Luka12
O Isus opomeninela bašo dujmujalipe
1I koga khedisalile nekozom ilade manuša, doborom bari gužva sine so jekh jekhe gazinena sine, a o Isus prvo počmingja te vakerel pe učenikonge: “Arakhen tumen taro kvasaci e farisejengoro, soj tano dujmujalipe.2Nane ništo garavdo so nane te dikhol javno, ni tajno so nane te ovel šundo.3Adava so phengjen ki temnina, ka vakerel pe ki svetlina, a adava so vakergjen le pohari ko kan ko sobe, ka vakerel pe taro krovi sarinen te šunen.”Ma daran
4“Ama phenava tumenge, amalalen: ma daran okolendar so šaj mudarena o telo, a palo adava našti te keren tumenge ništo poviše.5Ama ka phenav tumenge kastar trebela te daran: daran taro okova so palo tumaro meribe, isi le vlast te frdel tumen ko pekol. Oja, vakerava tumenge, lestar daran!6Na bikinela pe li pandž čirikla duje dinarenge? Ama nijekh lendar nane bisterdi anglo Devel.7A tumenge ko šero sekoja bal tani gejmi. Adaleske, ma daran! Tumen sijen povredna taro but čirikla.”Ma ladžan taro Isus
8“Vakerava tumenge: Koj ka priznajnel deka tano mlo anglo manuša, o Čhavo Manušeskoro da ka priznajnel le deka tano leskoro anglo angejla e Devleskere.9Ama koj ka otkažinel pe mandar anglo manuša, me da ka otkažinav man lestar anglo angejla e Devleskere.10Hem sekoj so ka vakerel lafi protiv o Čhavo Manušeskoro ka ovel leske oprostimo, ama sekoj so ka hulinel upro Sveti Duh nane te ovel leske oprostimo.11A koga ka anen tumen anglo sudo ki sinagoga, anglo vlastija hem vladitejla, ma sekirinen tumen sar ka braninen tumen ili so ka vakeren,12soske o Sveti Duh ka sikavel tumen ko adava vreme so te vakeren.”I parabola bašo barvalo glupavo manuš
13Togaš nekoj tari gužva phengja e Isuseske: “Učitele, vaker me phraleske te delinel o nasledstvo mancar.”14O Isus odgovoringja: “Manušeja, koj čhigja man te ovav sudija ili te delinav tumenge?”15Togaš vakergja okolenge so šunena le: “Pazinen hem arakhen tumen tari alčnost, soske o životo nane taro baro barvalipe.”16O Isus vakergja lenge akaja parabola: “Nesave barvale manušeskiri niva dengja but bari žetva.17A ov mislingja ki peste: ‘So te kerav? Nane man doborom than kote te khedav mi žetva.’18I phengja: ‘Akava ka kerav: ka rušinav me purane šupe hem ka kerav pobare, i adathe ka čhivav sa o giv hem sa so isi man.19Togaš ka vakerav me dušake: “Isi tut khedimo baro barvalipe bute beršenge. Odmorin, ha, pi hem uživin!”’20Ama o Devel phengja leske: ‘Glupavo manušeja, akaja rat ka lav ti duša. A sa adava so khedingjan, kaske ka ačhol?’21Agjar ka ovel okoleja so khedela peske barvalipe, a čorolo tano anglo Devel.”Bašo sekiracije
22Togaš o Isus vakergja pe učenikonge: “Adaleske vakerava tumenge: ma sekirinen tumen bašo tumaro životo, so ka han, ili so ka phiravel tumaro telo.23Soske o životo tano považno taro hajbe, a o telo považno taro šeja.24Dikhen e čavken! Ola ni sejnena, ni na khedena, ni nane len šupa kaj te čhiven o hajbe, a palem parvarela len o Devel. A kozom tumen sijen poskupa taro čirikla!25A šaj li nekoj tumendar sekirindor te prodolžinel hari po životo?26Hem agjar, koga našti ni adava o najtikno te kere, soske sekirinen tumen bašo sa javer?27Dikhen sar bajrona o diva lulugja. Ni mučinena pe, ni na sivena peske šeja, ama vakerava tumenge ni o car Solomon, so sine but barvalo, na sine uravdo agjar, sar jekh lendar.28Ako o Devel agjar uravela o pole e lulugjencar, so avdive tani adathe, a tajsa frdena pe ki jag, kozom poviše šeja ka del pe tumenge, tikne verakere!29Ma sekirinen tumen bašo adava so ka han ili so ka pijen.30Soske sa akava rodena okola so na džanena e Devle. A tumaro Dad džanela sa adava so trebela tumen.31Nego, roden o carstvo e Devleskoro, i sa akava ka del pe tumenge.32Ma daran, mo tikno stado! Adaleske so tumare Dadeskiri vojla tani te del tumen o carstvo.33Bikinen so isi tumen hem den le e čorolenge! Keren tumenge kesa so našti te pharavgjovel hem barvalipe ko nebo so nikat nane te našavgjovel, kote so o čor našti te khuvel hem o insektija našti nikat te uništinel le.34Soske kaj tano to barvalipe, adathe ka ovel tumaro srce da.”O spremno hem o nespremno sluga
