Luka11
O Isus sikavela e učenikon sar te molinen pe
1Jekh dive o Isus molingja pe ko jekh than. Koga završingja e molitvaja, jekh taro leskere učenikija phengja leske: “Gospode sikav amen te molina amen sar so o Jovan Krstitel sikavgja pe učenikon!”2Togaš o Isus phengja lenge: “Koga molinena tumen vakeren:‘Dade, neka ovel sveto to anav,te avel to carstvo,3amaro šuko maro de amen sekova dive,4hem oprostin amare grevija,sar so amen oprostinaja sarinenge so grešinena amenge.Hem cide amen taro iskušenie.’ ”5Togaš o Isus phengja lenge: “Zamislinen deka ki ekvaš i rat džana ko tumaro amal hem vakerena leske: ‘Amala, te de man trin mare, i ka iranav len tuke.6Mo amal alo taro drumo ki mande, a man nane man so te ikavav anglo leste.’7A ov andral te phenel: ‘Ma dosadin man! O udar tano phandlo, a me čhave više pašlile mancar hem sovena. Našti akana te uštav hem te dav tut!’8Vakerava tumenge: nane te uštel hem nane te del le maro adaleske soj leskoro amal, nego ka uštel hem ka del le sa so trebela adaleske so leskere amale nane le ladž te ovel dosadno.9Adaleske vakerava tumenge: Pučen hem ka del pe tumenge; roden hem ka arakhen; khuven hem ka phravel pe tumenge.10Soske sekoj so pučela, dobinela; hem koj rodela, arakhela; a koj khuvela, ka phravel pe leske.11A kova dad tumendar: Ako rodela leskoro čhavo mačho, ka del le sap?12Ili ako rodela lestar jaro, ka del le škorpija?13Togaš, tumen so sijen lošna, džanena te den šukar poklojna tumare čhavenge, a kozom poviše tumaro Dad soj ko nebo ka del o Sveti Duh okolenge so rodena lestar.”
O Isus hem o Veelzevul
14Jekh dive o Isus ikalgja e demone so na mukhela sine jekhe manuše te kerel lafi. Koga iklilo o demoni, o manuš počmingja te kerel lafi. I o narodo sine začudime.15Ama nesave lendar phenge: “Akava ikalela e demonen e Veelzevuleskere silaja, o gospodari e demonengoro.”16A javera iskušinge e Isuse adaleja so rodinge lestar znako taro nebo.17Ama o Isus džanela sine lengere misle hem phengja lenge: “Sekova carstvo soj maškar peste delimo ka perel, hem kher kote so nane sloga ka perel.18Ako e Bengeskoro carstvo maškar peste delisalilo, sar šaj togaš ačhola leskoro carstvo? Akava vakerava adaleske so tumen phenena deka me ikalava e demonen e Veelzevuleskere silaja.19Ako me ikavava e demonen e Veelzevuleskere silaja, tumare učenikija kaskere silaja ikavena len? Adaleske ola ka oven tumare sudije.20Ama ako e Devleskere silaja ikalava e demonen, togaš e Devleskoro carstvo alo upra tumende.”21O Isus phengja akava da: “Koga zoralo manuš hem voružimo arakhela po kher, leskoro barvalipe tano arakhlo.22Ama koga avela nekoj soj pozoralo lestar, ka pobedinel le hem ka lel lestar o oružje ko savo nadingja pe o manuš hem ka delinel le pe manušencar adava so lela.23Koj nane mancar, ov tano protiv mande, a koj na khedela mancar, ov rasturinela.”Koga o lošno duho iranela pe
24“Koga o lošno duho iklola taro manuš, ov nakhela taro šuke thana rodindor odmor. Koga na arakhela vakerela: ‘Ka iranav man ko kher kotar so iklilum.’25I koga ka resel arakhela o kher čistimo hem namestimo.26Togaš džala hem lela peja efta javera duhija soj pološna lestar, hem ola khuvena hem živinena adathe. I ko krajo adava manuš ovela pološno nego angleder.”Blagoslovime tane okola so šunena e Devle
27Dži kote o Isus kerela sine lafi adalestar, jekh džuvli tari gužva vikingja: “Blagoslovimi tani i daj so bijangja tut hem so dengja tut thud!”28A o Isus phengja: “Poblagoslovime tane okola so šunena o lafi e Devleskoro hem kerena le!”O znako taro Jona
