阅读𐴇𐴞𐴁𐴌𐴝𐴕𐴞𐴀𐴡𐴥𐴓𐴢 7

𐴇𐴞𐴁𐴌𐴝𐴕𐴞𐴀𐴡𐴥𐴓𐴢7

𐴀𐴞𐴔𐴝𐴔 𐴔𐴝𐴓𐴑𐴞𐴥𐴎𐴝𐴊𐴠𐴑𐴡𐴌 𐴉𐴡𐴌𐴞𐴏𐴡

¹𐴇𐴠𐴥 𐴔𐴝𐴓𐴑𐴞𐴥𐴎𐴝𐴊𐴠𐴑 𐴀𐴝𐴐𐴧𐴞𐴥𐴓𐴢 𐴊𐴠 𐴏𐴝𐴓𐴠𐴔 𐴐𐴡𐴥𐴀𐴌𐴡𐴌 𐴁𐴝𐴀𐴣𐴐𐴧𐴝 𐴀𐴠𐴊𐴧𐴠 𐴀𐴝𐴓𐴧𐴝 𐴃𐴝𐴥𐴓𐴝𐴌 𐴀𐴞𐴔𐴝𐴔. 𐴀𐴞𐴥𐴁𐴝𐴘𐴠 𐴎𐴠𐴣𐴃𐴧𐴠𐴥 𐴀𐴞𐴁𐴌𐴝𐴇𐴞𐴥𐴔𐴠 𐴁𐴝𐴀𐴣𐴐𐴧𐴝 𐴀𐴡𐴥𐴑𐴧𐴡𐴓𐴡𐴌𐴠 𐴇𐴝𐴥𐴌𐴝𐴘 𐴖𐴝𐴦𐴉𐴠𐴏𐴢 𐴀𐴝𐴘𐴧𐴠𐴤𐴌, 𐴇𐴠𐴥𐴣𐴃𐴧𐴠 𐴘𐴡𐴥𐴒𐴧𐴗𐴝 𐴓𐴧𐴡𐴥𐴘 𐴔𐴞𐴓𐴧𐴞𐴥𐴓𐴢 𐴀𐴠𐴊𐴧𐴠 𐴘𐴡𐴥𐴒𐴧𐴗𐴝𐴌𐴠 𐴁𐴡𐴌𐴈𐴡𐴃𐴢 𐴊𐴞𐴀𐴓𐴢,²𐴀𐴝𐴦𐴌 𐴀𐴞𐴁𐴌𐴝𐴇𐴞𐴥𐴔𐴠 𐴀𐴞𐴥𐴁𐴝𐴌𐴠 𐴓𐴟𐴄𐴢 𐴒𐴡𐴙𐴅𐴧𐴝𐴥 𐴇𐴝𐴥𐴀𐴌 𐴑𐴠𐴏𐴧𐴟𐴥𐴌 𐴊𐴡𐴐𐴢 𐴁𐴝𐴥𐴑𐴡𐴌 𐴀𐴠𐴑 𐴁𐴝𐴥𐴑 𐴊𐴞𐴦𐴉𐴠𐴥𐴓𐴝𐴙𐴓𐴢. 𐴀𐴝𐴒𐴡𐴃𐴧𐴟 𐴈𐴡𐴘𐴃𐴡𐴤 𐴏𐴝𐴘𐴓𐴠𐴥, 𐴔𐴝𐴓𐴑𐴞𐴥𐴎𐴝𐴊𐴠𐴑 𐴕𐴝𐴔𐴡𐴌 𐴔𐴝𐴀𐴕𐴞 𐴀𐴡𐴥𐴙𐴓𐴊𐴠 ”𐴉𐴡𐴌𐴇𐴠𐴥𐴏𐴒𐴝𐴌𐴞𐴌 𐴁𐴝𐴀𐴣𐴐𐴧𐴝,“ 𐴀𐴝𐴦𐴌 𐴏𐴝𐴓𐴠𐴔𐴡𐴌 𐴁𐴝𐴀𐴣𐴐𐴧𐴝𐴌 𐴔𐴝𐴀𐴕𐴞 𐴀𐴡𐴥𐴙𐴓𐴊𐴠 ”𐴐𐴝𐴥𐴕𐴃𐴞𐴌 𐴁𐴝𐴀𐴣𐴐𐴧𐴝.“³𐴀𐴞𐴥𐴁𐴝 𐴁𐴝𐴉𐴢 𐴏𐴝𐴥𐴌𐴝, 𐴔𐴝𐴦 𐴏𐴝𐴥𐴌𐴝, 𐴀𐴠𐴊𐴧𐴠 𐴇𐴡𐴕𐴡𐴤 𐴉𐴞𐴏𐴧𐴝𐴥𐴕 𐴏𐴝𐴥𐴌𐴝, 𐴀𐴞𐴥𐴁𐴝𐴌 𐴇𐴡𐴥𐴘𐴧𐴝𐴃𐴡𐴌 𐴐𐴟𐴥𐴌𐴟 𐴘𐴡𐴥 𐴕𐴝𐴥𐴘 𐴉𐴟𐴥𐴌𐴝𐴕𐴃𐴞 𐴘𐴡𐴥 𐴕𐴝𐴥𐴘, 𐴁𐴡𐴥𐴓𐴑𐴠 𐴀𐴞𐴥𐴁𐴝 𐴀𐴝𐴓𐴧𐴝𐴌 𐴉𐴟𐴖𐴝𐴌 𐴋𐴡𐴥𐴙𐴓𐴧𐴝 𐴀𐴞𐴥𐴏𐴝𐴉𐴠, 𐴀𐴝𐴁𐴝𐴊𐴟𐴓𐴀𐴝𐴁𐴝𐴊𐴢 𐴉𐴡𐴙𐴅𐴧𐴡𐴕𐴃𐴡 𐴀𐴞𐴔𐴝𐴔 𐴃𐴝𐴥𐴘𐴒𐴞𐴘𐴡𐴘.