35O Isus vakergja pe učenikonge: “Oven spremna baši služba hem ikeren tumare momojla thare,36sar so o sluge adžikerena pe gospodaren te iranel pe taro bijav. Koga ka iranel pe o gospodari hem ka khuvel ko udar, o sluge tane spremna odma te phraven leske.37Blago adale slugenge, koga lengoro gospodari ka avel hem ka arakhel len džangavde. Čače vakerava tumenge, ov o gospodari ka phandel pe i kecela, ka bešlarel len ki sofra hem ka služinel lenge.38Blago adale slugenge koga lengoro gospodari ka avel hem arakhel len džangavde, i te alo da ki ekvaš i rat ili pred te phravgjol o sabaj.39Ama džanen akava: te džanel sine o domakini e khereskoro ko kova sati tari rat ka avel o čor, nane sine te mukhel le te khuvel ko kher.40Adaleske tumen oven spremna, soske o Čhavo Manušeskoro ka avel togaš koga nane te adžikeren le!”41Togaš o Petar pučlja e Isuse: “Gospode, amenge li vakereja akaja parabola ili sarinenge?”42O Gospodari o Isus odgovoringja: “Koj tano verno hem mudro upraviteli, kas o gospodari ka čhivel le upreder pe sluge te del len o hajbe ko vreme?43Blago adale slugaske, koga leskoro gospodari ka avel hem ka arakhel le sar kerel adava.44Čače vakerava tumenge, ka čhivel le upravniko upro sa leskoro barvalipe.45Ama, ako adava sluga phenela ki peste: ‘Nane te avel panda mo gospodari’, i počminela te marel javeren slugjen hem slugjinken, hem te hal hem te pijel hem te makjol,46o gospodari adale slugaskoro ka avel ko adava dive koga nane te adžikerel le hem ko adava sati savo ov nane te džanel, ka čhinel le ko kotora hem ka čhivel le maškar o nevernikija.47A adava sluga so džanela i vojla pe gospodareskiri, a na spremingja pe ili na kergja adava so mangla leskoro gospodari, ka hal but mariba.48A okova so na džanela i vojla pe gospodareskiri, a kerela bukja so zaslužinela kazna, hari maribe ka hal. Kaske i dendo but, poviše ka rodel pe lestar, hem kaske i doverimo but, poviše ka rodel pe lestar.”Na mir nego deliba
49Togaš o Isus phengja: “Alum te frdav i jag e sudoskiri ki phuv hem kozom manglum sine te ovel thari!50Ama trebela te nakhav taro mukengoro krstiba. But mange pharo dži kote adava na završinela pe!51Mislinena deka alum te anav mir ki phuv? Na. Alum te odvinav e manušen jekh jekhestar.52Adaleske taro akava dive, taro pandž džene ko kher, ka oven odvime: trin protiv duj hem duj protiv trin.53Ka uštel o dad protiv po čhavo, o čhavo protiv po dad, i daj protiv pi čhaj hem i čhaj protiv pi daj, i sasuj protiv pi bori hem i bori protiv pi sasuj.”Trebela te pendžaren o znakija e vremeske
54Togaš o Isus vakergja e manušenge: “Koga dikhena o oblakija sar avena taro zapad, odma vakerena: ‘Ka del peske bršim’, i čače dela peske.55A koga phudela i bavlal taro jug, vakerena: ‘Ka ovel but tato’, i ovela.56Dujemujengere manušalen! Džanena te pendžaren o izgled e neboskoro hem e phuvjakoro, a sar šaj te na džanen te pendžaren o znakija akale vremeskere?57Soske korkori tumen na sudinena soj ispravno?58Koga džaja te dušmaneja ko sudo, de sa tutar tut te smirine tut leja dži kote sijan ko drumo, te na vlečinel tut to dušmani ko sudija, a o sudija te del tut e čuvareske so ka čhivel tut ko zatvor.59Čače vakerava tuke, nane te iklove adathar sa dži kote na deja te posledna pare.”The Word for the World International