Matthew21
1आउर जब यीशु आउर उनकर चेलवन यरूशलेम भीर पहुँचलन, आउर जैतून पहाड़ भीर बैतफगे गाँव में पहुँचलन, तऽ यीशु अपन दूगो चेलवन के भेज के,2ओखनी से कहलन, “जे गाँव तोरा सामने हे ओकरा में जा, आउर तुरन्त एगो बाँधल गेल गदही, आउर ओकरा साथे गदही के बच्चा तोरा मिलत। ओकरा खोल लिहऽ आउर ओकरा हमरा भीर ले अईहऽ।3आउर जदि तोरा से कोई कुछ पूछतन, तऽ तूँ कह दिहऽ कि, प्रभु के एकर जरुरत हे। आउर तुरन्त ऊ ओकरा दे देतन।”4अब ई येहिगुने होल ताकि, जे भविष्यद्वक्ता द्वारा शास्त्र में कहल गेल हल, ऊ पूरा होवे, ऊ लिखलन हे,5“सिय्योन के बेटी से कहऽ, ‘देखऽ! तोर राजा तोरा भीर आ रहलन हे, ऊ नम्र होके, एगो गदही के बच्चा पर सवार हथन, जे बोझा ढोवे वाला जानवर के बच्चा हे।’” 6तऽ ओखनी दूनो चेलवन जा के जईसे यीशु उनका निर्देश देलन ओईसहीं कर के,7ऊ गदही आउर गदही के बच्चा के लेके अईलन आउर ओकरा पर अपन कपड़ा डाललन, तब यीशु ओकरा पर बईठ गेलन।8फिन बड़ी सा लोग अपन कपड़ा राह में बिछा देलन, आउर दोसर लोग पेड़ लोग खजूर के पेड़ के डाली काट-काट के ओकरा राह पर बिछा देलन। 9आउर जे भीड़ उनकर आगे-आगे चल रहल हल, आउर जे उनकर पीछे-पीछे चलल आवऽ हल, ऊ चिल्ला-चिल्ला के कह रहल हल, “दाऊद के संतान के होशाना! धन्य हथन ऊ, जे प्रभु के नाम से आवऽ हथन! सभे से ऊँचा जगहवन पर होशाना।” 10आउर जखनी यीशु यरूशलेम में प्रवेश करलन, तऽ पूरा नगर भर में हलचल मच गेल, आउर लोग एक दोसरा से पूछे लगलन, “ई कौन हथन?”11आउर भीड़ जबाब देलक, “ई गलील के नासरत के भविष्यद्वक्ता यीशु हथन!”12तब यीशु मन्दिर में गेलन, आउर मन्दिर में खरीद-बिक्री करे वालन के बाहरे निकास देलन आउर पईसा बदले वाला के चौकी आउर कबूतर बेचेवाला के चौंकियन के उलट देलन।13आउर ऊ ओखनी से कहलन, “शास्त्र में अईसन लिखल हे कि ‘हमर घर प्रार्थना के घर कहलावत,’ बाकि तोहनी एकरा डाकू के खोह बना देलऽ हे।”14एकर बाद बड़ी सा आंधर आउर लाँगड़ मन्दिर में यीशु नजदीक अईलन, आउर ऊ ओखनी के चंगा करलन।15बाकि महायाजक आउर शास्त्री लोग उनकर द्वारा करल गेल चमत्कार के काम के, आउर लईकन के मन्दिर में “दाऊद के बेटा के होशाना” कहते आउर चिल्लईते देख के, ओखनी बड़ी गोस्सा हो गेलन।16आउर ओखनी यीशु से पूछलन, “का तूँ सुन रहलऽ हे कि एखनी का कह रहलन हे?” बाकि यीशु ओखनी से कहलन, हाँ, “का तोहनी एकरा शास्त्र में नऽ पढ़लऽ हे कि ‘छोटा बच्चा आउर दूध पिये वाला बच्चा के मुँह से तूँ स्तुति करवईलऽ हे’?”17आउर ओखनी के छोड़ के, यीशु नगर से बाहरे बैतनिय्याह चल गेलन, आउर ऊहें रात बितईलन।18फिन भोर में, यरूशलेम के शहर में लौटते बखत, उनका भूख लगल।19आउर सड़क के किनारे अंजीर के पेड़ देखके, ऊ ओकरा भीर गेलन आउर खाली पत्ता के छोड़ के ओकरा में कुछो नऽ पईलन। आउर ऊ अंजीर के पेड़ से कहलन, “अखनी से अनन्तकाल ला तोरा में फिन कहियो फल नऽ फरत,” आउर अंजीर के पेड़ तुरन्त सूख गेल।20आउर ई देख के चेलवन अचरज करलन आउर एक दोसर से कहे लगलन, “ई अंजीर के पेड़ एतना जल्दी कईसे सूख गेल?”21बाकि जबाब दे के, यीशु ओखनी से कहलन, “हम तोरा से सच कहऽ ही, जदि तूँ विश्वास करवऽ आउर शंका नऽ करवऽ, तऽ नऽ खाली ओही करवऽ, जे ई अंजीर के पेड़ के साथे करल गेल हे, बाकि ईहाँ तक कि तूँ पहाड़ से भी कहवऽ, ‘उखड़ जा, आउर समुद्र में डूब जा,’ तऽ ई भी हो जायेत।22आउर ऊ सभे कुछ, जे कुछ भी तूँ प्रार्थना में विश्वास कर के माँगवऽ, ऊ सभे तोरा मिल जायेत।”23आउर जखनी यीशु मन्दिर में अईलन, तऽ प्रधान याजक आउर लोगवन के पुरनियन, कहे लगलन, “तूँ ई काम के कौन अधिकार से करऽ हऽ, आउर तोरा ई अधिकार कौन देलन हे?”24बाकि जबाब दे के यीशु उनका से कहलन, “हम भी तोरा से एगो सवाल पूछऽ ही, आउर जदि तूँ हमरा जबाब देवऽ, तऽ हम भी तोरा बतायेम कि हम ई सभे काम के कौन अधिकार से करऽ ही।