Zekaria14
1Sünta, CHAKRAMANG kowh ni dow uang ting khowk. Nami ni khe dow Jerusalem maru-uüa kowh dawngthawnguan maten ransu-uüa narupta pe bowk kown, now dawngthawnguan dow amatni pur kowi ransu-uüa nataretah kown.2Jerusalem maru-uüa kowi nasenah kownkow akeng prenchak maten kowi CHAKRAMANG nakuaah kown. Marow, kim hai üa maten dow ransu-uüa nakhünta pe kown, now masiuüa hawmh maten kowi dow napiak pe siri kown. Marow kowi kowh maru dow dawnglang mowr mih akeng pren kowi nacham uowi nar kown, now dawnglang mowr dow marow kowi nata uowi kown.3Nami kung kowi dow CHAKRAMANG nauang lawt kown, now ransu-uüa kowi alai kowh aia senah iawng akeng prenchakuüa kowi nasenah kown.4Nami ni khe dow Jerusalem satlawt pra kowh kanrawn hungh luk kowi CHAKRAMANG naiowng kown. Nakhowk khe satlawt hownia satkup pra kanrawn hungh dow natalak kown. Nami hungh dow tawngphak pra dawnglang mrawkphak pra dawnglang natasüt kown, now atakra kowi dow lawngrawi aiukma nauang phaw lowk kown.5Nami khin khe nami hungh takra kowi kowh lawngrawi hown dow enni napowt kown. Juda pren kowi Uzia chowm mang khe kowh lihowng mang uang khe enni pipu-uüa powt mih iawng dow enni napowt kown. Nami kung kowi dow CHAKRAMANG ang kowh Thurai mih aia kowh maru chimsaima miuüa maten hown nauang kown.6Nami ni khe dow anowi nauowi kown nadowi; sat hai lama paw nanowi kown nadowi.7Nami ni dow akeng mih ni iawng nadowi tham. Nami ni dow tawng iawng chow naown kown mih CHAKRAMANG lowkchow taih tuk. Nami ni dow ni paw uowi kown nadowi, uar paw uowi kown nadowi. Tawkchedow iak prakowi nanowi kown. 8Nami khin khe dow Jerusalem hownia masing tui nauang lawt kown; nami tui dow satlawt pra kowh sata kowi dawnglang, satkup pra kowh sata kowi dawnglang nahawr kown. Nami masing tui dow satma khin hai chungrau khin khe khowm padow nahing hawr hüa kown.9CHAKRAMANG dow palusama kowi nachowm mang kown. Nami ni khe dow CHAKRAMANG kowi lowkchow Thurai padow maru natukah kown, now aia lowkchow mih ming kowi maru nachupiiaah kown.10Geba marow hownia Jerusalem mrawkphak pra kowh Rimawn marow mowr paprenma süng anaima nauang own kown. Nachenganchepaw Jerusalem marow dow alowngma nauowi reng kown. Jerusalem marow dow Benjamin tapplawt hownia anui tapplawt pape mih auown khe kowh tapplawt mowr, Hananel kowi kowh kimkrowng hownia mang kowh grep uih küara mowr nauar kown.11Jerusalem marow dow tawng nam ni paw piakra piati nimkrüa kowi nauowi kown nadowi bowt. Jerusalem dow thaulangma nauowi bowt kown; nakowi dow maru kawmma nauowi bowt kown.12Jerusalem maru-uüa kowi kingküa hown sen mih prenchakuüa maten luk kowi dow CHAKRAMANG nauang pawla pe makowng hawi kown. Arau uowi dowi matchang amatni buk kowi kowh nga dow nasu kown. Amatni kowh mik dow alak kowi nasu kown, now amatni kowh dai dow nawr lak kowi nasu kown.13Nami ni khe dow kramra uowima mih takrow takraira nami maru-uüa kowi CHAKRAMANG nauang pawla pe kown. Naiawng rakowi amatni bowkbowk dow lowkkowlowk natakhüm büah kown.14Juda maru-uüa paw Jerusalem maru-uüa vüi natawi tasen kown. Ariaret kowi kowh prenchakuüa kowh dawngthawnguan, kuh, tai hown dawnguan maten ahuma nakuaah kown. 15Akeng prenchak siphaiuüa kowh kawrnga, kawrngaramchük, ut hai akeng mih tawncher luk kowi paw naiawngün makowng hawi dow nauang kla kown.16Nami kung kowi dow Jerusalem kowi uang sen miuüa pungmadawng kowi kowh ta lat miuüa paw lang kri lang kraing mih CHAKRAMANG kowi amatni kowh mang iawng dow nauang chup büah kown. Amatni dow Te Pawi nauang sun kownkow ning towng Jerusalem marow kowi nauang kown.17Lang kri lang kraing mih CHAKRAMANG kowi nachupiia kownkow palusama maru Jerusalem kowi nauang kown; uang dowi mih chenchapuüa pren kowi dow uang nauang kown nadowi.18Aigupta maru-uüa che Jerusalem kowi tawi tarü dowi, CHAKRAMANG kowi che tawi chup dowi hanow amatni pren kowi paw uang nauang kown nadowi. Te Pawi tawi sun kownkow Jerusalem kowi tawi dowi mih prenchakuüa luk kowi dow CHAKRAMANG nauang pawla pe makowng hawi kown; nami hawi dow Aigupta maru-uüa luk kowi paw nauang kla kown.19Aigupta hai akeng prenchak maten Te Pawi tawi sun kownkow tawi tarü dowi mih kowi dow nami ripra napeah kown.20Nami khin khe “CHAKRAMANG vüi chimsaima” padow kawrnga ngawng kowi kowh khawngrawng kowi arui nauowi kown. Nahanow CHAKRAMANG kim kowi kowh puh maten dow phuchuara ria kowi kowh achimsaima mih bia iawng achimsaima naown kown.21Jerusalem hai Juda pren kowi kowh puh bia maten dow CHAKRAMANG vüi nachim nasai bowk bowt kown. Now uang phuchua CHAKRAMANG miuüa maten dow naiawngün puh bia hown naeng phuchua müa ngar bowt kown. Nami khin khe dow lang kri lang kraing mih CHAKRAMANG kim kowi mia iawng mih paw nachang kun kown nadowi bowt.
The Seed Company