لوقا1
1آ سِي تُوْفِيلُوْس، أَطّاس ن يِوْذَان ݣِّين اَذ اَرِين مِين يوقْعن غَارْنغ.2ؤُرِين نِيشَان عْلَاحْسَاب مَامْش ذَانغ خْبَرن ڒشْهُوْذ ذ يخدَّامن ن وَاوَاڒ ن أَربِّـي يدْجَان ذݣ ومزْوَارُو.3آ سِيذِي ؤُڒَا ذ نش تْغِيڒ-اَيِي مْلِيح اَذ ݣّغ اَذ اَرِيغ مِين يوقْعن وَامِي بحْثغ ذِي مَارَّا مَانَايَا مْلِيح. أَذَاش ث اَرِيغ ثَا س ثَا حمَا اَذ تسّْنذ ڒْحَقّ ن ثْمسْڒَايِين نِّي إِي ذَاش سڒْمَاذن.5تُوْغَا ذِي ڒْوقْث ن وزدْجِيذ هِيرُوْدُس نتَّا يحكّْمن خ ثْمُوْرْث ن يَهُوْذِيَا ذِنِّي يجّن ن ڒفْقِي نتَّا زِي لْفِرْقَا ن أَبْيُو قَّارن-اَس زَكَرِيَا. غَارس يجّن ن ثمْغَارْث زِي دُّوْرِّيث ن هَارُوْن نتَّاث قَّارن-اَس إِلِيزَابت.6زَكَرِيَا ذ إِلِيزَابت نِثْنِي ݣُّوْرن نِيشَان اَك أَربِّـي، ؤُڒ نْسن ذ اَشمْڒَاڒ. تݣّن مَارَّا مِين يُوْمَر ذ مَارَّا مِين يوصَّا سِيذِي أَربِّـي.7وَلَكِن وَار غَارْسن بُو يحنْجِيرن مِينْزِي إِلِيزَابت وَار تِيرو شَا. عَاوذ نِثْنِي س ثْنَاين إِذْسن مْغَارن اَطَّاس.8ئِجّن ن نْهَار زَكَرِيَا ثُوْوض-د نُّوْبَا نّس اَذ يخْذم ذِي ثمْزِيذَا ذ ڒفْقِي زَّاث إِ أَربِّـي اَك لْفِرْقَا نّس.9ݣِّين لْقُرْعَا عْلَاحْسَاب تَّقَلِيد نْسن إِي تݣّن ڒْفُقَهَا. نْهَار نِّي ثُوْسَا-د لْقُرْعَا ذِي زَكَرِيَا بَاش اَذ يَاذف غَار ثمْزِيذَا ثَمقّْرَانْت ن سِيذِي أَربِّـي حمَا اَذ يشعّڒ تْبَخُوْر ذِنِّي.10وَامِي يتْشعَّاڒ تْبَخُوْر، مَارَّا شَّعْب نِّي إِي ذِنِّي يمُوْنن قِّيمن غَار بَارَّا إِ ثمْزِيذَا تْࢲَدْجَان.11ڒخْدّنِّي يمظْهَار-اَس-د إِ زَكَرِيَا يجّن ن لْمَلَاك ن سِيذِي أَربِّـي يبدّ خ وفُوْسِي ن ڒْمذْبَح ن تْبَخُوْر.12زَكَرِيَا وَامِي ث يࢲْرَا ينخْڒع، ئِݣّْوذ.13ينَّا-ٱس لْمَلَاك نِّي: "آ زَكَرِيَا وَار تݣّْوذ شَا، قَا يسْتَاجب-اَش أَربِّـي ذِي مِين ذَاس ثتَّارذ. ثَمْغَارْث نّش إِلِيزَابت اَذَاش د ثجّ يجّن ن وحنْجِير، أَث ثسمِّيذ شك يَحْيَى.14سَّعْذ نّش اَذ تْفَرْحذ. خْمِي د غَا يخْڒق اَزَّايس فَرْحن اَطَّاس ن