LUKASI5
1Nana raria pesi pa, Yesus diosa na ruru Genesaret derepa. Apa kaiwasa pa sepau senda sesorumi, ave setadiawa Allah nie Kavo pai.2Yesus siejoro wa pa muandu nana ruru pa derepa; siniotu vekesera pasia sembiar vurusu wa pa sandu e sepapa rurana sene diara pasi.3Yesus siajai so wa pesi, andina Simoni nie wa pai, avori diemiasa Simoni siosari arau ve kasau katu nana ruru pa derepa. Yesus miesoi nana wa pa raropa e dieniniau kaiwasa pasia.4Dieniniau to manau pa, kievo so Simoni e diojo, “Muesosar arau so uta vekarija wa, e mesiepara diara pai ave metapu dia.”5Simoni ruar e diojo, “Guru, diru woroi pai pa amananaripi to karakuai! Vape amatitapu dia pesi va! Vape aso Guru buemiasa pavo, vesie; nari isiepara diara nei riwanea.”6Manau na setono ariri kievo pa, setapu dia pai veito pau vesiri apa vare to sene diara pai miesabu.7Avori sesau tutiri sembarami kamana so sene maneta venana wa esi pasia ave amamo sendama senggoto sia, apa sendama senggoto sia e setisu dia pasi susa wa pa sandu veito vare susasar.8Na kasau jana pa Simon Petrusi siejo pa, tietuan na Yesus aropo pa, kievo e diojo, “Syen, rua vurusu jau wa, ja ma siniotu veve tatar ni jau!”9Apa Simoni e kaiwasa borai vena tutiri pasia setandor aso dia setapu pai piau veja;10toapa jana kota tutiri Simoni nie maneta pasia, esandu Yakobusi tutir Yohanesi, Zebedeusi atu pa sandu na. Yesus kievo maso Simoni e diojo, “Muetai va, nana raria ninei, nari vue diara so vitapu siniotu.”11Apa Simoni tutir nie maneta pasia sepapara wa pasi so ruru derepa, avori sembavuru pi borai pasi, janama senda usara Yesus.12Nana raria pesi pa Yesus nia na aniose pesa, na jana siniotu pesi ma tiere pota pado, nana pa siejor Yesus pa, disa na aebu pasi na aropo Yesus e siau, “Jai, masisi muajar mamo, buonae ipanam.”13Avori Yesus siwi vara pa e pir ajai so siniotu jani, tutir kievo e diojo, “I majar, puenam!” Na jana pa pota pado veteri pa niai.14Yesus dierandu siniotu jani ave tiopanusara so esia va e, kievo e diojo, “Rua e buoisara au so Imam pai ma buono pi som so nomu panam pai, pi som ariri Musai nie pareta pasi, ave amamo veruana so sia toapa vevata mo puenam to manau.”15Vape topanusara nana Yesus ninei miesiepar so topina vea, apa kaiwasa pa sepau sendama so i, ave setadiawa nie aniau pasi ma kota ave sesamuai panam nana sene pota pasi.16Vape esa mamo suvi e ria so uta veseja pesa, e vie nadi.17Na raria pesi pa Yesus dieniniau, apa siniotu Farisi pesia e kota siniotu veruin sasavu kavo aniau na Torat pesia semasoi setadiawa Yesus dieniniau pa. Sendama na aniose vura na Galilea, Yudea ma Yerusalem kota. Syen nie paja pai niana Yesus apa dionae vepota pa sepanam.18Avori janama siniotu pesia sendama, senggor siniotu vemarera pesi tutir andiau dienana pai. Sesasera ria ave senggori sesuapui tutiri e sepiri na Yesus aropo pa.19Vape aso kaiwasa pai piau veja na wana, diadi so senggori maso i va. Apa sesa tutiri ajai so anio nandau pai. Avori setita nandau pai, e janama setuwi tutir nie andiau pai avav so Yesus aropo pa nana rabua kaiwasa vepau