خروج18
1مِدیانکینؔ لوٗکن ہُنٛد کاہن اوس یتروؔ یُس موسیٰؔ سُنٛد ہؠرٕ بابہٕ اوس۔ تٔمؠ اوس تہِ سورے بوزمُت یہٕ خداین موسیٰؔ ہس تہٕ پننؠن اسرائیلی لوٗکن ہنٛدِ باپتھ کوٚرمُت اوس۔ تٔمؠ بوز تتھ متعلق تہِ زِ یہُوواہنؔ کٔتھٕ پٲٹھؠ ٲسؠ تِم مِصرٕ منٛزٕ کڈتھ انمٕتؠ۔2موسیٰؔ ہن ٲسؠ پننٕؠ زنان صفورہؔ بیٚیہِ پننٕؠ زٕ نیٚچوؠ گرٕ واپس سوزِمتٕؠ ییٚلہِ تٔمؠ سُنٛد ہؠرٕ بابہٕ یتروؔ تمِس نِشہ آمُت اوس تہٕ تٔمؠ نیہ سۅ3بیٚیہِ تٔمؠ سٕنٛدؠ زٕ نیٚچوؠ۔ أکِس نیٚچوِس اوس جیرسومؔ ناو یُس عِبرٲنؠ لفظ چُھ تہٕ یمیٛک مطلب چُھ "مسٲفر" تکیازِ موسیٰؔ ہن اوس ووٚنمُت، "بہٕ چُھس بِییٚس ملکس منٛز مسٲفری ہنٛز زندگی بسر کران آمُت۔"4بییٚس نیٚچوِس اوس الِیعزرؔ یُس عِبرٲنؠ لفظ چُھ تہِ یمیٛک مطلب چُھ "خدایہِ چُھ مےٚ مددگار" تکیازِ موسیٰؔ ہن اوس ووٚنمُت، "یمِس خدایس میون بب اوس عبادت کرن، تٔمؠ کوٚر مےٚ مدد بیٚیہِ مۅکلووُنس فرِعوؔنہٕ سنٛزِ تلوارِ تلہٕ۔"5موسیٰؔ سُنٛد ہؠرٕ بابہٕ یتروؔ ووت تٔمؠ سٕنٛدؠ زٕ نیٚچوؠ تہٕ تٔمؠ سنٛز زنان ہؠتھ موسیٰؔ ہس نِشہ وجارس منٛز ییٚتہِ تِم خدایہِ سنٛدِس پاک پہاڑس نکھٕ ڈیرٕ دِتھ ٲسؠ۔6یتروہنؔ ٲس موسیٰؔ ہس شیچھ سوزمٕژ، "بہٕ چُھس ژےٚ نِشہ چٲنؠ زنان بیٚیہِ چٲنؠ زٕ نیٚچوؠ ہؠتھ واتن وول!"7لہٰذا موسیٰؔ دراو پننہِ ڈیرٕ منٛزٕ نیٚبر پننِس ہؠرٕ بابس سمکھنہٕ باپتھ۔ تٔمؠ کٔر تمِس خوش آوے بیٚیہِ کوٚرنس بُتھِس میوٗٹھ۔ تِمو پرُوژھ اکھ أکِس خٲرچؠ خبر اتر پتہٕ ژایہِ خٟمس منٛز۔8موسیٰؔ ہن ووٚن یتروؔہس تہِ یہِ یہُوواہنؔ اوس اسرائیل کیٚن لوٗکن مدد کرنہٕ باپتھ مِصرٕ کِس بادشاہس بیٚیہِ مِصرٕ کیٚن باقی تمام لوٗکن کوٚرمُت اوس۔ تٔمؠ ووٚن تمِس تِمن تکلیفن متعلق تہِ یِم تِمو وتہِ منٛز پیش آیہِ تہٕ یہُوواہؔ اوس تِمن مدد کوٚرمُت۔9یتروؔہن کٔرؠ یہُوواہؔ سٕنٛدؠ تعریف ییٚلہِ تٔمؠ بوز زِ یہُوواہنؔ ٲسؠ اسرائیل لٕکؠ لوٗکھ مِصرس منٛز غلامی نِشہ بچٲمٕتؠ بیٚیہِ اوس سُہ تِمن پؠٹھ مہربان روٗدمُت۔10یتروؔہن ووٚن، "یہُوواہسؔ کرو تعریف، یمؠ توٚہہِ مِصری طاقتور فوجہِ نِشہ بیٚیہِ فرعونؔس نِشہ نجات دِتوٕ بیٚیہِ مِصرِین ہنٛدِ اتھٕ تلہٕ مۅکلٲون اسرائیلٕکؠ لوٗکھ!11وۅنؠ توٚر مےٚ فِکرِ زِ یہُوواہؔ چُھ تمام معبودن ہنٛدِ کھۅتہٕ بوٗڈ تکیازِ تٔمؠ کٔرؠ اسرائیلٕکؠ لوٗکھ تِہنٛدیو مغرور دشمنو نِشہ تِم آزاد۔"12پتہٕ کٔر موسیٰؔ سٕنٛدؠ ہؠرٕ بابن، یتروؔہن خدایس اکھ بٔزمٕژ قۅربٲنی پیش بیٚیہِ کوٚرن نیاز۔ ہارونؔ بیٚیہِ اسرائیلٕکؠ زٹھؠ آیہِ خدایہِ سٕنٛدِس احترامس منٛز تہٕ کھییٚکھ موسیٰؔ ہس تہٕ تٔمؠ سٕنٛدِس ہؠرٕ بابس سٟتؠ ژوٹ۔13دوٚیمہِ دوٚہہ بیوٗٹھ موسیٰؔ لوٗکن ہنٛدؠ نیٛاۓ انزراونہِ۔ تمِس کوٚر لوٗکو عرض زِ سُہ بوز تِہنٛدؠ نیٛاے صبحو پؠٹھٕ شامس تام۔14ییٚلہِ یتروؔہن تہِ سورےٕ وُچھ یہِ موسیٰؔ لوٗکن ہنٛدِ خٲطرٕ کران اوس تہٕ تٔمؠ ووٚن، "امہِ طریقہٕ مٕہ ییہِ لوٗکن سٟتؠ پیش۔ ژےٚ پزِ نہٕ کُنے زوٚن بِہن تہٕ سٲری لوٗکھ چھِ صبحو پؠٹھٕ شام تام ژےٚ برونٛہہ کنہِ سٲرسےٕ دوٚہس ووٚدنیِ روٗزان!"15موسیٰؔ ہن دِیتُ پننِس ہؠرٕ بابس جواب، "لوٗکھ چھِ مےٚ نِشہ خدایہِ سنٛز پرٛژھِ غٲر کرنہٕ باپتھ یوان۔16ییٚلہِ نہٕ تِم کُنہِ متلق اتفاق ہیکن نہٕ کٔرِتھ، تِم یِن مےٚ نِشہ تہٕ ونُن مےٚ اسہِ منٛز کُس اکھ چُھ پزرس پؠٹھ۔ ییٚلہِ بہٕ فٲصلہٕ کرِ، بہٕ چُھس تِمن وضاحت کران زِ خدایہِ سُنٛد شریعت بیٚیہِ تسنٛدؠ ہدایت کٔتھٕ پٲٹھؠ چُھ اتھ حالتس منٛز لاگو سپدان۔"17تمِس ووٚن یتروؔہن، "یہِ ژےٚ کران چُھکھ تہِ چُھنہٕ جان۔18توٚہؠ چُھو پننُ پان تھکٕراون! یہِ کٲم چھِ تُہنٛدِ باپتھ سؠٹھاہ گوٚب۔ ژٕ ہؠکؠکھ نہٕ یہِ کٲم کُنے زوٚن کٔرِتھ۔19وۅنؠ بوز میٚون ژےٚ کیاہ چھی کرُن۔ ہرگاہ ژٕ تہِ کرکھ یہِ بہٕ مشورٕ دِمے، خدا روزِ ژےٚ مددگار۔ ژٕ روز خدایس نِشہ لوٗکن ہنٛز نمایندگی کران تہٕ تمِس برونٛہہ کُن ترٛاو لوٗکن ہنٛدؠ نیٛاے۔20ژٕ دِ تِمن خدایہِ سٕنٛدِ شریعتٕچ تہٕ تٔمسٕنٛدیٚن حکمن ہنٛز تعلیم۔ تِمن ون وضاحت کٔرِتھ زِ تِمن کۅسہٕ کٲم چھےٚ کرٕنؠ بیٚیہِ کتھٕ پٲٹھؠ چُھ تِمن پکُن۔21تمہِ علاوٕ ژارُکھ ژٕ اسرائیل لٕکؠ کینٛہہ قٲبل نفر پانس مدد کرنہٕ خٲطرٕ یِم خدایس احترام کران آسن، یِم قٲبلِ بھروسہٕ آسن، یِم نہٕ رشوت خور آسن۔ تِمو منٛزٕ بناوُکھ کینٛہہ دَہن دَہن نفرن پؠٹھ مشتمل جمٲژ، کینٛہہ پنٛژہن پنٛژہن نفرن پؠٹھ مشتمل جمٲژ، کینٛہہ ہتس ہتس نفرن ہنٛز، کینٛہہ ساسن ساسن جمٲژن ہنٛدؠ فٲصلؠ۔22تِم آسن پرٛتھ وِزِ لوٗکن ہنٛدؠ نیٛاے انزراوان۔ کٲم کرنُک طریقہٕ گژھِ یتھٕ پٲٹھؠ آسن۔ بٔڈؠ نیٛاے واتنَ ژےٚ نِشہ، معمولی نیٛاے انزراون تِم پان وٲنؠ۔ أتی وَسہِ چانیو نکھو پؠٹھٕ بور تہٕ تِم کرن سۅ کٲم چانہِ مدتہٕ باپتھ۔23ہرگاہ ژٕ یہِ کرکھ، ژٕ بنکھ تتھ قٲبل یُتھ ژٕ خدایہِ سنٛدین حکمن پؠٹھ روٗزکھ عمل کران، تہٕ سٲری لوٗکھ کرن امنہٕ سان پننٕؠ پننٕؠ زندگی بسر۔"24موسیٰؔ ہن بوز پننِس ہؠرٕ بابہٕ سُنٛد تہٕ کوٚرن تیٖ یہِ تٔمؠ تمِس ووٚنمُت اوس۔25پتہٕ ژٲرؠ موسیٰؔ ہن اسرائیل کیٚو لوٗکو منٛزٕ تِم قٲبل نفر تہٕ تھٲوِن لوٗکو منٛزٕ ساسس ساسس، ہتس ہتس، پنژہن پنژہن، تہٕ دہن دہن پؠٹھٕ حٲکم بنٲوِتھ۔26تِم روٗدؠ لوٗکن ہنٛدؠ نیٛاے انزراوان۔ تِم ٲسؠ مشکل مقدِمہ موسیٰؔ ہس نِشہ انان، مگر سہل مقدِمہ ٲسؠ تِم پانے انزراوان۔27موسیٰؔ ہن کوٚر پتہٕ پننُ ہؠرٕ بابہٕ رۅخصت تہٕ یتروؔ درٛاو پننُ گرٕ واپس۔
Bridge Connectivity Solutions Pvt. Ltd.