يِوْذَان15مِينْزِي اَذ يِيڒي ذ اَمقّْرَان غَار سِيذِي أَربِّـي. أَذ تِيڒِي لَابُد عمَّارْص اَذ يسو اَمَان ن وضِيڒ نِغ ذ وَامَان ن يمنْدِي. أَذ يِيڒِي يعمَّر س اَرُّوح يقدّْسن حتَّا ذݣ وعدِّيس ن يمَّاس.16أَذ يَارّ اَطَّاس ن أَيْث-إِسْرَائِيل غَار سِيذِي أَربِّـي نْسن.17أَذ يُوْيُوْر زَّاث إِ سِيذِي أَربِّـي س يِجّن ن اَرُّوْح يجْهذ اَم ونِّي ن نَّبِي إِلْيَاس. أَذ يسْمصْڒَاح لْوَالِدِين اَك ثَارْوَا نْسن. أَذ يَارّ يِنِّي يعصَّان غَار وبْرِيذ ن يِنِّي يدْجَان نِيشَان حمَا اَذ يسوْجذ شَّعْب إِ سِيذِي أَربِّـي اَذ يڒِين وجْذن."18ينَّا-ٱس زَكَرِيَا إِ لْمَلَاك نِّي: "مَامّش غَا سّْنغ نش مَانَايَا ذ صَّح؟ قَا نش وسَّارغ، ثَمْغَارْث ينُو ثوْسَر."19ئِنْدق-د لْمَلَاك نِّي ينَّا-ٱس: "قَا نش ذ جِبْرِيل ذ ونِّي يتْبدَّان زَّاث إِ أَربِّـي، ئِسّكّ-اَيِي-د أَربِّـي غَارش بَاش اَكِش سِّيوْڒغ اَذَاش ينِيغ ڒخْبَار-أَ يسْفَرَّاحن.20ڒخُّو شك اَذ تِيڒِيذ ذ اَزينُوْن. وَار ثسِّيوِيڒذ شَا حتَّا اَڒ نْهَار نِّي إِي غَا يوْقع مَانَايَا مِينْزِي شك وَار ثُوْمِينذ شَا زݣ وَاوَاڒ ينُو ونِّي إِي د غَا يفّْغن نِيشَان ذِي ڒْوقْث نّس."21شَّعْب قِّيمن تْرَاجَان زَكَرِيَا، تْعجّْبن وَامِي يعْظڒ اَطَّاس غَار ذَاخڒ ذِي ثمْزِيذَا ثَمقّْرَانْت.22وَامِي د يفّغ سّنِّي وَار يزمَّر شَا اَكِذْسن يسِّيوڒ، ئِقِّيم يسَّاوَاڒ اَكِذْسن س يفَاسّن وَاهَا. سّنِّي فهْمن يمظْهَار-اَس-د لْوَحِي غَار ذَاخڒ ذِي ثمْزِيذَا ثَمقّْرَانْت يذْوڒ ذ اَزينُوْن.23وَامِي عْذُوْن وُوْسَّان ن ڒْخذْمث نّس يذْوڒ غَار ثدَّارْث نّس.24منْبَعد ثيْسِي ثمْغَارْث نّس إِلِيزَابت اَعدِّيس ثقِّيم خمْس شْهُوْر ثسْنُوْفَّر يخْف نّس.25ثقَّار: "ذ مَانَايَا إِي ذَايِي يُوْشَا سِيذِي أَربِّـي ذِي نْهَار وَامِي ذَايِي يفْقذ حمَا اَخَافِي يكّس ڒْعِيب ن يِوْذَان."26إِلِيزَابت وَامِي ثدْجَا ذِي شْهَار وِيس ستَّا، ئِسّكّ-د أَربِّـي يجّن ن لْمَلَاك قَّارن-اَس جِبْرِيل غَار يِجّن ن وبِيلَاج ذِي ثْمُوْرْث