Chakatondejelwa20
1Pakalepo ndakabona ingilozi idelela pasi iva kudenga, yakabhata muluboko ikii yedizwa lisinojiba neketani ihulwana.2Ingilozi yakabhata ibhukanana, yendiya inyoka yantolo, uli iye guluzhanje akale ewhi Satani, akale akoonsunga kwamakole chiulu,3ingilozi yakoomposela mudizwa lisinojiba, akale ikalikonya ikalinama pezhulu pape, kuti esichengeje induji akale, kuswikila chiulu chamakole chapinda. Mushule mwezwi unokwelela kusungunulwa konshaji unshomanana.4Pakalepo ndakabona zwibhula zwobushe, akale bakabeligele panaizwo bakabeli yabo bakabakapiwa utongo. Akale ndakabona mipepo yaabo bakabadumulwa misholo pezhulu pokupa busumikiji bwabo nezwaJesu, newhi lyaMwali. Yaba ndibo basijakanamata chibanda kana chibumbwa chacho nokuso tambula imhande yacho pehuma jabo kana pamaboko abo. Bakamuka, akale bakatonga naKristo kwechiulu chamakole.5Bose bamwe bakafa abajakamuka kuswikila kupela kwechiulu chamakole. Yoku ndikokumuka kubafi kotanga.6Balokombolelwa akale bachena ibo banomuka pamwempela nabo banoomuka kubafi kotanga! Pezhulu pabananga saaba lufu lwabili aluna masimba, koga bachaba batebuji baMwali akale baKristo, akale banootonga naye kwechiulu chamakole.7Chiulu chamakole chingopela, Satani unoobhiswa muntolongo lilye,8unoonda kuzhe koochengela inyika jimo mumatibi mana enyika, ndikokuti, Gogu naMagogu, kubabunganijila ihondo, bunji bwabo bunanga sonsechelele wegungwa.9Akale bakakwabaila pezhulu penyika bupabi bwayo akale bakakomboloja unshasha wabachena akale neguta linodikana, koga moto wakava kudenga wakabapalaja,10akale Guluzhanje wakabachengela, wakaposelwa mugandwa igulwana lyomoto nesalifa mwakaba muline chibanda nompolofeti woniepa, akale banoosheteswa busiku namasikati kwemisi isinopela.11Pakalepo ndakabona chibhula chikulwana chichena chobushe akale nowakaba eligele panaicho, idenga nenyika zwakatizha mbeli kwechiso chiche. akale apajakawanikwa bugalo bwabo.12Ndakabona bakafa, bakulwana nabatukutuku, belimile mbeli kwechigalo chobushe, akale makwalo akazhulwa. Akale lumwe lukwalo lwakazhulwa, ilo luli lukwalo lwobupenyu. Akale bakafa bakatongwa nezwakabakakwalwa mumakwalo, pezhulu pezwito zwabo.13Akale igungwa lyakashikula bakabafila munailyo, Lufu nobugalo lwabakafa zwakabulula bakafa munaizwo, akale bose bakatongwa nezwito zwabo.14Pakalepo Lufu nobugalo lwabakafa zwakaposelwa mugandwa lyomoto. Yolu ndilo lufu lwabili, igandwa lyomoto,15akale kana izina lyani kana aani lisakawanikwa likakwalwa mulukwalo lyobupenyu, wakaposelwa mugandwa likulwana lyomoto.
The Word for the World International