar ju' xq'aq'b'il q'ank'uxb'ilju' e'kub' kyq'o'nju' ichan eb'aj kyim tu'n q'aq', xitma'n tu'n kykub' b'incha'n toj plaji'n te kutxb'ilteju' q'olb'eb'l.40Tenju' lu te jun ab'tzib'l kye aj Israel qa mix-a'lo' juntl, kyi'jxi' tyajajil Aaron, atiwt tu'me'l tu'n tok lq'e tk'etz q'olb'eb'l tu'n tkub' tq'o'n sturak twitz Qman Dyos; qu'n qatzun min ikx k'okyela' kse'nx b'aj ti'j Kore exqe' tuk'i'l. Ex b'inchet tkyaqil kse'nxju' tzaj tma'n Qman Dyos te Moyses tu'n tb'inchante Eleasar.
41Tetzun juntl q'ij, kykyaqilju' aj Israel e'aq'wi yolil kyi'j Moyses ex Aaron. Intoq kyma'n:
—¡Ate'qe'kye' b'yolkyeju' ttanam Qman Dyos! chechij.
42Eb'jo'k tiljtzuntz kyi'j Moyses ex Aaron; aye'tzunkye exi' ka'yin ti'ju' Ja te Mujb'ab'ltib'il. Tetzunju' kmuj lu kub' jupe' muj tib'aj ex tyek'u tib'ju' tajwalil Qman Dyos.43Exi'tzun Moysestz tuk'i'l Aaron twitzju' Ja te Mojb'ab'ltib'il,44Ex tzaj tma'n Qman Dyos te Moyses:
45—¡Kypa'mil kyib'e' kyi'j kykyaqilju' xjal lu, qu'n kche b'ajel wu'ne' toj jun kmujx! chij.
Aye'tzunkye Moyses ex Aaron e'kub' meje majx ku'punju' kyplaj twitz txo'tx',46ex xitma'n Moyses te Aaron kjalu:
—Q'intza t-xq'aq'b'ila, q'onku'xa ttxalq'aq'a ati tib'aju' q'olb'eb'l toj ex q'onku'xa sturak toj; kutxi'tzuntza jata'qe'ju' tnam ex qaninxa najsb'il kyil te Dyos, qu'n matxi' tzaj ttx'u'jil Qman Dyos kyi'j ex matxi' tzyetju' tz'e'ysb'il kywitz, chij.
47Ku, chi Aaron tb'inchaju' xitma'n Moyses te, xi' ojqel ja b'uyina'toq kyib'ju' tnam. Matxitoq tzyet tb'iyonju' tz'e'ysb'il witzb'aj tzaj tq'o'n Qman Dyos toju' tnam. Ku'xtzun tq'o'n Aaron sturak ex xitqani'n najsb'il te Qman Dyos kyi'ju' tnam.48Kub' tentzuntz kyxolju' matxitoq che kyim kyuk'i'lju' itz'qe'x, ex we'ju' kamik,49matxi'toq che kyim junmutx' qaqlajk'al o'lajnaq (14,700) xjal tu'n tz'e'ysb'il kywitz lu, kyib'ajxi'tlju' ojetoq che kyim nejtl tej tjaw tiq'i'ntib' Kore.50Anjti'j Aaron toju' Ja te Mujb'ab'ltib'il tk'etz Moyses tej tnumeju' kamik. T-xulin ttze Aaron
1Tzaj yolin Qman Dyos te Moyses ex tma ikjalu:
2Q'manxa kye aj Israel tu'n ttzaj kyiq'i'n jun tze te junjun nejenel kye junjun tnej kyyajajil, kab'lajoj (12) tze tu'n kykyaqil. K'okyel ttz'ib'a'na kyb'i teyele junjun ti'ju' ttze,3atzunju' tze kye tyajajil Leb'i k'okyel ttz'ib'a'na tb'i Aaron ti'j, qu'n ati tu'n tten junjun tze te junjun nejenel kyeju' tnej kyyajajil.4Che okyex tq'o'ntzuntza toju' Ja te Mujb'ab'ltib'il, twitzju' kax k'ub'lteju' yol kyejni b'entti'j, jata' qine' kyuk'i'le'.5Knb'incha'ye' tu'n tch'xulin ttzeju' sk'o'n wu'ne', laytzun che yolintlju' aj Israel taq'wix kyi'je' nwitze', chi Dyos.
6Xitzun tma'n Moyses ja'lu kye aj Israel, ex teyile junjunju' nejenel te junjun tnej tyajajil xitq'o'n jun tze te, kab'lajoj (12) tze tu'n kykyaqil. Ex atitoqju' ttze Aaron kyxol.7E'okxtq'o'n Moyses tze twitz Qman Dyos toju' ja teju' yol kyejni b'entti'j,8tetzunj tpon toju' ja te jun q'ijtl, tilju' ttze Aaron, tyajajil Leb'i, matxi'toq che t-xulin: matxi'toq tzaj tch'xul, ex matxitoq b'echan, ati tb'echil tb'anilxi'x.9E etztzun tiq'i'n Moyses kykyaqilju' tze twitz Qman Dyos, ex xityek'u'n kye' aj Israel. Tb'ajlenxi'tzun kyka'yi'n, teyle junjun xitiq'i'n ttze.
10Tzajtzun tma'n Qman Dyos te Moyses kjalu: Q'onku' jun majtla ttze Aaron twitzju' kax k'ub'lte yol kyejni b'entti'j, ex k'u'nxa atzu' te jun ab'tzib'l teju' tnam lu mib'a'n b'in. Laytzun che yolintl taq'wix nwitze' ex lay che kyim, chi Dyos.
11Ku, chi Moyses tb'incha tkyaqil kse'nx tzaj tma'n Qman Dyos te,12aye'tzu'n aj Israel xikyma'n te Moyses: ¡Matxi' qo'tak'e'! ¡Qo kyimele' qkyaqile'!13Kykyaqilju' nche oklq'e tk'etzju' ja xjan te Qman Dyos nche kyim. ¿Ma qkyaqiltzune' qo kyimele'? chechij. Kyaq'unxi'x pale ex aj Leb'i
1Tzaj tma'n Qman Dyos te Aaron kjalu:
Kyib'aje' ta' kyuk'i'lju' tk'wala exqe' txqantl tyajajil Leb'i, ja tzajna' tyajila, qama b'aj jun ti'xti' ti'ju' ja xjan; atzu'n qa tilo jun ti'xti' myab'a'n makyb'inchaye' toju' kyaq'une' te pale, naq kyib'aje' ta' kyuk'i'lju' tk'wala.2Ex q'manxa kye txqantl tyajajil Leb'i ja tzajna' tyajajila, tu'n kyonin tuk'i'la ex kyuk'i'l tk'wala toj ajb'eb'l twitzu' ja teju' yol kyejni b'entti'j.3Kche ajb'el teya ex toju' ajb'eb'l teju' ja xjan, naqtzun o'kx mixti' tu'n kyoklq'e kyi'ju' ti'xti' inche ajb'en toju' ja xjan ex tk'etzju' q'olb'eb'l, qu'n qatzun min kche kyimele' kyuk'i'l.4Ati tu'n kyten tuk'i'la toju' ajb'eb'l toju' Ja te Mujb'ab'ltib'il ex toj tkyaqilju' aq'untl kb'inchetel toj. Naqtzun o'kx mix-a'lo' jun xjal mya aj Leb'i kpomel lq'e kyk'etze';5aye'kye' ati kyoklene' ti'ju' ajb'eb'l toju' ja xjan ex ti'ju' q'olb'eb'l. Laytzun tzajtl ntx'u'jile' kyi'j aj Israel.6E' el npa'nju'ye' titz'ina aj Leb'i kyi'ju' txqantl aj Israel tu'n kyxi' nq'o'ne' kyeye', tu'ntzun kyajb'en toju' aq'untl toju' Ja te Mujb'ab'ltib'il;7naqtzun o'kxta kyuk'i'lju' tk'wala kche aq'unale' te pale ti'j tkyaqilju' aq'untl ti'ju' q'olb'eb'l, mujqa ti'ju' kb'inchetel ti'jxi' xb'alun. Aye'ye' tu'n kyb'inchante aq'untl lu, qu'n ayine' ẍinx q'onte kyoklene' tu'n kyaq'unane' te pale. Qa alo' jun matb'incha jun aq'untl kse'nte pale, extzun mya pale, ati tu'n tkyim, chi Dyos. K'a'chb'ilkye pale ex aj Leb'i
8Tzaj tma'n Qman Dyos te Aaron kjalu:
Matxi' che kyej nq'o'ne' oyaj nche tzaj q'o'n weye' toj tq'ob'a. Tkyaqilju' oyaj xjansa'n ntzaj kyq'o'n aj Israel weye', kxe'l nq'o'ne' teya ex kyeju' tk'wala, ju' ati kyoklene' ti'j, majx kjeltenju' nuk'b'il lu kukxju'.9Teju'ya oyaj twitz awal k'ok'e'kywitz exju' chojb'il kb'el kyq'o'n aj Israel tu'n tpaj il, kyi'ju' chojb'il inche kub' tz'e'yset; tkyaqilju' oyaj xjansa'n lu teya ex kyeju' tk'wala.10Kykyaqilju' q'a kyxole' b'a'n tu'n kywan ti'ju' oyaj lu, naq o'kx ati tu'n kywante toj jun najb'il xjansa'n, qu'n xjanqe'.
11Exqe'ju' oyaj nim kyoklen ktzajel kyq'o'n aj Israel weye', kxe'l nq'o'ne' teya, kyeju' tk'wala ex kyeju' tmyala najlqe'x tuk'i'la. Majx kjeltenju' lu te jun kawb'il. Alkyexku' xjal kyxolju' toj tjaya ẍtilsa'n tib', b'a'n tu'n twan ti'j.12Exqe' tnejel kywitz awal che tzajel kyiq'i'n aj Israel weye' atl junjun ab'q'i, che kxe'l nq'o'ne' teya: tb'anil aseyt, tb'anil b'in ex triy.13Exju' tnejel twitz kyawal ktzajel kyiq'i'n weye', che kxe'l teya. Alkyexku'tzun xjal kyxolju' toj tjaya ẍtilsa'n tib', b'a'n tu'n twan ti'j.14Tkyaqilju' oyaj makyxjansa aj Israel nwitze', kxe'l teya.
15Kykyaqil tnejel kyk'wal aj Israel mujqa tnejel tal kyalu'n matzaj kyq'o'n weye', che kxe'l teya. Aye'tzu'n tnejel kyk'wal xjal ex tnejel kyal alu'mj tz'ilqe', kxe'l tqani'na jun kyxel.16Ati tu'n tchjetju' kyxel tb'ajlenxi' jun xjaw kyitz'jlen, jwe' saqpwaq kchjetel, kse'nxju' pwaq toju' ja xjan, ch'inxmi tz'aqla' nik'jan ons talal.17Aye'tzunju' tnejel kyal wakx, tnejel kyal rit mujqa tnejel kyal chib', lalun tk'ama kyxel. We qe'weju'ye', ati tu'n kykub' tb'yo'na; kb'el tq'o'na kychk'el tib'aju' q'olb'eb'l, atzunju' t-until kb'el ttz'e'ysa'na te jun oyaj tb'anil tk'ok'jal weye'.18Atzunju' tchib'jil b'a'n tkyaj teya, exju' ttzitk'u'ju' alu'mj, qu'n a oyaju' tb'anil, exju' tkux toj tb'a'nq'ob'.19Tkyaqilju' o'nb'il matz'el kypa'n aj Israel weye', kxe'l nq'o'ne' teya, kye tk'wala ex tmyala najlqe'x tuk'i'la. Jun kawb'ilte' lu majx kjelten. Jun yol kjel b'entti'j wu'ne' tejumajx tuk'i'la ex kyuk'i'l tyajajila, chi Dyos.
20Tzaj tma'ntl Qman Dyos te Aaron kjalu:
Lay txi'ta ttx'otx' ex tetzb'il kse'nkye' txqantl aj Israel. Ayine' chin okyel te teya ex tetzb'ila toj Israel.21Atzu'n kye' aj Leb'i aju' tlajoji'n tnej tzul kyiq'i'n aj Israel ti'ju' kyawal ajtjaw, kxe'l nq'o'ne' kye te chojb'ilteju' kyajb'eb'l toju' Ja te Mujb'ab'ltib'il.22Mixti' tu'n kyoklq'eju' txqantl aj Israel tk'etzju' Ja te Mujb'ab'ltib'il, qu'n juku' che b'incha'n il tu'n kykyim.23O'qe'kxju' aj Leb'i che ajb'el toju' Ja te Mujb'alb'tib'il, ex kyib'aj ta' qa ati jun ti'xti' myab'a'n makyb'incha. Majx kjelten ja'lu te jun kawb'il kukxju', ex kjel kyma'ne' toj wiqi'nwiq kye kyk'wale'. Lay ten kye aj Leb'i kytx'otx' toj Israel.24Matxi' txinq'o'ne' tlajoji'n tnej, ju' ati tu'n kyq'onte aj Israel weye' ti'ju' kyawal injaw, kye aj Leb'i. Qu'mtzun matxi' txinma'ne' kye qa mixti' tu'n tten kytx'otx' toj Israel, chi Dyos.
25Tzaj tma'n Qman Dyos te Moyses kjalu:
26Q'manxa kye aj Leb'i, aj kyk'monteju' tlajoji'n tnej kye aj Israel ti'ju' kyawal injaw, ju' oje txi' nq'o'ne' te kye, ati tu'n tel kypa'n jun tlajoji'n tnej tu'n ttzaj kyq'o'n weye'.27Atzun ati tu'n kyq'onteju' weye', kse'nxju' ntzaj kyq'o'n aj Israel weye' ajttzaj kyq'o'n jun tnej ti'ju' kytriy mujqa ti'ju' ta'l ky-ub'a.28Iktzu'n, k'elel kypa'n aj Leb'i kyoyaj weye' ti'ju' tlajoji'n tnej kxel kyq'o'n aj Israel kye, ex kxel kyq'o'n teju' pale Aaron.29Ati tu'n tel kypa'n jun tnej tu'n kyq'onte weye' ti'j tkyaqilju' kxe'l q'o'n kye, ex aju' tb'anilxi'x kyxjansa' nwitze'.
30Ex q'manxa kye, telenxi' kypa'nju' tnej tb'anilxi'x weye', b'a'n tu'n tok kyq'o'nju' txqantl te kytriyku' ex kyb'inku'.31B'a'n tu'n kywante exqe'ju' toj kyja toj alkyexku' najb'il, atzun twikyk'u'ju' tu'n kyajb'eb'l toju' Ja te Mujb'ab'ltib'il.32Qa matxi'toq tz'el kypa'nju' tb'anilxi'x weye', b'a'n tu'n kywanteju' txqantl ex mixti' kyil tib'aj; qa makyb'incha ikju', lay kub' kytxa'ju'n oyaj xjan ntzaj kyiq'i'n aj Israel, ex mixti' tu'n kykyim, chi Dyos. Nuk'b'il tu'n kyẍtilsetu' tz'ilqe'
1Tzaj tma'n Qman Dyos kye Moyses ex Aaron kjalu:
2Ayine' Dyos Manb'aj, nxinq'o'ne' chaq'b'il lu tu'n t-xi' kyma'ne' kye aj Israel tu'n ttzaj kyiq'i'n jun ttxu wakx kyeqti'j kyeye', mixti' jun ttzakajil ex b'ajx tz'oka' k'lo'n tze ti'j twi'.3Kxel kyq'o'ntzuntze' teju' pale Eleasar, k'elex tiq'i'ntzuntz ti'jxi'ju' najb'il, kxe'l tma'n tu'n tkub' b'yo'n twitz.4Kjawil tiq'i'n pale Eleasar ch'i'n chik' tu'n twi'tq'ob', ex kxe'l twitxk'a'n wuq maj ti'ju' Ja te Mujb'ab'ltib'il.5Kb'el tz'e'ysa'ntzun ttxu wakxtz twitz, ex kb'el tz'e'ysa'nju' ttz'umal, tchib'jil, tchk'el, exju' ttxa.6Ktzajel tiq'i'ntzun paletz tze k'ute, jun tqan k'ak'ul ex xb'alun kyeq, kche okyex tq'o'ntzuntz tkyaqil toju' q'aq' ja intz'e'ya'ju' wakx;7kttx'ja'tzun t-xb'aluntz ex k-ichil, b'a'n tu'n tokxtzuntz toju' najb'il, maskye kjelten tz'il tzmaxi'j te qale.8Exju' ichan xkub' tz'e'ysanteju' ttxu wakx, kttx'ja' t-xb'alun, ex k-ichil, ex kjelten tz'il tzmaxi'j te qale.9Juntl ichan ẍtilsa'ntib' kse'nxu' nuk'b'il, kjawil b'uyinte ttza'jilju' ttxu wakx, kb'el tq'o'ntzuntz toj jun najb'il ẍtilun ti'jxi'ju' najb'il. K'ajb'elju' tza'j lu kye aj Israel tu'n tb'inchetju' a' te ẍtilsab'l. Tkyaqilju' lu jun chojb'il tu'n tpaj il.10Kttx'ja'ju' xjal xjaw b'uyinteju' tza'j t-xb'alun ex kjelten tz'il tzmaxi'j te qale. Jun kawb'ilte' lu majx kjelten, k'ajb'el kyeye' aj Israel ex kyeju' najchaq xjal najliqe' kyxole'.
