Genesis11
1शुरुआत में संसार में सभे लोग एक्के भाषा बोलऽ हलन।2जईसे-जईसे लोग पूरुब के तरप घूमते-घूमते गेलन, ओखनी शिनार देश के इलाका में एगो मैदान में पहुँच गेलन आउर हूँए वश गेलन। 3तऽ ओखनी आपस में कहलन, "आवऽ हमनी महल बनावे लागी ईंटा पार के ओकरा पक्का के बरियार करम!" एहिगुने पत्थल के जगह पर ईंटा के इस्तेमाल कईलन आउर ओकरा एक साथे लगावे लागी गारा के जगह पर अलकतरा के इस्तेमाल कईलन।4ओखनी कहलन, आवऽ हमनी अपना लागी एगो शहर बनायेम! हमनी के एगो ऊँचा मीनार बनावे के चाही जे आसमान के छुये! एकरा से लोग जानऽ लेतन कि हमनी कौन ही! जदि हमनी अईसन नऽ करम तऽ हम समूचे धरती पर तितिर-बितिर हो जाम।5एक दिन यहोवा ऊ नगर आउर गुम्मट के देखे ला स्वर्ग से नीचे उतरलन, जेकरा लोग बना रहलन हल।6यहोवा सोंचलन, "ई लोग एक्के गो समाज के हथन जे एक्के भाषा बोलऽ हथन। जदि ओखनी अईसन करे ला शुरू कर दे हथन, तऽ अईसन कुच्छो नऽ हे जेकरा ओखनी करे ला फईसला लेतन जे ओखनी ला असंभव होत!7एहिगुने आवऽ, हम ऊहाँ जा के लोगवन के भाषा के अलगे-अलगे भाषा कर देम, अईसन नऽ होवे कि ओखनी एक दोसरा के बात समझे लगतन।8अईसन कर के यहोवा ओखनी के पूरा धरती पर तितर-बितर कर देलन, आउर लोग नगर बनावे लागी बंद कर देलन।9ऊ नगर के नाम बाबेल रखल गेल, काहेकि यहोवा ऊहाँ धरती भर के लोग के एक्के भाषा बोले से रोक देलन। आउर यहोवा ओखनी के ऊ जगह से पूरा धरती पर तितर-बितर कर देलन।10ई ऊ हथन जे शेम के वंश हथन। जल परलय के दू साल के बाद, जहिया शेम एक सौ बरिस के होलन, तऽ ऊ अर्पक्षद के पिता बनलन।11अर्पक्षद के जलम लेला के बाद, शेम पाँच सौ बरस आउर जिन्दा रहलन आउर भी बड़ी मनी बेटा आउर बेटी के बाप बनलन।12जहिया अर्पक्षद पैंतीस बरस के होलन, तऽ उनका से शेलह जलम लेलन।13शेलह के जलम लेला के बाद, अर्पक्षद चार सौ तीन बरिस आउर जिन्दा रहलन आउर बेटा आउर बेटी के पिता बनलन।14जहिया शेलह तीस बरस के होलन, तऽ उनका से एबेर जलम देलन।15एबेर के जलम लेला के बाद, शेलह चार सौ तीन बरस जिन्दा रहलन आउर दोसरा बेटा बेटी के पिता बनलन।16जहिया एबेर चौंतीस बरस के होलन, तऽ उनका से पेलेग के जलम होल।17पेलेग के जलम के बाद, एबेर चार सौ तीस बरस आउर जिन्दा रहलन आउर दोसर बेटा आउर बेटी के पिता बनलन।18जहिया पेलेग तीस बरस के होलन, तऽ उनका से रू के जलम होल।19रू के जलम के बाद, पेलेग दू सौ नौ बरस आउर जिन्दा रहलन आउर दोसर बेटा आउर बेटी के पिता बनलन।20जहिया रूप बत्तीस बरस के होलन, तऽ उनका से सरुग के जलम होल।21सरुग के जलम के बाद रूप दू सौ सात बरस आउर जिन्दा रहलन आउर दोसरा बेटा आउर बेटी के पिता बनलन।22जहिया सरुग तीस बरस के होलन, तऽ उनका से नाहोर के जलम होल।23नाहोर के जलम के बाद सरुग दू सौ बरस आउर जिन्दा रहलन आउर दोसरा बेटा-बेटी के पिता बनलन।24जहिया नाहोर उनतीस बरस के होलन, तऽ उनका से तेरह के जलम होल।25तेरह के जलम के बाद, नाहोर एक सौ उनईस बरस आउर जिन्दा रहलन आउर दोसरा बेटा आउर बेटी के पिता बनलन।26जहिया तेरह सत्तर बरस के होलन, तऽ तेरह के बेटा अब्राम, नाहोर आउर हारान के जलम होल।27तेरह के वंश के बारे में ई होल, तेरह के बेटा अब्राम, नाहोर, आउर हारान हलन हारान के बेटा के नाम लूत हल।28जहिया हारान कसदीयन के देश के ऊर नगर में अपन बाबूजी तेरह के सामने मरलन, तऽ हारान के पिता उनका जौरे हलन। ई ओही जमीन हे जहाँ उनकर पुरखावन के देश में आउर ओही शहर में जलम होल हल। 29अब्राम आउर नाहोर दूनो बियाह कईलन। अब्राम के मेहरारू के नाम सारै, आउर नाहोर के मेहरारू के नाम मिल्का हल। मिल्का आउर ओकर बहिन यिस्का हारान के बेटी हलन।30सारै के कोई बाल-बच्चा नऽ हो रहल हल।31तेरह कसदिया के ऊर नगर छोड़ के कनान देश में रहे के फैसला लेलन। एहिगुने अपन बेटा अब्राम, आउर पोता लूत, जे हारान के बेटा हलन, आउर पुतोह सारै के अपन जौरे लेलन। बाकि ओखनी कनान जाई के बदले हारान नगर में रुक गेलन आउर हूँए बस गेलन।32जहिया तेरह के जीवन दू सौ पाँच बरस के होल, तऽ हारान नगर में ही मर गेलन।
Bridge Connectivity Solutions Pvt. Ltd.