Sarmur Randak31
1Ro ras oso Yakub imnaf Laban romawa vyesi sikofen ra dine, “Yakub dun pres nana vebor sinan kovani vyanna kam kwar. Nana vebor vyenakam nramuma ro kma kovani.”2Yakub myam kako ma Laban vye navye i ra ras vepondi va.3Inja Manseren Allah ikofen ve Yakub i, “Kwaver ve sup rik bena nadai ro aniwa, ve kmam rum vyanya ma ve kawasa bansi. Nari Yafadiren au.”4Posa ido Yakub iwan fa sikofen vadir ve Rahel ma Lea su insa susrow kuker i ro maper, mov rofanfan vyesya sisya roya.5Insape Yakub ikofen ve su, “Yamam kwar voi kma muvanya rari vyena ve aya namnis mankunba kwar; infama Allah kamam isyom anya fyadiren aya.6Mufawi ayaine yafararur marvak kaku kwar faro kma muvani.7Vesyavo dankar ma fyararwe ker vavyak ayedi rarwan samfur kwar. Imbape Allah myam monda i fa ifrur roi vevyeva yov ayava.8Fafisu kma muvani ikofen, ‘Kambing eve faksya nido vavyak bediri,’ inja rofanfan ansya sikaparkam mkun eve faksya. Rofyor ikofen wer, ‘Kambing eve swasersya sinido vavyak bediri,’ inja rofanfan ansya sikapar kam mkun eve swaser.9Rarirya Allah dun rofanfan kma muvanya vyansya fa vyuk ve aya.10Fafisu rofanfan ansi sfarvuk, yamam ro mafafu, kambing snoman vefarvuk ansyakam, eve kop, fak ma swaser.11Ma manakya Allah dawos ve aya ro do mafafu, Dove, ‘Yakub!’ Inja yakarem, ‘Ayaisine’.12Manakya ani ikofen wer, ‘mame, kambing snoman vebor vefarvuk siya eve kop, fak ma eve swaser siya. Yau kwar fa yave si radirya ve au snar Yamam kwar Laban frur vebor vyena faro au.13Aya Allah vefasnai mankun kwar faro au ro Betel. Ro diwa bawes karui swarapepen oso, ma kako wasar mani saitun ro bori kwar. Ro diwa be syasi ve Aya kwar. Inja knik ine veri fasos ma kwaver ve sup rik venadai ro aniwa.’”14Mura Lea ma Rahel sukofen, “Nuine nuyaksmai var rarwas ro nana kma nuvanya vyenava.15Nuine kyara nu ve mandaman. Vyov nu kwar ma vavyak ismai kwar ro nu, vye nara navro kwar.16Nana vebor Allah dun kwar ro kma nuvani, nana nuvenairya kuker romawa nuvesya kako. Wafrur kwar sasoser rosai Allah dawos kwar faro au.”17Inja Yakub syansanson fa ibur ve kmari ro sup Kanaan. Vin vyuk ansya ma romawa sesya vyesi fa sek unta, ma dun iwayan rofanfan vebor vyesi ma roi vebor ismai kwar ro Padan-Aram.19Ro fafis anya Laban isya ro maper fa kyaruk domba vyesya bur sesi, ma ro fafis anya kako Rahel dun fasis amfyanir vefadiren kina kmar Laban vyesi.20Yakub ibur fasis Laban i ma ikofen vadir barbur vyeja va.21Dun nana vebor vyenakam vo rya sawsaw kaku. Dunuk marei veba Efrat ma imbran be bonvepampyan Gilead.
Laban iyom Yakub i
22Ras ri kyor nasyonde ido insape sikofen vadir ve Laban i, abar vekur Yakub barbur vyedi.23Mura Laban iryur snonkaku vyesi ma insape siyom Yakub i ras ri fik isof sisrowi ro bonvepampyan Gilead.24Ro rovya ido Allah rya yov Laban i ro mafafu, ma ikofen ve i, “Waswarepen, wapok wawos wos rarmomen osero vaveri faro Yakub i.”25Fafisu anya Yakub vyawes Soyaiya kwar ro bonvepampyan Gilead. Fanam ro mov anya Laban ikako syoyai kuker kawasa veso insya.26Posa ido Laban ikofen faro Yakub i, “Rosai evewar wafrowes aya ma wun fasis inai ayesuyani, ryari women suirya?27Rosai evewar wafrowes aya ma wabur fasis vo wakofen vadirvaya? Wakofen vadir kada, nari yarir au fa wabur kuker marisen ma siyaker au kuker dow ma sirev kuker nevi.Nevi28Buk swaf ve aya va fa yasyum inai ayesuya ma kpu ayesi fa fyasnai vadir fafis kovesisyeya. Frur banine imnis mankun va!29Yasamvrav kaker fa yafrur roi vevyeva yov au, imboi rovanja Allah kmam isyom anya vyuk swarepen ve aya insa yafrur roi vevyeva awer yov au.30Yafawi wasasyar ine snar ive wabur kaku. Imboi rosai evewar kwarau anfyanir vewaren warek kina ayejani?”31Mura Yakub kyarem, “Yasasyar yabur fasis snar yamkak imem nari kwarwarek inai bansuya