25यूहन्ना के बपतिस्मा कहाँ से हल? स्वर्ग के तरफ से कि आदमी के तरफ से?” बाकि ओखनी आपस में ही ई कह के बहस करे लगलन, “जदि हम कहम, कि ‘स्वर्ग के दने से हल,’ तऽ ऊ हमरा से कहतन, ‘तऽ फिन तूँ ओकरा पर विश्वास काहे नऽ करलऽ।’26बाकि जदि हम कहम कि, ‘ई आदमी के तरफ से हल,’ तऽ हमरा भीड़ के डर हे, काहेकि ओखनी सभे यूहन्ना के भविष्यद्वक्ता मानऽ हे।”27आउर यीशु के जबाब दे के ओखनी कहलन, “हम नऽ जानऽ ही।” तऽ यीशु ओखनी से कहलन, “येहिसे हमहूँ तोरा नऽ बतायेम कि हम ई सभे काम कौन अधिकार से करऽ ही।28बाकि तूँ का सोचऽ हऽ? कोई आदमी के दूगो बेटा हल। आउर पहिलका भीर जा के ऊ कहलन, ‘हे बेटा, आज दाख के बारी में जा के काम करऽ!’29बाकि जबाब दे के बेटा कहलक, ‘हम नऽ जायेम!’ बाकि बाद में अपन मन बदल के चल गेल।30आउर दोसरका बेटा भीर जा के ऊ ओईसहीं कहलन। आउर जबाब दे के ऊ बेटा कहल, ‘मालिक, बाबूजी! हम चल जायेम,’ बाकि ऊ नऽ गेल।31एखनी दूनो में से कौन पिता के इच्छा पूरा करलक?” ओखनी जबाब देलन, “बड़का बेटा।” तब यीशु उनका से कहलन, हम तोरा से सच कहऽ ही कि चुंगी लेवे वाला आउर वेश्या तोहनी से पहिले परमेश्वर के राज में प्रवेश करतन।32काहेकि यूहन्ना बपतिस्मा देवे वाला धार्मिकता के राह से तोरा भीर अईलन, बाकि तूँ उनकर वचन पर विश्वास नऽ करलऽ। बाकि चुंगी लेवे वालन आउर वेश्यावन उनका पर विश्वास करलन। बाकि ई देखके बाद में भी नऽ पछतईलऽ कि उनका पर विश्वास करते हल।33“एगो आउर दृष्टान्त सुनऽ। एगो आदमी हल, एगो जमीन के मालिक हलन जे अंगूर के बगईचा लगईलन, आउर ओकरा चारो पट्टी बाड़ा बाँध देलन आउर ओकरा में दाख के कुण्ड खोदलन आउर पहरदार लागी एगो मचान बनईलन, आउर ओकरा किसान लोग के किराया पर दे देलन आउर प्रदेश में चल गेलन।34फिन जखनी फरे के समय नजदीक आयेल, तऽ ऊ अपन दास लोग के अपन बखरा लेवे ला किसान भीर भेजलन।35बाकि किसान दास लोग के पकड़ के कोई के पीटलक, आउर कोई के मार देलक, आउर कोई के पथराव करलक।36दूबारा मालिक दोसर दास लोग के भेजलन। बाकि किसान ओखनी के जौरे भी ओईसहीं करलक।37बाकि आखिरी में ऊ अपन बेटवन के ई सोच के भेजलन कि ओखनी हमर बेटा के इज्जत करतन।38बाकि किसान बेटा के देखके आपस में कहलन, ‘ई तऽ वारिस हे! आवऽ, हम मिल के ओकरा मार देम आउर ओकर संपत्ति ले लेम।’39आउर ओकरा पकड़ के, ओखनी दाख के बारी से बाहरसी खींच के मार देलन।40येहिगुने, यीशु महायाजकवन आउर बड़कन से पूछलन जखनी दाख के बारी के मालिक लौटतन, तऽ ऊ सभे किसान के साथे का करतन?”41लोगवन उनका जबाब देलन, “ऊ ओखनी दुष्टजन के पूरा तरह से खतम कर देतन, आउर दाख के बारी के दोसर किसान के ठेका पर देतन जे उनका समय पर फल देतन।”42यीशु उनका से कहलन, “का तोहनी पवित्रशास्त्र में ई नऽ पढ़ल हे कि ‘जौन पत्थर के राजमिस्त्री लोग अस्वीकार समझलन हल, ओही एगो नींव के पत्थर हो गेल। ई प्रभु के तरफ से होल, आउर तोहनी के नजर में ई चमत्कार हे’? 43येहिगुने हम तोरा से कहऽ ही: कि परमेश्वर के राज तोहनी से ले लेवल जायेत आउर अईसन लोगवन के समूह के दे देवल जायेत, जे ओकर फल लईतन।44आउर जे कोई ई पत्थर पर गिरतन, ऊ चकनाचूर हो जईतन, आउर जेकरा पर ई पत्थर गिरत, ओकरा ऊ पीस देत।”45आउर महायाजकवन आउर फरीसी लोग यीशु के ई दृष्टान्त के सुन के समझ गेलन, कि ऊ उनका बारे में कह रहलन हे।46आउर ओखनी यीशु के पकड़े ला चाहऽ हलन, बाकि ओखनी भीड़ से डरऽ हलन काहेकि भीड़ उनका भविष्यद्वक्ता मानऽ हल।
Bridge Connectivity Solutions Pvt. Ltd.