11Alkyete matxi' ttzyu'n alkyexku' jun kyimni, kjelten wuq q'ij tz'il.12Kttxja'tib' toj toxi'n q'ij ex toj twuqi'n q'ij tu'nju' a' te ẍtilsab'l, kjel tentzuntz ẍtilun. Qatzun minti' xt-ẍtilsatib' toj toxi'n q'ij ex toj twuqi'n q'ij, lay kyejten ẍtilun.13Qa ati jun xjal matz'oktmko'n jun kyimni ex min xt-ẍtilsatib', inkub' ttz'ilsa'nju' ja xjan weye', qu'mtzun ati tu'n tkub' najset kyxol aj Israel. Qu'n minti' xwitxk'et tu'nju' a' te ẍtilsab'l, tzilxte'.
14A nuk'b'il ja'lu qa ati jun makyim toj jun pach xb'alun: Kykyaqilju' ate'qe' toju' pach ex kykyaqilju' mache okx toj, che kjel tz'ilix wuq q'ij.15Kykyaqilju' kykb'el a' min tkub' kyjpel mujqa mya jpu'nqe' b'a'nxi'x, che kjelten tz'il.
16Kykyaqilju' matxi kytzyu'n jun xjal kyajni b'yo'n mujqa makyim tu'n yab'il, mujqa tb'aqil xjal kyajni kyim, mujqa jun muqb'il toj kojb'il, wuq q'ij kjelten tz'il.
17kyi'jtzunju' tz'il lu, ktzajel iq'et ch'i'n tza'j ti'ju' ttza'jilu' wakx kub'ni tz'e'yset tu'n tpaj il, kb'elex q'et toj jun tkb'el, kb'elex kyq'o'ntzuntze' toj jun k'wil tu'n tku'x a' tib'aj tzajnix toj t-xiklil.18Juntzun ichan jsoq' ktzajel tiq'i'n jun tqan k'ak'ul, kb'elex tak'sa'n toju' a' ex kxel twitxk'a'ntzuntz ti'ju' ja ex kyib'aju' toj tuja, ex kyi'ju' xjal ate' atzu', ex ti'ju' matxi ttzyu'n t-xmilal mujqa tb'aqilju' xjal kub'ni b'yo'n mujqa kyim tu'n yab'il, mujqa aju' muqb'il.19Ati tu'n twitxk'etju' xjal tz'il toj toxi'n q'ij ex toj twuqi'n q'ij tu'n jun xjal jsoq'. Matxitoq ẍtilsettzuntz toj twuqi'n q'ij. Atzunju' xjal tz'il kttx'ja' t-xb'alun ex k-ichil, ex kjelten tz'il tzmaxij te qale.20Qa ati jun xjal tz'il ex min xt-ẍtilsa'ntib', ati tu'n tex iq'et toju' ttanam, qu'n inkub' ttz'ilsa'nju' ja xjan weye'. Qu'n minti' xwitxk'et tu'nju' a' te ẍtilsab'l, tz'ilxte'.21Jun kawb'ilte' lu majx kjelten. Alkye mawitxk'ante juntl tuk'i'lju' a' te ẍtilsab'l, ati tu'n ttxjonteju' t-xb'alun. Alkye matxi tzyunteju' a' te ẍtilsab'l, kjelten tz'il tzmaxi'j ajqok yupj.22Tkyaqilju' matz'okmko'n tu'n jun xjal tz'il kjelten tz'il, ex alkye matxi tzyunte jun xjal tz'il kjelten tz'il, tzmaxi'j ajqok yupj, chi Qman Dyos kye. Etz a' toj pik (Ex 17.1-7)
1E'pon aj Israel toju' chq'ajlaj Sin toj tnejel xjaw te ab'q'i, ex e'kyajten jte' q'ij Kades. Atzuntzu' kyima' Mariy, ex atzu' ku'xa' mqu'n.
2Tu'ntzun tpaju' mixtoqti' a' kye xjal, b'aj kyb'u'yi'n kyib' kykyaqil kyi'j Moyses ex Aaron,3ex xikyma'n te Moyses kjalu:
—¡Naqwit ikj o'kyime' junx kyuk'i'lju' txqantl aj Israel e'kyim tu'n Qman Dyos!4¿Titiqu'n tzaja' kyi'nju'ye' ttanam Dyos toju' chq'ajlaj lu? ¿Ma atzun kyajb'ilju'ye' tu'n qkyime' kyuk'i'lju' qwakyixe'?5¿Titiqu'n xqo' etza' kyiq'ine' Ejipt ex maqotzaj kyiq'ine' toju' najb'il lu taq'wixi'x? Layx b'ent t-xi' awet jun awal; mixti' tqan iw, mixti' tqan ub'a, mixti' tqan kranad; ¡K'i'xpe'wt ati a' tu'n qk'wanteye'! chechij.
6Aye'tzunkye Moyses ex Aaron elkypa'n kyib' kyi'ju' tnam, exi' ttziju' Ja te Mujb'ab'ltib'il, e'kub' mejetzuntz atzu' majx ku'punju' kyplaj twitz tx'otx'. Kub'tzun tyek'u'n tb'iju' tajwalil Qman Dyos kye,7ex tzaj tma'n Qman Dyos te Moyses kjalu:
8—Iq'ima ttzeya, ex che kb'uyintzju'ye' xjal tuk'i'lju' ttzika Aaron. Q'manxtzuntza teju' pik kywitzku' kykyaqil tu'n ttzaj tq'o'n a' kyeye', ex ktka'yi'ya k'eletz a' toju' pik tu'n kyk'wane' exqe'ju' kyalu'ne', chi Dyos.
9Tzaj tiq'i'n Moyses ttze atitoq twitz Qman Dyos, se'nxju' tzaj tma'n Qman Dyos te,10e'tzajtzun kyb'u'yi'n Moyses tuk'i'l Aaron ju' xjal twitz pik, ex xitma'n Moyses kye ikjalu:
—Kyb'intze', e'pi's: ¿ma oktzun k-eletz a' qu'ne' toju' pik lu tu'nt-xi qq'o'ne' kyk'wa'ye'?, chij.
11Tetzunj tb'aj tma'n Moyses ja'lu, xitnuqpi'n tq'ob' ex oktjuma'n kamaju' pik tu'n ttze, ex etz qojli nim a' toj, ikytzu'n e'k'wan xjal ex e'k'wanju' kyalu'n.
12Atzunte Qman Dyos tzaj tma'n kye Moyses ex Aaron:
—Mixna'ti' sokqe kyk'u'je' wi'je' ex min ẍinjaw kynima'ne' kywitzju' aj Israel, lay che okxe' kyuk'i'lju' xjal lu toju' tx'otx' xinq'o'ne' kyeye', chij.
13Atzun t-xiklil a' Merib'a, ja jawa' kyiqi'nkyib' aj Israel ti'j Qman Dyos, atzunte Qman Dyos xityek'u'nju' toklen xjanxi'x. Min taj nimaqkawil aj Edom tu'n kyik'x aj Israel
14Txi'x Kades, e'xitchq'o'n Moyses junjun sanjelal q'malte te nimaqkawil toj Edom, tu'n t-xikyma'n te kjalu: Chechiju' titzi'na aj Israel teya, b'i'nxi'x tu'na jni'ju' yajb'il matxi' qoik'a'ye'.15E'xi' qyajilb'ene' Ejipt ex nimtoj e'najan atzu', aye'tzu'n aj Ejipt e'okten yajulqeye', kse'nx kyb'incha kyi'ju' qyajilb'ene';16xi'tzun qqani'ne' o'nb'il te Qman Dyos, ex tzaj tb'i'nju' qoq'e'ne', tzaj tchq'o'n jun anjl ex o'etz tiq'i'ne' Ejipt. Ex ato'ye' ja'lo toju' nintnam Kades, toj tnaqachalju' ttx'otx'a.17Inxiqkub'sa'ne' teya tu'n tq'onteya anb'il tu'n qik'e' toju' ttx'otx'a. Lay qo' ik'e' toju' tx'otx' ati awal toj ex toj tqan ub'a, expe' lay qok'wan a'ye' kyoju' t-xocha. Qo xe'le' toju' ninb'e, ex lay qoexe' ttx'u'k tzmax ajqexb'aje' toju' tx'otx'a, chechij.
18Atzunte nimaqkawil toj Edom tzaj ttzaq'we'n kye ikjalu:
—¡Lay che ik'e' toj ntx'otx'e', qu'n qatzun min chin elexe' kyi'je' kyuk'i'l nxjale' te q'oj! chij.
19Xi'tzun kytzaq'we'n aj Israel te:
—Tojna' ninb'e qoxe'la'qe', qatzun maqok'wan a'ye' mujqa aye' qalu'ne' kyi'ju' t-xocha, kxe'l qchjo'nqe' teya. O'kxqe' nxiqkub'sa'n teya tu'n qik'e' tu'n qqane' toju' ttx'otx'a, chechij.
20Atzunte nimaqkawil aj Edom xittzaq'we'n kye:
—¡Lay che ik'e'! chij.
Etztzuntz mqolkye' aj Israel kyuk'i'l jun k'loj t-xjal te q'oj kuwqe' ex iq'i'mile kyq'ojb'il,21mixti'x ntjo'n tu'n kyik' toju' ttx'otx'. Kyjoytzun aj Israel juntl b'e. Kyim Aaron
22Tkyaqilju' tnam Israel etz Kades, exi' tu'me'lju' witz Or.23Tzajtzun tma'n Qman Dyostz te Moyses ex Aaron, tk'etzju' nqach te Edom, kjalu:
24Kkyimelte' Aaron, ex lay tz'okx toju' tx'otx' oje txi' nq'o'ne' kye aj Israel, qu'n minti' exi kyb'i'nju'ye' nchaq'b'ile' tk'etzu' t-xiklil a' te Merib'a.25Moyses, iq'inxju'ya Aaron tuk'i'l Eleasar ju' tk'wal twi'ju' witz Or;26Atzuntzu' k'elela' tiq'i'na t-xb'alun Aaron te pale ex k'okyel tq'o'na ti'j Eleasar. Atzunte Aaron kkyimel atzu', chij.
27Ku, chi Moyses tb'incha kse'nxju' tchaq' Qman Dyos te. Ejawx twi' witz Or kywitz kykyaqil aj Israel.28Atzuntzu' ela' tiq'i'n Moyses t-xb'alun Aaron ex oktq'o'n ti'j Eleasar. Atzuntzu' kyima' Aaron twi' witz; aye'tzunkye Moyses tuk'i'l Eleasar eku'tz twi' witz.29Tetzunj kyb'inte aj Israel matxitoq kyim Aaron, junaq lajoj (30) q'ij e'oq' ti'j. Kub'ti'j Orma
1Tetzunj tb'inte nimaqkawil aj Kanaan toju' nintnam Arad, najli Nekeb', qa xi'toq kytzaju' aj Israel toj tb'eyil Atarim, etz q'ojil kyi'j, e'tzyet junjun tu'n ex e'okx tjpu'n.2Xitzun kytziya'n aj Israel te Qman Dyos, qatoq matz'onin kyi'j tu'n tkub'ti'ju' tx'otx' lu, majxtoq che b'el kyxitu'nju' nimaqkytanam.3Tzajtzun ttzaq'we'n Qman Dyos kyqanb'e'tz aj Israel te, onin kyi'j tu'n tkub'kyi'j aj Kanaan, majx e'kub' kyb'ajsa'n aj Israel aj Kanaan exqe' nimaqkytanam, qu'mtzun okkyq'o'n tb'iju' najb'il lu Orma. Q'ank'uxb'il kan
4E'etz aj Israel t-xe witz Or tu'n kyxi' tu'me'lju' Ninnjab' Kyaq tb'i, exi' q'ol welt tu'n lalun che ik' toju' tx'otx' Edom. E'kub' siktiju' xjal toj b'e,5e'aq'witzuntz yolil ti'j Dyos ex ti'j Moyses. Intoq kyma'n:
—¿Titiqu'n xqo etza' kyiq'i'ne' Ejipt? ¿manaq tu'nqkyaj kyime' toj chq'ajlaj? Mixti' a' ex mixti' qwaye'. ¡Min qajb'iltoqe' wab'j lu!, chechij.
6E'tzajtzun tchq'o'n Qman Dyos kan ati kyb'i'yb'il, eb'jo'k tx'a'n kyu'n ex nim aj Israel e'kyim.7E'xi'tzuntz ja ta'toq Moyses ex xikyma'n te kjalu:
—¡Matxi' qo b'inchan ile' tu'nju' maqoyoline' ti'j Qman Dyos ex ti'ja! ¡Kub'sanxa te Qman Dyos tu'n kyel tiq'i'nju' kan qk'etze'!, chechij.
Xi'tzun tqani'n Moyses te Qman Dyos tu'n tkub' tnajsa'n kyil aj Israel,8tzajtzun tma'n Qman Dyos te kjalu:
—B'inchanku'ya jun tilb'ilal kan q'ank'uxb'il, ex q'o'nktza twi' jun tze nimin twe'. Ajttx'a'njtz jun tu'n jun kan, kxel ka'yin ti'ju' tilb'ilal kan twi' tze, kkleteltzuntz, chi Dyos.
9Kub' tb'incha'n Moyses jun kan q'ank'uxb'il ttx'otx'al ex kub' tq'o'n twi' jun tze nimin twe'. Qatzun ati jun matz'oktx'a'n tu'n jun kan, intoq xitka'yi'nju' kan q'ank'uxb'il ex intoq klet. E'kuman aj Israel ti'j kytx'otx' aj Moab'
10Xikyljo'n aj Israel kyb'e ex e'kub' tenpun Ob'ot.11Tej kyik' Ob'ot exi' b'etl ex e'kub' tenpuntl Iye-ab'arim, toj chq'ajlaj toj tjawetzq'ij teju' tx'otx' Moab'.12Tej kyik'tl atzu' xikyljo'n kyb'e ex e'kub' tenpuntl jata'ju' a' Sered.13Kyik'tl atzu', xikyljo'ntl kyb'e ex e'kub' tenpuntl jlajxi' a' Arnon. Aju' nin a' lu atzu' ta' toj chq'ajlaj tzajx toj kytx'otx' amorey, ex in ajb'en te kynaqachju' moab' kyuk'i'l amorey.14Kyi'jtzunju'lu in yolina'ju' tz'ib'a'n toju' u'j kye q'oj tb'incha Qman Dyos, ju' ntma'n:
Qoqe' ik'x toj B'eeb', toju' tx'otx' Supa, kyoju' a' ex toj a' Arnon,15ex kytziyileju' a' ju' inche'x tzmax toju' tx'otx' Ar inche pon tzmax toj nqach te Moab', chiju' tz'ib'a'n.
16Tej kyik' tk'etzju' a' Arnon xikyljo'n kyb'e tzmax B'eer. Atzuntzu' ta'ju' xoch jatmaya' Qman Dyos te Moyses tu'n kytzaj tb'u'yi'nju' tnam qu'n oktoq ktzajel tq'o'n a' kye.17Tojtzu'n q'ij lu xikyb'itza'n aj Israel b'itz lu:
¡In poq'chaj a' toj xoch! ¡Che b'itzan qe'ye' teju' xoch!18¡Jatz kylku'nju' nejenel tu'nju' kytze te chaq'b'il, aye'ju' xjal nimaq kyoklen toju' tnam ejatz jqonte tu'nju' kytze!, chechij.
Tej kyik' aj Israel toj chq'ajlaj, xikyljo'n kyb'e tzmax Matana;19tej kyi'k Matana e'pon Naalyel, tej kyik'tl Naalyel e'pon B'amot,20tej kyik' B'amot, e'pon toju' b'ya' ati toj tx'otx' Moab', twi'ju' witz Piska, ja q'ancha'la'ju' chq'ajlaj. Kub'ti'j nimaqkawil Seon kyu'n aj Israel (Dt 2.26-37)
21Xikychq'o'n aj Israel jte' kysanjel tk'etz Seon, nimaqkawil kye amorey, tu'ntoq t-xi' kyma'n te ikjalu:22Qajb'ile' tu'n qik'e' toju' ttx'otx'a. Lay qo ik'e' kyoju' tx'otx' ati kyawal ex kyoj awal lob'j, ex lay txi' qk'wa'ne' a' kyoj t-xocha. Naq qo ik'ele' toju' ttx'otx'a toju' ninb'e, chechij xikyma'n.