29Dži kote khedela pe sine i gužva, o Isus počmingja te vakerel: “Akaja generacija tani lošno. Rodela mandar znako, ama nisavo znako nane te del pe, osven o znako so ulo e prorokoja e Jonaja.30Soske, sar o Jona so sine znako e manušenge so živinena sine ki Ninevija, agjar o Čhavo Manušeskoro ka ovel znako akale generacijake.31Ko sudno dive, i kralica taro jug ka uštel protiv akaja generacija hem ka sudinel la, soske oj ali taro krajo e svetoskoro te šunel e Solomoneskiri mudrost, a akate tano nekoj pobaro taro Solomon.32Ko sudno dive, o manuša taro gradi Ninevija ka ušten protiv akaja generacija hem ka sudinen la, soske ola pokajnge pe koga o Jona propovedingja, a akate tano nekoj pobaro taro Jona.”I svetlina e teloskiri
33“Nikoj na tharela i momoli te čhivel la ko garavdo than ili te učharel la čareja, nego čhivela la ko lakoro than te šaj te dikhen i svetlina adala so khuvena.34Ti jakh tani svetlina te teloske. Koga te jakha tane saste, celo to telo tano pherdo svetlinaja. Ama koga ti jakh tani lošno, celo to telo tano pherdo temninaja.35Adaleske pazin i svetlina soj tute te na ovel temnina.36Adaleske, ako celo to telo tano pherdo svetlinaja, hem nijekh delo lestar nane temno, togaš celo to životo ka ovel osvetlimo sar koga i momoli svetinela tut pe svetloja.”Pharo e farisejenge hem e učitelenge e Zakoneskere
37Koga o Isus vakergja adava, jekh farisejco vikingja le te hal maro ki leste. I o Isus khugja leske ko kher hem alo uza ko astali.38A o farisejco čudingja pe koga dikhla deka o Isus, palo adeti, na thogja pe vasta angleder o hajbe.39Togaš o Gospodari o Isus phengja leske: “Oja, tumen o fariseja thovena avrijaldan i čaša hem i činija, a andral tumen sijen pherde so alčnost hem lošnipe.40Glupavonalen! Nane li o Devel okova so kergja e manuše, so džanela le hem avrijaldan hem andral?41Ama adava so isi tumen, den e čorolen hem sa ka ovel tumenge čisto.42Pharo tumenge e farisejenge, soske dena e Devleske desetok taro nane, ruta, hem taro sa o zelenčuk, a mukhlen te keren javerenge adava soj pravedno hem te mangen e Devle. Trebela te den o desetok, ama na trebela te bistren te keren adava soj najvažno.43Pharo tumenge e farisejenge, soske mangena te bešen ko prvo thana ko sinagoge hem so mangena o manuša te poštojnen tumen ko pazajra.44Pharo tumenge soske sijen sar bi označime grobija upro save o manuša phirena, a na džanena.”45Togaš jekh taro učitejla e Zakoneskere phengja e Isuseske: “Učitele, tu akale lafencar amen da uvredžineja.”46A o Isus odgovoringja: “Pharo tumenge da, e učitelenge e Zakoneskere! Čhivena upro manuša pharipe so edvaj šaj phiravena, a tumen ni najeja na mangena te mrdinen te pomožinen lenge.47Pharo tumenge, adaleske so kerena spomenikija e prorokonge so tumare parapapija mudarge len.48Adaleja vakerena deka soglasinena tumen ko adava so kerge tumare parapapija: ola mudarge e prorokon, a tumen kerena lenge spomenikija.49Adaleske o Devel mudro vakergja tumendar: ‘Ka bičhavav lenge prorokija hem apostojla. Nekas lendar ka mudaren, a nekas ka progoninen.’50Adaleske akale generacijatar ka rodel pe o rat sa e prorokongoro so thavdingja panda taro početok e svetoskoro,51panda taro rat e Aveleskoro sa dži ko rat e Zaharijaskoro, so sine mudardo maškar o žrtveniko hem o Sveto Than e Hrameskoro. Oja, vakerava tumenge, akaja generacija ka ovel osudimi bašo sa o rat so thavdingja!52Pharo tumenge, e učitelenge e Zakoneskere! Adaleske so lelen e manušendar o klučo bašo džandipe. Tumen korkori na khuvena ki leste, ni na mukhena okolen so mangena te khuven.”53I koga o Isus iklilo adathar, o fariseja hem o učitejla e Zakoneskere počminge inateja te protivinen pe hem te pučen le taro but bukja,54adžikerindor te astaren le ko nesavo lafi sar te šaj te tužinen le.The Word for the World International