Genesis12
1तऽ यहोवा एक दिन अब्राम से कहलन, ई देश के जहाँ तूँ रह रहलऽ हे छोड़ दऽ। अपन पिता के कुल आउर परिवार के छोड़ दऽ, आउर ऊ देश में चल जा जे हम तोरा देखाम। 2हम तोर वंश के एगो बड़का जाति बनायेम। हम तोरा आशीर्वाद देम आउर तोरा मसहूर बना देम। हम तोरा ला जे करम ऊ दोसर कोई लागी आशीर्वाद होत।3जे तोरा आशीर्वाद देतन ओकरा हम आशीर्वाद देम, आउर जे तोरा से बुराई करतन ओकरा हम श्राप देम। हम तोरा चलते धरती भर के सभे कुल के आशीर्वाद देम। 4एहिगुने अब्राम यहोवा के आज्ञा के मोताबिक हारान के छोड़ देलन। अब्राम पचहत्तर बरस के हलन तहिये ऊ अपन परिवार आउर लूत के परिवार के साथे लेके ऊहाँ से चल गेलन।5अब्राम अपन मेहरारू सारै आउर अपन भतीजा लूत के जौरे लेलन; ऊ हारान देश में कमायल सभे दौलत के अपना जौरे ले गेलन। ऊ ऊहाँ से चल गेलन आउर कनान देश में चल गेलन। 6कनान में अब्राम शकेम ला यात्रा कईलन, आउर मोरे के बांज पेड़ नाम के एगो ऊँचा पेड़ भीर डेरा खड़ी कईलन। जखनी अईसन होल, कनानी लोग ऊ देश में रह रहलन हल।7तऽ यहोवा अब्राम से दर्शन दे के कहलन, हम ई देश तोर वंश के देम। तऽ अब्राम यहोवा लागी, जे उनका दर्शन देलन हल, ऊ जगह पर बलि चढ़ावे लागी एगो वेदी बनईलन। 8सकेम से अब्राम आउर उनकर परिवार बेतेल से पूरुब तरप पहाड़ी ला गेलन। जहाँ ऊ अपन तम्बू खड़ा कईलन, ओकर पच्छिम में बेतेल नगर हल, आउर पूरुब में हे देश हल ऊहाँ ऊ एगो आउर वेदी बनईलन, आउर बलि चढ़ईलन, आउर ऊहाँ यहोवा के उपासना कईलन।9फिन ऊ ऊहाँ से चल गेलन आउर दक्षिण पट्टी नेगेव रेगिस्तान दने यात्रा करते रहलन।10कनान देश में अकाल पड़ल, येहिगुने ऊ मिस्र देश में कुछ बखत ला रहे लागी दक्षिण दने चल देलन, काहेकि जौन देश में ऊ हलन, ऊहाँ खाई के बड़ी जादे समस्या हल।11जखनी ऊ मिस्र देश भीर पहुँचलन, तऽ अब्राम अपन मेहरारू सारै से कहलन, सुनऽ, हम जानऽ ही कि तूँ बड़ी सुन्दर औरत हऽ।12जखनी मिस्र के लोग तोरा देखतन, तऽ कहतन, 'ई औरत उनकर मेहरारू हे!' तऽ ऊ हमरा जानऽ से मार देतन, बाकि तोरा नऽ मारतन।13एहिगुने हम तोरा से हाथ जोड़ऽ ही, कि तूँ पूछे वालन से कहिहऽ कि तूँ हमर बहिन हऽ, जेकरा से हम बच जाम, आउर ऊ तोरा चलते हमरा नऽ मारतन।14आउर ओईसहीं कईलन। जइसहीं ओखनी मिस्र पहुँचलन, तऽ मिस्र के लोग देखलन कि अब्राम के मेहरारू सच में बड़ी सुन्दर हे।15जखनी राजा के हाकिम ओकरा देखलन, तऽ ऊ राजा के बतईलन कि ऊ केतना सुन्दर हे। तऽ राजा ओकरा अपन महल में ले गेलन।16सारै के चलते मिस्र के राजा अब्राम पर कृपा कईलन, आउर ऊ अब्राम के भेड़-बकरियन, गाय-बैल, गधी, दास-दासी, आउर ऊँट देलन।17बाकि काहेकि राजा अब्राम के मेहरारू सारै के रख लेलन हल, एहिगुने यहोवा राजा आउर उनकर घराना के सभे लोग के भयंकर रोग लगईलन।18तऽ राजा अब्राम के बोलईलन आउर उनका से कहलन, तूँ हमरा जौरे बड़ी गलत काम कईलऽ हे! तूँ हमरा ई काहे नऽ बतईलऽ कि ऊ तोर मेहरारू हथन?19तूँ अईसन काहे कहलऽ, कि ऊ तोर बहिन हथन, फिन हम उनका अपन मेहरारू बना लेली? तोरा अईसन नऽ करे ला चाहऽ हल! तऽ अखनी अपन मेहरारू के लेजा, आउर ईहाँ से चल जा।20तऽ राजा अपन सिपहियन के अब्राम आउर उनकर मेहरारू आउर उनकर सभे सम्पति के मिस्र से बाहर ले जाय के हुकुम देलन।
Bridge Connectivity Solutions Pvt. Ltd.