Romans11
1Ciciu cai Ih rangla, Tinggwang pe mina dungde pütdi deni? Peu madaude cinzwadi helo. Kedanemene Ih liede Israelme ge, Abraham leuhme ge, Benjamin leuh gade.2Tinggwang pe mina, pa mrai ci kebamme de püt dima. Mede kesanglaisiu ga Elijah ha dainzwa rang labi nnui ci meni, Israelme de mmau eh pa dainzwa Tinggwang dade pe nggia kiebi?3“Rampaubo, penui ngu caihakecime dungde teitset dida, penui n recabamdung teimsia dida. Ih rünne bangnzeu, nah penui au acu zuila dida.”4Dede Tinggwang samli de pecu dai rang lano? “Ih Baal da koktungmie kemakme mina cang hena ge a ziemne kainzeu pwabam.”5Cinzwa eh, cudau de bang kelume kecam nage bam Tinggwang ngaugia ne kedetkelu ziemne.6Dede cide ngaugia gade liecai, cide au batadung gade meda. Iciu meliecai Tinggwang ngaugia de au ngaugia tadi zie.7Ciucai dainzwa eh no? Israelme peei kelade, cide ngau luma, dede kedetkelume cide ngaulu, nah kedame lung tei takdi.8Cide au kesanglaisiu ga raupwa kelanzwa: “Tinggwang penuide maci kepa rabe peu dida, penui miak ma ngau melu kerane, nah penui kwen ma siu melu kerane, henai kecangde.” 9Nah David rangla, “Penui taktyeibam depeu hetak ge nah hebai ge nzwalu, nah puikam ge nah penui ziemne kemau ziehi ge lu.10Peu penui miak de mui dilu ciu eh penui mangau tadi kerane, nah penui kiadung bwak jüja dilu.”11Ih cine ranggai, “Penui kaumie kerane penui pi nsui ni?” Peu madaude cinzwadi helo. Meliene, penui gikah kegai gade, Gentileme da kelikelu gwanglu, penuide heriak kesia gage kai gailu kerane.12Cu penui gikah kegaide kideube ziemne mahei ge liecai, nah penui kap kedide Gentileme ziemne mahei liecai, penui ncütciak lucai daikieege hemaa kieegwalu zieno?13Dede cu Ih nnui Gentilemedung dage rangla, nah Ih Gentileme da langkegai ta teikela tane, Ih a ta ziemne hegie la.14Iciu eh Ih akatei a leuhme de heriak ketei gage teugai luzie ha nah Ih penui kangge de kelilu zie ha.15Kedanemene penuide gi kedi pekie kideube de kezuyi dailu liecai, penuide luu kelude au dai zieno, cide au tsai kedime ziemne kering da?16Dede petsi raitube reca tei kegaide mci liecai, tokkui henet kelube liede mci. Nah pe mah de mci liecai, pe kiakdung liede mci.17Dede magade pe kiakdung kesa de riaudicai, nah magade nang, Olive kiak ge, penui kakgage kaincüt dicai, nah magade nang penuide Olive bang pe mah keyide gage mzi gaicai,18pe kiak dungde ziemne hegie diso. Dede nang hegie lacai, nang pe mah de ngha kelabe ma, dede pe mah dene ncu ngha la.19Iciude nang rangzie, “Pe kiak dungde riaugi dida ciu eh acu cika kai ncütlu kerane.”20Cide au kesang. Penui nlum kemak ziemne penuide riaugi dida, dede n kenlum ziemne nang sap ntiplu. Nkatei de mning cehu ham diso, dede hinglu.21Kedanemene magade Tinggwang bangsang kiakdungde de mbai beu mecai, ncu de pa mbai beulak.22Cine, piegai lo, Tinggwang keku tadung nah teikeherei kelade: kau kedime da keherei de gwangla, dede Tinggwang keku de nda gwangla, nang pe keku ga bam lucai. Iciu meliecai ncude de riaugi dizie.23Nah penui liede, magade penui nlumkemak ga bam sita dicai, penuide teukau ncütdi luzie. Kedanemene Tinggwang au penuide teugwang kauncüt dailu builu.24Kedanemene magade ncu renaam Olive bang bangsang gade riaudi eh bangsang kemak taktyei kela Olive bang keyi gage kauncüt gaicai, aidungde daihia gede kieesi luzie no, bangsang dungde, penuikatei penui olive bang gage kauncüt dailu de?25Kedanemene Ih nnuide aipau macetkecok dungde cimene peu bamneu ma, sinamedung, iciu eh nnuikatei nnui kecet gade nnui makecime teidi melu kerane. Macetkecok aide cai Israelme da helung ketak ge bam dida, Gentileme pelane gwanglu kemaktane.26Cine kesanglaisiu ga rauteu kelanzwa eh, Israel pelane de kelilu zie: “Zion gade Kelikelube gwang zie. Pa Jacob dade rabe lam la kemakde keugi dizie,27nah aide penuide ngngwa Ih samkak keluge zie, Ih penui maudung keugi di kecudau.”28Samliakeyi de lamde cet kegai au, penui au nnui ziemne ngauraume ge. Dede kedetkelu lamde au, penui au penui paume ziemne pe kumedung.29Kedanemene Tinggwang mta mapeudung nah qu kelude au lidai gailak.30Kedanemene ndaa nnui Tinggwang samzai tei kemak nzwa, dede cu penui samzai teikemak ziemne ngaugia ngau luda,31nah cinzwa eh, cu Jewme aidungde samzai teilu tadi. Cide nnui dage ngaugia keu kelia gade penuide de cu peu ngaugia ngaulu kerane.32Kedanemene Tinggwang pelane samzai tei kemak gage baangdi, ciu eh pa pelane dage ngaugia laigailu kerane.33Oh, Tinggwang macet nah maci mahei kecok de! Pe tutiak au peicang gailak, nah pe lampui de cicang gailak!34“Kedanemene cau Rampaube lungning cino mede cau pecu rangkeliabe tei lulai?35Mede cau Tinggwang de ma peu ham eh, Tinggwang pecu peucaili dai maisia dino?”36Kedanemene pe dade nah pe ziemne nah peda maleune bam. Pecu peu kelungta ndu kelube tei lulo. Amen.
Bridge Connectivity Solutions Pvt. Ltd.