লুক2
1আত্রংকো সময়তাহা রোমি লোইকো টেবো জাইপু আগোস্তোসহা রোমি লোইকো তাংসা দিংঙাবিকো মিং লাপানেরোওয়া তামসা আজ্ঞা জোয়ে।2এপা মিং লাপানেরো তামসা আজ্ঞা জোওয়াহা ইরাং হাংসুরোমা নাগাই নিমগা। আত্রংরাং কুরেনিয়োসহা সিরিয়া জায়গাকো টেবো কাইজি নিমি।3টেবো জাইপুকো জাংওয়া সেই তাংসা আপনি আপনিকো শহরবিতা মিং লাপাকো হোয়ে।4আকো সোতা য়োসেফরে গালীল জায়গা নাসরতসোহা য়হুদিয়া জায়গাকো বেথলেহেম তাওয়া দাউদ জাইপুকো লোইতা হোয়ে, হাংপাতানাহা আকুহা দাউদকো চিমাকো নিমি।5য়োসেফহিংপাহা মরিয়োমকো বিয়ৌ জোরো তাওয়া নুওয়াং জিংতেমকো সোতা আকুহিংনে চিত্তা পুরায়ে। আত্রংহা মরিয়োমকো ফেমাতা চেং নিমি।6আবি বেথলেহেমতা নিনুরাং, মরিয়োমকো চেং কেকো সময় দেয়োংয়ে।7আকুহা আপনিকো ডেসোইওয়া চেংওয়া কেহে, আসা আংদুংসো মেরোইমসা হোকোইতা জিংপায়ে, হাংপাতানাহা আবিহা য়ুংকো এনতাওয়া গ্যইরে মোমুংতো।8আত্রংকো সময়তাহা আকো তোংনাংতারাং লুকা ল্যাচোইমবি নিমি, আবিহা লিসুং ওয়াংবোইতা য়ুমসা আপনিকো লুকাবিহিং কাংদিংমি।9আত্রংতারাং প্রভুসেংজাকো ইচো পোইংহা আবিকোতা তিংরেহে, আসা প্রভুসেংজাকো হাহাইওয়াহা আবিকো হুরাপা লালাইয়ে। ই তিংমসা আবিহা সিওপারাং চুসুংপুয়ে।10আদো আত্রংহা সেংজাকো পোইংহা জাংয়ে, “মাচ্ছুংগে! হাংপাতানাহা কা তাংসা দিংঙাবিহিং গাগ্রুপা জোওয়া এনতাওয়া দেরেং পামসা নাবিকো নাগাইতা লেমি নিও।11হিং, হিনিহা দাউদকো শহরতা ইচো মুক্তিদাতা কেমি নিও, আকুহা জেংওয়া জাইপু খ্রীষ্ট আসা প্রভুগা।12নাবিহিংয়া চিহ্নহা ই জিংরোওয়া: নাবিহা ইচো আপেহিং আংদুং মেরোইমসা হোকোইতা জিংপাদিংওয়া দোসুরোওয়া।”13আত্রংরাং উইসে পোইংবিরে আউতা তিংরেয়ে আসা এপা জিংওয়া লেহদি লেহমসা সেংজাহিং প্রশংসা জোয়ে,14“হাংসুরোমা তোইতা লোডিংবাতা নিওয়া সেংজাকো মিং টেবো জিংকো, আসা ই বাসিমতিতা হানি দিংঙাবিহিংপা আকু গাগ্রুপা নিমমে, আবিরে তিমেপা জিংকো।”15হাত্রং লোডিংবাকো পোইংবি আবিহিং হুইতেমসা লোডিংবাতা হোপুই, আত্রংহা গইত্রবিহা তাইবিলারাই জাংসুয়ে, “তে, প্রভুসেংজাকো জাংওয়া নুওয়াং বেথলেহেমতা হোমসা, কাকো।”16আবিহা সেন্নে-সেন্নেপা হোয়ে। আসা মরিয়োমসো য়োসেফহা আপেহিংয়া হোকোইতা জিংপাদিংওয়া দোসুয়ে।17গোইত্রবিহা আপেকো বিষয়তা লোডিংবাকো পোইংকো জাংওয়া নুওয়াং তাংসাহিং হিংপায়ে।18আবিকো জাংওয়া হিংমবিহা তাংসা আআংপেপেচপা জিংপুয়ে।19আদো মরিয়োমহা ই নুওয়াং নোমসারাং তুংসিংতা এপুয়ে।20গোইত্রবিহা পোইংকো জাংমবেপারাং দোসুমকো সোতা, সেংজাহিং মহিমা আসা প্রশংসা জোমসা লাকাপুয়ে।21কেমসা সায়্যাইয়ুকো নোইতা আকু আপেহিং খতনা জোনুওয়া, আকো মিংহা ইশু এহে। আকু মিংহা আয়ুকো ফেমাতা নিনুরোমা নাগাইসো লোডিংবাকো পোইংরাং এপুনতেমি নিমি।22মোসাকো লাওয়া লিংপাংতা জাংমি ত্যাবাপা মাদিপ্যাপাওয়া সময় দেয়োংনুওয়া আকো আয়ুসো আপাহা য়রুশালেমকো দেমসাতা সেংজাকো নাগাইতা চেংহিং পারায়ে।23হাংপাতানাহা প্রভুসেংজাকো লিংপাংতাহা লামি নিও, “তাংসা ডেসোইওয়া চেংওয়া সেংজাহিং পিচানেরোওয়া।”24আসা “নিহপু কুইজা মোকোনাহা নিহপু পোরোইকো চেংবে পারাকো।” তামসা সেংজাকো লিংপাংতাহা লামি ত্যাবাপা আবিহা দেমসাতা বলিদান পিচাকো লেহে।25আত্রংহা য়রুশালেমতাহা সিমিয়োন মিংকো ইচো দিংঙা য়ুংমি নিমি। আকুহা তাংজি নিওয়া দিংঙা আসা সেংজাহিং সেওয়া জোচাংমি। আকুহা ইস্রাইলবিহিং বাচাইওয়া দিংঙাকো ন্যাতা কাংদিংমি, আসা পবিত্র লাংবেহা আকো তোইতা নিমি। 26প্রভুসেংজাকো জেংওয়া জাইপু খ্রীষ্টহিং মাতিংনু চোইপা নাতিহা “মিসিরোওয়া” তামসা আকুহিংয়া পবিত্র লাংবেহা নাগাইসোরাং জাংপুনতেমি নিমি।27পবিত্র লাংবেকো জাংমবেপারাং সিমিয়োনহা দেমসাতা হোয়ে। আত্রংরাং লিংপাংতা লাওয়া সেই জোকো তামসা মরিয়োমসো য়োসেফহা ইশুহিং পারামসা দেমসাতা ওয়াংয়ে।28আত্রং সিমিয়োনহা ইশুহিং নুইতা কোংমসা সেংজাহিং প্রশংসা জাংয়ে,29“ও হাংসুরোমা টেবো সে নিওয়া প্রভু, নেহা নাতিহা কাহিং নাকো জাংওয়া সেই আপনিকো ডেইয়াহিংয়া তিমেপা সিকো পিচা।30হাংপাতানাহা নাকো নিংপুওয়া মুক্তি পিচাওয়াহিংয়া কা কুং মিচোসো তিংয়ে।31নাতিহা আকুহিংয়া তাংসা জ্যাকো দিংঙাবি তিংকো তামসা নিংপুমগা,32আকুরাং দোসরা জ্যাকো দিংঙাবিহিং নাকো ন্যাতা তিংপাওয়া হাহাইওয়াগা আসা আকুরাং নাকো জ্যা ইস্রাইলবিকো মহিমাকো সোতা জ্যোতিগা।”33আসা ইশুকো আপাসো আয়ুহা চেংকো বিষয়তা সিমিয়োনকো জাংওয়া নুওয়াং হিংনুওয়া আআংপেপেচপুয়ে।34সিমিয়োনহা আবিহিং আশিষ পিচামসা আকো আয়ু মরিয়োমহিং জাংয়ে, “কাং, ইস্রাইলতাহা তাংসাহিং বাচাইকোসো দাংপাকো সেংজাহা নাকো চেংওয়াহিংনাং জেংমি নিও। আকুহা সেংজাকো তিংপাওয়া চিহ্নগা, আকুহিংয়া উইসে দিংঙাবিহা মোসোংপা জোমসা আপনিকো তুংসিংসো নোওয়া সেই জাংসুরোওয়া।35এপাজিংওয়া উইসে দিংঙাবিকো নোচেং নোরোওয়া আসা নাকো তুংসিংহিংয়া কাসুমাসো বাপুমি ত্যাবাপা তুচারোওয়া।”