য়হোশু18
1আকু জায়গা জিয়োনতেনুকো নোইতাহা ইস্রাইলবিকো তাংসা দিংঙাবিহা শিলোতা জমা জিংয়ে আসা প্রভুসেংজাকো পবিত্র তাম্বু বানাইয়ে।2ন্যাসারাং ইস্রাইলিবিকো প্যাকোতাহা নীচো জিরি ল্যইতেওয়া নিমি, হাংসু আকু জায়গাকো আপনি আপনিকো ভাগ মুংচাওয়া মাতামমে।3আকো সোতা য়হোশুহা ইস্রাইলকো দিংঙাবিহিং জাংয়ে, “পরমপ্রভু নাকো আটাবিকো সেংজাহা নাবিহিং পিচাওয়া জায়গাহা অধিকার জোকোহা হাত্রং চোইপা খুইকোগা?4তাংসা জিরিসো সুংচো সুংচো জোমসা পোজাবিহা কুংতা ওয়োংকো। কা নাবিহিংয়া তাংসা জায়গা মেইক্যইপা নিংপুরোওয়া, আসা নাবিহা হোমসা আপনিকো অধিকারতা লাংওয়া জায়গাবিহিং নোও-নোওমসা আবিহা কুংতা লারেরোওয়া।5আকু মোংটোহা নীচো ভাগ জোমসা আবিকো প্যাকোতা পোপিরোওয়া। য়হুদা ম্যাম্যা কাটুতা আপনিকো লুংবিকো নাপোতারাং আসা য়োসেবকো চিমাহা দ্যাব্যা কাটুতা আবিকো লুংবিতারাং য়ুংনেরোওয়া।6নাবিহা আকু দেশকো নীচো ভাগকো বয়ান লামসা কুংতা পামসা ওয়াং আসা পরমপ্রভু য়োংকো সেংজাকো ইচ্ছা কোইকো কা চিট্ঠা বাডোইরোওয়া।7আদো নাবিহিংপাহা লেবিবিহা মোংটোকোহা হাইরে ভাগ মামুংচারোওয়া, হাংপাতানাহা তুটেংজু চোইপা প্রভুসেংজাকো পাউ জিংমসা সেওয়া জোকোরাং আবিকো উত্তরাধিকারকো নুওয়াংগা। গাদ, রুবেন আসা নুব্যাকো ইপো মনশ্শেকো জিরিবিহা য়র্দনকো নুব্যাতা আপনি আপনিকো জায়গা মুংচানতেমি নিও, হানি প্রভুসেংজাকো ডেইয়া মোসাহা আবিহিং পিচামি নিমমে।”8য়হোশুহা এপা জিংওয়া আজ্ঞা পিচাপুনতেনুওয়া দিংঙাবিহা জায়গা হুরামসা কাংকো আসা আকো বয়ান লাকো তেইয়ে। আজ্ঞাতাহা ই জাংওয়া নিমগা, “তাংসা জায়গা কোইমসা কাং, আকো বয়ান লা আসা কুংতা লায়োং, আসা কা ইতা সিলোতা কা চিট্টা বাডোইমসা নাবিকো সোতা প্রভুসেংজাকো ইচ্ছা কোইরোওয়া।”9আত্রংহা দিংঙাবি হোমসা তাংসা জায়গাবি কোইমসা কাংয়ে আসা জায়গাহা হেপা নীচো ভাগতা পোসুনেকোমমে, আকুহা বয়ান জোমসা লায়ে আসা শহরবিকো ইচো সোকুকো সুচি বানাইয়ে।10আকো নোইতা আবিহা য়হোশুকোতা সিলোতা লাকাপুয়ে, য়হোশুহা চিট্টা বাডোইমসা প্রভুসেংজাকো ইচ্ছা কোইয়ে আসা লেরা ল্যইতেওয়া তাংসা জিরিবিহিং আকু জায়গাকো ইচো ইচো ভাগ পিচায়ে।11বিন্জামিন জিরিকো প্যাপ্যাম্যাম্যাকো কাটুতা পরেওয়া মোংটোহা হাংসুরোমা নাগাই পোওয়ে। আবিকো কাটুকো মোংটোহা য়হুদা আসা য়োসেবকো প্যাকোতা পরেয়ে।12দ্যাব্যা আবিকো লুংবিহা য়র্দন জোরাসো শুরু জিংমসা য়রিহো য়্যাগ্যইকো আবেইসো দ্যাব্যা কাটু হোপুমগা। দিব্যা কাটুকো য়্যাগ্যইকো জায়গাসোহা য়ুতা হোমসা বেথ-আবনকো চিচ্চোওয়া জায়গাতা চোইপা দেকামগা।