Mark13
1နောက်လောင်နော့် စောင့်ယေရှုန ဆီမေဗိမာန်တော် တကြားအောက်ကွာကော်လော့် တပဲ့မွန်းစောင့်ကော်နိမ်န အောင်းစမွန်းစောင့် “ဆရာ၊ တွဲနူ။ အဆောက်အအုံအောင်းခမ်းနားလေတောင်း ကောင့်ဟဉ်လုန်လေဝုန်န” ဆီ တန်ပြားကော်ဝိုက်။2မေနယ့်လော့် မွန်းစောင့်န အောင်းစမွန်း “အောင်းအဆောက်အအုံအောင်းခမ်းနား မောနယ့်ဟောန်မစော်လေး။ အဆောက်အအုံဟိုက်န တောင်းလုန် အောင်းဖြိုတိုအောင်းဖျတ်စီးတနယ့်ခမ်။ ကောင့်ဟဉ်ဟွေနိမ်န ခနေဟွေနိမ်ကိုးသကော့် အောင်းသကျန်မစော်” ဆီ ဝါကော်ဝိုက်။3နောက်လောင်နော့် စောင့်ယေရှုန ခနေနွဲသံလွင် တောင်းဗိမာန်တော်တောင်း ရာတော်နာ့ တကြားနှောင်ဆီအူလော့် ပေတရု၊ ယာကုပ်၊ ယောဟန်တောင်း အန္ဒြေဟော်လေန ရာမွန်းစောင့် သီးသန့် မားဆီ4“အောင်းဟိုက်လေတောင်းလုန်န မေနော်တပေးမား။ အချီန်အောင်းဟောန့်လေပေးန နိမိတ်လက္ခဏာနောင်နူးလေ တပေး။ အောင်းစဟော လောင်ဝ်ပြားအွန်” ဆီ ထန်မ်ဟင်းကော်ဝိုက်။5မွန်းစောင့်န အောင်းစမနော် “အောင်းစမဆူ ဖောကော့်ဟပေါမနယ့်လိဉ် ဟေအလေးဟင်း။6ဟေဟောင်းဆီပေါဝါလော့် ကွန်းလေန အောင်းနာမယ်ကောဆွန်းဆီ အောင်းမနော်တောင်းမနော် ‘ကောလ ပေးမေရှိယ’ ဆီ ဝါဟင်းဆီ အောင်းကွန်းလေတောင်းလုန် တလိဉ်ဟင်း။7မဆူလေန အကြောင်းစစ်ပွဲလေတောင်း သတင်းအောင်းတပေးစစ်လေ ဟောင်ပေါနယ့်ဟဉ်းလော့် ပီကိုးဟင်း။ အောင်းဟောန့်လေတောင်းလုန်န တနယ့်ပေးဝါမေကော့် ကမ္ဘာအောင်းဆွတ်မထီန်အွန်။8ကွန်းလေ မျိုးနိမ်တောင်းမျိုးနိမ်၊ မှိန်းနိမ်တောင်းမှိန်းနိမ် တပေးစစ်ဟင်း။ ရာတီတောင်းလုန် အိဉ်းလုန်လေ တဆောန်။ အောင်းခေါင်ကျဉ်းခေါင်ဝါကာလေ တပေါ်မား။ အဖြစ်ပျက်ဟိုက်လေန ကော့်ယဉ်းကော်နိမ် ဟောင်ပေါတကောင့်ဝ်လိမ့်လအောင် အောင်းနယ့်ခံစား တောင်းဝေဒနာပထမတောင်း အောင်းတူ ပေးဒုက္ခဆင်းရဲအောင်းကော်မော်ဝ်တုန်းအွန်ဝိုက်။9မဆူလေကော့် တောင်းဆတိတောင်း အူဟင်း။ ကွန်းလေန အောင်းစမဆူ ရာတလားလွှတ်တော်လေ တအပ်ဟင်း။ ရာတလားစလပ်လေကော့် အောင်းစမဆူ တတင်ဟင်း။ မဆူလေန ပေးတပဲ့ကောလေညော့ ရာခနာ့စောင့်ခွန်ဟော်ခမ်းလေတောင်း ရာခနာ့စောင့်ခွန်ဟော်ငွန်းလေ စိန်ဆီ အကြောင်းကော ခမ်သက်သေဆီ တနယ့်တန့်ဟင်း။10အချီန်ကမ္ဘာနောင်နဉ်းပျတ်မထီန်ခွေတ် အောင်းသတင်းနီး အောင်းကွန်းတောင်းလုန် တနယ့်ဟောပြားအောင်းတိုင်း။11မဆူလေန အောင်းဝမ့်နယ့်ခမ်ဆီ ရာတလားရုံး အောင်းဟောင့်ဟောင်ပေါနယ့်ခမ်ကော့် တနယ့်တန့်နောင်နူးဝါလ အန့်ထဆီ ပီကိုးဟင်း။ မေအချီန်ဟောန့် ခနောဝ်စောဝ်မဆူ အောင်းစောင့်ဖလားပြားနဲဟော် တန့်ဟင်း။ ဟေဟောင်းဆီပေါဝါလော့် ခွမ်းဟောန့်လေန ခွမ်းမဆူမစော်ဆီ ပေးခွမ်းဉာဏ်အလင်းတော်လေ။12ကွန်းလေန အောင်းစပီနောင့်အောင်းယွန်မ်အောင်းကောလေ အောင်းကွန်းအုပ်ချုပ်လေ ဟဝမ့်ဆီ သစ္စာသဖောက်ဟင်းညော့ ဟေအလေးဟင်း။ နောက်လောင်နော့် ကွန်းအုပ်ချုပ်လေန အောင်းကွန်းဟောန့်လေ တအောင်းဝ်သိုင်းဟင်း။13ကွန်းတောင်းလုန်န ကောပ့်မဆူပေးတပဲ့ကောညော့ အောင်းစမဆူ တစောန်းဟင်း။ တော်နယ်ကော့် တော်ဘဝမဆူအောင်းဆွတ်ပွန့် ခနေကော ကွန်းသစ္စာရောင်းလေန အောင်းကယ်တနယ့်ခမ်” ဆီ ဝါကော်ဝိုက်။14နောက်လောင်နော့် စောင့်ယေရှုန “ဝမ်းနိမ်လော့် အောင်းဗိမာန်တော် ဟပေါပေးရာတီတောင်းကွန်းလေတောင်းကိုင်း ကွန်းအောင်းခနီးဆီဆေကော်နိမ်န ရာမွန်း အခွင့်အောင်းမနယ့်စိန် ရာခနောဝ်ဗိမာန်တော် ရာတီအောင်းမြတ်တ အောင်းစိန်ဆီအူလ မဆူတနယ့်ဟောန်ဟင်း။ ဟောင်ပေါထီန်အချီန်ဟောန့်လော့် ကွန်းအောင်းရောင်းရာမှိန်းယုဒလေန တပိုင်ခွန့်ခနေနွဲဟင်း။ 15ကွန်းရောင်းခနေခေါင်န ခတောင့်ဝ်ဟုန်း ပီလုန်းကော်ဟင်း။ ခနောဝ်ဟုန်း ခေါင့်ဝ်ဆီ အောင်းအဟောင်းကော့် ပီကွာအောင်းဝ်။16ကွန်းရောင်းခနောဝ်နားကော့် ဟပေါနယ့်အောင်းဝ်ဆေ့လုန်စောင့်ကောင်ဝ် ပီပေါက်ဟုန်းဟင်း။17ဝမ်းဟောန့်လေန မယ်တောင့်ပို့တောင်း မယ်လအောင်အရွယ်ကျဉ်းစော်ရောင်းလေန အိုက်တထီန်ဒုက္ခလုန်ဟင်း။ မနော်လေန အောင်းအဆတ်မနော် ဟပေါနယ့်ကယ်တောင်း