23Atzunte Seon min taj tu'n kyik'ju' aj Israel toju' ttx'otx', ape' tb'inchaju' eb'aj tb'u'yi'nju' t-xjal te q'oj ex etz q'ojil kyi'j toj chq'ajlaj, tetzunj kypon Jaas oktzaqpaj kyi'j.24Aye'tzunkye' aj Israel kykolkyib' ex kub'ti'j kyu'n, ex kub' kytzyu'nju' ttx'otx' tzajx tk'etzju' nin a' Arnon ex ponx tzmax tk'etzju' nin a' Jab'ok, ju' tzmax jata' nqach tuk'i'l kytx'otx' aj Amon, ju' jpu'mile ti'j kyu'n nimaqtapi.25Iktzu'n kytzuya' aj Israel kykyaqil nimaqkytanam amorey lu, aju' tnam Esb'on exqe' tnam ate' tjaq' tkawb'il, e'kub'tentzuntz najal kyoj.26Tojtzu'n nintnam Esb'on najla'toq Siyon, kynimaqkawil amorey. Ojetoq q'ojin Seon ti'ju' ojtxi' nimaqkawil aj Moab' ex ojetoq tz'el tiq'i'n tx'otx' lu pomnix tk'etzju' a' Arnon.27Qu'mtzun inkyma'n b'inchal b'itz kjalu: ¡Kukytzaje' toj tnam Esb'on, ju' nintnam ttanam nimaqkawil Seon! ¡kyb'incha'nktz junmajtle', ex kyq'onke' tapi te tkuwal ti'jile!28Tzajx Esb'on, ninttanam Siyon, ojexi'x juman q'aq', majxkub' t-xitu'nju' tnam Ar toj tx'otx' Moab', exqe' nimaqxjal nche kawin tib'aj Arnon.29¡Qab'anx twitza Moab'! ¡Matxi' kub'ti'ja ttanam dyos kyemos! mixti' xtb'incha tej ẍekub' oqu' t-xjala ex tej ẍekub' tz'aqu' tmyala toj tq'ob'ju' nimaqkawil Seon.30Kub' xitu'n tipumal Esb'on; tkyaqil kyej xitu'n tzajx Dib'on, ponx Nopa, pon kanunju' q'aq' tzmax Medab'a, chechij. Kub'ti'j Ok, nimaqkawil toj B'asan, kyu'n aj Israel (Dt 3.1-11)
31Iktzu'n kub'a' kytzyu'n aj Israel kytx'otx'ju' amorey.32Ex e'xitchq'o'n Moyses jte' ichan ka'yilteju' nintnam Jaser, ex kub'kyi'ju' nimaqtnam nqaku' ta'qe' kyu'n aj Israel, ex eb'je'x kyxla'ja'n amorey najlqe'toq atzu'.33Anjtzunkyi'tz tu'me'l B'asan, atzunte' Ow nimaqkawil toj B'asan, etz q'ojil kyi'j kyuk'i'l kykyaqilju' t-xjal te q'oj toj Edrey.34Tzajtzun tma'n Qman Dyostz te Moyses kjalu:
Lalun xob'a te, qu'n kxe'l nq'o'ne' toj tq'ob'a, junx kyuky'i'l kykyaqilju' t-xjal te q'oj tuk'i'lxi'ju' ttx'otx', ex ax ktb'incha'ya ti'j kse'n tb'inchaya ti'j Seon, nimaqkawil kye amorey najlitoq Esb'on, chi Dyos te.
35Iktzu'n kub' kyb'yo'n aj Israel Ow kyuk'i'lxi' tk'wal ex kykyaqilju' t-xjal te q'oj. Mixti' juntl kyej kyq'o'n itz', ex kub' ktzyu'nju' kytx'otx'. Tchaq' nimaqkawil B'alak ttxokli B'alaam
1Xikyljo'n aj Israel kyb'e ex e'kub' tenpuntl toju' plan tx'otx' te Moab', toj tjawetzq'ij teju' a' Jordan, jlaj Jeriko.
2Til B'alak tk'wal Sipor titi' ojetoq kyb'incha aj Israel kyi'ju' amorey.3Ikqe'xju' xjal aj Moab' eb'ajxob' tej kyka'yinte nimtoq txqan kyb'aju' aj Israel.4Kymatzun xjaltz aj Moab' kyeju' tijwnaq te Madyan ikjalu: Kb'ajelte' qtx'otx' kyu'n kykyaqilju' xjal lu, kse'n k'ul toj kojb'il inb'aj tu'n wakx, chechij.
Atoq B'alak nimaqkawil toj Madyan toju' tq'ijlalil lu,5xitchq'o'n ttxokli B'alaam, tk'wal B'eor, ju' atitoq Petor tk'etzju' nin a' Euprates, toju' tx'otx' Amab'. Xitma'n nimaqkawil B'alak kyeju' t-sanjel tu'n t-xikyma'n te B'alaam ikjalu: Matxi' tz'etz jun tnam Ejipt, matxi'xi'x che kub'chmet toj tkyaqilju' tx'otx', atzu'n ja'lo matxi' che ul kanun nk'etze'.6Qu'mtzun lwix kuttzaja ex qaninxa taq'wix kyib'aju' tnam lu, qu'n kuwqe'xi'x kyeqwitze'. Qapetzun ikykb'ela'kyi'ju' wu'ne' ex tu'n kyex nq'o'ne' ti'jxi'ju' tx'otx'. B'i'n wu'ne' nche japunju' qanb'en b'a'n mujqa qanb'en toq'wix nche tb'incha'na, chechiku'ye' te, chij.
7Exi'tzu'n tijwnaq aj Moab' ex aj Madyan tuk'i'l pwaq tu'n tchjetju' qanb'il taq'wix, tetzunj kypon ja ta'toq B'alaam, xikyma'nju' t-sanjel B'alak te.8Atzunte B'alaam xitma'n kye ikjalu:
—Kukykyaje' tzalu teju' qonik'an ja'lu, kxel nq'o'ntzun tzaq'web'ltze' kyeye' kse'nxju' ktzajel tma'n Qman Dyos weye', chij.
E kyejtzun ten tijwnaq te Moab' tuk'i'l.9Kub'tzun tyek'u'ntib' Qman Dyos twitz B'alaam ex tzaj tqani'n te ikjalu:
—¿Alkyeqe'ju' xjal ate'qe' tuk'i'la lu? chij.
10Xi'tzun ttzaq'we'n B'alaam te ikjalu:
—A B'alak tk'wal Sipor, nimaqkawil toj Moab', saj chq'onkye tu'n kytzaj q'malte weye'11qa matxi' kub'chmet jun tnam etzni Ejipt toj tkyaqilju' tx'otx'. Atzunte B'alak tajb'il tu'n nxi'ye' qanil taq'wix kyib'aj, tu'n tlonte qa ikykb'ela'kyi'ju' tu'n ex tu'n kyex tq'o'n ti'jxi' ttx'otx', chij.
12Tzajtzun tma'n Qman Dyos te B'alaam kjalu:
—Lalun txi'ya kyuk'i'l ex lalun tqani taq'wixa kyib'aju' tnam lu, qu'n oje kub' nky'i'wla'nwe' tnam lu, chi Dyos.
13Tetzunj tjawe' B'alaam te juntl q'ij, xitma'n kyeju' nejenel e'tzaj tchq'o'n B'alak kjalu:
—Kutanj kyi'je' toj kytx'otx'e'. Mintzaj tq'o'n Qman Dyos anb'il weye' tu'n nxi'ye' kyuk'i'le', chij kye.
14Anjtzun kyi'ju' nejenel te Moab' tk'etz B'alak ex xikyma'n te kjalu:
—Min xtaj te B'alaam tu'n ttzaj quk'i'le', chechij.
15Atzunte B'alak ilxi'xti'j tu'n, e'xitchq'o'n junjuntl nejenel nimxi'x kyb'aj ex nimxi'x kyoklen kyekywitzju' e'xitchq'o'n tnejel.16Exi'tzuntz tk'etz B'alaam ex xikyma'n te ikjalu:
—Chi B'alak, tk'wal Sipor, saj tma'n: B'inchama xtalb'il lalun kub' t-xk'a'yu'n tib'a tu'n ttzaja.17Kjawil nnima'ntzuntza b'a'nxi'x ex knb'incha'ye' tkyaqilju' matqaniya weye'; kuttzaja, b'inchama xtalb'il tu'n tqaninteya taq'wix tib'aju' tnam lu, chij teya, chechij te.
18Atzunte B'alaam xittzaq'we'n kye ikjalu:
—Maskye matzaj tq'o'n B'alak tkyaqilju' q'anpwaq ex saqpwaqju' ati toju' tja te kawb'il, mixti' tu'n nb'inchante junwe' ti'xti' nim toklen mujqa b'o's, qa min chq'o'n tu'n Qman Dyos Ndyose'.19Kutzun kykyaje' teju' qonik'an ja'lu, atzun wile' ti'ti' ktzajel tma'n Qman Dyos weye' toju' maj lu, chij kye.
20Tetzun qonik'an kub' tyek'u'ntib' Qman Dyos te B'alaam ex tzaj tma'n te kjalu:
—Ma'na' che kyaju' ichan lu tuk'i'la, we'ktza ex kutxi'ya kyuk'i'l, ex o'kxte kxel tb'incha'nju'ya o'kxu' kxe'l nma'ne' teya, chi Dyos. Okyal tanjl Qman Dyos twitz B'alaam
21Tetzunj tjawe' B'alaam te juntl q'ij, jaw tq'o'n tiqb'ilju' tb'ur ex xi'tzuntz kyuk'i'lju' nejenel te Moab'.22Iqa'n toqtzun B'alaam tu'n tb'ur lepchqe'toq kab'e' tmajin ti'j.
Tzajtzun ttx'u'jil Qman Dyos ti'j qu'n matxitoq txi', kub' tq'o'n tib'ju' tanjl Qman Dyos mqolteju' tb'e tu'n tmalun tzik'.23Tej tka'yinteju' b'ur atitoq tanjl Qman Dyos toj nky'ajchaq b'e tuk'i'l jun k'uẍtx'e'nb'il toj tq'ob', eltpa'ntib' ti'ju' b'e ex okx tq'o'ntib' tojxi' tx'otx'; atzunte B'alaam oktjuma'n tu'n t-xi' jumajtl toju' b'e.24Kub'tzun we'tlju' tanjl Qman Dyos janik'a' b'e txol awal b'incha'ntoq tapi tu'n ab'j toj kykab'il plaj.25Tej tka'yintetl b'ur tanjl Qman Dyos, xitqejb'a'n tib' twitzju' tapi ab'j b'incha'n, oktjtz'o'n tkux B'alaam twitzju' ab'j. Atzunte B'alaam oktjuma'n jumajtl.26Atzu'n tanjl Qman Dyos xinej kywitz ex kub' we' jab'o's toqju' b'e, ja mixjaloja tu'n txa' qpa'nqib' toj jun plajtl.27Tej tka'yinte b'ur tanjl Qman Dyos, kub' t-xon tib' twitz tx'otx'. Atzunte B'alaam tzaj ttx'u'jil ti'j ex oktjuma'n tu'n jun tze.28Tetzu'n kmuj lu tb'incha Qman Dyos tu'n tyolinju' b'ur, tu'n t-xitma'n te B'alaam kjalu:
—¿Ti'tzu'n matxi nb'inchaye' teya? Toxmaji'n wok tb'yo'nju'ya ja'lo, chij.
29—Naqna' nxmayina wi'je', noqwit ati jun kchil toj nq'ob'e', jaku' kub' nb'yo'na ja'loxi'x, chi B'alaam te.
30Atzunte' b'ur xitma'n te kjalu:
—Ayine' tb'ura, matxi' chejina wi'je' toj tkyaqilju' tchwinqlala ex kanli twitza b'ajx nb'inchaye' teya ikju', chij.
—B'ayte' ikju', chi B'alaam xittzaq'we'n.
31Tb'inchatzun Qman Dyostz tu'n tka'yinte B'alaamju' tanjl atitoq toj nky'ajchaq b'e tuk'i'l jun k'uẍtx'e'nb'il toj tq'ob'. Kub'tzun meje B'alaamtz majx ku'punju' tplaj twitz tx'otx',32tzajtzun tma'n tanjl Qman Dyos te kjalu:
—¿Tiqu'n soka' tb'yo'n oxmaja tb'ura? Ayinwe' ẍin ule' mqolteya, qu'n myab'a'nju' tb'eya toj nwitze'.33Machin tilju'ye' tb'ura ex lwiy sel tpa'ntib' wi'je' toju' oxmaj, noqwit min sel tpa'ntib' wi'je', matxi'wtlo kub' nb'yo'na, atzunju' tb'ura ma'wtlo kyej anq'in wu'ne', chij.
34Atzunte B'alaam xittzaq'we'n teju' tanjl Qman Dyos kjalu:
—Matxi' chin b'inchan ile', mixtoqti' b'i'n wu'ne' qa atiya tzalu jpulte nb'eye'. Qatzun myab'a'n toj twitza tu'n nxi'ye', k'anjel wi'je', chij.
35Tzajtzun ttzaq'we'n tanjl Qman Dyos te kjalu:
—B'a'n tu'n t-xi'ya kyuk'i'lju' ichan lu, naq aju' o'kx kxel tma'nju'ya aju' kxe'l nma'ne' teya, chij. K'monjtz B'alaam tu'n B'alak
Xi' B'alaam kyuk'i'lju' nejenel e'xitchq'o'n B'alak,36tetzunj tb'inte B'alak qa xi'toq tpon B'alaam, etz k'lulte toj jun nintnam te Moab', ttziju' nin a' Arnon, jata' tnqachilju' ttx'otx',37ex xitma'n te kjalu:
—Matxinchq'o'ne' ttxokliya tu'n ttzaja ilxi'xti'j, ¿tiqu'ntzun min tajb'iltoqa tu'n ttzaja? ¿ma intoq t-xima'na qa mixti' ninb'ilteya qu'ne'? chij.
38Atzunte B'alaam xittzaq'we'n te kjalu:
—Luqine' lu, matxi' chin ule' nelteya. Naqtzun aju' mixti' woklene' tu'n nyoline' tu'nx nnab'le'; o'kxwe' b'a'n tu'n t-xi' nma'n aju' ktzajel tma'n Dyos weye', chij te.
39Xi'tzun B'alaamtz tuk'i'l B'alak Kyiryat-usot,40jaxa' tma'na' B'alak tu'n kykub' b'yo'n ttxu wakx ex ttxu rit, tu'n kyxi' iq'i'n te B'alaam ex kyeju' nejenel intoq che b'et tuk'i'l.
41Tetzun juntl q'ij te prim, pon B'alak tk'etz B'alaam ex jax tiq'i'ntzuntz B'amot-b'aal, jaka'yeta' kyxmuj aj Israel tu'n.
1Atzunte B'alaam xitma'n te B'alak kjalu:
—B'incha'nktza wuq q'olb'eb'l tzalu, ex jyontza wuq tal tman wakx ex wuq rit, chij.
2Xitb'incha'n B'alak kse'nxju' tman B'alaam te, kykab'il e'kub' q'onte jun tal tman wakx ex jun tal rit tib'aj junjun q'olb'eb'l.
3Xi'tzun tma'n B'alaam te B'alak kjalu:
—Kutkyaja tzalu tk'etzju' chojb'il, atzunwe' machinxe' ka'yilte qama tzul Qman Dyos wuk'i'le'. Kxel nma'ntzuntze' teya titi' matzaj tma'n weye', chij. Tqani B'alaam b'a'n kyib'aj aj Israel
Xi'tzun B'alaamtz twi' jun witz toj chq'ajlaj,4ja kub'a' tyek'u'ntib' Dyos twitz. Xitma'n B'alaam te:
—Matxi' kub' nb'incha'ne' wuq q'olb'eb'l, ex matxi' kub' nq'o'ne' jun tal tman wakx ex jun rit tib'ajile junjun, chij.
5Tzajtzun tma'n Qman Dyos te B'alaam titi' tu'n tmante ex tzaj tma'n te kjalu:
—Kutanj ti'ja tk'etz B'alak ex q'manxa te axju' matxi' txinma'ne' teya, chij.6Anjti'j B'alaam, ex tej tpon, wa'ltoq B'alak junx kyuk'i'l kykyaqilju' nejenel kye aj Moab' tk'etzju' chojb'il.7Tmatzun B'alaamju' pakb'ab'l ikjalu:
Tzmax kywi' witz te tjawetzq'ij ex tzmax toj Aram, ẍin tzaja' tiq'i'ne' B'alak, nimaqkawil toj Moab'. Kutzaja, qaninxa taq'wix kyib'aju' aj Israel, txkoma taq'wix kyib'aju' ttanam Jakob', chij.8¿Se'n taq'wi knqani'ye' taq'wix kyib'aju' min tzaj tq'o'n Dyos taq'wix kyib'aj? ¿Se'n taq'wi ktzajel ntxko'ne' taq'wix kyib'aj, extzun min ntzaj tq'o'n te Qman Dyos taq'wix kyib'aj?9In nka'yi'ne' tzmaxtzu' kyib'aju' nimaq pik lu, inxi' nka'yi'ne' kywi'ju' witz: jun tnam q'uqlixi'x tk'u'jlalil, junxi'tl kyekywitzju' txqantl tnam.10Naku'j quq qe'; ¿alkye kb'entel tajlankye? ¿Alkye kb'ilteju' kyajlal? ¡Noqwit ikj chin kyima'we' kse'n kyeju' ichan lu tnik'alkyi'j, ikwit chin pon b'aja'we' kse'nkye! chij.
11Xitma'ntzun B'alaktz te B'alaam ikjalu:
—¿Titi' ntb'incha'na? Matzaj wiq'i'na tu'n tqaninteya taq'wix kyib'aju' wajq'oje, atzuntlta in tqani'na b'a'n kyib'aj, chij.
12Xitzun ttzaq'we'n B'alaam te:
—Kyajna' b'entti'j qu'n qa o'kxwe' knma' aju' ktma' Qman Dyos weye', chij.