36আসা আউতা আসেরকো চিমাকো ফনতুউয়েলকো চেমে হান্না মিংকো ইচো মেরেংপুনতেরি সেংজাকো তুংসিংকো নুওয়াং য়্যইচাংরি নিমি, আকুহা বিয়ৌ জোমসা লো-নীনিংকো নোইসোহা মুরিং জিংপুমি নিমি।37আকুহা মুরিং য়ুংমসা ডিকাইসো লোদিনিং বাংপুমতেমি, আসা আকুহা দেমসাহিংয়া হাত্রংরে ম্যালাইপা উপাস য়ুংমসা সেংজাহিং পাচাইমসা প্রশংসা জোচাংমি।38আকুরে মরিয়োমসো য়োসেফকো আবেইতা ওয়াংমসা সেংজাহিং গারানি তামসা জাংয়ে, আসা য়রুশালেমকো মুক্তিকো ন্যাতা নোইমবিহিংয়া তাংসাহিং ইশুকো বিষয়তা জাংয়ে।39মরিয়োমসো য়োসেফহা সেংজাকো লিংপাংতা জাংওয়া সেই তাংসা কাম ত্যইপাতেমসা, আবিকো সাতা গালীল জায়গা নাসরত শহরতা লাকাপে।40চেং ইশুহা দুংজিসো মেইপুমসা আসা বুচুইপা জিংপুমসা দেপুয়ে, আসা সেংজাকো লামতুওয়াহা আকোতা নিমি।41ইশুকো আয়ুসো আপাহা নিস্তার মানক্যাতাহা লোপোলেলে য়রুশালেমতা হোচাংমি।42ইশু লো বার্নিং জিংনুওয়া আকো আয়ুসো আপাহা আকুহিংয়া চিত্তা পুরামসা ন্যাসারাং য়রুশালেমতা হোরায়ে।43আকু মানক্যা পেংপুনতেনুওয়া আবিহা সাতা লাকাপে, আদো চেং ইশুহা য়রুশালেমতারাং য়ুংতেহে। ই নুওয়াংহা আকো আয়ু আপাবিহা সিদা মোচ্যইয়াংমি।44আকু লেপাওয়া দিংঙাবিহিংপারাং নিমদোওয়া তামসা হিমিসিংকো ন্যাতা হোয়ে, আসা জিরুং জিংপুনুওয়া আবিহা ইশুহিংয়া আপনিকো দিংঙা আসা নাইমি-নোমিকো পাকোতা মোয়ে,45আদো মোদোনুওয়া আবিহা ইশুহিং মোপু-মোপুমসা য়রুশালেমতারাং লাকায়ে।46সাসুংয়ুংকো নোইতাহা আবিহা ইশুহিংয়া দেমসাতা তাংজিকো উটকেওয়াবিহিংপা গামসা আবিকো নুওয়াং হিংমসা উইদিংমি।47আকো দুংজি আসা জাংকো চুওয়া তিংমসা আবি তাংসা আআংপেপেচপুয়ে।48এপারাং আকো আয়ুসো আপারে চেংওয়াহিং তিংনুওয়া আআংপেপচপুয়ে, আসা আয়ুহা উইয়ে, “চেংওয়া, নাতিহা হাংপাসা এপা জোমগা? কাং, নাকো আপাসো কাহা নাতিহিং মোওয়া-মোওয়াতা য়াপুনতেনা!”49ইশুহা আবিহিং জাংয়ে, “নাবিহা কাহিংয়া হাংপা মোমগা? কাহা কুং আপাকো সাতা নিনেরো তামসা নাবিহা মেগেমগা?”50আদো ইশুকো জাংওয়া নুওয়াংহা আবিহা মোকোইতো।51আসা ইশুহা আকো আয়ু আপাহিংপা নাসরততা লারেহে, আসা আবিকো জাংওয়া হিংমসা য়ুংয়ে। আকো আয়ুহা ই তাংসা নুওয়াংহা আপনিকো তুংসিংতারাং এপুয়ে।52ইশুহা সেংজা আসা দিংঙাকো লামতুওয়া মুংচামসা জুপা আসা দুংজিতা ডেপু-ডেপুমসা হোপুয়ে।
The Seed Company