য়হোশু17
1য়োসেবকো ডেসোইওয়া চেংওয়া মনশ্শেকো ইচো নিহসো চেংবিহিং য়র্দনকো দিব্যা কাটুকো জায়জাকো এক ভাগ পিচামি নিমগা। গিলাতকো আপা মাকির মনশ্শেকো ডেসোইওয়া চেংওয়াহা ইচো লুইসুকো ম্যারাইওয়া দিংঙা নিমগা। আকো সোতা নুব্যা য়র্দনকো গিলাত আসা বাশানহা আকুহিং পিচামি নিমগা।2য়র্দনকো দিব্যা কাটুকো জায়গাহা মনশ্শেকো লেরা চেংওয়াবিহিং পিচাওয়া নিমগা। আকু প্যাপ্যাম্যাম্যাবিহা অবিএজের, হেলেক, অস্রিয়েল, শকেম, হেপের আসা শমিদাকো সন্তান নিমগা। আবিহা য়োসেবকো চেংওয়া মনশ্শেকো চেংওয়া, চুওয়া আসা আপনি আপনিকো প্যাপ্যাম্যম্যাকো সন্তানবি নিমগা।3মনশ্শেকো চেংওয়া মাকির, আকো চেংওয়া গিলাত, ন্যাসারাং গিলাতকো চেংওয়া হেপের আসা আকো চেংওয়া সলোপাতকোহা চেমেবি মেংচে নিমগা, চেংওয়াবিহা ইচোরে মাতামগা। আবিকো মিংহা মহলা, নোআহ, হোগ্লা, মিল্কা আসা তির্সা নিমগা।4ই সলোপাতকো চেমেবিহা পাউ এলাজার, নুনকো চেংওয়া য়হোশু আসা দোসরা অগুওয়াবিকোতা হোমসা জাংয়ায়ে, “পরমপ্রভুহা মোসাহিংয়া আজ্ঞা জোওয়া নিমগা, কি দোসরা আপু এবিহিং ত্যাবাপা কাবিহিং হকদার বানাইমসা জায়গাকো এক ভাগ পিচানেরোওয়া।” আকো সোতা প্রভুসেংজাকো আজ্ঞা জোওয়া সেই আপনিকো জিরিকো পোজা দিংঙাবিহিং ত্যাবাপা আবিহিংয়া মোংটো পিচায়ে।5আকো সোতা মনশ্শেহা য়র্দনকো নুব্যাতা মুংওয়া গিলাত আসা বাসানকো তোইতা দোসরা ত্যাচো ভাগ মোংটো মুংচায়ে,6হাংপাতানাহা আকু মোংটোহা আকো চেংওয়া চেমেবি তাংসাকো সোতা পিচাওয়া নিমগা। লেরা মনশ্শেকো সন্তানবিহিংয়া গিলাত জায়গা পিচাওয়া নিমগা।7মনশ্শে কাটুকো মোংটো আশোরসোহা শকেমকো নুব্যাকো মিক্মতাত চোইপা দেকামগা। আকো নোইতা আকো লুংবিহা ম্যাম্যা কাটু দেকামগা আসা এন-তপ্পুহকো দিংঙাবি য়ুংওয়া জায়গাবিপারাং আকো নাপোতা পরেয়ে।8তপ্পুহকো আবেই আবেইকো মোংটোবিহা মনশ্শেকো নিমি, আদো লুংবি নিওয়া তপ্পুহ শহরহা এফ্রাইমকো চেংওয়াবিকো নিমি।9আকো নোইতা লুংবিহা কনাকো হোক্রা চোইপা দেকামগা। হোক্রাকো ম্যাব্যা কাটুকো শহরবিহা মনশ্শেকো জায়গাবিতা পরেদো আকুহা এফ্রাইমকো নিমি। মনশ্শেকো লুংবিহা হোক্রাকো দ্যাব্যা কাটু জিংপুমসা হোপুমগা আসা ভুমধ্য ঝাহাদি চোইপা দেকামগা।10ম্যাব্যা কাটুতাহা এফ্রাইম আসা দ্যাম্যা কাটুতাহা মনশ্শেকো নিমি, আসা নিহসোকোসারাং দিব্যা লুংবিতা ভুমধ্য ঝাহাদি চোইপা পরেমি নিমি। আশেরহা দ্যাম্যা-দিব্যাতা আসা ইস্সাখারহা দ্যাব্যা-নুব্যাতা নিমি।11ইস্সাখার আসা আসোরকো জায়গাকো নাপোতাহা ই জায়গাবি মনশ্শেহা মুংচাওয়া নিমগা, বেথ-শন আসা য়িবলাম, আকো হুরাপা নিওয়া লোইবি আকুহিংপাহা ডোর (হানি ঝাহাদিকো আরিতা নিমমে), এন্দোর, তানাক, মগিদ্দো আসা আকো হুরাপা নিওয়া লোইবি।12আদো মনশ্শে জিরিকো দিংঙাবিহা আকু শহরতা য়ুংওয়া দিংঙাবিহিং ঘীকো মাছুতো আসা কনানিবিহা আউতারাং য়ুংপুয়ে।13ইস্রাইলিবিহা এসেপাকো সে নিদো আবিহা তাংসা কনানিবিহিংয়া মাঘীতো, আদো আপনিকো সোতা কাম জোকো কর লাগাইয়ে।14য়োসেবকো সন্তানহা য়হোশুহিং জাংয়ে, “হাংপা নাতিহা কাবিহিংয়া এক ভাগ মোংটো মেংচে পিচামগা? পরমপ্রভুহা কাবিহিং আশিষ পিচামি নিও আসা কাবিকো দিংঙাহা সিওপারাং জিংপুমি নিও।”15য়হোশুহা জাংয়ে, “য়দি নাবিকো দিংঙামি উইসে জিংপুনাহা আসা এফ্রাইম য়্যাগ্যইকো মোংটোমি লিয়োপুনাহা চুংচা কাটুতা হ্যাপুই আসা পরিজ্জি আসা রপাইবিকো দেশকো নাপোতা আপনিকো সোতা চুংচা ডিচোই।”16আবিহা জাংয়ে, “য়্যাগ্যইকো জায়গাহা কাবিহিংয়া মাতেংতো, হাংপাতানাহা ওয়াংবোইতা য়ুংওয়া কনানিবিহা অর্থাৎ বেথ-শান আসা আকো হুরাপা নিওয়া শহরবি আসা য়িজরেলকো ওয়াংবোইতা য়ুংওয়া কনানিবিহিংপা লুইসুকো ম্যারাইওয়া দিংঙাবি আসা চাকো ওইংঙা গারিবি নিও।”17য়হোশুহা এফ্রাইমকো দিব্যাতা য়ুংওয়া মনশ্শেকো জিরিবিহিং জাংয়ে, “আজিপ্পারাং নাবিহা উইসে নিও আসা সিওপারাং সেরে নিও। নাবিহা এক ভাগরোমা সিওপা মুংচানেরোওয়া।18য়্যাগ্যইকো জায়গাহা নাবিকোরাংগা। নেহা আকুহা চুংচা নিও, আকুহা নাবি ডিচা আসা তাংসা আপনিকো খুইতা এচা। কনানিবিহা সাডুংপা নিদো আসা আবিহিংপাহা চাকো রথবি নিদো নাবিহা আবিহিংয়া ঘীপুরোওয়া।”
The Seed Company