13Atzunte B'alak ilxi'xti'j tu'n:
—Kutzaja wuk'i'le' toj jun plajtl, jatu'n tka'yinteya okxju' ti'jile kyxmuj, mya tkyaqilju' kyxmuj. Qaninxa taq'wix kyib'aj tzmaxtzu' na'tz, chij.
14Xi'tzun tiq'in B'alak B'alaam toju' kojb'il Sopim, twi'ju' witz Piska, jajawa' tb'incha'n wuq q'olb'eb'l, ex kub' tq'o'n jun qpoj tman wakx ex jun rit tib'aj junjun te chojb'il.15Xitzun tma'n B'alaamtz te B'alak:
—Kutkyaja tza'lu, tk'etzju' chojb'il, atzunwe' machinxe' tu'n nmujb'ante wib'e' tuk'i'l Dyos, chij.
16Etz Qman Dyos K'lulte B'alaam ex tzaj tma'n te titi' tu'n tmante. Ex tmatl te ikjalu:
—Kutanj ti'ja tk'etz B'alak ex q'manxa te axju' matxi' txinma'ne' teya, chij.
17Anjtzti'j B'alaam ex tej tul wa'ltoq B'alak tk'etzju' chojb'il, kyuk'i'lju' nejenel te Moab'. Atzunte B'alak xitqani'n te:
—¿Titi' Saj tma'n Qman Dyos teya? chij.
18Tmatzun B'alaam ju' pakb'ab'l kjalu:
B'alak, tk'wal Sipor, Chinpe' tb'itza b'a'nxi'x.19Mikxa'te Qman Dyos kse'nqe' xjal nche kyim: min nchan yol ex min ntch'exb'e'n tnab'l. Ajtmante jun tyol, njapun tu'n. Ajttziyante jun tyol njapun tu'n.20Chq'o'n qinwe' tu'n txi' nqani'ne' b'a'n kyib'aj; qa nche tk'i'wla'n Qman Dyos, lay b'ent tu'n txi' nqaninwe' taq'wix kyib'aj.21Mix-a'lo' oje ka'yinte sb'ub'l ex taq'wix toj Israel, ttanam Jakob'. Ati te Qman Dyos kyuk'i'l, injaw kynima'n qu'n a nimaqkawilju' kye.22Iky Qman Dyos etzq'inkye Ejipt, kye, kse'n tuk'a tojk'ul wakx.23Lay kub' tz'aqu' txkoj myab'a'n tib'aj Jakob'; mixti'x tajb'en ajk'ayi'n ti'j Israel. In nojqelan tu'n t-xiq'met te Israel ja'lo kjalu: ¡Nim txqan b'a'nq'ob'aj matxi' tb'incha Qman Dyos teya!24Kjawil tiq'i'ntib'ju' tnam lu xob'ajilx kse'n jun b'alun, ex lay kub' qe tzmaxi'j ajtkub' ti'ju' tchi' tu'n exqa na'mxtoq tk'wante kychk'elju' txkup matoq kub' kyi'j tu'n, chi B'alaam.
25Xi'tzun tma'n B'alaktz te B'alaam kjalu:
—¡Qatzun lay b'ent tqaninteya taq'wix tib'aju' tnam lu, tu'nxpe' lalun tqaniya b'a'n tib'aj! chij.
26Atzunte B'alaam xittzaq'we'n te:
—¿Ma mitzun jun nxinma'ne' teya, qa o'kxwe' knb'incha' o'kxju' matchaq'u' Qman Dyos weye'? chij.
27Atzunte B'alak xitma'n te:
—Kutzaja, kxe'l wiq'ina toj jun plajtl. Qapetzunlo lay tik'o Qman Dyos tu'n tqaninteya taq'wix tib'aj Israel atzu', chij.
28Xi'tzun tiq'i'n B'alak B'alaam twi'ju' witz peor, ja'ju' q'ancha'la' tkyaqilju' chq'ajlaj.29Atzuntzu' xa' tma'n B'alaam te B'alak kjalu:
—B'incha'nktza wuq q'olb'eb'l tzalu ex q'intza wuq qpoj tman wakx ex wuq rit, chij.
30Tb'inchatzun B'alak kse'nxju' xitma'n B'alaam te, kub'tzun tq'o'n jun qpoj tman wakx ex jun rit te chojb'il tib'aj junjun q'olb'eb'l.
1Matxi'toqna' til B'alaam qa b'a'n toj twitz Qman Dyos tu'n tqanit b'a'n kyib'aj aj Israel, min xi'tl k'molte pakb'ab'l te Qman Dyos kse'n matxitoq tb'incha nejtl, naq o'kx xitmiltz'u'n twitz tu'me'lju' chq'ajlaj.2Tetzunj txi' tka'yi'n B'alaam nk'u'mile kyten aj Israel toj tneji'n kyyajajil, tenju' t-xew Qman Dyos tuk'i'l;3tmatzun B'alaamtz pakb'ab'l ikjalu:
Tpakb'ab'l B'alaam, tk'wal B'eor. Jun ichan inknet najchaq tu'n twitz,4Ajtka'yinte toj witzik' in q'ancha'linxi'x b'a'nxi'x toj twitz, ntk'mo'n tqanil te Dyos naku'j toj witzik'. Teju' Qman Dyos nimtipumal.5¡Jakob', tb'anilqe'xi'xju' tpacha xb'alun! ¡Tb'anilxi'xju' t-xmuja Israel!6Txoli'n kyten naku'j tut nimaqkyqan, naku'j awalqe' ttzi jun nin a', k'ok'sb'ilqe' awa'nqe' tu'n Qman Dyos, ¡K'uteqe' ttzi a'!7Nim a' ktenb'el te Israel tu'n tk'wante ex tu'n tkub' a'letju' tawal. Kkawilju' tnimaqkawil tib'aj Ajak; nimxi'xju' tkawb'il ktenb'el.8Iky Qman Dyos etzq'inkye toj Ejipt, kse'nqe' tuk'a tojk'ul wakx toj twitz. Che b'ajelu' ajq'oj nimaqtnam kyu'n aj Israel; che kb'el ttoqi'nju' kyb'aqil. Ex kche tk'ixb'sa' kyu'n t-smaj,9Aj tkub'ten ojlal naku'j jun b'alun: mix-a'lo' kxe'l k'asunte. ¡K'iwla'nxwi'tju' in qanin b'a'n tib'aja, ex tzajxwit taq'wix tib'aju' in qanin taq'wix tib'aja!, chi B'alaam. Tpakb'al tu'n B'alaam
10Tetzunj tb'inte B'alak ja'lu, tzaj tx'u'jil b'a'nxi'x ti'j B'alaam, ex kub' tjuma'n tq'ob', xitma'n te B'alaam ikjalu:
—Tzaj ntxko'na tu'n tqaninteya taq'wix kyib'aju' wajq'oje, extzun toxmaji'n tuk'i'lu' ja'lo in tqani'na b'a'n kyib'aj.11¡Ate b'a'n kutanj ti'ja tjaya! Ojetoq ntziyaye' tu'n nq'onteye' txqan ninb'ilteya, mixnati' xtaju' Dyos Manb'aj, chij.
12Atzunte B'alaam xitzaq'we'n te ikjalu:
—Oje txi' nchik'b'a'ne' kyeju' t-sanjelala13maskye matzaj tq'o'na tkyaqilju' q'anpwaq ex saqpwaq ati toju' tjaya te kawb'il, lay naqwit tzik' nb'i'nwe' tchaq'b'il Qman Dyos ex lay nb'inchaye' jun ti'xti' b'a'n mujqa taq'wix tu'nx nnab'le', ex xinma'ne' kye qa o'kxwe' knma' aju' ktzajel tma'n Qman Dyos weye' tu'n txinma'ne'.14Machin anjwe' toj ntx'otx'e'; naq o'kx kxe'l nma'ne' teya titi' ktb'incha'ju' tnam lu tuk'i'lu' ttanama yajxi'tl, chij.
15Tmatzun B'alaamju' pakb'ab'l lu:
Tpakb'ab'l B'alaam tk'wal B'eor, jun xjal in knetju' najchaq tu'n twitz,16Ajtka'yinte toj witzik' nq'ancha'linxi'x b'a'nxi'x toj twitz, tojtzqi'nju' ojtzqi'n tu'n Qman Dyos nim toklen, nche tk'mo'n pakb'ab'l ex nkane' toj twitz ju' nche tzaj tq'o'n Qman Dyos nimtipumal.17Inknet ch'i'n wu'ne' titi' tzul yajxi'tl, inknet ch'i'naq tu'n nwitze' tzmax najchaq: k'eletz jun che'w ti'j Jakob', kjawil jun nimaqkawil toj Israel. Kb'el tpch'u'n twi' Moab', che kb'el twab'e'n kykyaqilju' tyajajil Set.18Kb'elti'j Edom tu'n, kb'elti'j Seyir ju' tajq'oj tu'n. Nimaq ti'xti' che kyb'incha' aj Israel.19K'eletz jun nejenel kyxol tyajajil Jakob', tkyaqil kb'elkyi'j tu'n ex che b'ajelju' che kjelten toju' nintnam tu'n, chij.
20Yajxi'tzuntl xitka'yi'n B'alaam ju' Amalek, ex tmaju' tpakb'al lu:
Nimxi'xte' toklenju' nintnam Amalek, te b'ajsb'iltzun majx kb'ajel xitj, chij.
21Ex exi tka'yi'nju' keney, ex tmaju' tpakb'al lu: E' tyajajil Kayin: maskye kuwsa'nqe'ju' kyjaye' te kolb'ilkyib'e', maskye matxi' kub' kyq'o'n kyjaye' kyxol pik, kb'ajelte' kyjaye' lu tu'n q'aq' ajkyb'ajx q'i'ne' pres kyu'n aj Asirya, chij.
23Yajxi'tzuntl tmaju' tpakb'al lu:
¿Alxi'xwitlokye kjel anq'in ajtb'inchante Qman Dyos e'ti'xti' lu?24Kche ulel b'ark tzajniqe' toju' mlaj te Chipre, ex che kjel kyxitu'n aj Asirya ex Eb'er, qu'n ikxte Eb'er kjel xitj, chij.
25Tb'ajlenxi'tzun tma'n B'alaam ja'lu, kub' b'e tu'n ex anj tja. Ex kub' b'e tu'n B'alak. E'k'ulun aj Israel twitz B'aal-peor
1Tej kykub'ten aj Israel Sitim, e'aq'wi ichan ajpajil kyuk'i'lju' qya aj Moab',2exi txko'n kyu'nju' qya lu q'olte chojb'il kywitzju' kydyos. Intoq che wan aj Israel ti'ju' wab'j lu ex intoq che k'ulun kye kydyosju' qya aj Moab',3iktzu'n e' b'leta' tu'n kyk'ulun twitz B'aal-peor. Tzajtzun ttx'u'jil Qman Dyos kyi'ju' aj Israel,4tzaj tma'ntzuntz te Moyses ikjalu:
—B'uyinqe'tza kykyaqilju' nejenel te tnam, ex b'yonqe'ku'ya nwitze' tojku'xi'x tqan q'ij. K'ik'eltzun ntx'u'jiltze' kyi'j aj Israel, chij.
5Tchaq'tzun Moyses kye' ajkawil kyxol aj Israel kjalu:
—Teyle junjunkye' che kb'el tb'yo'nju' ichan tex tyajajil ẍe b'let tu'n kyk'ulun te B'aal-peor, chij.
6Atitzun jun aj Israel xitiq'i'n jun qya aj madyan tja, twitzku' Moyses ex kywitzku' kykyaqil aj Israel b'u'yi'nkyib', akxtoq inche oq' ttziju' Ja te Mujb'ab'ltib'il.7Atzunte Pinees tk'wal Eleasar ex tchmanju' pale Aaron, tej tka'yinte ja'lu, etz kyxol aj Israel b'u'yi'nkyib', xitiq'i'n jun ch'ut8ex xilpe ti'ju' aj Israel lu tzmax tpon tja, ex t-xyu'ntzun ch'uttz toj tk'u'ju' aj Israel ex toj tk'u'ju' qya atzu'. Iktzu'n b'aja'ju' yab'il intoq che kyim aj Israel tu'n.9Matxitoqpe' che kyim oxmutx' (24,000) aj Israel.
10Tzajtzun tma'n Qman Dyos te Moyses kjalu:
11—Tu'n Pinees xkub'a' ntx'u'jile' kyi'j aj Israel, qu'n maxky'aqlin kse'nxwe' chin xky'aqlin kyi'j. Qu'mtzun min xxinq'o'ntle' toj nk'u'je' ex min ẍemankun wu'ne'.12Qu'mtzun q'manxa te qa kjel b'entti'j jun nyole' te nak'b'il tuk'i'l,13tu'ntzunju' lu kxe'l nq'o'ne' taq'un pale te ex kyeju' tyajajil tejumajx, qu'n maxky'aqlin tu'n tpaj myab'a'n xb'inchanjtz nwitze' ex matk'amju' najsb'il kyil aj Israel, chi Dyos.
14Simri tb'iju' aj Israel ex xopq'i'n toj tk'u'j junx tuk'i'lju' qya aj Madyan, tk'wal Salu ex nejenel te jun ja xjal kyxol tyajajil Simeon.15Atzu'n tb'iju' qya aj Madyan, Kosb'i, tmyal Sur, nejenel te jun k'loj ja xjal aj Madyan.
16Tzaj tma'n Qman Dyos te Moyses ikjalu:
17Kukyxi'ye' q'ojil kyi'ju' aj Madyan ex che kyb'ajsanqe'ku'ye',18qu'n mache oktzaqpaj q'ojil kyi'je' tu'nju' kypi'sal ex mache okq'o'ne' k'ulul kyu'n twitz B'aal-peor, ex kse'nte kosb'i, tmyalju' nejenel aj Madyan, ju' kyim tu'n ch'ut tej ttzaj nq'o'ne' yab'il kyi'je' tu'n tpaj e' k'ulune' twitz B'aal-peor, chi Dyos. Jaw jumajtl kyajlal aj Israel
1Tik'lenxi'ju' yab'il nb'iyon lu, tzaj tma'n Qman Dyos kye Moyses exju' Eleasar tk'wal pale Aaron kjalu:
2Kyiq'i'nktze' jun kyajlal kykyaqil aj Israel teyle junjun ja, ktzajel qe kyuk'i'lju' te winqi'n ab'q'iqe', b'a'nqe' te q'oj, chij.
3Kychaq'tzun Moysestz ex Eleasar kye aj Israel toju' plan tx'otx' te Moab', ttzi a' Jordan, jlaj Jeriko,4tu'n kytz'ib'ante kyib' kykyaqil, tzajx kyuk'i'lju' te winqi'n ab'q'iqe' kse'nxju' tchaq' Qman Dyos te Moyses.
Aye' aj Israel ja'lu e'etz toj Ejipt:
5Aye' k'loj tyajajil Rub'en, tnejel tk'wal Israel, aye' kyyajajil Enok, Palu,6Esron ex Karmi;7Japun kyb'aju' tyajajil Rub'en toj jo'mutx' b'eljojk'al qaqnaq lajoj (43,730) ichan, kse'nxju' kyajlal jaw.8Aju' Palu a tk'walju' Elyab',9atzu'n Elyab' aye' tk'walju' Menwel, Datan ex Ab'iram. Aye' Datan ex Ab'iram ju' e' q'on nab'l junx tuk'i'l Kore, jawkyiq'i'nkyib' ti'j Qman Dyos ex kyi'j Moyses ex Aaron,10xi'tzun k'ab'chaju' tx'otx' ex exi' qob'chaj kykab'il junx tuk'i'l Kore, exqe' xjal moje kytzi kyuk'i'l e'kyim, kab'lajnaq lajoj (250) ichan e'kyim tu'n q'aq'. Ajb'en ja'lu te jun nab'l kyeju' txqantl.11Aye'tzu'n tk'wal Kore minti' e'kyim.
12Aye' k'loj tyajajil Simeon aye' kyyajajil Nemwel, Jamin, Jaquim,13Sera ex Sawul;14japun kyb'aju' tyajajil Simeon toj kab'mutx' o'lajk'al lajnaq (22,200) ichan, kse'nxju' kyajlal jaw.
15Aye' k'loj tyajajil Kad aye' kyyajajil Sepon, Awi, Suni,16Osni, Eri,17Arod ex Arelyi;18Japun kyb'aju' tyajajil Kad toj jo'mutx' junk'al jo'naq (40,500) ichan, kse'nxju' kyajlal jaw.
19E'kyimju' Er ex Onan kyxolju' tk'wal Juda toju' tx'otx' Kanaan,20qu'mtzun aye' k'loj tyajajil Juda aye' kyyajajil Sela, Pares ex Sera.21Aye' k'loj tyajajil Pares aye' kyyajajil Erson ex Amul;22Japun kyb'aju' tyajajil Juda toj b'eljojmutx' junlajk'al jo'naq (76,500) ichan, kse'nxju' kyajlal jaw.
23Aye' k'loj tyajajil Isakar aye' kyyajajil Tola, Pub'a,24Jasub' ex Simron;25Japun kyb'aju' tyajajil Isakar toj wajxaqmutx' o'lajnaq (64,300) ichan, kse'nxju' kyajlal jaw.
26Aye' k'loj tyajajil Sab'ulon aye' kyyajajil Sered, Elon ex Jaleel;27Japun kyb'aju' tyajajil Sab'ulon toj wuqmutx' junlajk'al jo'naq (60,500) ichan, kse'nxju' kyajlal jaw.
