Luke22
1พอใกล้เทศกาลกินขนมปังไร้เชื้อ ที่เขาเอิ้นว่าเทศกาลวันปลดปล่อย2พวกผู้นำ นักบวช กับพวกครูสอนกฎปฏิบัติพยายามหาแนวทางที่สิฆ่าพระเยซู แต่ซุ่มเขากะย้านชาวบ้าน ยูดาสวางแผนหักหลังพระเยซู3ซาตานได้เข้าสิงยูดาส อิสคาริโอท ซึ่งเป็นศิษย์เอกคนหนึ่งในสิบสองคน4ยูดาสไปหาพวกผู้นำ นักบวช กับพวกทหารเฝ้าวิหาร เพื่อเสนอว่าสิช่วยจับพระเยซูให้5ซุ่มเขาดีใจหลาย แล้วสัญญาสิให้เงินกับยูดาส6ยูดาสตกลงแล้วเริ่มหาทางที่สิส่งพระเยซูให้พวกเขาตอนที่บ่มีฝูงชนอยู่กับพระองค์7เมื่อฮอดเทศกาลมื้อกินขนมปังไร้เชื้อ ซึ่งเป็นมื้อที่ซุ่มยิวสิฆ่าลูกแกะถวายพระเจ้าสำหรับเทศกาลวันปลดปล่อย8พระเยซูบอกเปโตรกับยอห์นว่า <<ไปเตรียมอาหารสำหรับเทศกาลวันปลดปล่อยให้ซุ่มหมู่เฮา>>9ซุ่มเขากะเลยถามว่า <<สิให้ไปเตรียมหม่องใดดีครับ>>10พระองค์ตอบว่า <<ให้เข้าไปในเมือง แล้วสิพ้อผู้ชายที่แบกเหยือกน้ำ ให้ตามเขาเข้าไปในเฮือนหลังหนึ่ง11ให้เว้ากับเจ้าของเฮือนนั้นว่า <อาจารย์ถามว่า ห้องที่เฮาสิใช้กินอาหารในเทศกาลวันปลดปล่อยกับพวกศิษย์อยู่ใส>>>12เขากะพาหมู่เจ้าขึ้นไปเบิ่งห้องใหญ่ชั้นบนที่เตรียมไว้พร้อมแล้ว กะให้จัดเตรียมอาหารหม่องนั้น>>13ซุ่มเขากะไป และมันกะเป็นไปตามที่พระเยซูบอกคุอย่าง ซุ่มเขากะจัดเตรียมอาหารสำหรับเทศกาลวันปลดปล่อยหม่องฮั่น14บัดฮอดเวลากินอาหารสำหรับเทศกาลวันปลดปล่อย พระเยซูนั่งเอนโตอยู่ที่โต๊ะอาหารกับพวกศิษย์เอก15แล้วเว้าว่า <<เฮาอยากสิกินอาหารสำหรับเทศกาลวันปลดปล่อยมื้อนี้กับหมู่เจ้าหลาย ก่อนที่เฮาสิถืกทรมาน16เฮาสิบอกให้ฮู้ว่า เฮาสิบ่กินอาหารสำหรับเทศกาลวันปลดปล่อยนี้อีก จนกว่าความหมายที่แท้จริงของเทศกาลนี้สิสำเร็จครบถ้วนในอาณาจักรของพระเจ้า>>17แล้วพระองค์ก็ยกถ้วยขึ้นมาและขอบคุณพระเจ้า พร้อมกับเว้าว่า <<รับถ้วยนี้ไปแบ่งกันดื่ม18เฮาสิบอกให้ฮู้ว่า เฮาสิบ่ดื่มเหล้าองุ่นอีกจนกว่าอาณาจักรของพระเจ้าสิมา>>19หลังจากนั้นพระองค์กะหยิบขนมปังขึ้นมา ขอบคุณพระเจ้า พร้อมหักส่งให้พวกเขา