ن لْجَلِيل قَّارْن-اَس نَاصِرَا.27ئِرُوْح غَار يِجّن ن ثعْزْرِيث قَّارن-اَس مَرْيَم ثنِّي إِي كذ يݣَّا زُّوْجِيَا يجّن ن ورْيَاز زِي دُّوْرِّيث ن دَاود نتَّا قَّارن-اَس يُوْسف.28يُوْذف غَارس لْمَلَاك نِّي ينَّا-ٱس: "آزُوْل يَا ثنِّي إِي خف يرْضَا أَربِّـي، أَقَا سِيذِي أَربِّـي اَقَاث اَكِذم."29ذِنِّي مَرْيَم ثْنخْڒع وَامِي ثسْڒَا إِ وَاوَاڒن نّس. ثْرزُّو اَذ تْميّز مِين يعْنَا سْڒَام نِّي؟30ينَّا-ٱس لْمَلَاك نِّي: "وَار تݣّْوذ شَا آ مَرْيَم، أَقَا شم يَارْضَا خَام أَربِّـي!31أَذ تيْسِيذ اَعدِّيس، أَذ د تجّذ يجّن ن وحنْجِير اَث تْسمِّيذ عِيْسَى.32أَذ يِيڒِي يمْغَر، أَتَاف تْڒَغَان-اَس آ مِّيس ن ونِّي يُوْعْڒَان. أَذَاس يُوْش سِيذِي أَربِّـي نّس لْعَرْش ن جدِّيس اَمقّْرَان دَاود.33أَذ يحْكم خ ڒْقُم ن يَعْقُوْب إِ ڒبْدَا، ڒْمُلْك نّس عمَّارْص اَذ يفْنَا."34ثنَّا-ٱس مَرْيَم إِ لْمَلَاك نِّي: "مَامّش إِي غَا يِيڒِي مَانَايَا؟ أَقَا نش عَاذ ذ ثَعْزْرِيث."35ئِنْدق-د لْمَلَاك نِّي ينَّا-ٱس: "أَخَام د يهْوَا اَرُّوْح يقدّْسن ذ جّْهذ ن ونِّي يُوْعْڒَان اَخَام يَارّْ ثِيڒِي. س مَانَاينِّي اَحنْجِير يقدّْسن إِي غَا د ثجّذ اَتَاف تْڒَغَان-اَس آ مِّيس ن أَربِّـي.36إِلِيزَابت ثنِّي يدْجَان زِي ڒحْبَاب نّم، وَاخَّا نتَّاث ثمْغَار اَقَات س وعدِّيس. أَقَات ذِي شْهَار وِيس ستَّا وَاخَّا تْڒَغَان-اَس يِوْذَان آ ثنِّي وَار يتِيرْون شَا.37وَار ثدْجِي بُو شَان ڒْحَاجث ثقْسح غَار أَربِّـي."38ثنَّا-ٱس مَرْيَم: "نش اَقَايِي ذ ثَخدَّانْت غَار سِيذِي أَربِّـي، أَرْضِيغ خ وَاوَاڒ نّش اَذَايِي يوْقع." سّنِّي يرُوْح خَاس لْمَلَاك نِّي.39ذݣ وُوْسَّان نِّي ثكَّر مَرْيَم ثْرُوْح س ثَازّْڒَا غَار وذْرَار غَار يِجّن ن وبِيلَاج ذِي ثْمُوْرْث ن يَهُوْذِيَا.40ثُوْذف غَار ثدَّارْث ن زَكَرِيَا ثْسدْجم خ إِلِيزَابت.41وَامِي ثسْڒَا إِلِيزَابت إِ سْڒَام ن مَرْيَم، ئِنْهزّ وسيْمِي نِّي ذݣ وعدِّيس نّس، نتَّاث ثشُّوْر س أَرُّوْح يقدّْسن.42ثْڒَاغَا س يِجّن ن