لوقا2
1ذِي ڒِيَّام نِّي اَزدْجِيذ قَيْصَر أَݣُسْطُس يُوْشَا لْأَمَار اَذ حسْبن مَارَّا يمزْذَاغ ن ثْمُوْرَا إِي ذِي يحْكم.2أَحْسَاب-أَ اَمزْوَارُو يوْقع وَامِي يحْكم كُرِينُوْس ذِي ثْمُوْرْث ن سُوْرْيَا.3رُوْحن مَارَّا يوْذَان حمَا اَذ سجّْلن، كُڒ يجّن يرُوْح غَار وبِيلَاج نّس.4ئِݣَعّذ يُوْسف زِي ثْمُوْرْث ن لْجَلِيل زݣ وبِيلَاج ن نَاصِرَا يرُوْح غَار ثْمُوْرْث ن يَهُوْذِيَا غَار وبِيلَاج ن دَاود ونِّي ؤُمِي قَّارن بَيْت لَحْم مِينْزِي نتَّا زِي دُّوْرِّيث ن دَاود ذ ڒحْبَاب نّس.5ئِݣَعّذ ذِنِّي اَذ يسجّل نتَّا ذ مَرْيَم ثنِّي إِي كذ يݣَّا زُّوْجِيَا، نتَّاث اَقَات س وعدِّيس.6وَامِي ؤُوْضن ذِنِّي، ثُوْوض-د ڒْوقْث نّس حمَا اَذ تَارو.7ثُوْرو مِّيس اَمنْزُو ثْصحْنُوْنّض-يث ثݣِّي-ث ذِي ڒْمذْوذ مِينْزِي وَار ؤُفِين بُو ومْشَان ذِي ثدَّارْث ن يمْسَافَرن.8تُوْغَا ذِنِّي اَڒ جِّهث نِّي يمكْسَاون حطَّان ثِيحِيمرِيوِين نْسن س دْجِيڒث.9ثُوْسَا-د يجّن ن لْمَلَائِكَا ن سِيذ أَربِّـي ثبدّ-د غَارْسن، ئِتْشعْشِيع نُّوْر ن لْعَظَمَا ن سِيذ أَربِّـي ينّض-د خَاسن ݣّْوْذن اَطَّاس.10ثنَّا-ٱسن لْمَلَائِكَا نِّي: "وَار تݣّْوْذم شَا. أَقَا نش تْبشَّارغ-كنِّيو س يِجّن ن ڒخْبَار يمْغَر اَطَّاس اَزَّايس يفَرح مَارَّا شَّعْب.11ئِخْڒق-د نْهَارَا ذݣ وبِيلَاج ن دَاود ونِّي إِي كنِّيو غَا يسْنجْمن، نتَّا ذ سِيذِيثْنغ لْمَسِيح.12كنِّيو اَذ تَافم يجّن ن لْعَلَامَا اَذ تَافم يجّن ن وسيْمِي يحْنُوْنّض يطّس ذِي ڒْمذْوذ."13عْلَاغَفْلَا مظْهَارن-د اَك لْمَلَائِكَا نِّي اَطَّاس ن يمزْذَاغ ن وجنَّا حمّْذن أَربِّـي قَّارن:14"لْعَظَمَا إِ أَربِّـي يُوْعْڒَان،ذ ڒهْنَا ن يِنِّي ذِي ثْمُوْرْث مِيخف يرْضَا."15وَامِي رُوْحنْت لْمَلَائِكَاث نِّي عقْبنْت غَار وجنَّا، سِّيوْڒن يمكْسَاون نِّي جَارَاسن نَّان: "يَالَّاهت أَ نْرَاحث غَار بَيْت لَحْم أَ نْࢲر مَانَايَا إِݣ يوقْعن مِين خَانغ يسِّيوڒ سِيذِي أَربِّـي."16رُوْحن ذغْيَا ؤُفِين مَرْيَم ذ يُوْسف ذ وسيْمِي نِّي يطّس ذِي ڒْمذْوذ.17وَامِي ث ؤُفِين ذِنِّي، كَّرن خْبَرن يوْذَان مِين ذَاسن ثنَّا لْمَلَائِكَا نِّي خ وحنْجِير-أَ.18مَارَّا ونِّي يتْسْڒَان يتْعجّب ذݣ وَاوَاڒ نِّي إِي ذَاسن نَّان يمكْسَاون.19أَمَّا مَرْيَم، ثْخمّڒ مَارَّا ثِمسْڒَايِين-أَ ذݣ وُوْڒ نّس تْخمَّام ذَايْسنْت.20سّنِّي عقْبن يمكْسَاون نِّي سمْغَارن أَربِّـي حمّْذن-ث خ مَارَّا مِين سْڒِين ذ مِين ࢲْرِين، ؤُفِين ثِمسْڒَايِين نِّي وقْعنْت نِيشَان اَمشْنَاو مَامْش ذَاسن ثنَّا لْمَلَائِكَا نِّي.21وَامِي يكمّڒ وحنْجِير نِّي ثْمنِيَّام حمَا اَذَايس يطهَّار، سمَّان-ث عِيْسَى س يِيسم نِّي مَامْش ث يسمَّا لْمَلَاك نِّي زِي قْبڒ مَا ٱذ يِيڒي ذݣ وعْدِيس ن يمَّاس.22وَامِي كمّْڒن وُوسَّان نِّي إِي ذِي تݣّن رُوْضُو بَاش لْوَلِدِين نّس اَذ يڒِين صْفَان عْلَاحْسَاب شَّرِيعَا ن مُوْسَى، ؤُوِين-ث غَار ثنْذِينْت ن لْقُدْس حمَا اَخَاس تَّارن إِ سِيذ أَربِّـي.23أَمُّو إِݣ يُوْرِي ذِي لْكِتَاب ن سِيذ أَربِّـي: <مْكُڒ مِّيس اَمنْزُو اَذ يِيڒِي ذ اَمقّْرَان غَار سِيذ أَربِّـي.>24عَاوذ بَاش اَذ قدّْمن يجّن ن دْبِيحث مَامْش د يُوْسَا ذِي لْكِتَاب ن سِيذ أَربِّـي: <ثْنَاين ن ثذْبِيرِين ن ڒخْڒَا، نِغ ثْنَاين ن ثذْبِيرِين ذ ثِمزْيَانِين.>25تُوْغَا ذِنِّي ذِي ثنْدِينْت ن لْقُدْس يجّن ن بْنَاذم قَّارن-اَس شِمْعُوْن. ئِݣُّوْر نِيشَان، يتݣّْوذ أَربِّـي، ئِتْرَاجَا أَيث-إِسْرَائِيل اَذ نجْمن، أَرُّوْح يقدّْسن اَقَاث خَاس.26تُوْغَا نتَّا يخْبَر-يث أَرُّوْح يقدّْسن وَار يتْمتِّي شَا اَڒ غَا يࢲر لْمَسِيح ن سِيذ أَربِّـي.27ئِكَّر شِمْعُوْن يسُوْيُوْر-يث أَرُّوْح يقدّْسن غَار ثمْزِيذَا ثَمقّْرَانْت. وَامِي ؤُذْفن لْوَالِدِين ن عِيْسَى حمَا اَذَاس ݣّن مِين ثقَّار شَّرِيعَا ن مُوْسَى،28يُوْفَا شِمْعُوْن اَحَرْمُوْش نِّي يِيسِي-ث جَار يفَاسّن نّس يشكَّر أَربِّـي ينَّا:29"يَا مُوْلَانَا، اجّ-اَيِي ڒْعَبْذ نّش اَذ رَاحغ ڒخُّو غَار ثدَّارْث ن ڒهْنَا، أَمشْنَاو مَامْش ثنِّيذ شك س وَاوَاڒ نّش.30مِينْزِي ثِيطَّاوِين ينُو ࢲْرِينْت اَسنْجم نّش،31إِي ثسْوجْذذ إِ مَارَّا يوْذَان.32نتَّا ذ يجّن ن نُّوْر إِي ثسْمظْهَارذ إِ ڒݣْنُوْس، نتَّا ذ يجّن ن لْعَظَمَا ن شَّعْب نّش ن أَيْث-إِسْرَائِيل."33بَابَاس ذ يمَّاس قِّيمن تْعجّْبن ذِي مِين خَاس يتْوَانَّان.34ئِبَرك-يثن شِمْعُوْن ينَّا-يَاس إِ يمَّاس مَرْيَم:"أَقَا وَانِيتَا يݣِّي-ث سِيذِي أَربِّـيأَذ د يسهْوَا اَذ يسِيڒِي اَطَّاس ن يِوْذَان ذِي أَيْث-إِسْرَائِيل.نتَّا ذ يجّن ن لْعَلَامَا اَتَاف وَار ت تْخِيسن شَا،35أَذ نْفضْحن لْأَفْكَار ن وَاطَّاس ن وُوْڒَاون.