ရှာန်မာကု4
1အနားပန်းနူ ကိုယ်တော်ယေရှုကား ဂါလိလဲအာမ်းပိုက်ပေ စသဘန်း ဆုံးမဩဝါဒအီမှါခ့်ခါ ကိုယ်တော်ဘင်း ပတ်ပတ်လည်ဘေ စုသဘန်းထုတ်ကြီးရီဘင်း သမီဆတာတ်ကား လွောန်ဒင်းဘင်းအတွာတ် ကိုယ်တော်ကား ဝဲအာမ်းအစပ်ပင်း လှေစောက်ပါဟယ်ဘန်း ထုံးမှာ။ သမီဆာကလောင်းတုံန်းရီးဒါး ဝဲအာမ်းကမ်းစပ်စောက်ဟက်နင်းဘန်း သက်ပန်းနင်းကြီးမှာ။2ကိုယ်တော်ကား အကြောင်းအရာကလောင်းတုံန်းတေ သမီဆာတာတ်နင်း ငှေါကာဒင် ပုံဥပမာတေဒေနပ်မှာ။ အန်နိမ် ဟောသကာဆွောန်သကာမှါခ့်ခါ ကိုယ်တော်ကား3“သက်ကြီး။ ပန်းနူမှါခ့်ခါ လပါးအွန်ဘင်းဆိတ်ဟော်ဝါကား သတူတေဒေ ဆက်တင်အတွာတ် ဟိန်လပါးပါ ပူလာန်ဘဲမှာ။4ဟိန်ကား သတူတေဒေဆက်နာန်မှါခ့်ခါ စယ်ယာဘင်းသတူတေကား လမ်းစောက်ပေတေအက်နာန်ဘန်း အူစိတ်ဆာတေကား ဒီဘန်းနာ ကွန်ယုတ်ဆွန်နာန်မှာ။5စယ်ယာဘင်းသတူတေကား ကာစစ်ပန်း လုံးကရှီခံသဘင်းကာစောက်ပေ အက်ဆွန်နာန်မှာ။ အန်ဘင်းသတူတေကား ကာဖာဘင်းအတွာတ် ခပ်မြန်မြန် နော်တူကြီးရီမှာ။6အန်နိမ်စါန်းငှေါဒီ အန်ဘင်းကလွုန်တေကား တကလပ်အစွဲသရန်ဘင်းအတွာတ် စမိတ်ပူရီမှါခ့်ခါ ကားဘင်းဒဏ်တေ ခံသထှာဘန်းနာ ဆလောဘန်း ကူလာန်ဘဲမှာ။7စယ်ယာဘင်းသတူတေကား စောဟားချုံနောင်းဘေတေ အက်နာန်ဘန်း ကလွုန်တူရီဒီဒါး စောဟားချုံတာတ် ကာသဘန်းပဲရာန်ဘင်းအတွာတ် ရှရှီအရှီကြီးရန်ဘန်း။8အန်နိမ်စါန်းငှေါဒီ စယ်ယာဘင်းသတူတေကား မဲဘင်းကာစောက်ပေ အက်ဆွန်နာန်မှာ။ အန်ဘင်းကလွုန်တေကား ကလွုန်တေတူရီဘန်း တုံန်းရီမှါခ့်ခါ စယ်ယာဘင်းကလွုန်တေကား အဆဆန်းနူ၊ စယ်ယာကား အဆဟုတ်ရှစ်၊ စယ်ယာကား အဆပါတ်နူထုတ်ကွန်း ရှရှီတေရှီကြီးရီမှာ” ညယ် မိန့်တော်မူသမှာ။9စီးမှါခ့်ခါ ကိုယ်တော်ကား ဆာတ်သဘန်း “ကနားငှါဘန်း သက်ပူဟာဘင်း ဟာဟမဲစါန်းငှေါဒီ နားလည်သကွန်း အာရုံစိုက်သဘန်း သက်ကြီး” ညယ် မိန့်သမှာ။10စီးမှါခ့်ခါ သမီဆာကလောင်းတုံန်းကား ကိုယ်တော်ယေရှုဟက် ပူလာန်ဘဲစီးမှါခ့်ခါ သာဝကရှစ်နူဘန်းကလိန်းဟူးယောက် တခြားတပယ့်တာတ်ကား ကိုယ်တော်ဒေ ဥပမာဘင်း အဓိပ္ပာယ်တေဒေ စိန်ယူကြီးမှာ။11ဘုရားရှာန်ကား ဟနိမ်ဒေ “ဘုရားရှာန်ဘင်း သာသနာတော်ယောက်ဆိုင်သဘင်း လျှို့ဝှက်ချက်တေ မိန်းရှာတ်ခါစိန်းပဲစီးဘန်းထှာမှာ။ အန်နိမ်စါန်းငှေါဒီ ငါနောက်လိုက်အချီဘင်း တခြားဘင်းသမီဆာတေဒေ ငါကား ပုံဥပမာဒေနပ်ပန်းနာ၌ဆာ ဆွန်ကွန်းတေ ဟောသကာဆွောန်သကာထှာမှာ။12အမှာတွာတ်‘အန်တာတ်ကား ငါအွန်နင်းဘင်းနာဒေ ကတုံန်နင်းဒီဒါး အလေ့ရီးအလေ့လာ အဆွောန်ရီး အဆွောန်သကြီးရား။အန်တာတ် ငါဟောသကာ ဆွောန်သကာဘင်းနာဒေ သက်ပူကြီးဒီဒါး အန်တာတ် သက်ပူကြီးဘင်းနာတေဒေ အနားလည်သကြီးရား။အန်နိမ်အချီဘန်းကား အန်တာတ်ကား ဘုရားရှာန်ပါ လှည့်သဟာန်းရီဘန်း ဘုရားရှာန်ရီးဒါး အန်တာတ်တေ ခွာမ်းလွှတ်သကူထှာမှာ’ ညယ်ငှေါဘင်း ကျမ်းကျိန်းကား ပြေ့စုံမှန်ကန်သကူထှာမှာ” ညယ် မိန့်တော်မူသမှာ။13စီးမှါခ့်ခါ ကိုယ်တော်ယေရှုကား အန်တာတ်တေ “ဟနိမ် အဘင်းဥပမာဘင်း အဓိပ္ပာယ်ဒေ အနားလည်သရန်ကြီးရားရယ်။ အန်နိမ်ငှေါဘန်းကား ဟနိမ် တခြားဘင်း ဥပမာဆွန်ကွန်းဒေ ဟာနိမ်အွန်ဘန်း နာလည်သရန်ကြီးကူဒေ။14အဘင်းဥပမာဘင်း အဓိပ္ပာယ်ကား အန်နိမ်ထှာမှာ။ သတူတေဒေဆက်ပင်း လပါးအွန်ဘင်းဆိတ်ငှေါဘင်းနာကား ဘုရားရှာန်ဘင်း နှုတ်ကပါတ်တော်တေဒေ ဟောသကာဘင်းဆိတ်ယောက် တူသမှာ။15လမ်းစောက်ပေအက်ပင်း သတူငှေါဘင်းနာကား ဘုရားရှာန်ဘင်း နှုတ်ကပါတ်တော်တေဒေ သက်ပူလူဒီဒါး မာရ်နတ်ကား ချတ်ချန်းဒီဘန်း အန်ဘင်းနှုတ်ကပါတ်တော်တေဒေ လမ်းစာလားပါ လာလာန်ဘဲလား ခံသထှာဘင်းဆိတ်တာတ်တေ ရည်ရွယ်သလားထှာမှာ။16လုံးကရှီခံသဘင်းကာစောက်ပေ အက်နာန်ဘင်း သတူငှေါဘင်းနာကား ဘုရားရှာန်ဘင်း နှုတ်ကပါတ်တော်တေဒေ သက်ပူလူဘန်း ချတ်ချန်းမွန်းဘန်းနာ လိုက်နာသကြီးဘင်း ဆိတ်တာတ်တေ ငှေါလားထှာမှာ။17အန်နိမ်စါန်းငှေါဒီ အန်တာတ်ကား