LUKASI4
1Yesus dionu tutir Wainunu Sren pai nana raria ria vurusu Maria Yordan pa. Avori Wainunu Sren pai kiori so mapar kurumi pa.2Na jana Bilis pai siotouri woroi pa raria siniotu muandu. Aja nia jana pa, dia piesa va, apa veito vepui pa vievisi.3Avori Bilis pai kievo maso i e diojo, “Masisi Au ma Allah Atu pai ni Au mamo, kuevo maso rovuki ninei vie mamami.”4Yesus ruar maso i e diojo, “Na Repo nei raro pama ve aivuire to manau, ‘Siniotu sitenam tutir mamami vea va.’”5Bilis pai kioro Yesus so uta vetariai pa, sawawara e disatuir uta pasi vura maso I na dunia nei.6Avori Bilis pai kievo masoi e diojo, “Au ma Allah atu pai ni au we, ite piva e? Masisi tojana mamo, kueriwana au so dou wa, aso nana Repo pai raro pama vui tonine, Allah nari diemiasa nie siniotu rora pasia setarama Au, nari setapu au nana sembarami pasi, ave amamo aimu pa kasa sitere rovuki pasi va.7Masisi bisa aebu pasi e siom jau mamo, nari jono pi ninesi vura maso au.8Yesus ruar e diojo, “Ve aivuire to manau na Repo nei raropa, ‘Suom Syen Allah ma nuenaripi usari vea.’”9Avori veveru na wainunu vekariria pai kioro Yesus so Yerusalem e piri na Anio Syen pai vavopa, e kievo maso i e diojo, “Masisi Au ma Atuma Allah, amamo kueriwanau na nine avav.10Aso na Repo ninei raropa ve aivuire to manau, ‘Allah nari diemiasa siniotu rora pasia setarama Au tutir vesie,11e sia nari seser Au na sembarami pasi, ave aemu pasi sitere so rovuki vape moja.’”12Yesus ruar e diojo, “Na Repo pai raro pa ve aivuire to manau, ‘Suotour nomu Syen Allah pai vape moja!’”13Apavo Bilis pai siotour Yesus nana vava vepau to manau pa, vievuru Yesus, e dienota raria viate pesi.14Janama Yesus siovera so Galilea; e siemuai paja na Wainunu Sren pai, e topanusara nana Yesus imasiepara so uta vura.15Dieniniau nana anio ari agama Yahudi pasi e siniotu vura sesom sesanandiki.16Yesus ria ea so Nazaret, uta bieba nanapa. Nana raria Sabat pesi, ariri nienari ora pa e ria sua na anio ari agama Yahudi pai, avori diosa e diapa Repo pai,17e setono Nabi Yesayai nie surat pai so I, e siepari, avori siemuai kavo vevui pa tonine,18“Wainunu Sren pai nia na Jau,aso diri Jau to manau, ave itopanakavo vesie maso siniotu vevaro pi pasia.Diemiasa Jau ave itopan sasarakavo vesie maso siniotu setapu ve womie viono panam maso siniotu veremi kaber;ave ikor sovera siniotu vetau so kariria pa raropa19ave vetopa sasara raria Syen riamakior vesie maso nie kaiwasa vesanemitiari pasia.”20Janama Yesus kiapara sovera surat pai, e sioverai so siniotu vera nanaripi pai, avori miesoi. Siniotu borai vena anio ari agama Yahudi pai raro pasia vura setaduati.21Avori dieniau sia e diojo, “Kavo vevui na Repo nei nesi, raria ninei, simasi mo ariri raria metadiawa nei.”22Kavo kievora pasi ma siete vesiri, veito setandor e senggavo usara. Avori senggavo e setojo, “I ma Yusupi atuma paina, te piva e?”23Apa Yesus kievo so sia e diojo, “Ariria, mia ma nari menggavo na kavo sosiau maso jau e metojo, ‘Dokter, buono panam maso mataun au. Pitandor amatadiawa nuenari na Kapernaum pasi, nuenari si kota na matau nomu aniose ne.’”24Yesus kievo riwanea, “Vevata mo ikavo maso mia e jojo, nabi pesi sa siemuai sanandika na matau nie aniose pa va.25Vevata mo itopa maso mia e jojo: nana rabua Eliai pa, varo rama veviar veito woroi pa taun toru e