Romans12
1Ih nnui dage rangsünne gaila, sinamedung, Tinggwang ngaugia gade, nnui pumdung pwa kering ratak, mci, nah Tinggwang luulu kebui ge tei lulo. Aide nnui tei siaktelu kebui ta ge.2Kideu aide zaidung mzui diso, dede nnui lung tei hecilu eh nnui zaireli teintsam lu. Aide tei kegai gade nnui daibe yibi, nah luulu kebuibe bi, nah Tinggwang lungning yicang kecu cilu zie.3Kedanemene Ih rang gaila, Tinggwang ngaugia acu kepeude ziemne, keheibede nnui kakga kebamme penui mning kerabe nreu swade penui katei penuide mning mdi kerabe ma. Meliene, penui mteu eh cet siaktelu maisia, Tinggwang hangge ge dage kenlum kaikebeu kieege nzwa eh.4Kedanemene anui mipum ga pe mzi kekieege kebam nzwa, dede pe mzi kebam pelane peta nzwa ma,5cide nzwa eh, anui kekieege bam liede Khrista gade au pum ge, nah hangge ge kecu kedabe zi ge teikap.6Dede anui ngaugia gade anuide kepeu mapeudung ketsamtsam bam: Magade Tinggwang ne, pe kenlum kebam nsam gade peucai;7mata ketei gade, bata gade; keledeu liecai, pe keledeu gade;8kehecung gade cai, mide kehecung gade; kepeu gade cai, mbang eh peulu; teuswa kecu gade cai, sünne kecu gade; ngaugia liakela gade cai, suiyi liakela gade.9Keku depeu hezai gade diso. Kesiabe de ngkaulu; keyibe kerakteu bamlu.10Hangge gede caireiswacing keku teu kulu. Herüt kepeu ga, hangge gede herüt peulu.11Helungnei eh hegwa ketei ga, nghet diso. Rabe ziemne, nri bamlu. Rampaube ziemne, pe gwa teilu.12Kereguide ga nnui sui yilu, keherei kecu gade helung tielu, kekie gade samsanglu.13Kemcime teu maikesia gage hema mzi gailu. Mide hegia kera lampui kekiee peilu.14Nnuide teikeherei kelame de samlam beulu; samlam beulu nah reset so.15Pesui yi kelame de ngngwa suiyi nsamlu; hap kelame de ngngwa haplu.16Hangge gede ngngwa suige teilu. Ngang eh cetso, dede kehenahme kekangngwa luulu. Nkatei ncu mning mdi diso.17Kesia teikegai ziemne mide kesiabe peu daiso. Mina pelane dwagade ma keyi teilu.18Magade tei lubui cai, n lambiede teilukebui tane, mina pelane de kezuyi eh lungh lu.19Akumedung, madaude hekum peei diso, cide Tinggwang masang lunghop dage nlum beudi. Kedanemene Kesanglaisiu ga ainzwa rauteu kelane, “‘Hekum kepeei au a gu; Ih ne penuide peu daizie,’ de Rampaube rangla.”20Kesanglaisiu rang kelanzwa “Dede magade n ngauraube nzeu lacai, pepok teibeu lu. Magade pa hereu lacai; pecu sak kera peu lu. Kedanemene nang aide teikegai ga, nang pe peu gage kehengam miceu pwagai dida.”21Kesiabe depeu ncu ngam diso, dede keyibe teu kesiabe de ngamlu.
Bridge Connectivity Solutions Pvt. Ltd.