พระองค์เว้าว่า<<นี่คือร่างกายของเฮา ที่ให้กับหมู่เจ้า ให้เฮ็ดแนวนี้เพื่อเป็นการระลึกถึงเฮา>>20เมื่อซุ่มเขากินอาหารแลงเสร็จแล้ว พระองค์กะหยิบถ้วยขึ้นมาเฮ็ดคือเก่า แล้วเว้าว่า <<นี่เป็นเลือดของเฮา ที่ได้หลั่งไหลออกมาเพื่อหมู่เจ้า พระเจ้าได้เฮ็ดสัญญาขึ้นใหม่กับหมู่เจ้าด้วยเลือดนี้>>21พระเยซูเว้าว่า คนที่สิหักหลังเฮา ก็นั่งอยู่ที่โต๊ะนี้กับเฮา22บุตรมนุษย์สิต้องตายตามที่พระเจ้าได้กำหนดไว้แล้วล่วงหน้า แต่วิบัติแก่คนที่หักหลังพระองค์>>23ซุ่มศิษย์เอกถามกันอย่างใหญ่ว่าใผสิเฮ็ดแนวนั้น24พวกศิษย์เอกเถียงกันว่าใผใหญ่ที่สุด25พระเยซูบอกว่า <<พวกกษัตริย์ของคนต่างชาติมักออกคำสั่งประชาชนของเขาไปทั่ว ส่วนซุ่มที่มีอำนาจกะมักให้คนเอิ้นว่า ผู้เฮ็ดประโยชน์เพื่อสังคม26แต่หมู่เจ้าบ่ต้องเป็นแนวนั้น ในหมู่เจ้า คนที่ยิ่งใหญ่ที่สุดควรสิเป็นคือเด็กน้อย คนที่เป็นหัวหน้าควรสิเป็นคือคนฮับใช้27ใผใหญ่กว่ากัน คนที่นั่งโต๊ะหรือคนที่ยืนฮับใช้ คนที่นั่งบ่แม้นเฮาะ แต่เฮาอยู่ท่ามกลางหมู่เจ้าคือกับคนฮับใช้28<<ตลอดเวลาที่ผ่านมา เมื่อเฮาโดนข่มเหง หมู่เจ้ายืนเคียงข้างเฮาเสมอ29เรากะสิให้หมู่เจ้าปกครองเป็นกษัตริย์ คือกับที่พระบิดาของเฮาให้เฮาเป็นกษัตริย์30เพื่อหมู่เจ้าสิได้ดื่มกินกับเฮาในอาณาจักรของเฮา และหมู่เจ้าสิได้นั่งเทิ่งบัลลังก์ตัดสินชนชาติอิสราเอลสิบสองเผ่า31<<เปโตร เปโตร ฟังให้ดี ซาตานได้ขอเอาหมู่เจ้าไปฝัดร่อนคือข้าวเปลือก32แต่เปโตร เฮาได้อธิษฐานให้เจ้ามีความเชื่อที่มั่นคง และเมื่อเจ้าได้หันกลับมาหาเฮาแล้ว ก็ให้ช่วยพี่น้องคนอื่นๆ ตั้งมั่นคงในความเชื่อนำ>>33เปโตรว่า <<อาจารย์ เฮาพร้อมจะติดคุกและตายพร้อมกับอาจารย์เด้อครับ>>34พระเยซูจึงตอบว่า <<เปโตร เฮาสิบอกเจ้าเด้อว่า คืนนี้ก่อนที่ไก่สิขัน เจ้าสิว่าเจ้าบ่ฮู้จักเฮาเด้อถึงสามเทือ>>35พระเยซูถามพวกศิษย์ว่า <<ตอนที่เฮาส่งพวกเจ้าออกไป โดยบ่มีเงินในกระเป๋า บ่มีถงย่าม และบ่มีรองเท้า พวกเจ้าขาดแคลนหยังบ่>>พวกเขาตอบว่า <<บ่ขาดแคลนหยังเลยเด้อครับ>>36พระองค์เว้าว่า <<แต่ตอนนี้ คนที่มีกระเป๋าเงินหรือถงย่าม ก็ให้เอาติดตัวไปนำ และถ้าไผบ่มีดาบ ก็ให้เอาเสื้อผ้าไปขาย แล้วไปซื้อดาบซะ37ที่เฮาบอกให้เฮ็ดแนวนี้กะเพราะว่า มีข้อพระคัมภีร์เขียนไว้ว่่า เขาถืกนับเป็นอาชญากรคนหนึ่งด้วยนำซึ่งหมายถึงเฮาเอง และมันกะสิเป็นจริงตามนั้น>>38พวกเขาจึงบอกว่า <<อาจารย์ นี่เด้ ดาบสองเล่ม>> แต่พระองค์บอกว่า <<เซาเว้าเรื่องนี้ได้แล้ว>>39พระเยซูออกไปที่ภูเขาหมากกอกเทศอีกคือเก่า พวกศิษย์ก็ตามไปนำ40เมื่อไปฮอด พระองค์เว้าว่า <<ให้พากันอธิษฐาน ขออย่าให้เจ้าของแพ้ต่อการทดลอง>>41พระองค์ปลีกโตออกไปใกล้ๆ แค่ระยะขว้างหิน แล้วพระองค์กะคุกเข่าลงอธิษฐานว่า42<<พระบิดา ถ้าพระองค์พอใจ ช่วยเอาถ้วยแห่งความทุกข์นี้ไปจากลูกด้วยเถิด แต่ขอให้เป็นไปตามใจของพระบิดา บ่แม่นตามใจของลูกเอง>>43แล้วก็มีทูตสวรรค์ลงมาให้กำลังใจพระองค์44พระองค์ต่อสู้ดิ้นรนอย่างหนักในการอธิษฐาน จนเหงื่อไหลคือหยดเลือดตกเทิ่งพื้นดิน>>45เมื่ออธิษฐานแล้ว พระองค์ลุกขึ้นหย่างกลับไป แต่เห็นพวกศิษย์นอนหลับกันเบิด เพราะเสียใจจนเบิดแฮง46พระองค์จึงเว้าว่า <<พากันนอนอยู่เฮ็ดหยัง ลุกขึ้นมาอธิษฐานแหม๊ สิได้บ่แพ้ต่อการทดลอง>>47พระเยซูเว้ายังบ่ทันขาดคำ ยูดาส ศิษย์คนหนึ่งในสิบสองคนของพระองค์ กะนำคนกลุ่มหนึ่งเข้ามา ยูดาสเฮ็ดท่าสิเข้ามาจูบทักทายพระองค์48พระเยซูถามยูดาสว่า <<ยูดาส เจ้าสิหักหลังบุตรมนุษย์ด้วยการจูบเฮาะ>>49เมื่อพวกศิษย์ของพระเยซูเห็นว่าเกิดหยังขึ้น จึงถามพระองค์ว่า <<อาจารย์ เอาดาบลุยมันเลยดีบ่>>50ศิษย์คนหนึ่งของพระองค์ได้ชักดาบออกมา แล้วกะฟันถืกหูขวาของทาสคนหนึ่งของหัวหน้านักบวชสูงสุดขาดไป51พระเยซูห้ามว่า <<พอแล้ว>> แล้วพระองค์กะจับหูคนนั้นและฮักษาให้คือเก่า52แล้วพระเยซูหันไปเว้ากับพวกหัวหน้านักบวช พวกนายทหารฮักษาวิหาร และพวกผู้นำที่เป็นผู้ใหญ่ทั้งหลายที่มาจับพระองค์ว่า <<เห็นเฮาเป็นโจรเฮาะ ถึงได้ถือดาบและไม้กระบองมา53เราอยู่กับหมู่เจ้าคุมื้อในวิหาร กะบ่เห็นหมู่เจ้าจับเฮาเลย