pasia.20Na jana Yesus siejo sene sanetiar pasi, apa kievo so i e diojo, “Maneta, suemuai ampun so nomu tatar pasi to manau!”21Vape siniotu veruin sasavu kavo aniau na Torat pasia tutir siniotu Farisi pasia senggavo na sesanemi raro pasi e setojo, “Siniotu teini sisiajar Allah ne? Teini nari vie ampun tatar? Allah matauni pino.”22Vape Yesus ruini sene sanepaja pasi, apa kievo so sia e diojo, “Aso vitoni mesanemipai usari nana mesanemi raro pasi pa?23Apavo topi tapisa rawai, vekavo e viojo, ‘Nomu tatar pasi ive ampun to manau’, pivai viojo, ‘Suobatau, kuor nomu andiau pai e rua?’24Vape amamo menduina, toapa na dunia nei mamo Atuma Siniotu pai, andi piaja so vie ampun tatar pasi pa.” Janama Yesus kievo maso siniotu vemarera pai e diojo, “Suobatau, e puosasan nomu andiau buena na pai e vuevu raso nomu anio pai!”25Nana jana pa biatai na sendaromi pasi, avori piosasan nie andiau pai e vievu raso nie anio pai, ria tutir sienandik Allah.26Siniotu pasia vura setandor avori sesanandik Allah ma tutiri sanepaja vematai e setojo, “Raria ninei mo vori tasajo pi viono tandori nine pa.”27Janama Yesus suvi e ria, apa, siejor siniotu vesau pajak pesi, sano pa Lewi, miesoi na anio vesau pajak pai. Yesus kievo e diojo, “Rua usara jau!”28Apa Lewi biatai e vievur pi pasi vura, avori ria usari.29Avori Lewi diono kuaruvi viapi tutiri nana nie anio pai, apa siniotu vesau pajak pasia tutir siniotu pa esia kota setapi tutiri.30Siniotu Farisi pesia tutiri siniotu veruin sasavu kavo aniau na Torat pasia sesanemi pa sikariria maso Yesus nie verausara pasia senggavo e setojo, “Aso vitopi metapi e metunu tutir siniotu vesau pajak e kota tutir siniotu veve tatar ne sia pa?”31Avori Yesus ruar maso sia e diojo, “Siniotu vepanam pai sa siesera dokter va, vape siniotu vepota paini siesera dokter vea.32Irama ve isau siniotu vetindija pasi va, vape siniotu veve tatar, ave sesovera na sene tatar pasi.”33Siniotu pasia senggavo so Yesus e setojo, “Vera usara Yohanesi pasia tutir verausara siniotu Farisi pasia ma setariori e esa mamo sembe nadi. Vape verausara au ne sia ma, setapi e setunu.”34Yesus ruar e diojo, “Nana rabua mei vavindiriau pesi, mua veririau vavoru pai nia tutiri nie maneta pasia, apavo mia ma nari metamiasa sia setariori e? Kasa piva!35Vape nari raria pai miesi mamo nari senggor mua veririau pai vurusu sia. Nana raria jani, nari sembe puasa.”36Avori Yesus tiopanusara kavo sora tarawa ninei maso sia. “Sa esi diawar tupa sasu tawa tutir sisi sope nana sasu vavoru pesi va. Aso nari dionae sasu vavoru pai mieraba. Kota nari sisi vavoru viawar tapura pai miesi tutir sasu tawa pai va.37Toapa jana kota, sa esi siara anggur vavoru pesi susa rota piaum rawa tawawari pesi va, aso masisi tojana mamo, nari sua anggur vavoru pai dionae rota pai miesabu. Amamo sua anggur pai tiebubue niai, e rota pai kieriria.38Sua anggur vavoru pai ma nari siara nana rota vavoru pai kota.39Toapana kota esi dunu anggur tawa pai to manau, nari kasa dunu anggur vavoru pai va, aso diojo, ‘Anggur tawa paini diete rawai.’”
The Seed Company