ဟပေါနယ့်ပိုင်တော်ပေါလောက် အိုက်တယတ်ပ်ဟင်း။18ဝမ်းဟောန့်လေန ဟပေါမပေးအချီန်နောဝ် ရောန်းဆုဟင်း။19ဟေဟောင်းဆီပေါဝါလော့် စောင့်ဖလားန အောင်းကမ္ဘာလုန် မေအချီန်စဆီဖန်းစန်းမားန တော်အချီန်အစောင်ပွန့် အောင်းမပေးကောင်ဝ်၊ အချီန်နောက်လောင်လေကော့် မေနော်ကော့် အောင်းတပေးမစော် ဒုက္ခဆင်းရဲအောင်းမနီးန မေအချီန်ဟောန့် တပေးညော့ဝိုက်။20စောင့်ဖလားန အောင်းဝမ်းဟောန့်လေ ဟောင်ပေါမဟလော်လ်လော့် ဖောကော့် အဆတ်အောင်းတခွန်းပဲ့မစော်။ တော်နယ်ကော့် အောင်းစကွန်းအောင်းမွန်းစောင့်လိတ်ဝိုက်ပေါဝါလော့် အောင်းဝမ်းဟောန့်လေ တဟလော်လ်ဝိုက်။21မေနယ့်လော့် ကွန်းကော်နိမ်မကော်နိမ်န အောင်းစမဆူ ‘တွဲနူ။ ရာတီဟိုက် မေရှိယရောင်း။ နောင်နယ့်ပေါမစော် ရာတီဟောန့် မေရှိယရောင်း’ ဆီ ဝါဟင်းမေကော့် အောင်းစမနော် ပီယွန်မ်ဟင်း။22ဟေဟောင်းဆီပေါဝါလော့် မေရှိယအတုလေတောင်း ပရောဖက်အတုလေန ပေါ်မားဆီ ကွန်းဟောန့်လေန ဟောင်ပေါပေးပဲ့ အောင်းကွန်းစောင့်ဖလားလိတ်ဝိုက်ကိုးသကော့် ဟပေါနယ့်လိဉ် နိမိတ်လက္ခဏာလေတောင်း လောင်အောင်းခနီးအမ်းလေ တဟေဟင်း။23ကောပ့်နယ့်ညော့ မဆူလေန ဟေအလေးဟင်း။ အောင်းရောင်းတောင်းလုန် မေမပေးအွန်ပွန့် အောင်းစမဆူ ကောဝါထမားရောင့်ဝ်ကော်။”24နောက်လောင်နော့် စောင့်ယေရှုန ဆက်ဆီ “ဒုက္ခဆင်းရဲဟောန့်လေ ဝမ်းတထီန်န မိုရောင့်ဝ်ဆီ ဝမ်းန နပ်ဆိဉ်ကော်ဆီ နိန်းကော့် အောင်းလိန်းမွန်း တဟောင့်ဝ်ကော့်မစော်။25နောဝ်လေကော့် ဆီမေတောင့်ဖ ကြွေတိုဆီ အစွမ်းတောင့်ဖ လေကော့် တယွန်းယန်ဟင်းဝိုက်။26မေနယ့်လော့် လူ့သားတော်န တောင်းဘုန်းတော်အောင်းရောင်ဝ်လုန်လေ၊ တောင်းဘုန်းအသရေလေတောင်း အောင်းချီဖလေ ချီဆီ အောင်းကြွမား ကွန်းလေတနယ့်ဟောန်ဟင်း။27နောက်လောင်နော့် လူ့သားတော်န အောင်းဖီဒေဝါလေ ပွယ်ဆီ ရာကမ္ဘာတောင်းလုန် အောင်းကွန်းမွန်းစောင့်လိတ်ဝိုက်လေ ဟပေါနယ့်စူး တပွယ်ဝိုက်။28အစောင် အောင်းပွန်ဥပမာမတ်ဖနေတူးနိမ် ဆောန်ဟင်း။ ရာတိန့်ဖနေ ခို့မွန်းခါမွန်းအောက်ဆီ ဖေအောင်လေ စဆီဟောင်ပေါအောက်မားလော့် အကြောင်းတထီန်အချီန်နွေ မဆူဟုဟင်း။29နောင်နယ့်ကျဉ်းနော့် အောင်းအကြောင်းကောဝါမားလေ အောင်းပေးမား မဆူဟောင်ပေါနယ့်ဟောန်လော့် အချီန်အောင်းဟိုက်လေတပေးလ ကောင့်ဝ်မားကော်ဝါလ မဆူဟုဟင်းမေ။30အောင်းမဆူ ကောတဝါအောင်းစော်။ အောင်းဟိုက်လေတောင်းလုန် တော်အချီန်မပေးအွန်ပွန့် မျိုးဆတ်ကွန်းဟိုက်လေန တဟိုင်နိုင်းဟင်းမစော်။31တောင့်ဖတောင်းနောင်နဉ်းန ဝမ်းနိမ်မဝမ်းနိမ် တပျတ်စီး။ တော်နယ်ကော့် ခွမ်းအောင်းကောဝါမားကောင်ဝ်လေန ကူမေ့ တရောင်းဝိုက်” ဆီ ဝါကော်ဝိုက်။32“တော်နယ်ကော့် အောင်းဟောန့်လေန အချီန်ထော၊ ဝမ်းထောတပေးဝါလ ဖောကော့်မဟု။ ဖီဒေဝါအောင်းရောင်းရာမှိန်းခမ်းလေကိုးသကော့် မဟုဟင်း။ လုစိုင်းကော့် မဟု။ စောင့်ဖလားပါးနိမ်နဲဟော် ဟုဟော။33အချီန်ဟောန့်န မေနော်တထီန်မားဝါလ မဆူမဟုဟင်းညော့ ဟေအလေးဆီ ထဟင်း ။34အောင်းလူ့သားတော်ကြွမားလ ကွန်းအောက်ပိုင်းတန်းကော်နိမ်န ဆီမေဟုန်းမွန်း မေမအောက်ခွေတ် အောင်းခမွန်းလေ အောင်းတနယ့်ဟေ တာဝန်လေ ဟောင့်ဝ်ဆီ အောင်းစောင့်ပေါင့်ဝ်နာ့ဆိုတူး အချီန်မွန်းတပေါက်မား တောင်းဆတိတောင်း ဟပေါနယ့်ထထ တောင်းအောင်းဆောင်ဝိုက်တောင်း တူဝိုက်။35ကောပ့်နယ့်ညော့ စောင့်ဟုန်းန အချီန်ဝမ်းစိုင့် နယ့်ပေါမစော် အချီန်ကမ်းခွန်း နယ့်ပေါမစော် အချီန်ကိုင်ခေါန် နယ့်ပေါမစော် အချိန်ကန်းနော်ဝ်စောင့်ဝ်စောင့်ဝ်လေန မေအချီန်နောတကြွမားဝါလ မဆူမဟုဟင်းညော့ တောင်းဆတိတောင်း ထဟင်းမေ။36မွန်းန အောင်းဟောင့်ဝ်ဆတိထမရောင်းဆီ တထီန်မားအောင်းတဲ့တဲ့ညော့ တောင်းဆတိတောင်း ထဟင်း။ မေနယ့်လော့် မောန အောင်းစမွန်း အဆင်သင့်ပေးဆီအူလ မွန်းတဟောန်။37‘တောင်းဆတိတောင်းထဟင်း’ ဆီ အောင်းမဆူ နောင်ကောဝါမားညော့ အောင်းကွန်းတောင်းလုန်ကော့် ကောဝါ” ဆီ ဝါကော်ဝိုက်။
Empower Asia Bible Translation Movement