خروج19
1مِصرٕ منٛزٕ نیرتھ ترٛیمہِ رؠتکہِ گۅڈنکہِ دوٚہہ وٲتؠ اسرائیل لٕکؠ لوٗکھ سیناؔ کِس وجارس منٛز۔2رفیدیمؔ نیرتھ وٲتؠ تِم سیناؔ کِس وجارس منٛز، تہٕ تتہِ دِیتُ تِمو پہاڑکِس دامنس تَل خٟمہٕ۔3موسیٰؔ کھوٚت پہاڑس ہیٚور خدایس نِشہ ملاقات کرنہِ۔ یہُوواہنؔ کوٚر تس پہاڑٕ تینتالہِ پؠٹھ آلو تہِ ووٚننس، "بہٕ چُھس یژھان زِ ژٕ وَنکھ یعقوبؔ سنٛدِس خاندانس اسرائیل کیٚن لوٗکن یتھٕ پٲٹھؠ،4ژےٚ وچُھتھ زِ مےٚ کیاہ کوٚر مِصرٕ کیٚن لوٗکن سٟتؠ تہِ بٲز سنٛزن پکھن پؠٹھ تُلتھ ٲنؠ مو یور پانس نِشہ۔5یمہِ وِزِ ہرگاہ توٚہؠ ہوشہِ سان میٲنؠن حکمن پؠٹھ عمل کٔرِو تہٕ میون وعدہ مٲنو، توٚہؠ ٲسیٚو میٲنؠ لوٗکھ تہٕ ساروٕے قومو منٛزٕ ٲسیٚو میٲنؠ ذٲتی ملکِیت حالانکہ سٲری زمیٖن چھِ میٲنؠ،6توٚہؠ ٲسیٚو میٲنؠ کاہنن ہنٛز مملِکت بیٚیہِ میون اکھ شُد قوم۔ یمہٕ کتھٕ چھے ژےٚ اسرائیل کیٚن لوٗکن وننہِ۔"7أتی ووٚتھ موسیٰؔ پہاڑٕ پؠٹھٕ بوٗن تہِ اننٲوِن لوٗکن ہنٛدؠ زٹھؠ ناد دِتھ۔ تٔمؠ ونیہ نکھ تِم سٲری کتھٕ یِمہٕ یہُوواہنؔ تمِس ونیہ مٕژ آسہٕ۔8ساروےٕ لوٗکو ووٚن، "ٲسؠ کٔرِو تہِ سورے یہِ یہُوواہنؔ اسہِ ووٚنمُت چُھ۔ "پتہٕ کھوٚت موسیٰؔ پہاڑس ہیٚور یہُوواہسؔ لوٗکن ہنٛز شیچھ ہٮ۪تھ۔9پتہٕ ووٚن یہُوواہنؔ موسیٰؔ ہس، "ہوشہِ سان بوز۔ بہٕ یمےٕ ژےٚ نِشہ أکِس گٔنِس اوبرس منٛز ییٚلہِ بہٕ ژےٚ سٟتؠ کتھٕ کران آسہٕ یتھ زن لوٗکھ بوزن تہٕ تِم کرن ھمیشہ پژھ زِ ژےٚ چُھکھ تِہنٛد سردار۔ "ادٕ ؤنؠ موسیٰؔ ہن لوٗکن ہنٛز شیٚچھ یہُوواہسؔ۔10پتہٕ ووٚن یہُوواہنؔ موسیٰؔ ہس، "لوٗکن نِشہ گژھِ بیٚیہِ واپس۔ تِمن ون میانہِ ینٕچ کٔرِو تیٲری۔ تِمن چُھ پننُ پان از تہٕ پگاہ صاف تہٕ پاک کرُن۔ تِمن چھِ بیٚیہِ پننٕؠ پلو چھلٕنؠ11یتھ زن تِم ترٛیمِس دوٚہس پؠٹھ تیار روٗزن یمہِ دوٚہہ بہٕ خداوند سیناؔ پہاڑٕ پؠٹھٕ بوٗن وسہٕ ییٚتہِ سٲری لوٗکھ ہیکین مےٚ وچھتھ۔12ژٕ بناؤ پہاڑٕ کِس دامنس أندؠ أندؠ لوٗکن ہنٛدِ حفاظتہٕ خٲطرٕ اکھ سرحد۔ تِم کرکھ خبردار زِ پہاڑس یتھ نہٕ کانٛہہ کھسہِ بیٚیہِ لاگہِ نہٕ کانٛہہ پہاڑٕکِس دامنس اتھٕ۔ ژےٚ چھےٚ سُہ اکھ قتل کرُن یُس پہاڑٕکِس دامنس اتھٕ لاگہِ۔13کٲنٛسہِ أکِس انسانس یا جانورس مٕہ دِ پہاڑس کن گژھنہٕ۔ یُس اکھا تہِ کرِ توٚہہِ پزن تِم کنہِ لٲیتھ مارنؠ تہٕ تیٖر لٲیِتھ تہِ۔ مگر ییٚلہِ توٚہہِ بگل وزنچؠ اکھ زیٹھؠ آواز کنن گژھِ، لوٗکھ ہیکین پہاڑٕ کِس دامنس نکھٕ گژھتھ۔"14لہٰذا موسیٰؔ ووٚتھ پہاڑٕ پؠٹھٕ دبارٕ بوٗن تہٕ لوٗکن ووٚنُن زِ تِم کرِن پننُ پان صاف تہٕ پاک تہٕ روٗزن یہُوواہؔ سٕنٛدِ ینہٕ خٲطرٕ تیار۔ تِمو کوٚر تیٖ یہِ موسیٰؔ ہن تِمن ووٚن، تہٕ تِمو چٔھلؠ بیٚیہِ پننٕؠ پلو تہِ۔15پتہٕ ووٚن موسیٰؔ ہن لوٗکن، "تریمہِ دوٚہہ باپتھ سپدیو تیار، مرد گژھن پننؠن زنانن سٟتؠ تۅتام جنسی تعلقات قٲیم کرنس منٛز پتھ روزن۔"16ترٛیمہِ دوٚہہ صبحےٕ گۓ گگرایہِ تہٕ وزملہٕ، اکھ سیاہ اوٚبر ووت پہاڑس پؠٹھ بیٚیہِ گییہِ بگلچؠ زبردس آواز یمہِ سٟتؠ خٟمن منٛز روٗزن وٲلؠ لوٗکھ کھوژؠ زبردس۔17موسیٰؔ ہن کڈؠ لوٗکھ خدایس سمکھنہٕ خٲطرٕ خٟمو منٛزٕ نیٚبر۔ تِم روٗدؠ پہاڑٕ کِس دامنس انٛدؠ انٛدؠ کھڑا۔18ادٕ ووٚتھ یہُوواہؔ نارس ؤلِتھ سیناؔ پہاڑٕ پؠٹھٕ بوٗن یمہِ سٟتؠ سٲرسےٕ پہاڑس دہؠ ولنہٕ آو زنہٕ اوس بٔٹھٕچہ بخارِ منٛزٕ دہؠ نیران بیٚیہِ آو سٲرسےٕ پہاڑس وُترٕ بُنیٚل۔19بگلچؠ آواز ٲس گرٛزان تہٕ موسیٰؔ اوس خدایس سٟتؠ کتھٕ کران تہٕ خدا اوس أکِس روبہٕ داب واجنہِ آوازِ منٛز جواب دِوان۔20یہُوواہؔ ووٚتھ پتہٕ دُبارٕ سیناؔ پہاڑٕ کہِ تنتٲلہِ پؠٹھٕ بوٗن، تٔمؠ دِیتُ موسیٰؔ ہس ناد زِ سُہ کھسہِ پہاڑس ہیٚور کُن، لہٰذا موسیٰؔ کھوٚت ہیٚور کُن۔21یہُوواہنؔ ووٚن موسیٰؔ ہس، "بیٚیہِ وس بوٗن تہٕ لوٗکھ کرکھ خبردار زِ تِم ترٛن نہٕ مےٚ وچھنہٕ باپتھ سرحدٕ یپور۔ ہرگاہ تِمو تہِ کوٚر تیلہِ سپدن واریاہ لوٗکھ مارٕ۔22بیٚیہِ چُھ کاہنن تہِ پننُ پان صاف تہٕ پاک کرُن یِم مےٚ نکھٕ یِن۔ ہرگاہ تِمو تہِ کوٚر نہٕ تیلہِ دِمہٕ بہٕ تِمن سزا۔"23موسیٰؔ ہن ووٚن پتہٕ یہُوواہسؔ، "ژےٚ چُھتھ تِم حکم دِیتُمتُ یہِ ونان زِ پہاڑس انٛدؠ انٛدؠ بناؤ اکھ سرحد یتھ یہِ پاک روزِ لہٰذا لوٗکھ کھسن نہٕ پہاڑس پؠٹھ۔"24یہُوواہنؔ ووٚن موسیٰؔ ہس، "پہاڑٕ پؠٹھٕ وس واپس بوٗن تہٕ اننُ ہارونؔ پانس سٟتؠ۔ کاہنن یا لوٗکن مٕہ دِ اجازت سرحدٕ یپوٗر ترِٛتھ یتُھ زن تِم مےٚ کُن واتن۔ ہرگاہ تِم یپوٗر ترٛؠ، بہٕ دِمہٕ تِمن سزا۔"25لہٰذا موسیٰؔ ووٚتھ دُبارٕ پہاڑٕ پؠٹھٕ واپس بوٗن تہٕ لوٗکن ووٚنُن تہِ یہِ یہُوواہنؔ تمِس ووٚنمُت اوس۔
Bridge Connectivity Solutions Pvt. Ltd.