ثْمِيجَّا ثجْهذ ثنَّا:"شم تْوَابَرْكذ جَار ثمْغَارِين،عَاوذ يتْوَابَرك ونِّي إِي يدْجَان ذݣ وعَدِّيس نّم!43نْهَارَا ذ نْهَار ذ اَمقّْرَان إِ نش وَامِي غَارِي د تُوْسَا يمَّاس ن سِيذِي!44وَامِي د تُوْسِيذ سْڒِيغ إِ سْڒَام نّم، ئِنْهزّ وعدِّيس ينُو س ڒفْرَاحث.45آ سَّعْذ ن ثنِّي يُوْمْنن مِين ذَاس ينَّا سِيذِي أَربِّـي اَذ يِيڒِي."46أُوْشَا ثنَّا مَرْيَم:"ڒَعْمَر ينُو يحمّذ سِيذِي أَربِّـي،47أَرُّوح ينُو يفَرح زِي أَربِّـي إِي ذَايِي يسْنجْمن.48ئِࢲْرَا-ٱيِي ذ ثَخدَّانْت نّس ذ ثَدْرِيوشْت وَاهَا.سَّا اَڒ ثْسَاونْت مَارَّا يوْذَان اَذَايِي حسّْبن ذ ثَمِيمُوْنْت،49مِينْزِي ونِّي يزمَّرن يݣّا-ٱيِي اَطَّاس ن ثْمسْڒَايِين ثِمقّْرَانِين.نتَّا يسم نّس ذ اَمقّْرَان،50أَرَّحْمث نّس ثدْجَا زِي لْجِيل غَار لْجِيل إِ يِنِّي ث يتݣّْوْذن.51ئِݣَّا س وفُوْس نّس ڒخْذَايم ذ ثِمقّْرَانِين،ئِشتَّت يِنِّي يحسْبن يخف نْسن ذ يمقّْرَانن.52ئِسهْوَا-د يزدْجِيذن زِي لْعَرْشَاث نْسن،يسْݣَعّذ يِنِّي يدْجَان ذ ذْرَاوش.53ئِسجِّيْون س ڒْخِير نّس يِنِّي يدْجُوْزن،ئِسّكّ تْوَاجَر س يفَاسّن نْسن خْوَان.54ئِعَاون أَيْث-إِسْرَائِيل إِي يدْجَان ذ ڒْعَبْذ نّس عْلَاحْسَاب اَرَّحْمث نّس،55مَامْش يوْعذ ڒجْذُوْذ نّغ،بْرَاهِيم ذ دُّوْرِّيث نّس إِ ڒبْدَا."56ثقِّيم مَرْيَم اَك إِلِيزَابت شَان ثڒْت شْهُوْر سّنِّي ثعْقب-د غَار ثدَّارْث نّس.57وَامِي د ثُوْوض ڒْوقْث ن إِلِيزَابت اَذ تَارو، ثجَّا-د اَحنْجِير.58جِّيرَان نّس ذ ڒحْبَاب نّس فَرْحن اَكِذس وَامِي غَارْسن ڒخْبَار بلِّي سِيذ أَربِّـي يرْضَا خَاس اَطَّاس.59ثعْذُو ثْمنْيَام، ؤُسِين-د يِوْذَان حمَا اَث طهَّارن. رزُّوْن اَذَاس سمَّان زَكَرِيَا خ يِيسم ن بَابَاس،60وَلَكِن يمَّاس ثُوْݣِي ثنَّا-ٱسن: "لَّا، أَث نْسمَّا يَحْيَى."61نَّان-اَس: "ؤُڒَا ذ يجّن زِي ڒحْبَاب نّمْ مَا يسمَّا س يِيسم-أَ."62سّقْسَان بَابَاس س يفَاسّن: "مَامّش ثخْسذ شك اَث تسمِّيذ؟"