ဘုရားရှာန်ဘင်း နှုတ်ကပါတ်တော်တေဒေ အန်တာတ်အဆေင်နောင်းဘေ စွဲစွဲမြဲမြဲ တကလပ်အစွဲသစိန်းဘင်းအတွာတ် အချိန်ခဏဆာ၌ ယုံကြည်သကြီးလားထှာမှာ။ အန်တာတ်ကား ဘုရားရှာန်ဘင်း နှုတ်ကပါတ်တော်တေဒေ ယုံကြည်သဘင်းအတွာတ် ဒုက္ခဆာန်းရဲတေယောက် နှိပ်စါက်သလားတေဒေ ခံသထှာမှါခ့်ခါ အန်တာတ်ယုံကြည်သဘင်းတေဒေ ချတ်ချန်းရပ်သကြီးရာန်မှာ။18စောဟားချုံနောင်းဘေတေ အက်နာန်ဘင်း သတူတေငှေါဘင်းနာကား ဘုရားရှာန်ဘင်းတရာတော်တေဒေ သက်လူကြီးဒီဒါး19ဘဝအတွာတ် စိုးရိမ်သဘင်းတေ၊ စည်းစိမ်ချမ်းသာတာတ်ပင်း လှည့်ဖြားသဘင်းနာတေယောက် တခြားဘင်းနာတေဒေ တပ်မက်သဘင်းနာတေကား ဆာန်ဆွန်နီဘန်း ဘုရားရှာန်ဘင်း နှုတ်ကပါတ်တော်တေဒေ ကာသဘန်းပဲရာန်ဘင်းအတွာတ် ဘုရားရှာန်ဘင်း နှုတ်ကပါတ်တော်အတိုင်း အစဉ်းစားသဘန်း အအွန်ဘင်းဆိတ်တာတ်တေ ဆိုလိုသလားထှာမှာ။ 20မဲဘင်းကာစောက်ပေအက်ပင်း သတူတေငှေါဘင်းနာကား ဘုရားရှာန်ဘင်း နှုတ်ကပါတ်တော်တေဒေ သက်ကြီးလူမှါခ့်ခါ လက်ခံသဘန်း အဆဆန်းနူ၊ အဆဆစ်နူ၊ အဆပါတ်နူထုတ်ကွန်း ရှရှီရှီကြီးဘင်း ကလွုန်တေနိမ် အန်တာတ်ပင်းဘဝဘေ မဲဘင်းနာကလောင်းတုံန်းဒေ လူဘင်းသမီဆာတေဒေ ဆိုလိုသလားထှာမှာ” ညယ်မိန့်သမှာ။21စီးမှါခ့်ခါ ကိုယ်တော်ယေရှုကား အန်တာတ်တေ “ဟာဟမဲကား ဝါမ်ပလုတ်တေ ဝါမ်တပ်ပန်း ကုမ်ဟာမ်းတွန်ဘေ အန်နိမ်အချီ ခတာန်တွန်ဘေ ပဲကြီးလည်း။ အန်နိမ်အွန်ကူဘင်းအစား ဝါမ်ပလုတ်တေ တိုင်စောက်ပေ ဝယ်ပဲဘန်း ယားစိန်းကလား အချီနော်။22ဟမာန်တွာတ်ငှေါဘန်းတာတ်ငှေါ ကဆွုန်းဘန်း ပဲဘင်းနာတေရီး ပေါ်သကြီးဆွန်နီကူထှာဘန်း လျှို့ဝှက်သပဲဘင်းနာတေဒေရီးဒါး မိန်ရှာတ်ခါကြီးရီကူထှာမှာ။23ကနားငှါဘန်း သက်ပူရန်ဘင်းဆိတ်တာတ် အာရုံစိုက်သဘန်း သက်ကြီး။24ဟနိမ်သက်ပူကြီးလူဘင်းနာတေဒေ ဂရုတစိုက်စဉ်းစားသကြီး။ ဟနိမ် သမီတေ စီရာန်သဒင် နပ်ပင်းစည်းမျဉ်းအတိုင်း ဘုရားရှာန်ကား ဟနိမ်တေ စီရာန်သကူထှာဘန်း