tamua, veruana vavisi pai riewai na uta pa vura. Nana rabua jana ma inar pa sepau na Israel.26Vape Allah diemiasa Eliai ria maso inar pasia esi va, vape ria maso inar pa siri vea na Sarfat nana uta Sidon.27Toapana kota, nana rabua Nabi Elisa pa siniotu Israel pa sepau setere pota pado viomadidi, vape varo siniotu kota nana sia esi siemuai panam, vape maso Naaman, siniotu Siria pai andi siemuai panam.”28Siniotu venana anio ari agama Yahudi pasia vura setadiawa kavo janapa senggasiou vesiri.29Sesobata sia avori setatavar Yesus vurusu aniose pa, e senggori so wi dere vena aniose jana. Sesanemi pai setawa pidiari so kurumi pa raropa.30Vape Yesus ria vurusu kaiwasa borai pasia nana sene kasau rabua pa, avori ria.31Janama Yesus ria so aniose Kapernaum, na uta Galilea. Na jana dieniniau siniotu pa sepau na raria Sabat.32Setadiawa nie kavo aniau pasi pa, senggavo usara, aso kavo kievora pasi sionu tutir paja.33Siniotu vetere wainunu vekariria pesi niana Anio ari agama Yahudi pai raro pa, e dienanar tutir raupui ve baba e diojo.34“Hei, Yesus siniotu Nazaret panau, buo buono vitoi tutir ama? Buo ruama buono kariria so ama e? Iruina teini Au: Au ma veve Sren, amias nana Allah!”35Vape Yesus kievo masa e diojo, “Pueja, suvi vurusu siniotu ninei!” Avori wainunu vekariria jani biari siniotu pai na dopon sia vura, avori suvi vurusu siniotu jani e dio vaverai ea va.36Kaiwasa pasia vura senggavo usara, e senggavo vavera so sia e setojo, “Dionggavo pa masi kota. Tutir buai ma paja, I ma vie pareta e wainunu vekariria pasi sisuvi, apa wainunu vekariria jasi sisuvi kota!”37Apa raupui nanapi Yesus pai miesepar na uta vetutira.38Yesus suvi na anio ari agama Yahudi pai, avori ria so Simoni nie anio pai. Simoni nioni vavi pai andia visi pananit pa, e siniotu pasia setopana vava jana maso Yesus.39Yesus ria so uta vavi nei diena nana pa, avori dietavar visi pai. Apa visi jani niai, e Simoni nioni vavi nei sawawara e biatai e vie masis pisia so sia.40Nana pa wor pai dio subai pa, kaiwasa vura senggor siniotu vepota saserai pasia vura maso Yesus. Yesus pir vara pa ajai so sia siri-siri e dionae sepanam.41Wainunu vekariria pasi kota sisuvi na kaiwasa pa esia, e setananar e setojo, “Au ma Allah Atu ni au!”
Avori Yesus kiembarai pasi wainunu vekariria pasi sikavo, aso siruina I ma Raja vekor vesie paina pana.42Nana raria jani pa, Yesus suvi e ria so uta veseja pesa. Vape kaiwasa pa sesaserai, avori sesamuai e setoisuari ave vievuru sia vape moja.43Vape Yesus kievo maso sia e diojo, “Nana aniose vevesiei pasi kota, nari itopana Kavo Vesie nanapi Allah vie pareta ariri Raja pa, aso jo ma jana pa Allah diemiasa Jau e irama so dunia nei pa.”44E Yesus tiopanusara Kavo Vesie na anio ari agama Yahudi pasi na aniose Yudea vura.
Avori Yesus kiembarai pasi wainunu vekariria pasi sikavo, aso siruina I ma Raja vekor vesie paina pana.42Nana raria jani pa, Yesus suvi e ria so uta veseja pesa. Vape kaiwasa pa sesaserai, avori sesamuai e setoisuari ave vievuru sia vape moja.43Vape Yesus kievo maso sia e diojo, “Nana aniose vevesiei pasi kota, nari itopana Kavo Vesie nanapi Allah vie pareta ariri Raja pa, aso jo ma jana pa Allah diemiasa Jau e irama so dunia nei pa.”44E Yesus tiopanusara Kavo Vesie na anio ari agama Yahudi pasi na aniose Yudea vura.
The Seed Company