28Aye' k'loj tyajajil Jse ju' kyyajajil Manases ex Eprayin.29Aye' tyajajil Manases, aju' k'loj tyajajil Makyir; aye' tyajajil Makyir, aju' k'loj tyajajil Kalaad;30aye' tyajajil Kalaad, aye' k'loj kyyajajil Leser, Elek,31Asryel, Sikyem,32Semida ex Eper.33Aju' Selopead, tk'wal Eper mixti' ten tk'wal, o'qe'kx tmyal, aye' Maala, Noa, Okla, Milka ex Tirsa.34Japun kyb'aju' tyajajil Manases toj qaqmutx' junlajk'al jo'naq (52,700) ichan, kse'nxju' kyajlal jaw.35Aye' k'loj tyajajil Eprayin aye' kyyajajil Sutela, B'akyer ex Taan.36Aye' tyajajil Sutela, aye' k'loj tyajajil Eran.37Japun kyb'aju' tyajajil Eprayin toj kyajmutx' junk'al jo'naq (32,500) ichan, kse'nxju' kyajlal jaw. Aye'tzun tyajajil Jse ju' kse'nx ttxolil toj k'loji'n kywitze'l kyib'.
38Aye' k'loj tyajajil B'enjamin aye' kyyajajil B'ela, Asb'el, Ayram,39Sepupam ex Upam.40Aye'tzu'n k'loj tyajajil B'ela aye' kyajajilju' tk'wal, Ard ex Naaman.41Japun kyb'aju' tyajajil B'enjamin toj jo'mutx' kyajlajk'al (45,600) ichan, kse'nxu' kyajlal jaw.
42Aye' tyajajil Dan aju' k'loj tyajajil Swam.43Japun kyb'aju' tyajajil Suwam toj wajxaqmutx' junk'al (64,400) ichan, kse'nxju' kyajlal jaw.
44Aye' k'loj tyajajil Aser aye' kyyajajil Imna, Isuy ex B'eriya.45Aye' k'loj tyajajil B'eriya aye' kyyajajil Eb'er ex Malkyel.46Ten jun tmyal Aser, a tb'iju' Sera.47Japun kyb'aju' tyajajil Aser toj qaqmutx' oxlajk'al lajnaq (53,400) ichan, kse'nxju' kyajlal jaw.
48Aye' k'loj tyajajil Neptali aye' kyyajajil Jaseel, Kuni,49Jeser ex Silem.50Japun kyb'aju' tyajajil Neptali toj jo'mutx' oxlajk'al lajnaq (45,400) ichan, kse'nxju' kyajlal jaw.
51Japun kyb'aju' aj Israel toj oxnaq o'lajmutx' kyajk'al qaqnaq lajoj (601,730) ichan tu'n kykyaqil, kse'nxju' kyajlal jaw. Nuk'b'il tu'n tkub' pa'nju' tx'otx'
52Tzaj tma'n Qman Dyos te Moyses kjalu:
53Kb'el pa'yetju' tx'otx' kyxolju' xjal lu, kse'nxju' kyajlal xtz'ib'et.54Nimju' tx'otx' kxel tq'o'na kyeju' tnej nim kyb'aj, atzu'n kyeju' tnej mya nim kyb'aj naqjni'x kxel tq'o'na. Teyile junjun tnej kxe'l jun tal tnejil kytx'otx' kse'nxju' kyajlal xjaw.55Kxel pa'yitju' tx'otx' kse'nxju' makub' tz'aq kye. Teyile junjun ktk'ma'ju' tetzb'il tojxju' k'loj junx kyyajilb'en ti'ju' kxel q'et teju' kyman.56Kxel sipetju' tx'otx' kse'nxju' makub' tz'aq kye, kyxolju' tnej nim kyb'aj ex kyxolju' tnej mya nim kyb'aj, chi Dyos. Jaw kyajlal aj Leb'i
57Aye'ju' k'loj tyajajil Leb'iju' jaw kyajlal aye' kyyajajil Kerson, Koat ex Merari.58Exqe' k'loj kyyajajil Lib'ni, Eb'ron, Mali, Musi, ex kori, tyajajil Leb'iqe'.
Aju' Amram tk'wal Koat.59Mje Amram tuk'i'l jun tmyal Leb'i Jokab'ed tb'i, itz'ji tej atixtoq Leb'i Ejipt. Aye' Amram ex Jakob'ed kyman Aaron, Moyses ex Mariy.60Aye'tzu'n tk'wal Aaron aye' Nadab', Ab'yu, Eleasar ex Itamar.61Aye'tzu'n Nadab' ex Ab'yu, e'kyim tej tkub' kyq'o'n jun q'aq' junxi'tl twitz Qman Dyos.
62Kab'mutx' wuqlajk'al lajnaq (23,000) japuna' kyajlalju' q'a tyajajil Leb'i tu'n kykyaqil, tzajx kyuk'i'lju' te jun xjaw qe'. Na'mtoq kytz'ib'et kyuk'i'lju' txqantl aj Israel, qu'n na'mtoq t-xi' q'et kyetzb'il.
63Atzun kyajlal aj Israel jaw kyu'n Moyses tuk'i'lju' pale Eleasar kyoju' plan tx'otx' te Moab', ttzi nin a' Jordan jlaj Jeriko.64Mixti' jun kyeju' jaw kyajlal kyu'n Moyses ex Aaron toju' chq'ajlaj Sinayi kyxol kykyaqil ja'lu,65qu'n ojetoq tma Qman Dyos kye qa oktoq che kyimel toj chq'ajlaj. Majx e mankun kykyaqil, naq o'kx Kaleb' tk'wal Jepone ex Joswe tk'wal Num e'kyajten. Kyetzb'il myalb'aj
1Ate'toq jwe' txin kyitz'inkyib' kyxolju' tyajajil Manases, aye' Maala, Noa, Okla, Milka ex Tirsa. Tmyal Selopead qe', kyyajajilkuxi'x Eper, Kalaad Makyir, Manases ex Jse.2Exi'ju' jwe' txin lu kyitz'inkyib' ttziju' Ja te Mujb'ab'ltib'il yolil kyuk'i'l Moyses ex pale Eleasar kyuk'i'lju' nejenel kye tnam, ex xikyma'n ikjalu:3Kyimju' qmane' toj chq'ajlaj, ex min q'o'ntoqtetib' kyuk'i'lu' t-xjal Kore jawkyiq'i'n kyib' ti'j Qman Dyos. Kyimte tu'nx til ex mixti' ten tk'wal q'a.4Mya tu'me'lte' tu'n tkub' naju' tb'i qmane' kyi'ju' k'loj tyajajil noq tu'nju' mixti' tk'wal q'a. Kyq'ontz ch'i'nqe' qtx'otx' kyxolju' titz'in qmane', chechij.
5Xi'tzun tma'n Moyses ja'lu te Qman Dyos,6atzunte Qman Dyos tzaj ttzaq'we'n kjalu:
7Tu'me'lte inkyma'n tmyal Selopead. Q'onxa jun tal tnej tx'otx' kyxolju' titz'in kyman, tu'n tik'ju' tetzb'il kyman kye.8Ex q'manxa kye aj Israel, qa ati jun makyim mixti' tk'wal q'a xkyaj, kye tmyal kxe'la'ju' tetzb'il;9qatzun mixti' jun tmyal xkyaj, kye titz'in kjela'ju' tetzb'il;10qatzun mixti' titz'in, kye titz'in tman kjela'ju' tetzb'il.11Qatzun mixti' titz'inju' tman, teju' twitze'l nqaku' toklen tuk'i'l kjela' tetzb'il. Majx kjelten ja'lu te jun kawb'il kye' aj Israel kse'nxju' matxi' nchaq'e' teya, chi Dyos. Ok Joswe t-xel Moyses (Dt 31.1-8)
12Tzaj tma'n Qman Dyos te Moyses kjalu:
—Kutjaxa twi' witz Ab'arim ex ka'yinxju'ya tx'otx' matxi' txinq'o'ne' kye' aj Israel.13Tb'ajlenxi'tzun tka'yi'na, kkyimela, kxe'l tzuntza tu'n ttena junx kyuk'i'lju' ojtxi' tyajilb'ena, kse'nte ttzika Aaron,14qu'n kykab'ile' min exi' kyb'i'nju'ye' nchaq'b'ile' toj chq'ajlaj Sin tej tjaw kyiq'i'n kyib'ju' tnam wi'je', ex min injaw kynima'ne' kywitz tej kyqaninte a', chi Dyos. (Xi' nyolina' ti'ju' t-xiklil a' Merib'a toj Kades, toju' chq'ajlaj Sin.)
15Atzunte Moyses xitma'n te Qman Dyos kjalu:
16—Taye, Nman Dyos, aya nq'onte kychwinqlal kykyaqil xjal, q'onkja jun nejenel tu'n tten kyxolju' tnam ex tu'n tkub'nej kywitz jaxjaku' mache'xa', tu'ntzun lalun che kyej kse'nkye rit mixti' k'ik'lel kye, chij.
18Atzunte Qman Dyos tzaj ttzaq'we'n te Moyses kjalu:
—A Joswe tk'wal Num, jun ichan ati xewb'aj tuk'i'l. Iq'inxa ex q'onqeku' tq'ob'a toj twi'.19Iq'inxtzuntza twitzju' pale Eleasar ex kywitz kykyaqil tnam, ex q'onxju'ya toklen te kywitz kykyaqil;20q'onx jni'ju'ya toklena te, tu'ntzun kyniman tkyaqilju' tnam Israel te.21Naq o'kx ati tu'n tpon Joswe twitzju' pale Eleasar, ate Eleasar ktzajel qaninte weye' tu'nelju' Urim titi' kb'inchetel. Atzunte Joswe kq'olte chaq'b'il kye aj Israel toj tkyaqilju' kkyb'incha', chi Dyos.
22Tb'inchatzun Moyses kse'nxju' tma Qman Dyos te. Xitiq'i'n Joswe twitzju' pale Eleasar ex kywitz kykyaqilju' tnam.23E'kub' tq'o'n tq'ob' toj twi' ex xitq'o'nju' toklen, kse'nxju' tchaq' Qman Dyos te. Oyaj tu'n tkub' tkyaqil q'ij (Ex 29.38-46)
1Tzaj yolin Qman Dyos te Moyses ex tma kjalu:
2Q'onxa chaq'b'il kye aj Israel tu'n ttzaj kyiq'i'n kyoyaj wab'j ex kyoyaj tz'e'ysa'n kukxju' tojku'xi'x tq'ijlalil kyoju' ninq'ij nim kyoklen, te jun oyaj tb'anil tk'ok'jal weye'.
3Ex q'manxa kye qa aye' kyoyaju'ye' tu'n tkub' kytz'e'ysa'ne' te ninb'ilweye' ilxi'xti'j tkyaqil q'ij: kab'e' qpoj tman rit te jun ab'q'i mixti' kytzakajil.4Kb'el q'etju' jun te chojb'il prim atzun juntl te qale.5Atzu'n oyaj kyi'ju' twitz awal k'ok'e', kyaje' lib'r tk'i' nik'jan tb'anil arin xyuq'i'n toj jun litr aseyt olib'o.6(Atzun chojb'ilju' intz'e'yset kukxju' twi'ju' witz Sinayi, te jun oyaj k'ok'j te Qman Dyos)7Atzun jun litrju' oyaj b'in tu'n junjun qpoj tman rit. Tu'n tkub' qetju' b'in lu toju' ja xjan te ninb'ilweye'.8Kb'el q'etju' tkab' qpoj tman rit te chojb'il ajtok qale, ex jun oyaj kyi'ju' twitz awal k'ok'e' tmoj ex jun oyaj b'in, kse'nxju' kb'el q'et te prim. Jun oyajte' lu tb'anilxi'x tk'ok'jal, inkub' tz'e'yset te ninb'ilweye', ayine' Dyos Manb'aj, chi Dyos. Oyaj toju' q'ij te ojlab'l
9Ati tu'n tkub' kyq'o'ne' kab'e' qpoj tman rit te jun ab'q'iqe' mixti' kytzakajil te chojb'il kyoju' q'ij te ojlab'l, ex ch'inxmi b'eljoj lib'r arin tb'anilxi'x xyuq'i'n tuk'i'l aseyt kyi'ju' twitz awal k'ok'e'kwitz, tuk'i'lju' oyaj b'in.10Kb'el q'etju' chojb'il k'ok'sb'il lu kyoju' q'ij te ojlab'l tuk'i'lxi'ju' oyaj b'in, tib'ajxi'tlju' chojb'il k'ok'sb'il inkub' q'et atl junjun q'ij. Oyaj junjun xjaw
11Kb'el kyq'o'ne' kab'e' qpoj tman wakx, jun rit ex wuq qpoj tman rit te jun ab'q'iqe' mixti' kytzakajil, te jun chojb'il k'ok'sb'il nwitze' toj tnejel q'ij te junjun xjaw.12Kb'el kyq'o'ne' masch'i'n oxlajoj lib'r tb'anil arin xyuq'i'n tuk'i'l aseyt tu'n junjun qpoj tman wakx, ch'inxmi b'eljoj lib'r arin xyuq'i'n tuk'i'l aseyt tu'n junjun rit,13atzun kyaje' lib'r tk'i' nik'jan arin xyuq'i'n tuk'i'l aseyt tu'n junjun qpoj tman rit. Jun chojb'il k'ok'sb'il te' tb'anil tk'ok'jal in tz'e'yset te ninb'ilweye'.14Kab'e' litrju' oyaj b'in tu'n junjun qpoj tman wakx, jun litr tk'i' nik'jan tu'nju' rit ex jun litr tu'n junjun qpoj tman rit. Aye'tzun chojb'il k'ok'sb'ilu' ati tu'n kyq'onteye' tkyaqil xjaw toj ab'q'i.15Tib'ajxi'tltzunju' chojb'il k'ok'sb'il inkub' tkyaqil q'ij, ati tu'n tkub' kyq'o'ne' jun tman chib' te chojb'il tu'n tpaj il tuk'i'lxi'ju' oyaj b'in inkub' tmoj. Oyaj te Tq'ij Tzaqpib'l (Lv 23.5-8)
16Kb'el ik'setju' q'ij te tzaqpib'l te ninb'ilweye' toj kyajlajoj tajlalju' tnejel xjaw te ab'q'i.17Atzu'n t-o'lajoji'n q'ij jun ninq'ij. Wuq q'ij tu'n kywan wab'je' mixti' ttx'amal.18Tojtzunju' tnejel q'ij teju' wuq q'ij kb'el ik'set jun b'uyjtib'il xjan. Mixti' tu'n kyb'inchanteye' jun aq'untl toju' q'ij lu.19Kb'el kyq'o'ne' kab'e' qpoj tman wakx, jun rit ex wuq qpoj tman rit te jun ab'q'iqe' mixti' kytzakajil, te jun chojb'il k'ok'sb'il nwitze'.20Ex kb'el kyq'o'ne' oyaj arin xyuq'i'n tuk'i'l aseyt tmoj ikjalu: masch'i'n oxlajoj lib'r arin tu'n junjun qpoj tman wakx, ch'inxmi b'eljoj lib'r tu'n junjun rit,21ex kyaje' lib'r tk'i' nik'jan tu'n junjun qpoj tman rit.22Ex kb'el kyq'o'ne' jun chib' te chojb'il tu'n tnajset kyile'.23Tkyaqil ja'lu kxel kyq'o'ne' tib'ajxi'ju' chojb'il k'ok'sb'il ju' kb'el kyq'o'ne' tkyaqil q'ij te prim.24Iktzun tu'n kyb'inchanteju'ye' junjun q'ij toju' wuq q'ij ninq'ij, te jun oyaj tb'anil tk'ok'jal tz'e'ysa'n te ninb'ilweye'. Ati tu'n tkub' kyq'o'ne' tuk'i'lju' oyaj b'in inkub' tmoj, tib'ajxi'lju' chojb'il k'ok'sb'il kb'el kyq'o'ne' junjun q'ij.25Ex k'okyel kyq'o'ne' juntl b'uyjtib'il xjan toj twuqi'n q'ij. Mixti' tu'n kyb'inchante jun aq'untle' toju' q'ij lu. Oyaj tnejel twitz awal (Lv 23.9-22)
26Ex ikx k'okyel jun b'uyjtib'il xjan kyu'ne' toju' ninq'ij to smani'n, ajttzaj kyq'o'ne' twitz awal k'ok'e'kywitz weye' ti'ju' twitz kyawale' toj tq'ij tnejel twitz awal. Mixti' tu'n kyb'inchante jun aq'untle' toju' q'ij lu.27Ktzajel kyq'o'ne' kab'e' tal tman wakx, jun rit ex wuq qpoj tman rit te jun ab'q'iqe', te jun chojb'il k'ok'sb'il weye'.28Exju' oyaj arin xyuq'i'n tuk'i'l aseyt, masch'i'n oxlajoj lib'r tu'n junjun qpoj tman wakx, atzun ch'inxmi b'eljoj lib'r tu'nju' rit29atzun kyaje' lib'r tk'i' nik'jan tu'n junjun qpoj tman rit.30Ex kb'el kyq'o'ne' jun chib' te chojb'il tu'n tnajset kyile'.31Kb'el kyq'o'nju'ye' chojb'il k'ok'sb'il lu tuk'i'lju' oyaj twitz awal k'ok'e'kywitz ex b'in inche kub' tmoj, tib'ajxi'tlu' chojb'il k'ok'sb'il inkub' junjun q'ij. Mixti' kytzakajilju' alu'mj che kb'el kyq'o'ne'. Kyq'ij Chun (Lv 23.23-25)
1K'okyel jun b'uyjtib'il xjan kyu'ne' toj tnejel q'ij teju' twuqi'n xjaw. Mixti' tu'n kyb'inchante jun aq'untle', ex k'elex kyq'o'ne' tqanilju' q'ij lu tuk'i'l chun.2Kb'el kyq'o'ne' jun qpoj tman wakx, jun rit ex wuq qpoj tman rit te jun ab'q'iqe' mixti' kytzakajil, te jun chojb'il k'ok'sb'il tb'anil tk'ok'jal weye'.3Masch'i'n oxlajoj lib'rju' oyaj arin xyuq'i'n tuk'i'l aseyt tu'nju' qpoj tman wakx, ch'inxmi b'eljoj lib'r tu'nju' rit4ex kyaje' lib'r tk'i' nik'jan tu'n junjun qpoj tman rit.5Ex kb'el kyq'o'ne' jun chib' te chojb'il tu'n tnajset kyile',6tib'ajxi'lju' chojb'il k'ok'sb'il inkub' junjun xjaw ex tib'ajxi'lju' chojb'il k'ok'sb'il inkub' junjun q'ij, kyuk'i'lju' oyaj twitz awal k'ok'e'kwitz ex b'in inkub' tmoj, kse'nxju' tchaq' Dyos. K'okyel ja'lu te jun oyaj tb'anilxi'x tk'ok'jal tz'e'ysa'n te ninb'ilweye'. Oyaj te Tq'ij Najsb'il Il (Lv 23.26-32)
7Ex ikx k'okyel jun b'uyjtib'il xjan kyu'ne' toj tlajoji'n q'ij texju' twuqi'n xjaw. Kche mewayile' toju' q'ij lu ex mixti' tu'n kyb'inchante jun aq'untle'.8Kb'el kyq'o'ne' jun qpoj tman wakx, jun rit ex wuq qpoj tman rit te jun ab'q'iqe', mixti' kytzakajil, te jun chojb'il k'ok'sb'il tb'anil tk'ok'jal weye'.9Masch'i'n oxlajoj lib'rju' oyaj arin xyuq'i'n tuk'i'l aseyt tu'nju' qpoj tman wakx, atzun ch'inxmi b'eljoj lib'r tu'nju' rit10ex kyaje' lib'r tk'i' nik'jan tu'n junjun qpoj tman rit.11Ex kb'el kyq'o'ne' jun chib' te chojb'il tu'n tpaj il, tib'ajxi'lju' chojb'il tu'n tpaj il inkub' toj tq'ij najsb'il il, ex tib'ajxi'tlju' chojb'il k'ok'sb'il inkub' junjun q'ij, kyuk'i'lxi'ju' oyaj twitz awal k'ok'e' kywitz ex b'in inche kub' tmoj. Oyaj toj kyq'ij Pach Tq'ob' tze (Lv 23.33-44)
12K'okyel jun b'uyjtib'il xjan kyu'ne' toj o'lajoj tajlalju' twuqi'n xjaw. Mixti' tu'n kyb'inchante jun aq'untle' toju' q'ij lu. Wuq q'ij kb'el kyik'sa'nju'ye' ninq'ij te ninb'ilte Qman Dyos.13Kb'el kyq'o'ne' oxlajoj (13) qpoj tman wakx, kab'e' rit ex kyajlajoj (14) qpoj tman rit te jun ab'q'iqe' mixti' kytzakajil toju' tnejel q'ij, te jun chojb'il k'ok'sb'il tb'anil tk'ok'jal weye'.14Masch'i'n oxlajoj lib'rju' oyaj arin xyuq'i'n tuk'i'l aseyt kb'el kyq'o'ne' tu'n junjun qpoj tman wakx, atzun ch'inxmi b'eljoj lib'r tu'n junjun rit15ex kyaje' lib'r tk'i' nik'jan tu'n junjun qpoj tman rit.16Ex kb'el kyq'o'ne' jun chib' te chojb'il tu'n tpaj il, tib'ajxi'lju' chojb'il k'ok'sb'il inkub' junjun q'ij tuk'i'lxi'ju' oyaj twitz awal k'ok'e'kywitz ex b'in inkub' tmoj.
