1 Ngoma15
Isandugu y’Isezerano yimurirwa i Yerusalemu
1Dawidi amaze kwubaka inyubakwa ziwe mu Gisagara ca Dawidi, aca ategura ikibanza c’Isandugu y’Imana, ayishingira ihema.2Maze Dawidi aravuga ati: “Nta muntu n’umwe atari Umulewi akwiye guterura Isandugu y’Imana, kuko Uhoraho yabatoranirije kurerura iyo Sandugu yiwe no kwama bamukorera bari imbere yiwe ibihe bidashira.”3Dawidi akoranya Abisirayeli bose i Yerusalemu ngo badugane Isandugu y’Uhoraho bayizane mu kibanza yari yayiteguriye.4Ahamagara abo mu ruvyaro rwa Aroni n’Abalewi:5Abo mu nzu ya Kohati, Uriyeli umukuru wabo hamwe na benewabo ijana na mirongo ibiri;6abo mu nzu ya Merari, Asaya umukuru wabo hamwe na benewabo amajana abiri na mirongo ibiri;7abo mu nzu ya Gerishomu, Yoweli umukuru wabo hamwe na benewabo ijana na mirongo itatu;8abo mu nzu ya Elizafani, Shemaya umukuru wabo hamwe na benewabo amajana abiri;9abo mu nzu ya Heburoni, Eliyeli umukuru wabo hamwe na benewabo mirongo umunani;10abo mu ya Uziyeli, Aminadabu umukuru wabo hamwe na benewabo ijana na cumi na babiri.11Hanyuma Dawidi atumako Sadoki na Abiyatari abaherezi, na Uriyeli, Asaya, Yoweli, Shemaya, Eliyeli na Aminadabu Abalewi.12Arababwira ati: “Ni mwebwe bakuru b’inzu zigize umuryango w’Abalewi; mwebwe na bagenzi banyu b’Abalewi nimwiyeze kugira ngo muje kudugana Isandugu y’Uhoraho, Imana y’Abisirayeli, muyizane mu kibanza nayitunganirije.13Kubera yuko, mwebwe Abalewi, mutayireruye ca gihe ni co catumye Uhoraho Imana yacu aturakira. Ntitwamusiguje ngo atubwire uko yavuze bizohora bikorwa.”14Nuko abaherezi n’Abalewi bariyeza kugira ngo baje kudugana Isandugu y’Uhoraho, Imana y’Abisirayeli.15Kandi Abalewi barerura Isandugu y’Imana iri ku biti bibiri biteruwe n’abantu bane ku bitugu vyabo, nk’uko Mose yari yarabitegetse yisunze ijambo ry’Uhoraho.16Dawidi abwira abakuru bo mu Balewi ngo batoranye muri bagenzi babo b’abaririmvyi abo kuririmba indirimbo z’umunezero, bavuza n’ibicurarangisho: amakembe, inanga n’udushako tw’ingoma.17Maze Abalewi batoranya Hemani mwene Yoweli; mu bavukanyi biwe, Asafu mwene Berekiya; no muri benewabo b’Abamerari, Etani mwene Kushaya;18bari kumwe na benewabo bo ku rwego rwa kabiri: Zakariya, Yayaziyeli, Shemiramoti, Yehiyeli, Uni, Eliyabu, Benaya, Mayaseya, Matitiya, Elifelehu, Mikuneya, Obedi-Edomu na Yeyiyeli, abarinzi b’irembo.19Abacuraranzi Hemani, Asafu na Etani bavuza ivyuma vy’imiringa;20Zakariya, Aziyeli, Shemiramoti, Yehiyeli, Uni, Eliyabu, Mayaseya na Benaya bacuraranga amakembe mw’ijwi ryitwa alamoti,21nayo Matitiya, Elifelehu, Mikuneya, Obedi-Edomu, Yeyiyeli na Azaziya bavuza inanga, mw’ijwi ryitwa Sheminite.22Kenaniya umukuru w’Abalewi yari arongoye abaririmvyi, kuko yari umuhinga muri vyo.23Berekiya na Elukana bari abarinzi b’urugi rw’ihema ry’isandugu.24Shebaniya, Yoshafati, Netaneli, Amasayi, Zakariya, Benaya na Eliyezeri abaherezi bari bashinzwe kuvuza inzamba imbere y’Isandugu y’Imana. Obedi-Edomu na Yehiya na bo nyene bari bashinzwe kurinda umuryango w’isandugu.25Nuko Dawidi n’abakuru bose b’Abisirayeli n’intwazangabo zirongoye ingabo igihumbihumbi, bagenda kudugana Isandugu y’Isezerano y’Uhoraho bayikura mu nzu kwa Obedi-Edomu, bari n’umunezero mwinshi.26Kandi kubera ko Imana yafashije Abalewi bari bareruye iyo Sandugu y’Isezerano y’Uhoraho, baciye batanga ibimazi vy’amashuri y’inka indwi n’amapfizi y’intama indwi.27Muri ico gihe Dawidi yari yambaye ikanzu yera derere, co kimwe n’Abalewi bose bari bareruye iyo Sandugu, n’abaririmvyi, na Kenaniya umukuru w’imigwi y’abaririmvyi; kandi Dawidi yari yambaye na efodi yera.28Nuko Abisirayeli bose badugana iyo Sandugu y’Isezerano y’Uhoraho batera akamo k’umunezero, bavuza inzamba zikozwe mu mahembe y’intama n’inzumbete, n’ivyuma bivuzwa bigasama, bavuza n’amakembe n’inanga.29Maze Isandugu y’Isezerano y’Uhoraho yinjiye mu Gisagara ca Dawidi, Mikali umukobwa wa Sawuli abirabira mw’idirisha. Abonye umwami Dawidi atamba yiginagura, amugayira mu mutima.Biblica, Inc.