LUK18
1Yeso oti bɔ mboo, me ndɔɔ yi asuo bɔ kwɛn bɔ ebvaan abebuɛɛn Nziã ãlio mam mbueel, owɔɔl wɛ.2Ndɛ olieel bɔ bubu: «Onse bviil ngelemɔ̃, éli ye twel ngɔmɔ̃ wɛn k'ákebal Nziã ndyam wɛ, k'áli hɛ̃ ye bvɛɛ e mbuul si ngɔmɔ̃ wɛ.3Onse bviil olɔ, éli hɛ̃ y'ɔ̃kaal ngɔmɔ̃ wu ɔ̃pfiil wu ákeya twel ondɛ oliaal ndiri: “Tsiil ndɔɔ a mɛ̃ y'ɔ̃taal a mɛ̃!”4Ãlio boo-boo, twel ondɛ ákebee kɛn obee. Tsoo ngelemɔ̃, ndɛ oyɛɛn ndyam-a-ndyam bubu: “Onkyam ŋɛn mɛ̃ k'ebebal Nziã wɛ, mɛ̃ hɛ̃ ke ndi ye bvɛɛ e mbuul si ngɔmɔ̃ wɛ,5onge bɛn ɔ̃kaal wu ɔ̃pfiil wu abewɛɛl mɛ̃, ngesɛ mɛ̃ nsiil ndɔɔ a ndɛ y'ɔ̃taal a ndɛ, kwɛn oŋɔ̃ tiil ye k'efa ndɔɔ oyɔ, ndɛ bvool abee mɛ̃ nkyal obeya osa.”»6Mfam olweel bubu: «Eyoo emfa ki eyɛɛn twel wu ɔ̃bi-ɔ̃bi ondɛ!7Obobɔ, byɛ b'etsam wɛn Nziã k'atsiil ãndɔɔ ã baal b'ésueel ndɛ, b'abelel ola ndɛ tsia ye mwiĩ wɛ? Ndɛ ol'osuul bɔ abekiaal kɛn okiaal?8Mɛ̃ eyɛɛn byɛ wɛn, ndɛ àtsiil ãndɔɔ a bɔ tswa-a-tswa. Kɛn a ŋ'èya Muaan a mbuul, ndɛ olɔ oyebɔɔ b'ali y'okiool me Nziã me nsie?»9Yeso bvool oti mboo yi, me ndɔɔ a baal b'abetsam ndiri bɔ b'ali dzu ke mviil ã Nziã, bvool abefiɛɛn bakyɛ:10«Tsoo ngelemɔ̃, baal buaal ayɛn Nzɔ a Nziã, me ndɔɔ yi abuɛɛn. Ngɔmɔ̃ ali Ɔ̃falisaye, wukyɛ áli mbuul wu awal mpal.11Ɔ̃falisaye otɛɛn, bvool obuɛɛn onse ɔ̃kwal bubu: “Ee Nziã, mɛ̃ mveel yɛ ãtuɛɛn, me ndɔɔ yɛn mɛ̃ ke ndi onge baal b'asiil wɛ: Bɔ ali baal a pfuul, baal bɛn k'ali dzu wɛ, ye b'aturu anga-akal. Mɛ̃ ntuɛɛn yɛ hɛ̃, me ndɔɔ yɛn mɛ̃ ke ndi onge ɔ̃twal-mpal wu wɛ.12Onse eyenge ɔ̃tsiin, mɛ̃ ebesa ãbuɛɛn mɛn k'adza wɛ nsa yuaal. Mɛ̃ hɛ̃ ebewa yɛ boo ngemɔ̃ onse ãboo kuun m'obɔɔ o mɛ̃ bam bueel.”13Me b'otal ɔ̃twal-mpal, ndɛ otɛɛn li ndyam lela, mviɔɔl m'ɔ̃kwal, k'ákedzii bam si ekal k'aseel mviil ke ywel wɛ, bvool oyɛɛn ndiri: “Ee Nziã, sio mɛ̃ nyiĩ, mɛ̃ ndi mbuul a ãbi.”»14Yeso bu alweel ndiri: «Mɛ̃ eyɛɛn byɛ wɛn, ɔ̃twal-mpal, me lio li ebvool ndɛ nzɔ, oyii mbuul wa dzu ke nkwel a Nziã, k'Ɔ̃falisaye wɛ. Ke ngwel wɛ, mbuul wu andɛɛl nzuru, àkuaal ndɛ, kɛn a mbuul wu akuaal nzuru, àndɛɛl ndɛ.»15Baal abiri baan b'abwee ola Yeso, kwɛn ndɛ andɔɔl bɔ kuɔɔl. Ŋ'emwɛn ayio obobɔ, bɔ ayiaan baal obɔ.16Kɛn a Yeso otam kwɛn aya ye bɔ ola ndɛ, bvool oyɛɛn ndiri: «Eyɔɔl baan b'abwee aya ola mɛ̃, ebee bɔ nkuul okii. Ke ngwel wɛ, Okwɛn o Nziã oli bo baal b'ali onge baan b'abwee.17Taa-taa bam, mɛ̃ eyɛɛn byɛ wɛn, mbuul wɛn k'ayɔɔ Okwɛn o Nziã onge muaan wu ɔ̃bwee wɛ, k'akoo k'asam onse bɔ hɛ̃ wɛ.»18Mfam ngɔmɔ̃ ofuul Yeso ndiri: «Ɔ̃tee wa ngesɛ, ki esa mɛ̃ emã, kwɛn mɛ̃ mbɔɔ elaã li ɔ̃bu nkal ɔ̃bu?»19Yeso obveel ndɛ ndiri: «Ndɔɔ mã yi eta yɛ mɛ̃ me mbuul wa ngesɛ? K'eli ye mbuul wa ngesɛ wɛ, wa ngesɛ kɛn a Nziã ndyam.20Yɛ yɛɛ kwɛn ãngel ãyɛɛn bubu: “Oyɛɛ ke dzuu y'ɔ̃kal wuo y'ɔ̃lam a mbuul wɛ. Oyɛɛ ke bam mbuul wɛ. Oyɛɛ ke turu eluɔ e mbuul wɛ. Oyɛɛ ke buru ngandoo-mbuul ndɔɔ wɛ. Lweel tal ye ngoo a yɛ.”»21Mbuul ondɛ obveel ndɛ ndiri: «Mɛ̃ ebekiaal ãngel omɔ̃ mam mbueel, fa obwee o mɛ̃.»22Ŋ'eyoo Yeso ãndɔɔ omɔ̃, ndɛ olieel ndɛ bubu: «Eywɛn yɛ kɛn ndɔɔ ngamɔ̃: Tiɔ eluɔ bvam bvieel bvi eli a yɛ, kab nzi oyɔ aywal. Obobɔ, yɛ àbɔɔ opfel ke ywel. Ke mbee oŋɔ̃, ya, luɛɛn a mɛ̃!»23Ŋ'eyoo mbuul ondɛ obobɔ, ndɛ nzuru esool yam bibi. Ke ngwel wɛ, ndɛ áli y'opfel bam bibi.24Ŋ'emwɛn Yeso kwɛn mbuul ondɛ nzuru esool yam bibi, ndɛ oyɛɛn ndiri: «Eli ye fool lam bibi kwɛn apfel asam onse Okwɛn o Nziã!25Eli ye fool kwɛn nyam wu ɔ̃mbiri ãpfuũ abwel onse pfee e nyuɔ̃. Kɛn osam b'ɔ̃pfel onse Okwɛn o Nziã, oyɔ ndɔɔ yi enduru fool yam. »26Baal b'ayoo ãndɔɔ m'eyɛɛn Yeso afuul ndiri: «Ke m'emfa okyɛ, wɛn olɔ obvuul nã?»27Yeso obveel ndiri: «Ãndɔɔ mɛn baal k'akoo m'osa wɛ, Nziã asa mɔ̃.» 