Proverbs26
1Hepwak tingdau buising kei kecu mede luhlüt tingdau tingrui kecu au zeu kemak nzwa, kemieme ge de twa kera au zeu ma.2Tangkine nah nruine tau mene lim mpet nlüt kebam nzwa, reset ngaubui kemakpe au gwang tungcang lak.3Hekwen ge de kebiet kerabe, gada mui kang kerabe nah kemieme ge de dap kerabe.4Kemieme ge keteu kegai kemtage keli so, mecai nangde penui nzwa kemieme ge dizie.5Kemieme ge de kemie sam gele keli gai beulu, ciude pa pekatei pe miakngau gade mriak lie melu kerane.6Kemieme ge de sampau kera langgai kegaibe au pekatei pe pi dang lula nah keherei mnwa lula.7Kemieme ge mui gade macisamdung kerang au pi kesiame pi pe ta teila kemak nzwa da.8Kemieme ge de ketwa au tangtsu ge tamnung gage kang kegai nzwa da.9Kemieme ge macisamdung kerang au sakmie kelume ge ba ga hetu lütkedi nzwa da.10Kemieme ge de mede keheibe pecu tetkah kegwangbe zie li kecube au lakpikekapme petai ga kebam mileune de rezam kela nzwa da.11Kemieme ge kemangta pia pekenabe ketei au, heteu pe nrui ga nli gwang dai kela nzwa da.12Nang mige pe miakngau gade pekatei pecu maci lie la eh ngau ni? Cipaude swa kemieme ge da keregui kieeki.13Kenghetme ge rangla, “Lampuiki ga hingho bam! Puidiki kakga hingho ge la!”14Kenghetme ge pe zeu ga zeudet kebam au, kikam pebam gade ngkei ngkui kebam nzwa da.15Kenghetpe au pe kwak ga ge pe ba kaila, dede pe mui gage mpang kera pe kengking kette gah. 16Mina hanghena tutiak keyi teu ranglia kegai swade kenghetme ge pekatei pe miak gade pa mriakki lie bamla.17Mige tetkah gwang kela ga mikedame kesamlim bam kecu ga gwang deiga kecu au, heteu kwen keriak gai kecu nzwa da.18Kemiebe pei ge lakpitsi heu kebam ge kap kegaide au,19cide au pe kidabe de cwa eh aide rang kegai nzwa da, “Ih au henui teibam meluini?”20Tsing cang kedine, mi mmüt dila; nah ledkieesam rang kemak ga kesamlim tadi la.21Miceu ne peu misumdangdung de heu bam lula nah tsing ne mi de peu heu bam lu kecu nzwa, makebwak kelame kesamlim kecu teibeu bamla.22Ledkieesam kerang au penggumkeyi kecam nage nzi ketyei nzwa; cidungde pumtei helungle nhung gai dila.23Makesia rang neu eh ru kebam mui nah kemau mlung teupung kebam au tangdei li gage hezu keyi ge keniak kenzeuge nzwa da.24Mige mikedame de ngkau kelabe pe lungcet hebai teu eh pemui le hezusam rangla nah pa pekatei peda mide cwagai kera kwabam la.25Pa nciep eh marang bam lubui, dede pecu nlum so, kedanemene pe mlung ga au heciem hena riem pwa bam.26Pa mide ngaurau kecu de pe ciem le gum pwa bam liede, pa kemau tei kela de mbau kebam ga keulia di zie.27Mitak tei kelame pe katei cika cak lüt di zie nah tangtsu cwak kegaibe da caili gwang dai zie.28Kenret kelame ge au pa ne tei rejam kedime de ngkau la nah hegiehelia kela mui au kekap teu gwang la.
Bridge Connectivity Solutions Pvt. Ltd.