17Aye'x oyaju' ex chojb'il k'ok'sb'il che b'elkyq'o'ne' toju' waqaq q'ijtel teju' ninq'ij kse'nx toj tnejel q'ij, noq o'qe'kxju' qpoj tman wakx k'elel iq'et junjun ti'ju' kyajlal junjun q'ij, qu'mtzun naq wuqju' qpoj tman wakx kb'el b'yet toju' twuqi'n q'ij.
35Kb'el kyik'sa'ne' twajxaqi'n q'ij tu'n jun b'uyjtib'il nim toklen, mixti' tu'n kyb'inchante jun aq'untle' toju' q'ij lu.36Kb'el kyq'o'ne' jun qpoj tman wakx, jun rit ex wuq qpoj tman rit te jun ab'q'iqe', mixti' kytzakajil, te jun chojb'il k'ok'sb'il tb'anil tk'ok'jal weye'.37Ex kb'el kyq'o'ne' oyaj twitz awal k'ok'e'kywitz ex b'in tu'nju' qpoj tman wakx, rit exqe' qpoj tman rit kse'nxju' tchaq' Qman Dyos.38Ex kb'el kyq'o'ne' jun chib' te chojb'il tu'n tpaj il, tib'ajxi'lju' chojb'il k'ok'sb'il inkub' junjun q'ij tuk'i'lju' oyaj twitz awal k'ok'e'kywitz ex b'in inkub' tmoj.
39Aye'tzun chojb'il ja'lu tu'n tkub' kyq'o'ne' nwitze' kyoju' tq'ijlalil q'ma'ntl, tib'ajxi'lju' kyoyaje' tu'n tjapun jun kyyole' tziya'ntl mujqa jun kyoyaje' matzaj anq'in toj kyanmiye', b'a'ntzunqa jun chojb'il k'ok'sb'il mujqa oyaj twitz awal k'ok'e'kywitz ex b'in, mujqa chojb'il te mujb'ab'ltib'il, chi Qman Dyos.
40Xi'tzun tma'n Moyses kye aj Israel tkyaqilju' tchaq' Qman Dyos te. Nuk'b'il kyi'ju' yol tziya'n twitz Qman Dyos
1Xitma'n Moyses kyeju' nejenel kye kyyajajil aj Israel kjalu:
Matxi' tchaq' Qman Dyos2qa mattziya jun xjal tyol twitz mujqa mataq'tib' axxi'x tu'n tjapun tu'n, ati tu'n tjapunju' tyol tu'n ex tu'n tb'inchante tkyaqilju' matma tu'n tjapun tu'n.
3Qa ati jun txin atix tk'etz tman, mattziya jun tyol twitz Qman Dyos mujqa mataq'tib' tu'n tb'inchante jun ti'xti',4qatzun mixti' xtmaju' tman ajtb'inte ti'ju' tyol xttziya mujqa ti'ju' tu'n tb'inchante, ati tu'n tjapunju' tyol xttziya mujqa aju' q'ma'ntl tu'n tjapun tu'n.5Qatzun min xtaju' tman ajtb'inte, myatzun ilti'jtz tu'n tjapunju' tyol tziya'ntl tu'n mujqa aju' q'ma'ntl tu'n tjapun tu'n. Mixnati' xkub' toj twitzju' tman, lay tz'ok il te' Qman Dyos tu'n tjapun tu'n.
6Qa jun qya mattziya jun tyol twitz Qman Dyos mujqa mataq'tib' tu'n tb'inchante jun ti'xti' ex min xkub' t-xima'n b'a'nxi'x, extzun matxi' mje,7qatzun mixti' xtmaju' tchmil ajtb'inte, ati tu'n tjapunju' tyol tziya'n tu'n ex titi' xtaq'a'tib' tu'n tjapun tu'n.8Qatzun min xkub' toj twitzju' tchmil ajtb'inte, myatzun ilti'j tu'n tjapun tyoltz tziya'ntl tu'n ex titi' xtaq'a'tib' tu'n tjapun tu'nju' min xkub' t-xima'n b'a'nxi'x. Lay tz'ok ilte Qman Dyos ti'j tu'n tjapun tu'n.
9Qatzun kyimni tchmil qya xtziyante jun tyol, mujqa kub'ni tpa'ntib' tuk'i'l tchmil, ilti'j tu'n tjapun tu'n tkyaqilju' xttziya tu'n tb'inchante.10Qama ttziya tyol jun qya mjeb'ni mujqa mataq'tib' tu'n tb'inchante jun ti'xti', extzun ati tjaju' tchmil.11Qa mixti' xtmaju' tchmil tu'n ajtb'inte ex min sel tik'o'nju' intb'incha'n, ati tu'n tjapun tyolju' qya tziya'n tu'n exju' ttziya tu'n tb'inchante.12Qatzun mache kub' t-xitu'nju' tchmil ajtb'inte, myatzun ilti'j tu'n kyjapuntz tu'n, mana' kub' t-xitu'nju' tchmil. Lay tz'ok ilte Qman Dyos ti'j tu'n tjapun tu'n.
13Aju' chmilb'aj kq'malte qa b'a'n mujqa kb'el xitet alkyexku' tyolju' t-xu'jil mattziya mujqa mataq'tib' tu'n tb'inchante, ju' inq'mante qa ilxi'xti'j tu'n tmewayin.14Qatzun mixti' xtmaju' tchmil tu'n ajtik' jun q'ij, kab'e' q'ij, matxitzun tmatz tu'n tjapunju' yol ttziyaju' t-xu'jil mujqa titi' xtaq'a'tib' tu'n tb'inchante.15Qatzun makub' t-xitu'n tik'lenxi' jte' q'ij tb'imlente, tib'ajtzuntz ta' qa min xjapun tu'nju' t-xu'jil, chi Moyses.
16Aye'tzun kawb'il ja'lu taq' Qman Dyos te Moyses tib'aju' nuk'b'il kyxol ichan kyuk'i'l kyxu'jil, ex kyxolju' manb'aj kyuk'i'l kymyal, qa txinx ex atix tjaq' tkawb'il tman. Kub' xitu'n tnam Madyan
1Tzaj tma'n Qman Dyos te Moyses kjalu:
2Q'onka tu'me'l t-xel kye aj Madyan tu'nju' xkyb'incha kye aj Israel, tb'ajlenxi'tzun ja'lu, kkyimela, chij.
3Xitma'ntzun Moysestz kyeju' tnam ikjalu:
—Kyb'incham kyib' junjunkye' te q'oj, ex kukyok tzaqpaje' ti'ju' Madyan tu'ntzun tq'et tu'me'l t-xel kye toj tb'i Qman Dyos.4Kab'k'al lajnaq (1,000) ichan kxel kychq'o'n junjun tnej kyyajajil toju' q'oj, chij.
5Iktzu'n, e'jaw sk'o'n kab'k'al lajnaqchaq (1,000) ichan kyxolju' xjal te q'oj te junjun tnej kyyajajil, junmutx' lajk'al (12,000) kyb'aj tu'n kykyaqil, b'incha'ntl kyib' tu'n kyq'ojin.6Exitzun tchq'o'n Moyses toj q'oj tuk'i'l Pinees, tk'walju' pale Eleasar, atoq q'ilkyeju' ti'xti' xjan exqe'ju' chun tu'n t-xi' tq'o'n chaq'b'il ajttzyet q'oj.7Eq'ojintzuntz kyi'ju' aj Madyan ex eb'aj kub' kyb'yo'n kykyaqilx, kse'nxju' ojetoq tchaq' Qman Dyos te Moyses.8E'kub' kyb'yo'n Eb'i, Rekyem, Sur, Ur ex Reb'a, aye' jwe' nimaqkawil aj Madyan, ex ikx B'alaam tk'wal B'eor.9Exi' kyiq'i'n aj Israel qya aj Madyan pres exqe' kyal b'o'sqe', ex eb'je'l kyiq'i'n kyalu'n, e'kyq'inumal.10Expe' eb'ajkub' kytz'e'ysa'n nimaqkytanam exqe' kynajb'il.11Tkyaqiltzunju' b'je'l kyiq'i'n kye, e xjal exqe' alu'mj,12Eb'ajx kyiq'i'n te Moyses, teju' pale Eleasar ex kyeju' tnam Israel, ate'toq toju' plan tx'otx' te Moab', ttzi nin a' Jordan, jlaju' tnam Jeriko.
13Eb'je'tz Moyses tuk'i'lju' pale Eleasar ex kykyaqilju' nejenel te tnam k'molkye ti'jxi'ju' kynajb'il.14Atzunte Moyses tzaj ttx'u'jil kyi'ju' nejenel kyib'aj kab'k'al lajnaq (1,000) ex kyib'aj jo'naq (100) xjal te q'oj, ju' tzajniqe'xtoq toj q'oj,15ex xitma'n kye:
—¿Tiqu'n min ẍe kub' kb'yo'nju'ye' qya?16Kyu'npena'kye' qya lu jawa' kyiq'i'n kyib' aj Israel ti'j Qman Dyos naq tu'n tnab'l B'alaam ex ek'ulun teju' tilb'ilal B'aal-peor. Qu'mtzun tzaj tq'o'n Qman Dyos tx'u'j yab'il tib'aju' ttanam.17Che kyb'yonqeku'ye' ja'loxi'x kykyaqilju' k'wal q'aqe' ex kykyaqilju' qya oje txi' tzyu'nkyi'j tu'n ichan.18Aye'tzu'n txin b'ajx txa' tzyu'nkyi'j tu'n ichan lalun che kub' kyb'yo'ne' ex che tenkj kyuk'i'le'.19Kykyaqiltzunju' mache kub' b'yonte jun xjal mujqa matz'ok kymko'n jun kyimni, kukykyajten wuq q'ij ti'jxi'ju' najb'il. Ati tu'n kyẍtilsante kyib'e' exqe'ju' pres toj toxi'n q'ij ex toj twuqi'n q'ij.20Ex ikx che kyẍtilsame' kykyaqilju' xb'alun ex kykyaqilju' ti'xti' tz'u'n, t-smal chib' mujqa tze, chij.
21Xitma'nju' pale Eleasar kye kykyaqilju' xjal te q'oj e'ten toju' q'oj ikjalu:
—Jun kawb'ilte' lu taq' Qman Dyos te Moyses:22tu'n kyẍtilsetju' ti'xti' q'anpwaq, saqpwaq, q'ank'uxb'il, k'uxb'il, k'uxb'il estanyo mujqa plom kytx'otx'al, kykyaqilju' min nche tz'e'y tu'n q'aq', ati tu'n kyẍtilset tu'n q'aq' ex tu'n kytxjet tu'n a' te ẍtilsab'l. Aye'tzu'n ti'xti' in cheb'aj tu'n q'aq', o'kx tu'n a' kche ẍtilsetela'.24Ati tu'n kytxjonteju' kyxb'alun toj twuqi'n q'ij, kche ẍtilseteltzuntz. Yajxi'tzuntl b'a'n tu'n kyokx toju' najb'il, chij. B'aj sipa'n b'je'l kyi'ju' ajq'oj
25Tzaj tma'n Qman Dyos te Moyses kjalu:
26Kyajlame' jte' kyb'aju' xjal ex alu'mj ẍeb'je'l kye aj Madyan, junx kyuk'i'lju' pale Eleasar exqe'ju' nejenel kye junjun tnej kyyajajil aj Israel,27pa'nqeku'ya toj kab'e' tnej junelni, sipanxtzu'na jun tnej kyxolju' che tx'anj q'ojil, atzu'n jun tnejtl kyxol kykyaqil aj Israel min ẍe tx'anj q'ojil.28Expe' q'intz jun tneja weye' ti'ju' kye xjal te q'oj, junjun kyi'j qaqchaqmutx' winqi'n, kyi'ju' xjal, wakx, b'ur ex rit29kxel tq'o'ntzuntza teju' pale Eleasar te jun oyaj weye'.30Atzu'n ti'ju' nik'jantl kyeju' txqantl aj Israel, ktzajel tiq'i'na junjun ti'j kakab'naq lajoj (50) kyi'ju' xjal, wakx, b'ur ex rit, mujqa kyi'j kykyaqil alu'mj, ex kxe'l tq'o'na kyeju' leb'i inche ajb'en toju' njaye' xjan, chi Dyos.