⁴𐴘𐴝𐴓𐴝 𐴁𐴝𐴥𐴉𐴞𐴏𐴡 𐴔𐴝𐴕𐴟𐴥𐴙𐴐𐴢 𐴀𐴞𐴥𐴁𐴝 𐴇𐴡𐴃𐴡𐴥 𐴋𐴡𐴣𐴀𐴌 𐴀𐴝𐴐𐴧𐴞𐴥𐴓𐴢, 𐴎𐴞𐴁𐴝𐴤𐴌𐴠 𐴀𐴝𐴣𐴀𐴌𐴝𐴌 𐴑𐴡𐴗𐴔𐴡𐴌 𐴁𐴝𐴉𐴢 𐴀𐴞𐴁𐴌𐴝𐴇𐴞𐴥𐴔𐴠 𐴎𐴞𐴀𐴕 𐴓𐴟𐴄𐴢 𐴒𐴡𐴙𐴅𐴧𐴞𐴥𐴓𐴢 𐴇𐴞𐴥𐴀𐴕𐴡𐴃𐴧𐴟 𐴁𐴝𐴌𐴞𐴥𐴑 𐴑𐴟𐴥𐴕 𐴊𐴡𐴐𐴢 𐴁𐴝𐴥𐴑𐴡𐴌 𐴀𐴠𐴑 𐴁𐴝𐴥𐴑 𐴊𐴞𐴦𐴉𐴠𐴥𐴓𐴝𐴙𐴓𐴢.⁵𐴓𐴠𐴀𐴜𐴞𐴌 𐴕𐴡𐴏𐴡𐴥𐴓𐴡𐴌 𐴔𐴝𐴕𐴟𐴥𐴙𐴐𐴢 𐴎𐴠𐴃𐴝𐴌𐴝𐴤 𐴀𐴞𐴔𐴝𐴔𐴞 𐴈𐴝𐴔 𐴉𐴝𐴦, 𐴀𐴞𐴥𐴃𐴝𐴌𐴝𐴃𐴧𐴟 𐴃𐴡 𐴔𐴝𐴙𐴕𐴐𐴡𐴥𐴃𐴧𐴟 𐴊𐴡𐴐𐴢 𐴁𐴝𐴥𐴑𐴡𐴌 𐴀𐴠𐴑 𐴁𐴝𐴥𐴑 𐴓𐴡𐴦𐴘𐴢 𐴁𐴡𐴓𐴧𐴝 𐴐𐴡𐴥𐴌𐴞𐴘𐴡𐴃𐴡𐴌 𐴇𐴡𐴥𐴑𐴟𐴔 𐴀𐴝𐴏𐴠𐴤, 𐴘𐴝𐴥𐴕𐴞 𐴕𐴞𐴎𐴡𐴌 𐴑𐴡𐴗𐴔 𐴀𐴡𐴃𐴧𐴟, 𐴎𐴡𐴊𐴞 𐴀𐴞𐴥𐴃𐴝𐴌𐴝 𐴘𐴡𐴥 𐴀𐴞𐴁𐴌𐴝𐴇𐴞𐴥𐴔𐴡𐴃𐴧𐴟 𐴀𐴝𐴙𐴐𐴧𐴠𐴥 𐴊𐴠 𐴀𐴡𐴥𐴘𐴓𐴠 𐴘𐴡.⁶𐴔𐴡𐴕𐴃𐴡𐴌 𐴔𐴝𐴓𐴑𐴞𐴥𐴎𐴝𐴊𐴠𐴑 𐴃𐴡 𐴓𐴠𐴀𐴜𐴞𐴌 𐴕𐴡𐴏𐴡𐴥𐴓𐴡𐴃𐴧𐴟 𐴀𐴝𐴙𐴐𐴧𐴠𐴥 𐴊𐴠 𐴕𐴡, 𐴃𐴡𐴀 𐴀𐴞𐴥𐴁𐴝𐴘𐴠 𐴇𐴠𐴥 𐴀𐴞𐴁𐴌𐴝𐴇𐴞𐴥𐴔 𐴎𐴞𐴁𐴝𐴤 𐴓𐴧𐴡𐴥𐴘 𐴀𐴝𐴓𐴧𐴝𐴘𐴠 𐴖𐴝𐴦𐴊𐴝 𐴒𐴡𐴙𐴅𐴧𐴞𐴥𐴓𐴢, 𐴘𐴡𐴥𐴒𐴧𐴗𐴝𐴃𐴧𐴟 𐴊𐴡𐴐𐴢 𐴁𐴝𐴥𐴑𐴡𐴌 𐴀𐴠𐴑 𐴁𐴝𐴥𐴑 𐴓𐴡𐴀𐴙𐴓𐴢 𐴀𐴠𐴊𐴧𐴠 𐴘𐴡𐴥𐴒𐴧𐴗𐴝𐴌𐴠 𐴁𐴡𐴌𐴈𐴡𐴃𐴢 𐴊𐴞𐴀𐴓𐴢.