ndi,32Imboi anfyanir wakofenya, imem wasmai snonkaku vekarauya ro fandu inko ido, ivye vye vemun ra imar. Swepak kwar, roi vebor imem bena naisya ro dineke. Naisya ido, wun na. Ma snonkaku kuvansine kam smam epen.” Yakub ifawiva vo Rahel i veyun fasis anfyanir anyani.33Inja Laban rya ve Yakub soyai vyedi ma syepaki; posa rya ve Lea soyai vyedi ma soyai vinfyan vye suya, imbape amfyanir anya isrow iva. Pupesya syun ro Rahel soyai vyedi.34Fyor anya Rahel dun amfyanir anya fa ikram i ro inoken untaya, ma kyain epen i ro soyai vyanya dori. Laban syepak Rahel soyai vyanya kasiper, imbape ismai anfyanir anyava.35Mura Rahel ikofen ve kmari, “Kamam wamsor awer aya, yores fa yasom kamam au va snar yasmai mamas.” Laban syewar fafewa kaku infama ismai amfyanir anyava.36Muraido Yakub imsor bos kaku ma ifuken, “Vavyeva rosai yafrur kwarya, sasar rosai yafrur fa evedar imem wayamyom aya radinenya?37Swepak pres roi vebor ayanna kwar, imem wasmai roi swewarya kwar? Wasasyar i ma rwir i ro varpon ine insa snonkaku ayesya ma snonkaku besya smam ma skara user mansei vekaku ro fandu ku.38Pasivarek samfur di suru yakenem so imem au. Rofanfan domba ma kambing vin imem bansya sikapar siryewen, imboi mkun sikaparsya ono simar va, ma kambing snomansya yan osero vaveri.39Aiwan berafdisya smunsya raso fa yun si ve imem auva, imboi mankundaya yasadwer si. Skarau ro meser orovaido rov, imem wayau si ro aya fa yasadwer si.40Ras na ido daresya myun aya ro meserna ma pnunkya myun aya ro rov na. Swaf naso ido yenef mnisva.41Irya kenem ayedi fafisu yafararur ve imem au pasivarek samfur di suru. Pasivarek samfur oser seser di fyak yafararur insa yana imem inai bansuya ma pasivarek ri wonem wer infa yasmai rofanfan siya. Ma ro swaf anine imem fadadwer ker vavyak ayedi rarwan samfur.42Allah up ayedi, isoine Allah Abraham ma Ishak susyomya Fyadiren ayava kada nari imem wawan aya fa yabur beidi. Imbape Allah myam epen kwar marindi vekur aya ma fararur yafrur kwar na, ma rovanja Vyuk wos namuk kwar.”Fes eren fandu Yakub ma Laban
43Mura Laban kyarem be Yakub i, “Vin suiya inai ayesuirya; romawa suvesya kpu ayesirya, ma domba safsofer siya ro yana sirya. Kakudam, roi mam ro dine nakam roi yana nairya. Imbape nari yafrur royo fa yavuki dwarek romawa kpu ayansiya va.44Inja ivye ku fes eren ma kuyaker karui no fa ne avyair fes eren ine.”45Posa Yakub dun karui oso fa vyawes fa dores fa vye karui swarapepen.46Insape iwan kawasa veso insya fa siryur karui na ma sisofer na fa ne aker. Raimnai sanan kayam ro ris karui aker anna.47Laban nyir karui aker anya ve Yegar Sahaduta, imboi Yakub nyir ive Galed 48Laban ikofen ve Yakub i, “Karui aker ine nari vye swarapepen faro ku.” Evedar mov anya snir i ve Galed.49Laban ikofen wer, “Ivyekada Manseren Allah vye manfadwaren fandu au kuker aya fafisu kuvinkwan yaye.” Evedar mov anya snir i ve Mispa 50Laban ikofen wer, “Rofyor wafrur evyeva yov inai ayesuya, rovaido farvuk kuker vin no vese, ono sifawi vayo, waswar epen Allah isya fyadwaren warek ku.51Nane nairya karui yaker kwar, ma ine ido karui swarapepen.52Ivye karui aker ine ma karui swarapepen ine vyuk swarepen ve ku insa yunuk awer karui aker ine ma karui swarapepen ine fa yafarmun au, ma au kako wapok wunuk karui aker ine ma karui swarapepen ine fa farmun aya.53Allah Abraham ma Kma ayedi Nahor susyomya nari vye mankakara fandu au ma aya.” Muraido yakub ifrur sowar kuker snonsnon Allah kmar Ishak isyom anya, fa nari vye imnis sowar vyani.54Kyaruk aiwanya fa fyarser ro urek anya bori. Insape dor kawasa sya fa sanan kayam. Sanan ra posa sveryar fa senef ro urek ani.55Meser fyas ro mun arwoya ido Laban isyum inai ma kpu vyesi ma vye vok si, insape ibur kaver ve mov vyedi.The Seed Company