31Kyb'incha Moyses tuk'i'lju' pale Eleasar kse'nxju' tchaq' Qman Dyos te Moyses.32Tu'n tkyaqilju' b'je'l kye ajq'oj, kyajnaq kyaje'mutx' wuqk'al lajnaq (675,000) rit, ex min okju' b'ajx kyiq'i'n xjal te q'oj kyu'nxkye toj tajlal,33b'eljojmutx' (72,000) wakx,34wuqmutx' kab'lajk'al lajnaq (61,000) b'ur35ex kyajmutx' (32,000) txin b'ajx txa' tzyu'nkyi'j tu'n ichan.36Qu'mtzun, aju' nik'jan xi' kyeju' xjal te q'oj, kab'naq kab'mutx' oxk'al o'lajnaq (337,500) rit,37kyi'jtzunju'lu, junk'al oxlajnaq o'lajoj (675) xiq'et te Qman Dyos;38atzu'n kyi'ju' kyajmutx' lajk'al (36,000) wakx, xiq'et oxnaq kab'e' (62) te Qman Dyos;39atzu'n kyi'ju' oxmutx' qaqlajk'al jo'naq (30,500) b'ur, xiq'et oxnaq jun (61) te Qman Dyos;40ex kyi'ju' kab'mutx' (16,000) txin, xiq'et junaq kab'lajoj (32) te Qman Dyos.41Xitq'o'n Moyses o'nb'il te Qman Dyos teju' pale Eleasar, kse'nxju' tchaq' Qman Dyos te.
42Atzu'n nik'jantl, tu'n t-xi' q'et kyeju' txqantl aj Israel ojetoq tz'el tpa'n Moyses ti'ju' kye xjal te q'oj,43Tojxi'x nik'jan, mujqa: kab'naq kab'mutx' oxk'al o'lajnaq (337,500) rit,44kyajmutx' lajk'al (36,000) wakx,45oxmutx' qaqlajk'al jo'naq (30,500) b'ur46ex kab'mutx' (16,000) txin.47Kyi'jtzunju' nik'jan lu, eltpa'n Moyses junjun ti'j kakab'naq lajoj (50), kyi'ju' xjal ex kyi'ju' alu'mj, xitq'o'ntzuntz kye aj Leb'i nche ajb'en toju' ja xjan te Qman Dyos, kse'nxju' ojetoq tchaq' Qman Dyos te.
48Aye'tzu'n nejenel kye kab'k'al lajnaq (1,000) chaq ex kye jo'naq (100) chaq xjal te q'oj, exi' nelte Moyses49ex xikyma'n te: Matxi' jaw qiq'ine' kyajlalju' xjal te q'oj ate' toj qkwente, ayo'ye' ajb'el qo'ye' teya; ex tz'aqlite' kyb'aj.50Mache tzaj qiq'i'ne' ti'xti' q'anpwaqqe' lu ẍeknet tu'nile junjun: e'tqulq'ob'aj, xpatx'q'anpwaq nche ok tqulq'ob'aj, ti'j q'ob'aj, xmilq'ob'aj, toj ẍkyinb'aj ex txqantl u'wj tu'n kyxiq'et te Qman Dyos tex kotpib'l qeye', chechij.
51Kyk'amtzun Moyses tuk'i'l Eleasar tkyaqilju' ti'xti' q'anpwaq lu.52Masch'i'n kyaje' kyintal tk'ijwe' lib'r (4.5) talalju' q'anpwaq xikyq'o'nju' nejenel kye kab'k'al lajnaq (1,000) ex kye jo'naq (100) xjal te q'oj te jun oyaj te Qman Dyos,53qu'n teyile junjun xjal te q'oj tzaj tiq'i'n jni' ti'ju' b'je'l kyeju' ajq'oj.54Iktzu'n, tk'am Moyses ex Eleasar q'anpwaq tzaj kyiq'i'n nejenel, ex xikyiq'i'n toju' Ja te Mujb'ab'ltib'il tu'ntzun kytzaj na'n aj Israel tu'n Qman Dyos. E'kub' najanju' kyyajajil Rub'en Ex Kad toj tjawetzq'ij te nin a' Jordan (Dt 3.12-22)
1Nimtoq txqan kyalu'nju' tyajajil Rub'en ex Gad ate'. Tetzunj kyka'yinte tb'anilxi'xtoqju' tx'otx' Jeser ex Kalaad kye alu'mj,2exi' qanilte kye Moyses, pale Eleasar exqe' nejenel te tnam, ex xikyma'n kye:
3Tb'anil qekye' tx'otx' Atarot, Dib'on, Jaser, Ninb'ra, Esb'on, Eleale, Seb'am, Neb'o ex B'eon, te kywab'l alu'mj, ju' matxi' kub'ti'j tu'n Qman Dyos teju' tnam Israel, ayo'tzune' ajb'el qo'ye' teya, ate' qalu'ne',5qa b'a'n toj twitza, q'ontzju'ya tx'otx' lu qeye' ex lalun qo ik'x tq'o'na jlajxi' nin a' Jordan, chechij.
6Atzunte Moyses xittzaq'we'n kye:
—¿Ma kyajb'ile' tu'n kykyajtene' tzalu, aye'tzu'n kywnaqile' che kxe'l toj q'oj?7¿Tiqu'n kyajb'ile' tu'n tanjtz tikyk'u'ju' aj Israel tu'n lalun che ik'x toju' tx'otx' oje tzaj tq'o'n Qman Dyos kye?8Ax kyb'incha kymanju'ye' tej kytzaj nchq'o'ne' tzmax toj Kades-b'arnea ka'yilteju' tx'otx' lu.9Epon tzmax ttzi a' Eskol ex kyka'yiju' tx'otx' lu, yajxi'tzuntl e'okten xob'salkye aj Israel tu'n lalun che okx toju' tx'otx' ojetoq tzaj tq'o'n Qman Dyos kye.10Qu'mtzun tzaj ttx'u'jil Qman Dyos toju' q'ij lu, ex ttziya11qa aye' xjal tzajx te winqi'n kyab'q'i tej kyb'je'tz Ejipt laytoq kyilju' tx'otx' ojetoq ttziya te Ab'raam, te Isaak ex te Jakob', qu'n min e'oklpe ti'j tu'n tkyaqil kyk'u'j.12Naq o'kx Kaleb' tk'wal Jepone te Senesey, ex Joswe tk'wal Num, e'oklpe tu'n tkyaqil kyk'u'j ti'j Qman Dyos.13Tzaj ttx'u'jil Qman Dyos kyi'ju' aj Israel ex eb'et kab'naq (40) ab'q'i tu'n toj chq'ajlaj, tzmaxi'j mixtoqti'tl jun itz'x kyxolju' e okq'onte ttx'u'jil tu'n kyb'inchb'aj taq'wix.14Aye'tzuntlkye' ja'lo, kyk'wal aj il qe'ye', kyajb'ile' tu'n kyb'inchanteye' kse'nx kyb'incha kymane', tu'n ttzajtl tx'u'jil Qman Dyos ti'ju' tnam Israel kyu'ne'.15Qa min kyajb'ile' tu'n kyxilpeye' ti'j Qman Dyos, che kjel tenxi'xtl aj Israel toj chq'ajlaj, ex tu'n kpaje' qama che kub'a' b'yo'n, chi Moyses kye.
16Exi'lq'etzuntz tk'etz Moyses ex xikyma'n te:
—A qeju'ye' qajb'il tu'n kyjaw qb'incha'ne' kych'lajil qrite' ex qwakyixe', ex che jawil qb'incha'ne' tnam kye qk'wale'.17Yajxi'tzuntel kqb'incha' qib'e' tu'n qxi'neje' kywitz aj Israel q'ojil, tzmax ajkypon qu'ne' toj kytx'otx'. Aye'tzu'n toj qjaye' che kjelten kyoju' nimaqtnam tok tapi kyi'j, tu'n kyklet kye'ju' najlqe' toju' tx'otx' lu.18Lay tz'anjtz qi'je' qjaye' qa na'mxtoq kyk'monte aj Israel kytx'otx'.19Qu'n a k'okyelju' te qtx'otx'e' ati tzalu jlajtzaj, toj tjawetzq'ij te a' Jordan, lay qo qanine' ti'j txqantl qtx'otx'e' jlajxi' a' Jordan, ex tzmax najchaq, chechij.
20Atzunte Moyses xittzaq'we'n kye:
—Qama japun kyole' kyu'ne' exqa matxi kyiq'ine' kyq'ojb'ile' tu'n kyq'ojine' toju' tchaq'b'il Qman Dyos.21Qa kykyaqile' mache' ik'x jla'jine' toju' nin a' Jordan iq'i'n kyq'ojb'ile' toj tchaq'b'il Qman Dyos exqa mache kyajtene' chix tzmaxi'j aj kyb'je'x q'o'nju' ajq'oj tu'n Qman Dyos22exqa matxitoq kanb'etju' tx'otx' tu'n, b'a'ntzun tanjtz kyi'jtze', kche tzaqpeteltzuntze' ti'ju' xkytziyaye' twitz Qman Dyos ex kywitz aj Israel. K'okyelju' tx'otx' lu kyeye' tu'n Qman Dyos.23Qatzun min xkyb'inchaye' ikju', kaneku' toj kywitze' qa ilju' kkyb'incha'ye' ti'j Qman Dyos ex jun q'ij tzul tz'e'ysb'il kywitze' tu'n tpaju' il lu.24Che kyb'incha'nktze' nimaqtnam jatu'n kykyaja' toj kyjaye' ex kych'laje' kye kyrite', naqtzun aju' japunxju' xktziyaye' kyu'ne', chi Moyses kye.
25Aye'tzu'n tyajajil Gad ex Rub'en xikytzaq'we'n te:
—Kqb'incha' qeju'ye' matxi' tchaq'a, ayo'ye' ajb'el teya.26Axtzu' che kjela'ten qxu'jile' ex qk'wale' b'o'sqe', kyuk'i'lju' qwakyixe' ex kykyaqil qalu'ne' tzalu kyoju' nimaqtnam toj Kalaad,27ayo'tzunqe', ajb'el teya, kqo xe'le' kyuk'i'l qq'ojb'ile' toj q'oj toj tchaq'b'il Qman Dyos, kse'nxju' xtchaq'a qeye', chechij.
28E b'ajxtzun tq'o'n Moyses chik'b'ab'l teju' pale Eleasar, te Joswe ex kyeju' nejenel kye junjun k'loj kywitze'l kyib' kyxolju' chukchaq tnej kyyajajil aj Israel:
29—Qa kykyaqilju' ichan tyajajil Gad ex Rub'en mache ik'x jlajin kyuk'i'le' toju' nin a' Jordan b'antni kyten tu'n kyq'ojin toj tchaq'b'il Qman Dyos, tzmaxi'j aj tkanb'etju' tx'otx' kyu'ne', tzmaxi'tzun kxe'l kyq'o'n tx'otx'tze' te Kalaad te kyeku'.30Qatzun min ẍe ik'x b'incha'n kyten tu'n kyq'ojin, atzuntzu' kxe'la kytx'otx'tz kyxole' toj tx'otx' Kanaan, chij.
31Aye'tzu'n tyajajil Gad ex Rub'en xikytzaq'we'n:
—Kqb'incha' qeju'ye' xtchaq' Qman Dyos kyeju' ajb'el teya lu.32Kqo ik'exe' b'incha'mile qtene' toj q'oj toju' tx'otx' Kanaan kse'nx tajb'il Qman Dyos, naqtzun aju' tu'n tkyaju' tx'otx' te tjawetzq'ij teju' nin a' Jordan te qtx'oxtx'ku'ye', chechij.
33Ikytzu'n, xitq'o'n Moyses ttx'otx' Seon, kynimaqkawil amorey, ex ttx'otx' Ok, nimaqkawil toj B'asan, kyuk'i'lxi' nimaqkytanam exju' tx'otx' kyi'jile, kyeju' kyyajajil Gad ex Rub'en, ex kye nik'jan tyajajil Manases.34Eb'jaw kyb'incha'ntl tyajajil Gad ju' nimaqtnam Dib'on, Atarot, Aroer,35Atarot-sopan, Jaser, Jojb'ea,36B'et-nimra ex B'et-aran, ex b'ajaw kyb'incha'n tapi kyi'jile ex b'aj kyb'incha'n kych'lajilju' kyrit.37Aye'tzu'n tyajajil Rub'en eb'jaw kyb'incha'ntlju' nimaqtnam Esb'on, Eleale, Kyiryataym,38Neb'o, B'aal-meon ex Sib'ma, el kych'exb'en kyb'i junjun ex b'jo'k kyq'o'n kyb'i ak'a'j.
39Aye'tzu'n tyajajil Makyir, tk'wal Manases, kub' kyq'o'n kyib' toju' tx'otx' Kalaad ex kub' kytzyu'n, eb'je'tz kyxla'ja'nju' amorey ate'toq atzu'.40Xitq'o'ntzun Moyses tx'otx'tz Kalaad kyeju' tyajajil Mekyir, e'kub' najantzuntz atzu'.41Ikx Jayr tyajajil Manases, kub' ttzyu'n junjun kykub'el amorey ex oktq'o'n kyb'i Ab'ot-jayr.42Aye'tzu'n t-xjal Nob'a kub' kytzyu'nju' kenat kyuk'i'lxi'ju' tnam tzyu'nqe' tu'n, ex axju' tb'i Nob'a oktq'o'n te tb'i. Kyb'e aj Israel
1Aye' najb'il ja'lu jaeb'jik'a' aj Israel tej kyetz Ejipt nk'u'n kyten kse'nqe' xjal te q'oj, lepchiqe' kyi'j Moyses ex Aaron.2Intoq kub'xi' ttz'ib'a'n Moyses kyb'iju' najb'il jachaq nche ik'a', kse'nx intoq tma'n Qman Dyos te. Aye'tzun najb'il ja'lu jachaq eb'jik'a'.
3E'etzju' aj Israel toj tnam Ramses toj o'lajoj q'ij te tnejel xjaw te ab'q'i, jun q'ij tik'len tq'ij Tzaqpib'l. Tuk'i'l nim tipumal Qman Dyos eb'je'tza' kywitzku' kykyaqil aj Ejipt,4tej intoq che ku'x kymqu'n aj Ejipt kykyaqilju' tnejel kyk'wal, ju' ma'toq che kyim tu'n Qman Dyos, qu'n tu'nju' lu kub'a' ttz'e'ysa'n kywitzju' kydyos aj Ejipt.
5Eb'je'tz aj Israel toj tnam Ramses ex e'kub'ten Sukot.
6Tej kyik'b'et Sukot e'kub'ten Etam, toj tnaqachilju' chq'ajlaj.
7Tej kyik'b'et Etam, eq'on welt tu'n kypon Pi-ayrot, toj tjawetzq'ij te B'aal-sepon, e'kub'tentzuntz twitz Mikdol.
8Tej kyik'b'et Pi-ayrot, e ik'x toj ninnjab' ex e'pon toj chq'ajlaj. Oxe' q'ij eb'et toju' chq'ajlaj te Etam ex e'kub'ten Mara.
9Tej kyik'b'et Mara e'pon Elim, e'kub'tentzuntz atzu', qu'n ate'toq kab'lajoj (12) t-xiklil a' ex oxnaq lajoj (70) tut atzu'.
10Tej kyik' Elim, e'kub'ten ttziju' Ninnjab' Kyaq tb'i.
11Tej kyik' atzu', e'kub'ten ttziju' chq'ajlaj te Sin.
12Xikyljo'ntzun kyb'etz ex e'kub'ten Dopka.
13Yajxi'tzuntl e'pon Alus.
14Kyik'lentl atzu' e'kub'ten Repidim, ja mixti' a' te kyk'wa' xjal.
15E pontzuntz toju' chq'ajlaj te Sinayi.
16Atzu'n toju' kyb'e tej kyetz toju' chq'ajlaj Sinayi tu'n kypon Kades, e'kub'ten chaq kyoju' najb'il lu: kib'rot-ataab'a, Aserot, Ritma, Rimon-peres, Lib'na, Rissa, Kyeelata, twi' witz Seper, Arada, Makyelot, Taat, Tara, Mitka, Asmona, Moserot, B'ene-jaakan, Or te Widkad, Jotb'ata, Ab'rona, Esyon-keb'er, ex toj chq'ajlaj Sin toj Kades.
37Tej kyik'b'et Kades e'kub'tentzuntz twi' witz Or, toj nqach tuk'i'l Edom.38Jaxju' pale Aaron twi' witz Or kse'nx tma Qman Dyos, atzuntzu' kyima' toj jun tajlal tjweyi'n xjaw te tkab'naqi'n (40) ab'q'i kyetzlen aj Israel Ejipt.39Tetoq qaqnaq oxe' (123) ab'q'i Aaron tej tkyim twi' witz Or.
40Tb'iju' nimaqkawil aj Kanaan toj Arad, najlitoq Nekeb' toj Kanaan, matxitoq che pon aj Israel.