⁷𐴐𐴡𐴥𐴣𐴍𐴡𐴘𐴠 𐴋𐴡𐴣𐴀𐴌𐴡𐴃𐴧𐴟 𐴁𐴠 𐴁𐴡𐴌𐴈𐴡𐴃𐴢 𐴉𐴝𐴦, 𐴈𐴡𐴃𐴝𐴤 𐴇𐴞𐴥𐴘𐴝𐴕𐴡𐴃𐴢 𐴊𐴠 𐴇𐴡𐴕𐴡𐴤 𐴐𐴡𐴥𐴀𐴑 𐴕𐴝𐴥𐴘.⁸𐴀𐴠𐴑 𐴔𐴞𐴑𐴧𐴝𐴥𐴃𐴧𐴟 𐴏𐴝𐴘𐴓𐴠𐴥, 𐴔𐴡𐴌𐴠 𐴊𐴠 𐴔𐴝𐴕𐴟𐴥𐴙𐴐𐴠 𐴀𐴠𐴥𐴕𐴝 𐴊𐴡𐴐𐴢 𐴁𐴝𐴥𐴑𐴡𐴌 𐴀𐴠𐴑 𐴁𐴝𐴥𐴑 𐴓𐴡𐴦, 𐴔𐴡𐴕𐴃𐴡𐴌 𐴀𐴝𐴌𐴀𐴠𐴑 𐴔𐴞𐴑𐴧𐴝𐴥𐴃𐴧𐴟 𐴏𐴝𐴘𐴓𐴠𐴥, 𐴀𐴟𐴀𐴙𐴕 𐴃𐴡 𐴀𐴟𐴁𐴝𐴤𐴘𐴠 𐴀𐴠𐴥𐴕𐴝 𐴓𐴡𐴘𐴧𐴠𐴥 𐴎𐴞𐴁𐴝𐴤 𐴇𐴝𐴥𐴔𐴞𐴐𐴝 𐴎𐴞𐴕𐴊𐴝 𐴀𐴝𐴏𐴠𐴤 𐴁𐴡𐴥𐴓𐴞 𐴒𐴡𐴁𐴝𐴤 𐴊𐴞𐴥𐴘𐴝 𐴎𐴝.⁹𐴇𐴠𐴥 𐴀𐴞𐴥𐴏𐴝𐴉𐴠 𐴈𐴡𐴘𐴓𐴠𐴥, 𐴎𐴠 𐴓𐴠𐴀𐴜𐴞𐴘𐴠 𐴊𐴡𐴐𐴢 𐴁𐴝𐴥𐴑𐴡𐴌 𐴀𐴠𐴑 𐴁𐴝𐴥𐴑 𐴓𐴡𐴦, 𐴘𐴡𐴥𐴒𐴧𐴗𐴝𐴘𐴠 𐴀𐴟𐴥𐴊𐴧𐴗𐴝 𐴀𐴞𐴁𐴌𐴝𐴇𐴞𐴥𐴔𐴡𐴌 𐴊𐴟𐴖𐴝𐴌𐴝 𐴊𐴡𐴐𐴢 𐴁𐴝𐴥𐴑𐴡𐴌 𐴀𐴠𐴑 𐴁𐴝𐴥𐴑 𐴊𐴞𐴀𐴓𐴢 𐴊𐴠 𐴀𐴝𐴏𐴠𐴤,¹⁰𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴎𐴠𐴣𐴃𐴧𐴠𐴥 𐴔𐴝𐴓𐴑𐴞𐴥𐴎𐴝𐴊𐴠𐴑𐴠 𐴀𐴞𐴁𐴌𐴝𐴇𐴞𐴥𐴔 𐴓𐴡𐴥𐴘 𐴔𐴞𐴓𐴧𐴠𐴥, 𐴇𐴠𐴥𐴣𐴃𐴧𐴠 𐴃𐴡 𐴓𐴠𐴀𐴜𐴞 𐴘𐴡𐴥𐴒𐴧𐴗𐴝𐴌 𐴁𐴝𐴉𐴊𐴝𐴊𐴝 𐴀𐴞𐴁𐴌𐴝𐴇𐴞𐴥𐴔𐴡𐴌 𐴅𐴞𐴏𐴞𐴥𐴔𐴡𐴃𐴢 𐴀𐴝𐴐𐴧𐴞𐴥𐴓𐴢.

