য়হুন্না15
1আকো নোইতা ইশুহা ন্যাসারাং জাংয়ে, “আজিপ্পাকো আংগুরকো সিংতেংহা কারাংগা আসা কুং আপাহা দুংরাই কাংওয়া দিংঙাগা।2কুংতা জিংমসা মেসেওয়া তাংসা গেইবেবিহিংয়া আকুহা ঠেপুরোওয়া, আদো সেওয়া গেইবেবিহিংয়া ন্যাসারাং উইসে সেচাকো তামসা এনতাপা সাইপিরোওয়া।3দুংরাই কাংওয়া দিংঙাহা গেইবেহিং এনতাপা সাইমসা সাফা জোমি ত্যাবাপা কুং জাংওয়া ই য়্যইদিসোরাং নাবিহিংয়া নাগাইসোরাং চোসোপা জোপুনতেও।4নাবিহা কুংতা য়ুং আসা কা নাবিহিংপা য়ুংরোওয়া। হেপা গেইবেহা সিংতেংতা মায়ুংপা ফল সেমক্যইমে, এপারাং নাবিরে কুংতা মায়ুংনাহা ফল সেপাম ক্যইরোওয়া।5“আংগুরকো সিংতেংহা কারাংগা, আসা নাবিহা কুং গেইবেবিগা। আদো হাংসু কুংতা য়ুং, কারে আকুহিংপা য়ুংরোওয়া আসা এপারাং আকুহা উইসে ফল সেরোওয়া। কাহিংপা তানাং য়ুংমসা নাবিহা হাইরে জোমক্যই।6কুংতা মায়ুংমবিহিংয়া ঠেপুওয়া গেইবেবিহিং ত্যাবাপা বাদোইপুরোওয়া আসা আকুহা সেংপুরোওয়া। আকুহিংয়া দিংঙাবিহা য়োচাপুমসা মেতা চুংপুরোওয়া।7নাবিহা কাহিংপা য়ুংমসা আসা কুং জাংওয়া নুওয়াংবি নাবিহিংপা য়ুংনাহা, নাবিকো ঘ্যইওয়া নুওয়াংবিহা আকুহা জোপিরোওয়া।8নাবিবেমি উইসে ফল সেপামসা কুং য়োংতোং তামসা তিংপানাহা ইতারাং কুং আপাকো মহিমা জিংরোওয়া।9“হেপা কুং আপা কাহিং জেজেংপা জোমে, এপারাং কারে নাবিহিং জেজেংপা জোমি নিও। এপারাং নাবিহা কুং জেজেংওয়াতা হাত্রংদো য়ুং।10কাহা কুং আপাকো খুইওয়াবি তাংসা জোমসা আপাকো জেজেংওয়াতা য়ুংমি নিও। এপারাং নাবিরে ইচোহা দোসরাহিং জেজেংপা জো।11কুং য়াংতাওয়াহা নাবিকোতা নিকো আসা নাবিকো য়াংতাওয়া উইসে জিংকো তামসারাং কাহা নাবিহিংয়া ই নুওয়াংবি জাংমগা।12“কুং, খুইওয়া নুওয়াংহা ইরাংগা: হেপা কা নাবিহিং জেজেংপা জোমি নিমে, এপারাং নাবিরে ইচোহা ইচোহিং জেজেংপা জো।13আপনিকো ব্যারোকো সোতা সাদি পিচাওয়ারাং হাংসুরোমা টেবো জেজেংওয়াগা, ইরোমা টেবো জেজেংওয়াহা হাইরে মোতো।14নাবিমি কুং খুইওয়া জোনাহা নাবিহা কুং ব্যারোগা।15ইসো য়ুতাহা কা নাবিহিংয়া ডেইয়াবি তামসা মাজাংরোওয়া, হাংপাতানাহা ডেইয়াহা গিরি হাং জোদিংমে, আকুহা মেগেমগা। কা নাবিহিংয়া ব্যারো তামসা জাংরোওয়া, হাংপাতানাহা কুং আপাকোসো হিংওয়া তাংসা নুওয়াংবিহা কাহা নাবিহিংয়া ল্যাপুনতেমি নিও।16নাবিহা কাহিংয়া জেংওয়া মোকো, আদো কা নাবিহিং জেংমগা, নাবিহা হোমসা হাত্রংদো সেমসা য়ুংওয়া ফলবি সেপা তামসা কা নাবিহিংয়া জেংমগা। আত্রংহা কুং মিংতা আপাহিংপা হাইয়া আকুহা নাবিহিংয়া পিচারোওয়া।17নেহা নাবিহিংয়া কা ই নুওয়াং খুইরোওয়া, ইচোহা ইচোহিং জেজেংপা জো।”18ইশুহা আবিহিং জাংয়ে, “বাসিমতিকো দিংঙাবি নাবিহিংমি আচকাপা জোনাহা নাবিহিংরোমা নাগাই কাহিংনাং আচকাপা জোয়ে তামসা নাবিহা গেকো জো।19নাবিমি বাসিমতিকো দিংঙা জিংনাহা আবিহা নাবিহিংয়া আপনিকো নোমসা জেজেংপা জোকোগা, আদো কা নাবিহিংয়া ই বাসিমতিসো জেংমি নিও। নাবিহা ই বাসিমতিকো মোকো, আকো সোতা বাসিমতিহা নাবিহিংয়া আচকাপা জোমগা।20‘ডেইয়াহা গিরিরোমা টেবো মাজিংমগা’ তামসা কুং জাংওয়া ই নুওয়াং নো। আবিহা কাহিংনাং কোইচ্যাপানাহা নাবিহিংনে কোইচ্যাপারোওয়া। এপারাং নাবিহা কুং খুইওয়া জোনাহা নাবিকো জাংওয়ারে জোরোওয়া।21কাহিং দেংওয়াকো সোতারাং নাবিহিংয়া কোইচ্যাপারোওয়া, হাংপাতানাহা আবিহা কাহিং নিংপুওয়া আপাহিং মানাইতো।22“কামি লেমসা মাজাংপিনাহা আবিহা পাপকো দোষ মাজিংকোগা, আদো নেহা আবিহা আবিকো পাপকো তোইতা হাইরে জাংকোরাং মামুংরোওয়া।23হাংসু কাহিং আচকাপা জো, আবিহা কুং আপাহিংনে আচকাপা জোরোওয়া।24হাংসুরে হাত্রংরে মোজোয়াংওয়া সে নিক্যইওয়া কামবি কাহা নাবিকো প্যাকোতামি মোজোনাহা নাবিহা পাপকো দোষ মাজিংকোগা। আদো কুং জোওয়া আআংপেপেচপুওয়া কামবি তিংমসারে নাবিহা কাহিং আসা কুং আপাহিংনে আচকাপা জোমি নিও।25আদো নাবিকো লিংপাংতারাং লাওয়া ই নুওয়াং তাংসা জিংকো তামসারাং ই তাংসা জিংরেমগা, হেপা লামি নিমে: ‘এপারাং আবিহা কাহিংয়া আচকাপা জোয়ে।’26“কা আপাকোসো আজিপ্পাকো লাংবে নাবিহিং য়ুজ্রুকো নিংপুরোওয়া। আকুরাং লেমসা কুং তোইতা প্রমান পিচারোওয়া।27আদো নাবিহা নাগাইসোরাং কাহিংপা নিওয়াকো সোতা নাবিরে কুং প্রমান জিংরোওয়া।”
The Seed Company