41Tetzunj kyik'b'et twi' witz Or tu'n kypon toju' plan tx'otx' te Moab', ekub'tenchaq kyoju' najb'il lu: Salmona, Punon, Ob'ot, Iye-ab'arim toj nqach tuk'i'l Moab', Dib'on-kad, Almon-dib'lataym, kywi'ju' witz Ab'arim toj tjawetzq'ij te Neb'o, ex e'pontzuntz toju' chq'ajlaj Moab' ttzi a' Jordan, jlaj Jeriko.49Axtzuntzu' e'kub'a' ten ttzi a' Jordan, xi' qex kytxa'n B'et-jesimot ex pomnix Ab'el-sitim, toju' plan tx'otx' te Moab'. Nuk'b'il tu'n kyokx toj Kanaan ex tu'n tkub' kysipa'n
50Tzaj yolin Qman Dyos te Moyses toju' plan tx'otx' te Moab', ttzi nin a' Jordan jlaj Jeriko, tzaj tma'n te tu'n t-xitma'n kye aj Israel kjalu:
Ajkyik'xe' toju' nin a' Jordan ex ajkyokxe' toju' tx'otx' Kanaan,52che kyxla'janqe'mixe' kykyaqilju' xjal najlqe' toju' tx'otx', ex kytxijunku'ye' kykyaqilju' kywitzleb' ab'j ex k'uxb'il b'incha'nqe', ex kyxitunku'ye' kykyaqil najb'il janche k'uluna' twi'yile ttxa'nwitz.53Kytzyumju'ye' tx'otx' ex che najanqe'ye' toj, qu'n ayine' chin xel q'onte kyeye' tu'n tok te kyeye'.54Naq aju' kb'el kysipa'ne' tx'otx', axchaqju' makub' tz'aq te junjun k'loj kywitze'l kyib' kyxol kykyaqilju' tnej kyyajajile'; nimxi'x kytx'otx'ju' nim txqan kyb'aj kxel q'et, atzu'n kyeju' naqjni'x kyb'aj naqjni'x kytx'otx' kxel q'et; teyile junjun k'loj kywitze'l kyib' kyk'ma' kytx'otx' kse'nxju' makub' tz'aq kye.55Qatzun min ẍe ex kyxla'ja'ne' xjal najliqe' toju' tnam, kche yajtele' kyu'nju' che kjelten naku'j tze tokx toj kywitze' mujqa kse'n ch'ix kyi'je' ajkykub' najane' toju' tx'otx'.56Kyi'jtzuntze' knb'incha'ye' kub' nxima'ne' tu'n nb'inchanteye' kyi'j, chi Qman Dyos te Moyses. Tnaqachilju' tx'otx'
1Tzaj tma'n Qman Dyos te Moyses tu'n t-xitma'n kye aj Israel kjalu:
Naqch'inxtl kyokxe' toju' tx'otx' Kanaan. Atzun tx'otx'ju' k'okyel te kytx'otx'e', aye' tnaqachil ja'lu:
3Atzu' ktnaqachi'tib' toj tnayajkya'j tuk'i'lju' chq'ajlaj Sin ex tx'otx' Edom. Tzajx toj tjawetzq'ij, ktzajel qeju' nqach tojxi'x ttx'u'k Kyimni Ninnjab' toj tnayajkya'j,4kxel tljo'ntzuntz tu'me'l tnayajkya'j kjawix tk'u'ju' witz Akrab'im, k'ik'ex Sin ex kpomel tzmax Kades-b'arnea. Kxel tljo'ntzuntz tu'me'l Asar-adar tzmax Asmon,5K'ik'eltl Asmon ex kpomel tzmax ttzi a' tnaqachal Ejipt, ex kpomel b'aj toj ninnjab' Mediteraney.
6Atzu'n toj tkub'exq'ij ktnaqachi'tib' tuk'i'lju' ninnjab' Mediteraney.
7Atzu'n toj tb'a'nq'ob'kya'j, ktzajelxju' tnaqachil ttzi ninnjab' Mediteraney kpomelx twi' witz Or,8k-ik'el twi' witz Or kpomelx ttziju' tnam Amat, kxe'ltzuntz tzmax Sedad.9K-ik'eltzun nqachtz te tb'a'nq'ob'kya'j Sedad, kxe'l tzmax Sipron ex kpomel b'aj Asar-enan.
10Atzu'n toj tjawetzq'ij ktzajelxju' nqach Asar-enan kpomelx Sepam,11k'ik'eltl Sepam kxe'l Rib'la, kxe'l tjawetzq'ij te Ayin; kb'elextzuntz toj tjawetzq'ij teju' njab' Sineret,12kxe'ltzuntz tojileju' nin a' Jordan, tzmax kpomela' b'aj toju' Kyimni Ninnjab'.
Aye'tzun tnaqachil kytx'otx'ju'ye', chi Qman Dyos. Tu'n t-sipetju' tx'otx'
13B'ajx tq'o'n Moyses chik'b'ab'l kye aj Israel kjalu:
A tx'otx' ja'lu kb'ajel kysipa'ne' kyxole' kse'nx makub'a' tz'aq te junjun; atzun tx'otx'ju' tma Qman Dyos tu'n t-xi' q'et kyeju' b'eljoj tnejtl tk'i' nik'jan qyajajil na'mx t-xi' kytx'otx',14qu'n matxina' kyej kye' kab'e' tnej qyajajil tk'i' nik'jan kytx'otx' te junjun k'loj kwitze'lkyib' toju' tx'otx' toj tjawetzq'ij te nin a' Jordan jlaj Jeriko, aye' tyajajil Rub'en ex Gad, exju' nik'jan tyajajil Manases, chi Moyses.
16Tzaj tma'n Qman Dyos te Moyses kjalu:
17Aye'kye' pale Eleasar tuk'i'l Joswe tk'wal Nun kche sipalteju' tx'otx' kyxole'.18Che kytxkontztzunkye' jun nejenel te junjun tnej kyyajajile' sipalteju' tx'otx'.19Aye' ichan ja'lu che ktzajel kytxko'ne':
Kyxolju' tyajajil Juda
a Kaleb' tk'wal Jepone.
Kyxolju' tyajajil Simeon,
a Samwel tk'wal Amyud.
Kyxolju' tyajajil B'enjamin,
a Elidad tk'wal Kyislon.
Kyxolju' tyajajil Dan,
a B'ukyi tk'wal Jokli.
Kyxol kyyajajilju' tk'wal Jse,
a Anyel tk'wal Epod, kye tyajajil Manases;
ex Kemwel tk'wal Siptan, kye tyajajil Eprayin.
Kyxolju' tyajajil Sab'ulon,
a Alisapan tk'wal Parnak.
Kyxolju' tyajajil Isakar,
a Paltyel tk'wal Asan.
Kyxolju' tyajajil Aser,
a Ayud tk'wal Selomi.
Kyxolju' tyajajil Neptali,
a Pedael tk'wal Amyud, chi Qman Dyos.
29Aye'tzun e'oktq'o'n Qman Dyosju' sipalte tx'otx' Kanaan kyxol aj Israel. Kyetzb'il aj Leb'i
1Tzaj yolin Qman Dyos te Moyses kyoju' plan tx'otx' te Moab', ttzi nin a' Jordan jlaj Jeriko, tzaj tma'n te ikjalu:
2Q'manxa kye aj Israel tu'n kyxi' kyq'o'n nimaqtnam kyuk'i'lxi' kojb'il kyi'jile te k'ik'leb'l toju' kytx'otx' kye aj Leb'i tu'n kynajan kyoj.3Che najal aj Leb'i kyoju' nimaqtnam lu, ex che tenb'elju' kywakyix ex txqantl kyalu'n kyoju' kojb'il.4Aju' k'ik'leb'l alu'mj kxel kyq'o'n kye, junaq jun (21) ky'jaj tk'i paq k'elela' lq'e ti'jile ttapiyil junjun nimaqtnam.5Tkyaqilju' tx'otx' te kyaje' ttx'u'k, kab'naqjun (41) ky'jaj tqan junjun plaj, kyinx tqanju' toj tjawetzq'ij, kyinx toj tkub'exq'ij, kyinx toj tb'a'nq'ob'kya'j ex kyinxju' toj tnayajkya'j. Kjeltenju' nintnam toj nky'ajchaq, tuk'i'lu' k'ik'leb'l alu'mj ti'jile.
6Kyxoltzunju' nimaqtnam che kxe'l kyq'o'ne' kye aj Leb'i, qaq nimaqtnam che okyel te kolb'il, jatu'n tklontetib' jun xjal qama kub' tb'yo'n juntl xjal. Kyib'ajxi'tzu'n qaq nimaqtnam lu, kxel kyq'o'ne' kab'naq kab'e'tl (42).7Ati tu'n t-xi' kyq'o'ne' kab'naq wajxaq (48) nimaqtnam tu'n tkyaqil kye aj Leb'i tuk'ilxi' kytx'otx' te kyky'ik'leb'l.8Ajkyxikyq'o'n aj Israel nimaqtnam ti'jku' kytx'otx' kye aj Leb'i, teyle junjun tnej tyajajil ati tu'n tq'onte kse'nxju' ati te: b'a'npunxi'xtl nimaqtnam k'elel kyeju' nim kytx'otx', atzu'n kye naqjni'x kytx'otx' naqjte'x nimaqtnam k'elel kye, chi Qman Dyos. E'nimaqtnam te kolb'il (Dt 19.1-13; Jos 20.1-9)
9Tzaj tma'n Qman Dyos te Moyses tu'n t-xitma'n kye aj Israel kjalu:
Ajkyik'xe' toju' nin a' Jordan tu'n kyokxe' toj Kanaan,11ati tu'n kysk'onteye' junjun nimaqtnam te kolb'il, jatu'n txa' jun xjal kloltib' mya xima'n tu'n ajtkub' tb'yo'n juntl xjal.12Atzuntzu' kkletela' kye twitze'lju' kyimni qa kyajb'il tu'n kq'onte tu'me'l t-xel te, ex lay kub' b'yo'n tzmaxi'j ajtok toj xjel kywitz tnam.13Qaq nimaqtnam kjawil kysk'o'ne' te kolb'il kyxolju' che kxe'l kye aj Leb'i:14oxe' toj tjawetzq'ij te Jordan ex oxe' toj Kanaan.15Che okyelju' waqaq nimaqtnam lu te kolb'il, che ajb'el kye aj Israel ex kyeju' najchaq xjal najliqe' mujqa ajb'etu'nqe' kyxole'. Atzuntzu' b'a'n kyklonte kyib' kykyaqilju' mya xima'n kyu'n qama kub' kyb'yo'n juntl xjal.
16Qa ati jun matk'ixb'sa juntl tu'n jun k'uxb'il, ex makyimju' xk'ixb'i, b'yojwnaqi'nte', kb'el b'yetju' xkub' b'yonte.
17Qa ati jun matz'oktb'yo'n juntl tu'n jun ab'j, ex makyimju' sokb'yo'n, b'yojwnaqi'nte', kb'el b'yetju' xkub' b'yonte.
18Qa ati jun matz'ok tjuma'n juntl tu'n jun tze, ex makyimju' sokb'ju'n, b'yojwnaqi'nte', kb'el b'yetju' xkub' b'yonte.19Aju' nqaku'xi'x witze'lj teju' xkyim, kb'el b'yonteju' b'iyol ajtelyal twitz.
20Qa ati jun matxi' tlmo'n juntl tuk'i'l tkyaqtk'u'j, mujqa matxi t-xon jun ti'xti' ti'j tuk'i'l t-xim myab'a'n,21mujqa tu'n tpaj q'oj ati kyxol matz'oktb'yo'n tu'n tq'ob', ex makyimu' juntl, kb'el b'yetju' xkub' b'yonte, qu'n b'yojwnaqi'n te'. Aju' twitze'lju' xkyim atixi'x toklen tuk'i'l kb'el b'yonteju' xkub' b'yonte ajtelyal twitz.
22Qatzun ati jun naq myanim xxi' tlmo'n juntl, ex mya tu'nwt jun q'oj ati kyxol, mujqa matxi' t-xon jun ti'xti' ti'j ex mya tuk'i'l t-xim myab'a'n,23mujqa min xtil aj t-xi' t-xon jun ab'j tib'aj juntl ex makyim tu'n, ex mya kyajq'oj kyib' ex myatoq xima'n tu'n, tu'n tb'o'lju' juntl tu'n,24atzun tnamtz k'okyel te ajkawil kyxolju' xkub' b'yonte tuk'i'l twitze'lju' xkyim ju' tajb'il tu'n tq'onte tu'me'l t-xel, kse'nxju' nuk'b'il lu.25Che kololju' tnam ti'ju' xb'iyon toj tq'ob' twitze'lju' xkyim, ex ati tu'n kyka'yinte tu'n tanjti'j toju' nintnam te kolb'il ja ojetoq pona' kloltetib'. Ati tu'n tkyajtenju' xb'iyun atzu' tzmax ajtkyimju' kynejel pale xjansa'ntib'.26Qatzun matz'etz ti'jxi' tx'otx' teju' nintnam te kolb'il,27mixti' til twitze'lju' kub'ni b'yo'n qama tz'el yal twitz ti'jxi'ju' tnam te kolb'il ex makub' tb'yo'n.28Ati tu'n tkyaj tenju' xb'iyon toju' nintnam te kolb'il tzmax ajtkyimju' kynejel pale. Yajxi'tzuntl b'a'n tu'n tanjti'j toju' ttx'otx'.
29Che kjeltenju' kawb'il lu tu'n kyajb'en kyeye', ex tu'n tkyaj kyma'ne' kye kyk'wale' toj wiqi'n, jaxjaku' mache najana'ye'. Kawb'il kyib'aj tziyb'il ex kolpib'l
30Naq o'kx tu'n kytziyb'il b'a'npun tziyal b'a'n tu'n tkub' b'yet jun b'yolxjal. Lay b'ant tkub' b'yet jun xjal naq tu'n jun tziyal.
31Mixti' tu'ntk'met pwaq te kolpib'lte jun b'yolxjal b'entni ti'j tu'n tkyim; ati tu'n tkub' b'yette' xjal lu.
32Mixti' tu'ntk'met pwaq te jun b'yolxjal ojetoq pon kloltib' toj jun nintnam te kolb'il, tu'nwt tanjtzti'j toju' ttx'otx' na'mxtoq tkyimu' kynejel pale.
33Lalun kub' kytz'ilsa'ne' tx'otx' ja kche najala'ye' tu'n b'yojwnaqi'n, qu'n tu'nju' b'yojwnaqi'n in tz'ilixa'ju' tx'otx', ex mixti' kolpib'l tu'n tpaju' b'yojwnaqi'n, naq o'kx tu'n tkamikju' xb'iyon.
34Lan kub' kytz'ilsa'ne' tx'otx' ja che najala'ye' ex jakchin najala'ye', qu'n ayine' Dyos Manb'aj, najli qine' kyxol aj Israel, chi Qman Dyos. Kyetzb'il qya
1Aye'tzu'n nejenel kye junjun k'loj tyajajil Kalaad, ju' tyajajil Mekyir, Manases ex Jse, e'pon kyk'etz Moyses exqe' nejenel kye junjun tnej kyyajajil aj Israel, xikyma'n kye:
2—Matchaq' Qman Dyos tu'n t-xi' t-sipa'na tx'otx' kyxol aj Israel, Moyses, kse'nxju' makub' tz'aq te junjun tnej, ex ikx tchaq' teya tu'n t-xi' tq'o'na tx'otx'ju' tetoq Selopead kyeju' tmyal, ju' ti'jx qyajajile' tzajna'.3Qatzun mache mje kyuk'i'l ichan kyxol jun tnejtl kyyajajil aj Israel, lay kyajtentl kytx'otx' xiq'et kye kyxolju' tnej qyajajile', k'okyeltzuntz kyxolju' tnej tyajajilju' jaxmjeya'. Iktzu'n k'elela' ti'ju' qetzb'ile' makub' tz'aq qeye'.4Ajtzun tul kanunju' ab'q'i te tzaqpib'l toj Israel, majx kjeltenju' kytx'otx' teju' jun tnejtl tyajajil ex myatzu' tu'n ttena'tl tmoju' qtx'otx'e', chechij.
5Atzunte Moyses, tchaq' kye aj Israel kse'nxju' tzaj tchik'b'a'n Qman Dyos te kjalu:
—Axte' nkyma'n tyajajil Jse.6B'a'n toj twitz Qman Dyos tu'n kymjeju' tmyal Selopead alquk'i'lxku' kyajb'ila', naq o'kx tu'n kymje kxolxju' kyyajajil ja tzajna' tyajil kyman.7Mixti' tu'n tik' ttx'otx' junjun matk'am toj jun tnej kyyajajil tmoj kytx'otx' jun tnejtl kyyajajil aj Israel; kykyaqil aj Israel tu'n kyklonteju' kyetzb'il kyxolxju' kyyajajil kywitze'l kyib'.8Qa ati jun qya te alkyexku' tyajajil matetza ttx'otx', ati tu'n tmje tuk'i'l jun ichan toj jun k'loj kywitze'l kyib' kyxolxju' tyajajil. Teyletzun junjun aj Israeltz ktkla' tetzb'il matk'am te tman.9Mixti' jun etzb'il te jun tnej tyajajil okwit k'ik'el te juntl tnej tyajajil. Teyle junjun tnej kyyajajil aj Israel tu'n tklonteju' ttx'otx' xkyaj q'o'n te, chi Moyses kye.
10Kyb'inchatzu'n Maala, Tirsa, Okla, Milka ex Noa, tmyal Selopead, kse'nxju' ojetoq tchaq' Qman Dyos te Moyses, e mjetzuntz kyuk'i'l kyk'wal ttzik mujqa titz'in kyman,12tyajajil Manasesqe', tk'wal Jse. Iktzu'n kyej tenju' kyetzb'il kyxolxju' tnej kyyajajil ja tzajna'ju' kyman.
13Aye'tzun chaq'b'ilju' ex nuk'b'il e'tzaj tq'o'n Qman Dyos te Moyses tu'n kyxitma'n kye aj Israel kyoju' plan tx'otx' te Moab', ttzi nin a' Jordan, jlaj Jeriko.

Bible Society in Guatemala

https://app.library.bible/content/aea9d9099feb3a24

expand_more
chevron_leftالفصل السابق
chevron_rightالفصل التالي