𐴀𐴞𐴏𐴝𐴤 𐴀𐴡𐴥𐴙𐴓𐴊𐴠 𐴔𐴝𐴓𐴑𐴞𐴥𐴎𐴝𐴊𐴠𐴑𐴡𐴌 𐴋𐴡𐴥𐴙𐴓𐴧𐴝 𐴀𐴞𐴔𐴝𐴔

¹¹𐴇𐴠𐴥𐴃𐴡𐴓𐴧𐴝, 𐴎𐴡𐴊𐴞 𐴓𐴠𐴀𐴜𐴞𐴀𐴡𐴥𐴓𐴡𐴌 𐴀𐴞𐴔𐴝𐴔𐴞 𐴈𐴝𐴔𐴡𐴌 𐴊𐴟𐴖𐴝𐴌𐴝 𐴔𐴝𐴕𐴟𐴥𐴙𐴐𐴢 𐴉𐴟𐴌𐴝𐴉𐴟𐴌𐴞 𐴏𐴡𐴥𐴘𐴧𐴞 𐴄𐴡𐴥𐴀𐴌𐴞 𐴉𐴝𐴙𐴃𐴧𐴡—𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴇𐴠𐴥 𐴁𐴡𐴥𐴌𐴝𐴐𐴝𐴘𐴠 𐴀𐴠𐴥𐴕𐴝 𐴔𐴝𐴕𐴟𐴥𐴙𐴐𐴡𐴌𐴠 𐴐𐴡𐴥𐴌𐴞𐴘𐴡𐴃𐴢 𐴊𐴞𐴦𐴘𐴝 𐴒𐴞𐴘𐴠𐴥—𐴃𐴡𐴥𐴀𐴘𐴓𐴠 𐴀𐴝𐴌𐴀𐴠𐴑 𐴋𐴡𐴙𐴓𐴧𐴝 𐴀𐴠𐴒𐴧𐴗𐴝𐴤 𐴀𐴞𐴔𐴝𐴔 𐴉𐴡𐴘𐴊𐴝 𐴀𐴡𐴥𐴘𐴁𐴝𐴌 𐴑𐴞𐴦 𐴎𐴡𐴌𐴟𐴌𐴡𐴃𐴢 𐴀𐴝𐴐𐴧𐴞𐴥𐴓𐴢, 𐴎𐴞𐴁𐴝𐴤 𐴀𐴝𐴌𐴡𐴕𐴡𐴌 𐴕𐴡𐴔𐴟𐴕𐴝 𐴕𐴡 𐴁𐴡𐴥𐴓𐴑𐴠 𐴔𐴝𐴓𐴑𐴞𐴥𐴎𐴝𐴊𐴠𐴑𐴡𐴌 𐴕𐴡𐴔𐴟𐴕𐴝؟¹²𐴀𐴞𐴔𐴝𐴔𐴞 𐴈𐴝𐴔𐴡𐴌 𐴑𐴞𐴏𐴞𐴥𐴔 𐴁𐴡𐴊𐴡𐴓𐴞𐴎𐴝𐴘𐴓𐴠𐴥 𐴃𐴡 𐴐𐴡𐴥𐴌𐴞𐴘𐴡𐴃𐴢 𐴀𐴡𐴥 𐴁𐴡𐴊𐴡𐴓𐴞𐴎𐴝𐴌 𐴎𐴡𐴌𐴟𐴌.¹³𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴎𐴞𐴁𐴝𐴤𐴌 𐴁𐴝𐴦𐴁𐴟𐴃𐴠 𐴀𐴞𐴀𐴕 𐴈𐴡𐴖𐴝𐴤 𐴎𐴝𐴌, 𐴀𐴞𐴥𐴁𐴝 𐴃𐴡 𐴀𐴝𐴌𐴀𐴠𐴑 𐴈𐴝𐴥𐴀𐴕𐴊𐴝𐴕 𐴀𐴡𐴌, 𐴀𐴝𐴦𐴌 𐴇𐴠𐴥 𐴈𐴝𐴥𐴀𐴕𐴊𐴝𐴕𐴡𐴃𐴧𐴟 𐴇𐴡𐴕𐴡𐴤𐴑𐴞𐴘𐴠 𐴑𐴟𐴌𐴁𐴝𐴕𐴞-𐴒𐴝𐴥𐴣𐴃𐴢 𐴇𐴠𐴥𐴊𐴔𐴡𐴃𐴢 𐴒𐴡𐴙𐴅𐴧𐴠𐴥 𐴊𐴠 𐴕𐴝𐴥𐴘.