ဟနိမ်ကား ပိုသောဆိုးဆိုးရွားရွား စီရာန်သလားခံသထှာကူ။25ငါဟောသကာ ဆွောန်သကာဘင်းနာတေဒေ သက်ပင်းဆိတ်တာတ်ကား နားလည်သရန်ဘင်း အခွာမ်းဒေ ပိုသောအီလားခံသထှာကူ။ အန်နိမ်စါန်းငှေါဒီ အသက်ပင်းဆိတ်တာတ်ကား အန်တာတ်နားလည်သဘန်းပဲဘင်းနာ အစစ်ဆာဒေစဲ အန်တာတ်ဟက် လာလားခံသထှာကူ” ညယ် မိန့်တော်မူသမှာ။26ပန်းနူကိုယ်တော်ယေရှုကား “ဘုရားရှာန်ဘင်း သာသနာတော်ငှေါဘင်းနာကား အန်နိမ်ထှာမှာ။ လပါးအွန်ဘင်းဆိတ်ဟော်ဝါကား သတူတေဒေ ဟိန်လပါးနောင်းဘေ ဆက်အက်နာန်မှာ။27စီးမှါခ့်ခါ ဟိန်ကား နခူယောက် နာတ်ကြယ်ဘေ အေ့ပ်ပန်းစါန်းထှာကာတ်ထှာ မင်ဘန်းနင်းဒီထှာထှာ သတူတေကား နော်တူရီဘန်း တုံန်းဆွန်နီမှာ။ အန်နိမ်စါန်းငှေါဒီ ဟိန်ကား သတူတေ ဟာနိမ်တုံန်းရီမှာငှေါဘင်းနာဒေ အမိန်းရှာတ်ခါး။28ကာကား အလိုလိုညယ် သတူဟက် ကလွုန်တူစိန်းရီမှာ။ အရာန်နော်ပူရီဘန်းနာ တွန်းပလော်တေပူရီဘန်း နောက်ဆုံးဘေ အန်ဘင်းတွန်းပလော်ဟက် ရှရှီတေ ရှီရီမှာ။29ရှရှီတေမိန်းဘန်း ယာတ်ချိန်ထုတ်အီမှါခ့်ခါ လပါးအွန်ဘင်းဆိတ်ကား ဟိန်ဘင်းသာန်စါန်းယောက် ယာတ်နာန်မှာ” ညယ် မိန့်တော်မူသမှာ။30ကိုယ်တော်ယေရှုကား ဆာတ်သဘန်း “ဘုရားရှာန်ဘင်းသာသနာတော်ကား ဟာဘင်းနာယောက်တူသမှာညယ် အလေငှေါရန်ကူဒေ။ အန်နိမ်အချီဘန်းကား အန်ဘင်းဒေ အလေကား ဟာဘင်းပုံဥပမာဒေ နပ်ပန်း ရှာန်းသကာထှာကူဒေ။31ဘုရားရှာန်ဘင်း သာသနာတော်ကား ကမ္ဘာစောက်ပေငှါဘင်း အစစ်ဟန်ဆုံးသတူထှာဘင်း ကန်စူတူယောက် တူသမှာ။32အန်ဘင်းကန်စူတူဒေ ကာစောက်ပေ စုတ်အာန်မှါခ့်ခါ အန်ဘင်းသတူကား တခြားဘင်းကလွုန်တေထာတ် ပိုသောတုံန်းရီမှာ။ ကလိုင်းကလန်းတုံန်းတေရီးဒါး ပူရီဘန်း အူစိတ်ဆာတေကား အန်ဘင်းအရိပ်တွန်ဘေတေ ဒီဘန်း အအုံတေစာကြီးမှာ” ညယ် မိန့်သမှာ။33ကိုယ်တော်ယေရှုကား ဘုရားရှာန်ဘင်း နှုတ်ကပါတ်တော်တေဒေ သမီဆာတာတ်နင်း နာလည်သရန်ကွန်း အန်နိမ် ဥပမာကလောင်းတုံန်းဒေ နပ်ပန်း ဟောသကာ ဆွောန်သကာမှာ။34ကိုယ်တော်ယေရှုကား ဥပမာတေ အနပ်ညယ် သမီဆာတာတ်တေ ဟာဘင်းအကြောင်းအရာဒေစဲ အဟောသကာရား။ အန်နိမ်စါန်းငှေါဒီ ကိုယ်တော်ကား ဟိန်တပယ့်တော်တာတ်ယောက်အတူတူ သီးသန့်ငှါနင်းမှါခ့်ခါ အန်တာတ်တေ အကုန်လုံးဒေ ရှာန်းသကာမှာ။35အန်ဘင်းမာန်းရာတ် ညနေစောင်းမှါခ့်ခါ ကိုယ်တော်ယေရှုကား တပယ့်တော်တာတ်တေ “အာမ်းအန်းကမ်းပါ ယာတ်ကြီးမှါခ့်” ညယ် မိန့်တော်မူသမှာ။36အမှာတွာတ် တပယ့်တော်တာတ်ကား သမီဆာကလောင်းတုံန်းဒေ ပဘဲဘန်း ကိုယ်တော်ထုံန်းဘန်းနင်းဘင်း လှေစောက်ပေဟယ်ဘန်း ကိုယ်တော်ဒေ အန်တာတ်ယောက်အတူတူ ကော်လာန်ဘဲမှာ။ တခြားလှေတေရီးဒါး ကိုယ်တော်ဘင်း လှေဟလိန်းဟက် ဒီရာတ်ကြီးမှာ။37ဗြုန်းစားတုံန်း ဟလာန်းမွန်တက်နီဘန်း ဝဲလှိုင်းတုံန်းတေရီးဒါး လှေဒေသန်းဘင်းအတွာတ် လှေရီးဒါး ဝဲတေဖိန်းထန်ငှါရီမှာ။38အန်နိမ်စါန်းငှေါဒီ ကိုယ်တော်ယေရှုကား လှေဟလိန်းဘေ မောအုံးစောက်ပေ အေ့ပ်ဘာတ်ပွတ်ပန်းနင်းမှာ။ တပယ့်တော်တာတ်ကား ဟိန်ဒေ ဆော်ဘန်း “အိုးဆကြီး၊ အလေရှီးထှာကဘန်းဘင်းနာဒေ ဂရုအစိုက်သရားရယ်” ညယ် လျှောက်တာန်သကြီးမှာ။39အန်၌မှါခ့်ခါ ကိုယ်တော်ကား ရဲဘန်း လှိုင်းယောက် လေတေဒေ “ငြိမ်တာန်စမ်း၊ ရပ်တာန်စမ်း” ညယ် အမိန့်အီရာန်မှာ။ စီးမှါခ့်ခါ ဟလာန်းမွန်ဘန်းနင်းဘင်းနာကား ရပ်သလာန်ဘဲဘန်း ဝဲအာမ်းတစ်အာမ်းလုံး ငြိမ်သလာန်ဘဲမှာ။40ကိုယ်တော်ကား ဟိန်တပယ့်တာတ်တေ “ဟနိမ်ဟမာန်တွာတ် စါတ်နင်းကြီးဒေ။ အရာတ်အောင်းထုတ် ဟနိမ်ဘေယုံကြည်ချက် အဘိုကြီးနွန်းရယ်” ညယ် မိန့်တော်မူသမှာ။41အန်နိမ်စါန်းငှေါဒီ တပယ့်တော်တာတ်ကား အကြီးကျယ်စါတ်နင်းကြီးဘန်း ဟော်ဝါယောက်ဟော်ဝါ “အဘင်းဆိတ်ကား ဟာနိမ်သမီဆာအမျိုးသမား။ လှိုင်းတေယောက် လေတေစဲ ဟိန်ဒေနာခံသကြီးထှာမှာ” ညယ် အချန်းချန်း ငှေါဘန်းနင်းကြီးမှာ။
Empower Asia Bible Translation Movement