13আকো নোইকো লুংবিহা লুচকো (হানিহিং বেথেল তামসা জাংমমে) ম্যাব্যা কাটুসো লেতা হ্যাপুমগা। আউসোহা য়ুতা হোমসা বেথ-হেরোনকো ম্যাব্যাতা নিওয়া লাগাকো তোইতা অতারোত-অদ্দারতা চোইয়ামগা।14আউসোহা লুংবিহা দোসরা কাটুতা হোপুমগা, আকু লাগাকো দিব্যা কাটুসোহা ম্যাব্যা কাটু হুরামসা বেথ-হোরোনকো আবেইকো মাম্যাচেকো য়্যাগ্যইসো আকুহা য়হুদা জিরিকো অধিকারতা নিওয়া কির্য়ত-বাল (কির্য়ত-য়ারিম) চোইপা দেকামগা। দিব্যাকো লুংবিহা আকুরাং নিমগা।15ম্যাব্যা কাটুকো লুংবিহা কির্য়ত-য়ারিমকো চেব্রেসো শুরু জিংমসা নেপ্তোহকো পাটিংতা দেরেমগা।16আসা লেতা য়্যাগ্যইকো ডেবে চোইপা দেকামগা আসা আউসোহা রপাইবিকো ওয়াংবোইকো দ্যাব্যা কাটু চেব্রেতা নিওয়া বেন-হিন্নোন ওয়াংবোই তিংমগা। আকো নোইতাহা আকুহা বেন-হিন্নোমকো ওয়াংবোইকো প্যাকোসো জিংমসা নুব্যা কাটু হ্যাপুমগা আসা য়ুবিসি য়্যাগ্যইকো ম্যাব্যা জিংপুমসা এন-রোগেল চোইপা দেকামগা।17আকো নোইতাহা আকুহা দ্যাব্যা কাটু এন-শেমেশ কাটুসো হুরাপুমসা হ্যাপুমগা আসা অটুমিম হোক্রাকো আবেইতা নিওয়া গলিলোততা নোরেমগা। আকো নোইতাহা আকুহা বোহনকো লুংটুই কাটুতা দেরেমগা (বোহনহা রুবেনকো চেংওয়া নিমগা)।18আসা য়্যাগ্যইবিকো দ্যাব্যা কাটু হোপুমগা, হানি য়্যাগ্যইবিসোহা য়র্দন ওয়াংবোই তিংমমে। আউসোহা লুংবিহা ওয়াংবোইতা দেকামগা।19আসা বেথ-হোগ্লা য়্যাগ্যইবিকো দ্যাব্যা জিংপুমসা সিপুওয়া ঝাহাদিকো দ্যাব্যা কাটুতা, হাংতা য়র্দন জোরা ঝাহাদিতা চোইয়ামমে, আউতা দেকামসারাং ত্যইপুমগা। আকুহা ম্যাব্যা কাটুকো লুংবি নিমগা।20নুব্যাকো লুংবিহা য়র্দন জোরা পরেমগা। বিন্জামিন জিরিকো প্যাপ্যাম্যাম্যাবিহা আপনিকো অধিকারতা মুংচাওয়া জায়গাকো লুংবিহা ইরাং নিমগা।21বিন্জামিন জিরিকো প্যাপ্যাম্যাম্যাবিকো শহরবিহা ইরাং নিমগা: য়রিহো, বেথ-হোগ্লা, এমেক-কসিস,22বেথ-অরাবা, সমারৈম, বেথেল,23অব্বিম, পারা, অৗপ্রা,24কপর-অমোনি, অৗপ্নি আসা গেবা। ই বার্চো শহরবিহিংপাহা আকো হুরাপা নিওয়া লোইবিপারাং নিমগা।25গিবোন, রামা, বেরোত,26মিস্পা, কপিরা, মোজা,27রেকেম, য়ির্পল, তরলা,28সেলাহ, এলেপ, য়বুসি (অর্থাৎ য়রুশালেম), গিবা আসা কির্য়ত-য়ারিম, ই চৌদ্দ শহরবিহিংপাহা আকো হুরাপা নিওয়া লোইবিপারাং নিমগা। বিন্জামিন জিরিকো প্যাপ্যাম্যাম্যাবিহা আপনিকো পুংজিকো রুপতা মুংচাওয়া জায়গাবিহা ইরাংগা।
The Seed Company