¹⁴𐴇𐴞𐴥𐴘𐴝𐴕𐴠 𐴏𐴝𐴥𐴉𐴢 𐴎𐴝𐴇𐴠𐴥𐴌 𐴒𐴡𐴌𐴠𐴥 𐴊𐴠 𐴑𐴞, 𐴀𐴝𐴣𐴀𐴌𐴝𐴌 𐴔𐴝𐴓𐴞𐴑 𐴀𐴝𐴙𐴐𐴧𐴠𐴥 𐴊𐴠 𐴀𐴡𐴥𐴙𐴓𐴊𐴠 𐴘𐴡𐴇𐴟𐴥𐴊𐴝𐴌 𐴕𐴡𐴏𐴡𐴥𐴓𐴢 𐴀𐴡𐴃𐴧𐴟, 𐴎𐴠 𐴈𐴝𐴥𐴀𐴕𐴊𐴝𐴕𐴡𐴌𐴠 𐴇𐴠𐴥𐴃𐴝𐴂𐴢 𐴒𐴡𐴌𐴞𐴥 𐴔𐴟𐴀𐴏𐴝𐴘𐴠 𐴀𐴞𐴔𐴝𐴔𐴞 𐴈𐴝𐴔𐴡𐴌 𐴔𐴟𐴃𐴝𐴓𐴠𐴑 𐴇𐴡𐴕𐴡𐴤 𐴑𐴠𐴏𐴧𐴟𐴥 𐴕𐴡𐴥 𐴈𐴡𐴀.¹⁵𐴇𐴞𐴥𐴘𐴝𐴕 𐴃𐴡 𐴀𐴝𐴌𐴡𐴤 𐴏𐴝𐴥𐴉𐴢 𐴎𐴝𐴇𐴠𐴥𐴌 𐴀𐴡𐴥𐴘𐴒𐴞𐴘𐴡𐴘, 𐴎𐴠𐴃𐴧𐴡𐴥𐴃𐴢 𐴔𐴝𐴓𐴑𐴞𐴥𐴎𐴝𐴊𐴠𐴑𐴡𐴌 𐴋𐴡𐴥𐴙𐴓𐴧𐴝 𐴀𐴝𐴌 𐴀𐴠𐴒𐴧𐴗𐴝𐴤 𐴀𐴞𐴔𐴝𐴔 𐴉𐴡𐴘𐴊𐴝 𐴀𐴡𐴥𐴘𐴧𐴠,¹⁶𐴎𐴞𐴁𐴝𐴤 𐴀𐴞𐴔𐴝𐴔 𐴀𐴡𐴥𐴘𐴧𐴠 𐴊𐴠 𐴅𐴞𐴏𐴞𐴥𐴔𐴞 𐴊𐴝𐴁𐴞𐴊𐴝𐴖𐴝𐴌 𐴕𐴞𐴘𐴡𐴔𐴠 𐴕𐴡, 𐴁𐴡𐴥𐴓𐴑𐴠 𐴉𐴝𐴥𐴕𐴝 𐴕𐴡 𐴀𐴡𐴥 𐴊𐴠 𐴎𐴞𐴕𐴊𐴞𐴒𐴞𐴌 𐴃𐴝𐴦𐴑𐴡𐴃𐴠.¹⁷𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴁𐴝𐴌 𐴁𐴝𐴦𐴁𐴟𐴃𐴠 𐴃𐴡 𐴀𐴠𐴕𐴊𐴞𐴓𐴧𐴝 𐴒𐴡𐴁𐴝𐴤 𐴊𐴞𐴥𐴘𐴝 𐴀𐴝𐴏𐴠𐴤,”𐴔𐴝𐴓𐴑𐴞𐴥𐴎𐴝𐴊𐴠𐴑𐴡𐴌 𐴕𐴡𐴔𐴟𐴕𐴝𐴘𐴠𐴃𐴟𐴀𐴛 𐴀𐴝𐴁𐴝𐴊𐴟𐴓𐴀𐴝𐴁𐴝𐴊𐴢 𐴉𐴡𐴙𐴅𐴧𐴡𐴕𐴃𐴡 𐴀𐴞𐴔𐴝𐴔.“