28Piɛɛl bu alieel Yeso ndiri: «Tal, bee esiil bvam bvieel bvi éli a bee, me ndɔɔ yi eluɛɛn a yɛ.»29Yeso obveel bɔ ndiri: «Taa-taa bam, mɛ̃ eyɛɛn byɛ wɛn, mbuul wu osiil nzɔ a ndɛ, ɔ̃kal a ndɛ, baan-ngoo a ndɛ, eburu e ndɛ, wuo baan a ndɛ, me ndɔɔ Okwɛn o Nziã,30àbɔɔ eluɔ obvɛ bvi enduru me lio li, y'elaã li ɔ̃bu nkal ɔ̃bu, me lio li èya.»31Yeso obiri atam a ndɛ ange-kuun ye buaal me pyɛ, bvool olieel bɔ ndiri: «Etal, bia-byɛ ŋ'ebeyi Yelusalem, me ndɔɔ yɛn mam mbueel m'ékel aliaal-ɛ̃kiɛɛn a Nziã me ndɔɔ a Muaan a mbuul, ŋ'ayii asa mɔ̃.32Ke ngwel wɛ, àtiɔ ndɛ me mviɔɔl ɛ̃ baal bɛn k'ayɛɛ Nziã wɛ. Àsyob ndɛ, àtuaal ndɛ mpal, àfaan ndɛ ãntɛɛ,33àbɛɛl ndɛ, bvool àbam ndɛ. Kɛn a me tsoo li ãtyel, ndɛ àsiool.»34Kɛn antam k'abɔɔ m'eyɛɛn Yeso otsɛn wɛ. Ãyɛɛn omɔ̃ ola bɔ k'ã́li kal-a-kal wɛ. Bɔ k'abɔɔ ɔ̃nki a ndɔɔ wu ékeyɛɛn ndɛ wɛ.35Ŋ'eyii Yeso tsotsoo ye Dzeliko, ɔ̃nkwa-mviil ngɔmɔ̃ ábvi nsɛn me pyɛ e nkuul, bvool ákelaa nzi ola baal.36Ndɛ oyoo enkiin ki embuul ki ékebwel, bu afuul otsɛn o ndɔɔ.37Baal abveel ndɛ ndiri: «Yeso wa Nadzalet mbuul wu abwel!»38Ndɛ bu abiool ndiri: «Yeso, Muaan a David, sio mɛ̃ nyiĩ!»39Baal b'ákedzuu ke nkwel embuul abvi ndɛ opɛɛn ndiri asuul nkyal, kɛn a ndɛ bvool obiool bam kokɔ, ndiri: «Muaan a David, sio mɛ̃ nyiĩ!»40Yeso otɛɛn bvool otam kwɛn aya ye ndɛ. Ŋ'etɔ bɔ ye ndɛ tsotsoo a Yeso, ndɛ ofuul ndɛ ndiri:41«Ndɔɔ mã yi edzii yɛ kwɛn mɛ̃ nsa yɛ?» Ndɛ obveel Yeso ndiri: «Mfam, mɛ̃ nzii k'emwɛn bvool!»42Yeso bu alieel ndɛ ndiri: «Oŋɔ̃ mwɛn bvool! Onge b'elɔ yɛ okiool onse mɛ̃, yɛ ŋe bvuul!»43Kɛn ɛ̃kiri-anka oŋɔ̃, ndɛ obɛɛn omwɛn bvool. Ndɛ obvi Yeso oluɛɛn onse otuɛɛn o Nziã. Ŋ'emwɛn baal bam bueel ndɔɔ yi ebwel, bɔ abvi Nziã olweel.
Wycliffe Bible Translators, Inc.