63ئِتَّار زَكَرِيَا يجّن ن ثَڒْوِيحت يُوْرَا ذَايس: "ئِسم نّس يَحْيَى." قِّيمن يِوْذَان نِّي تْعجّْبن مَارَّا إِذْسن.64ذݣ ومْشَان ينْدق زَكَرِيَا يبْذَا يسَّاوَاڒ يحمّذ أَربِّـي.65ݣّْوْذن مَارَّا جِّيرَان. بْذَان سَّاوَاڒن يِوْذَان خ مَارَّا مَانَايَا ذِي مَارَّا يذُوْرَار ن ثْمُوْرْث ن يَهُوْذِيَا.66مَارَّا ؤُݣ يتسْڒَان خ ثْمسْڒَايِين-أَ قّارن ذݣ وُوْڒَاون نْسن، مِين غَا يذْوڒ وحنْجِير-أَ؟ مِينْزي فُوْس ن سِيذِي أَربِّـي اَقَاث اَكِذس.67زَكَرِيَا بَابَاس ن يَحْيَى، يشُّوْر س أَرُّوْح يقدّْسن، ئِسِّيوڒ س مِين يعْڒم زِي أَربِّـي ينَّا:68"لْحَمْدُ لِلَّه إِ سِيذِي أَربِّـي ن أَيث-إِسْرَائِيل،ڒَاحقَّاش يفْقذ شَّعْب نّس يفكّ-يث.69ئِسْمظْهَار-اَنغ-د ونِّي ذݣ يدْجَا جّْهذ إِي ذَانغ غَا يسْنجْمن،يُوْسَا-د زِي دُّوْرِّيث ن دَاود ڒْعَبْذ ن أَربِّـي.70مَانَايَا يسِّيوڒ س يِيڒسَاون ن لْأَنْبِيَا صَّالِحِين اَطَّاس زݣ وَامِي،71أَذَانغ يسنْجم زِي ڒْعَذْيَان نّغ،عَاوذ زݣ يفَاسّن ن مَارَّا يِنِّي ذَانغ يتْعِيفَّان.72أَذ د يسْمظْهَار اَرَّحْمث نّس إِي زِي يوْعذ ڒجْذُوْذ نّغ،أَذ يعْقڒ خ ڒْعَهذ نّس يقدّْسن.73يُوْشَا-اَس ڒْعَهذ إِ جدِّيثْنغ بْرَاهِيم،74أَذَانغ يسنْجم زݣ يفَاسّن ن ڒْعَذْيَان نّغ،حمَا اَث نعْبذ بْڒَا ثِيݣّْوْذِي،75س وُوْڒ يصْفَا ذ اَشمْڒَاڒ إِ مَارَّا ثُوْذَارْث نّغ.76ئِي شك آي اَحنْجِير،أَذَاش تْڒَغَان نَّبِي ن ونِّي يُوْعْڒَان،مِينْزِي اَذ تُوْيُوْرذ غَار زَّاث حمَا اَذ تسْوجْذذ اَبْرِيذ إِ سِيذِي أَربِّـي.77عَاوذ اَذ تسْڒمْذذ إِ شَّعْب نّس خ وسنْجم،يعْنِي مَامش إِي غَا تْوَاغْفَرنْت ڒْمُعْصِيَاث نْسن.78مِينْزِي أَربِّـي نّغ ذ اَرَحْمَان ذ اَرَحِيم،ئِفْقذ-اَنغ-د زݣ وجنَّا خْمِي ثْغدْجِي ثْفُوْشْت.79حمَا اَذ يُوْش ثْفَاوْث إِ يِنِّي يتْعِيشن ذِي ثَادْجسْت ذِي ثِيڒِي ن ڒْموْث،حمَا اَذَانغ يسُوْيُوْر يضَارن نّغ غَار وبْرِيذ ن ڒهْنَا."80تُوْغَا اَحنْجِير يتمْغَار يتجْهِيذ س اَرُّوْح نّس. ئِزدّغ ذِي ڒخْڒَا اَڒ وَامِي د يمظْهَار إِ أَيْث-إِسْرَائِيل.
Wycliffe Bible Translators, Inc.