¹⁸𐴀𐴠𐴑 𐴌𐴟𐴖𐴝𐴃𐴠 𐴏𐴝𐴘𐴓𐴠𐴥, 𐴀𐴝𐴒𐴡𐴌 𐴉𐴟𐴌𐴝𐴕𐴝 𐴕𐴞𐴘𐴡𐴔𐴡𐴌𐴠 𐴁𐴝𐴦𐴃𐴠𐴓𐴢 𐴒𐴡𐴌𐴞𐴥𐴉𐴠𐴓𐴝 𐴒𐴞𐴥𐴘𐴠 𐴊𐴠, 𐴇𐴞𐴥𐴘𐴝𐴕 𐴑𐴡𐴔𐴎𐴟𐴌 𐴀𐴠𐴊𐴧𐴠 𐴁𐴠𐴇𐴝𐴌 𐴀𐴝𐴐𐴧𐴞𐴥𐴓𐴢 𐴊𐴠 𐴇𐴠𐴥𐴃𐴡𐴓𐴧𐴝,¹⁹𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴐𐴡𐴥𐴌𐴞𐴘𐴡𐴃𐴠 𐴃𐴡 𐴇𐴡𐴕𐴡𐴤 𐴑𐴠𐴏𐴧𐴟𐴥𐴌𐴠 𐴉𐴟𐴌𐴝𐴉𐴟𐴌𐴞 𐴏𐴡𐴥𐴘𐴧𐴞𐴒𐴡𐴌𐴞 𐴉𐴝𐴙𐴅𐴧𐴠𐴥 𐴊𐴠 𐴕𐴝𐴥𐴘. 𐴀𐴝𐴌 𐴀𐴠𐴑 𐴌𐴟𐴖𐴝𐴃𐴠 𐴏𐴝𐴘𐴓𐴠𐴥, 𐴇𐴞𐴥𐴘𐴝𐴕𐴡𐴌 𐴎𐴝𐴒𐴝𐴃𐴢 𐴀𐴠𐴑𐴧𐴝𐴥𐴕 𐴁𐴠𐴀𐴃𐴡𐴌 𐴀𐴝𐴐𐴝𐴤 𐴊𐴞𐴦𐴘𐴝 𐴒𐴞𐴘𐴠𐴥 𐴊𐴠, 𐴎𐴞𐴘𐴝𐴥𐴕𐴡𐴌 𐴀𐴟𐴏𐴞𐴥𐴓𐴝𐴘𐴠 𐴀𐴝𐴣𐴀𐴌𐴝 𐴀𐴝𐴓𐴧𐴝𐴌 𐴋𐴝𐴥𐴑𐴠 𐴎𐴝𐴘 𐴉𐴝𐴌𐴞.²⁰𐴇𐴠𐴥 𐴀𐴝𐴐𐴝𐴤𐴌 𐴁𐴝𐴦𐴁𐴟𐴃𐴠 𐴈𐴡𐴏𐴡𐴥𐴔 𐴇𐴝𐴥 𐴒𐴞𐴥𐴘𐴠 𐴊𐴠 𐴀𐴝𐴏𐴠𐴤,²¹𐴀𐴟𐴘𐴃𐴝𐴌𐴝𐴤 𐴃𐴡 𐴇𐴡𐴕𐴡𐴤 𐴈𐴡𐴏𐴡𐴥𐴔 𐴏𐴝𐴥𐴌𐴝 𐴀𐴠𐴥𐴕𐴝 𐴀𐴞𐴔𐴝𐴔 𐴁𐴡𐴙𐴕𐴧𐴞𐴥𐴓𐴢, 𐴔𐴡𐴕𐴃𐴡𐴌 𐴀𐴞𐴏𐴝𐴤 𐴇𐴠𐴥𐴕𐴊𐴞𐴓𐴧𐴝 𐴁𐴡𐴙𐴕𐴧𐴠𐴥 𐴊𐴠 𐴀𐴟𐴁𐴝𐴤𐴌 𐴈𐴡𐴏𐴡𐴥𐴔𐴠 𐴎𐴞𐴁𐴝𐴤𐴘𐴠 𐴀𐴞𐴥𐴁𐴝𐴌𐴠 𐴀𐴠𐴕𐴊𐴞𐴓𐴧𐴝 𐴈𐴡𐴘𐴧𐴠𐴥, ”𐴔𐴝𐴁𐴟𐴊𐴠 𐴈𐴡𐴏𐴡𐴥𐴔 𐴇𐴝𐴥𐴘𐴧𐴞, 𐴀𐴝𐴦𐴌 𐴀𐴞𐴥𐴁𐴝𐴘𐴠 𐴔𐴡𐴕 𐴕𐴡 𐴁𐴡𐴊𐴡𐴓𐴞𐴁𐴡, ’𐴃𐴟𐴀𐴛 𐴀𐴝𐴁𐴝𐴊𐴟𐴓𐴀𐴝𐴁𐴝𐴊𐴢 𐴉𐴡𐴙𐴅𐴧𐴡𐴕𐴃𐴡 𐴀𐴞𐴔𐴝𐴔.‘“

²²𐴇𐴞𐴥𐴘𐴝𐴕𐴡𐴌 𐴎𐴡𐴌𐴞𐴘𐴝 𐴃𐴡 𐴀𐴞𐴏𐴝𐴤 𐴀𐴠𐴑𐴧𐴝𐴥𐴕 𐴁𐴠𐴀𐴃𐴡𐴌 𐴌𐴝𐴎𐴞𐴕𐴝𐴔𐴝𐴌 𐴎𐴝𐴁𐴞𐴕 𐴄𐴡𐴥𐴀𐴙𐴅𐴧𐴠.