ذ يجّن ن لْحُزن اَم سِّيف يقضْعن اَذ يشُوْكّ ڒْعَمَر نّم."36تُوْغَا ذِنِّي عَاوذ يجّن ن نَّبِيَا ذ ثَوسَّارْث قَّارن-اَس حَنَان نتَّاث ذ يدْجِيس ن فَنْوِيل زِي ثقْبِيڒْث ن عَشُوْر. ثْعِيش اَك ورْيَاز نّس سبْعَا يسݣّْوُسَا.37ڒخْدّنِّي يمُّوْث نتَّا، ثقِّيم نتَّاث ذ ثَاجَّاڒْث حتَّا وَامِي ثمُّوْث خ اَرْبعَا أُو ثْمَانِين يسݣّْوُسَا. تْغِيمَا ڒبْدَا ذِي ثمْزِيذَا ثَمقّْرَانْت، ثْعبّذ أَربِّـي تْࢲُوْمَّا تْࢲَادْجَا دْجِيڒث ذ وَاسّ.38ذِي ڒْوقْث نِّي ثُوْسَا-د ثْحمّذ أَربِّـي ثسِّيوڒ خ وحنْجِير نِّي اَك مَارَّا يِنِّي يتْرَاجَان نْهَار نِّي ذِي غَا يفكّ أَربِّـي لْقُدْس.39وَامِي يُوْسف ذ مَرْيَم صَافِي كمّْڒن مَارَّا مِين زَّايْسن ثُوْمَر شَّرِيعَا ن سِيذ أَربِّـي، ذوْڒن غَار ثْمُوْرْث ن لْجَلِيل غَار وبِيلَاج نْسن ن نَاصِرَا.40عِيْسَى يتمْغَار يتجْهِيذ يتْشَار س ڒفْهَامث، خَاس اَرْضَا ن أَربِّـي.41لْوَالِدِين نّس تْرَاحن مْكُڒ اَسݣّْوَاس غَار لْقُدْس ذِي ڒْعِيذ اَمقّْرَان ن أَيث-إِسْرَائِيل.42عِيْسَى وَامِي يُوْوض ثنْعَاش ن يسݣّْوُسَا، ݣَعّْذن غَار لْقُدْس عْلَاحْسَاب تَقَلِيد ن ڒْعِيذ.43وَامِي كمّْڒن وُوْسَّان ن ڒْعِيذ روّْحن نتَّا يقِّيم ذِي لْقُدْس، وَلَكِن نِثْنِي وَار سِّينن شَا بلِّي نتَّا عَاذ يقِّيم ذِنِّي.44تْغِير-اَسن اَقَاث اَكِذْسن اَك لْمجْمَع نْسن. ؤُيُوْرن نْهَار يكْمَاڒ، بْذَان رزُّوْن خَاس جَار فَامِلْيَا ذ يمدُّوْكَاڒ.45وَامِي وَار ث ؤُفِين شَا، ذوْڒن غَار ثنْدِينْت رزُّوْن خَاس.46كِّين ثڒْتِيَّام أُوْشَا ؤُفِين-ث يقِّيم ذِي ثمْزِيذَا ثَمقّْرَانْت جَار يِنِّي يسڒْمَاذن، ئِتْسْڒَا-يَاسن يتْسقْسَا-ثن.47مَارَّا يِنِّي ذَاس يتْسْڒَان تْعجّْبن ذَايس س ڒَعْقڒ نّس ذ لْجَاوَبَاث نّس.48وَامِي ث ࢲْرِين لْوَلِدِين نّس تْعجّْبن ذَايس، ثنَّا-ٱس يمَّاس: "مَايْمِي ذَانغ ثݣِّيذ اَمُّو؟ أَقَا نش ذ بَابَاش نْرزُّو خَاك، ثجِّيذ-اَنغ ذِي ڒَعْذَاب."49ينَّا-ٱسن عِيْسَى: "مَايْمِي خَافِي ثْرزُّوْم؟ مَا وَار ثسِّينم شَا بلِّي نش يتْخصَّا-ٱيِي اَذ يڒِيغ ذِي ثدَّارْث ن بَابَا؟"50وَار ذَاس فْهِيمن شَا إِ وَاوَاڒ نِّي إِي ذَاسن ينَّا.51ئِذْوڒ-د اَكِذْسن غَار نَاصِرَا يتݣّ-اَسن اَرَّاي. يمَّاس تْخمَّام ذِي مَارَّا مَانَايَا ذݣ وُوْڒ نّس.52عِيْسَى يَرنِّي ذِي ڒفْهَامث ذ طُّوْل، ئِتمْغَار ذِي اَرْضَا غَار أَربِّـي ذ ڒْعَبْذ.
Wycliffe Bible Translators, Inc.