แต่ตอนนี้เป็นเวลาของพวกเจ้าแล้ว เป็นเวลาที่ความมืดครอบครอง>>54พวกเขาจับพระองค์ และนำโตไปที่เฮือนของหัวหน้านักบวชสูงสุด เปโตรก็ตามไปห่างๆ55เมื่อพวกเขาก่อกองไฟขึ้นกลางลานเฮือน และนั่งอ้อมวงกัน เปโตรก็เข้าไปนั่งอยู่นำ56มีสาวใช้คนหนึ่งเห็นเปโตรนั่งอยู่ใกล้แสงไฟ นางกะจ้องมองดูเขาใกล้ๆ และพูดขึ้นว่า <<ชายคนนี้อยู่กับเยซูนำ>>57แต่เปโตรปฏิเสธว่า <<หญิงเอ่ย ข่อยบ่ฮู้จักเขาเลย>>58ต่อมาบ่โดนอีกคนหนึ่งกะเห็นเปโตรและเว้าขึ้นว่า <<เจ้ากะเป็นคนหนึ่งในหมู่นั้นบ่แม้นเฮาะ>>แต่เปโตรปฏิเสธว่า <<พ่อหนุ่มเอ่ย บ่แม่นข่อยเด้อ>>59ประมาณหนึ่งชั่วโมงต่อมา กะมีชายคนหนึ่งยืนยันว่า<<ไอ้คนนี้ ต้องอยู่กับเยซูแน่ๆ เพราะมันเป็นชาวกาลิลีคือกัน>>60แต่เปโตรเว้าว่า <<พ่อหนุ่มเอ่ย ข่อยบ่ฮู้ว่าเจ้าเว้าเรื่องสัง>>และเมื่อเปโตรเว้ายังบ่ทันขาดคำกะมีเสียงไก่ขันขึ้นมา61พระเยซูหันมาเบิ่งเปโตร เฮ็ดให้เขาคึดฮอดคำเว้าของพระองค์ที่บอกว่า<<คืนนี้ก่อนไก่ขัน เจ้าสิเว้าว่าเจ้าบ่ฮู้จักเฮาถึงสามเทือ>>62แล้วเปโตรกะออกไปฮ้องไห้อย่างขมขื่น63พวกที่ควบคุมโตพระเยซูพากันเยาะเย้ยและทุบตีพระองค์64พวกเขาเอาผ้ามาปิดตาพระองค์ และถามว่า <<ทายเบิ่งดุ๋ว่าไผเป็นคนตีเจ้า>>65แล้วพวกเขากะเว้าดูถูก เหยียดหยามพระองค์อีกหลาย66เมื่อฮอดยามเช้า พวกผู้นำอาวุโส พวกหัวหน้านักบวช และพวกครูสอนกฎปฏิบัติ พากันมาประชุม และเอาโตพระเยซูเข้ามาในศาลสูงของพวกเขา67พวกเขาเว้าขึ้นว่า <<บอกพวกเฮามาดุ๋ว่า เจ้าเป็นพระคริสต์เฮาะ>>พระเยซูจึงตอบพวกเขาว่า <<ถึงเฮาบอก พวกเจ้าก็บ่เชื่ออยู่ดี68ถ้าเฮาถามหยังพวกเจ้า พวกเจ้าก็บ่ตอบคือกัน69แต่ว่านับจากนี้ไป บุตรมนุษย์จะนั่งอยู่ทางขวาของพระเจ้าผู้มีฤทธิ์ทั้งสิ้น>>70พวกเขาทั้งหมดจึงถามพระองค์ว่า <<ถ้าแนวนั้น เจ้ากะเป็นบุตรของพระเจ้าเฮาะ>> พระองค์จึงตอบว่า <<แม้น คือเจ้าว่า>>71แล้วพวกเขากะเว้าขึ้นว่า <<เฮาต้องการพยานอีกเฮ็ดสัง ในเมื่อพวกเฮาก็ได้ยินจากปากของเขาเองแล้ว>>
Son Light Foundation