²³𐴀𐴞𐴔𐴝𐴔 𐴃𐴡 𐴁𐴡𐴀𐴗𐴃𐴢 𐴎𐴡𐴕 𐴃𐴝𐴥𐴑𐴞𐴃𐴡, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴃𐴝𐴌𐴝 𐴔𐴡𐴌𐴞𐴎𐴝𐴘𐴓𐴠𐴥 𐴀𐴞𐴔𐴝𐴔𐴞 𐴈𐴝𐴔 𐴀𐴝𐴌 𐴒𐴡𐴌𐴞𐴥 𐴕𐴡 𐴉𐴝𐴙𐴃𐴧𐴡.²⁴𐴔𐴡𐴕𐴃𐴡𐴌 𐴀𐴞𐴏𐴝𐴤 𐴎𐴠𐴃𐴧𐴡𐴥𐴃𐴢 𐴀𐴝𐴁𐴝𐴊𐴟𐴓𐴀𐴝𐴁𐴝𐴊𐴢 𐴉𐴡𐴙𐴅𐴧𐴡𐴕𐴃𐴡 𐴎𐴞𐴕𐴊𐴝 𐴀𐴝𐴏𐴠𐴤, 𐴀𐴞𐴥𐴁𐴝𐴌 𐴀𐴞𐴔𐴝𐴔𐴞 𐴈𐴝𐴔 𐴇𐴡𐴕𐴡𐴤𐴊𐴞𐴕 𐴕𐴡 𐴉𐴟𐴥𐴌𐴝𐴘𐴁𐴡.²⁵𐴇𐴠𐴥𐴃𐴡𐴓𐴧𐴝, 𐴎𐴠𐴃𐴝𐴌𐴝𐴤 𐴀𐴞𐴥𐴁𐴝𐴌 𐴊𐴟𐴖𐴝𐴌𐴝 𐴀𐴝𐴓𐴧𐴝𐴌 𐴇𐴝𐴣𐴏𐴠 𐴀𐴝𐴘𐴧𐴠𐴤 𐴀𐴞𐴥𐴃𐴝𐴌𐴝𐴌𐴠 𐴀𐴞𐴥𐴁𐴝𐴘𐴠 𐴉𐴟𐴌𐴝𐴉𐴟𐴌𐴞 𐴕𐴠𐴅𐴝𐴃𐴢 𐴊𐴞 𐴉𐴝𐴌𐴠, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴃𐴝𐴌𐴝𐴌 𐴐𐴟𐴥𐴖𐴝𐴌𐴞𐴐𐴡𐴓𐴧𐴝 𐴀𐴞𐴥𐴁𐴝 𐴃𐴡 𐴇𐴝𐴥𐴔𐴞𐴐𐴝 𐴎𐴞𐴕𐴊𐴝 𐴀𐴝𐴏𐴠𐴤.

²⁶𐴀𐴠𐴕𐴊𐴞𐴓𐴧𐴝 𐴀𐴠𐴒𐴧𐴗𐴝𐴤 𐴁𐴡𐴌𐴡 𐴀𐴞𐴔𐴝𐴔 𐴃𐴝𐴥𐴑𐴝 𐴀𐴝𐴣𐴀𐴌𐴝𐴓𐴧𐴝 𐴀𐴡𐴥𐴊𐴡𐴊𐴠 𐴀𐴡𐴥𐴘𐴧𐴠, 𐴎𐴞𐴁𐴝𐴤 𐴂𐴝𐴑, 𐴁𐴠𐴈𐴡𐴏𐴟𐴥𐴌, 𐴊𐴝𐴑 𐴏𐴝𐴥𐴌𐴝, 𐴒𐴟𐴕𐴝𐴤𐴒𐴝𐴌 𐴀𐴡𐴥𐴑𐴧𐴡𐴓𐴡𐴃𐴧𐴟 𐴀𐴝𐴓𐴡𐴑, 𐴀𐴠𐴊𐴧𐴠 𐴎𐴞𐴁𐴝𐴤𐴌𐴠 𐴀𐴝𐴏𐴔𐴝𐴕 𐴀𐴡𐴥𐴑𐴧𐴡𐴓𐴡𐴌 𐴃𐴟𐴥𐴖𐴝𐴌𐴡 𐴀𐴟𐴣𐴏𐴡𐴓𐴡𐴃𐴢 𐴃𐴟𐴓𐴝𐴤 𐴒𐴞𐴥𐴘𐴠.²⁷𐴀𐴞𐴥𐴁𐴝𐴃𐴧𐴟 𐴉𐴡𐴃𐴧𐴞𐴥 𐴊𐴞𐴕 𐴑𐴟𐴌𐴁𐴝𐴕𐴞 𐴂𐴠𐴦𐴐𐴢 𐴒𐴡𐴌𐴝𐴥 𐴕𐴡 𐴉𐴡𐴌𐴠, 𐴎𐴠𐴕𐴊𐴞𐴓𐴧𐴝 𐴀𐴡𐴙𐴕𐴧𐴡 𐴁𐴡𐴌𐴡 𐴀𐴞𐴔𐴝𐴔 𐴀𐴡𐴥𐴑𐴧𐴡𐴓𐴡𐴃𐴧𐴟 𐴀𐴝𐴒𐴠 𐴕𐴞𐴎𐴡𐴌 𐴒𐴟𐴕𐴝𐴤 𐴓𐴧𐴝 𐴁𐴝𐴦𐴊𐴠 𐴔𐴝𐴕𐴟𐴥𐴙𐴐𐴡𐴌 𐴒𐴟𐴕𐴝𐴤 𐴓𐴧𐴝 𐴒𐴡𐴌𐴝𐴥 𐴉𐴡𐴌𐴠, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴁𐴝𐴘𐴠 𐴃𐴡 𐴇𐴠𐴥 𐴈𐴝𐴔 𐴀𐴠𐴑𐴁𐴝𐴌𐴡𐴃𐴢 𐴇𐴝𐴥𐴔𐴞𐴐𐴝𐴓𐴧𐴝 𐴀𐴡𐴣𐴃𐴧𐴠𐴤 𐴀𐴝𐴊𐴝𐴘 𐴒𐴡𐴌𐴞𐴥𐴉𐴠𐴓𐴝𐴘𐴧𐴠 𐴎𐴠𐴣𐴃𐴧𐴠𐴥 𐴀𐴞𐴥𐴁𐴝𐴘𐴠 𐴕𐴞𐴎𐴡𐴌𐴠𐴥 𐴑𐴟𐴌𐴁𐴝𐴕𐴞 𐴊𐴞𐴘𐴠𐴥.²⁸𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴐𐴡𐴥𐴌𐴞𐴘𐴡𐴃𐴠 𐴔𐴝𐴙𐴕𐴐𐴡𐴥𐴌𐴠 𐴀𐴠𐴥𐴕𐴝 𐴁𐴡𐴌𐴡 𐴀𐴞𐴔𐴝𐴔 𐴃𐴞𐴥𐴘𐴝𐴒𐴝𐴌𐴝 𐴎𐴠𐴃𐴝𐴌𐴝𐴤 𐴑𐴡𐴔𐴎𐴟𐴌 𐴀𐴡𐴓𐴝, 𐴔𐴡𐴕𐴃𐴡𐴌 𐴎𐴠 𐴈𐴡𐴏𐴡𐴥𐴔 𐴐𐴡𐴥𐴌𐴞𐴘𐴡𐴃𐴢 𐴁𐴝𐴦𐴊𐴠 𐴇𐴝𐴥 𐴒𐴞𐴥𐴘𐴠, 𐴇𐴞𐴥𐴘𐴝𐴕𐴠 𐴃𐴡 𐴉𐴟𐴖𐴝𐴌𐴠 𐴀𐴠𐴥𐴕𐴝 𐴇𐴠𐴥 𐴈𐴝𐴔𐴡𐴃𐴢 𐴃𐴞𐴥𐴘𐴝𐴒𐴝𐴌𐴝𐴘𐴧𐴠, 𐴎𐴞𐴁𐴝𐴤𐴌𐴠 𐴀𐴝𐴁𐴝𐴊𐴟𐴓𐴀𐴝𐴁𐴝𐴊𐴡𐴓𐴧𐴝 𐴉𐴟𐴌𐴝𐴉𐴟𐴌𐴞 𐴇𐴝𐴥𐴄𐴞 𐴒𐴡𐴌𐴞𐴥𐴉𐴠𐴓𐴝 𐴒𐴞𐴥𐴘𐴠.

The Word for the World International

https://app.library.bible/content/87faca8b51c22590