Zekaria13
1Lang kri lang kraing mih CHAKRAMANG tek mih, “Nami ni khe dow mang David krungchak hown Jerusalem marow chakuüa vüi angak hai tasür talawk mih nasaula kownkow krawng dawng hownia tui ang nauang pe lawtah parah kown.2Nami ni khe dow Juda pren kowi kowh arup aren maten kowi ang napiakta bowk kown, now arup aren ming khowm padow amiapaw ka tuak kown nadowi bowt. Amatni pren hownia risi iua hai amatni kowh lümla ngak kowi dow ang nachumta pe bowk kown.3Nami kung kowi paw risi iawng tek lai mih maru che uowi khai tak kowh chalow now aiamat u-pa mih, ‘CHAKRAMANG ming hown en tek dai lai khai. Naiawng rakowi en nakowng kown takla,’ padow natek pe kown. Risi iawng tek lai mih kowi dow aiamat kowh u-pa mih kowng pat aia kowi nasawtah kown.4“Nami ni khe dow risi iuauüa maten amatni kowh mukmang lawnguan kowi narukrai kown. Amatni dow nakuanla maru kownkow risiuüa iawng dow pawi humma mih tawnguat nakhup büah kown nadowi bowt.5Amatni dow, ‘Ang dow risi nadowi. Ang dow üa lup chang mih taih; asowmchow hownia ang dow chang üa lup reng mih chowtaih,’ padow natek büah kown.6Now amia iawng mih chünchü, ‘En downgprang kowi tawng ma lep lawi chow?’ padow lüntaah khai e dow, ‘Ang auiuauüa kim kowi ang cham takhüm khe kowh ang tangen mih ma lep lawi chowbowt,’ padow naklangah kown,” padow CHAKRAMANG tek khai.7Lang kri lang kraing mih CHAKRAMANG tek mih,“Aw saidawng, ang auiua kowi tuah diah,ang kowh ruapur thing mih kowi tuah diah,nahanow ruapur hawmuüa dow nataset kown towbowt,ruapur chauüa kowi paw ang naripah kown.8Pren kowi kowh ang maru-uüa kowi nachangah sum bak kown,sum bak kowi pre bak mowr dow ang napawta pe asak kown.Nachenganchepaw sum bak kowi pabak mih dow nata sing kown.Ang CHAKRAMANG tek khowk.9Nami abakchow mih kowi dow maih kowi ang napawla kown,tai kowi achangma thawpah khe kowh iawng ang nachaingah kown,amatni kowi dow achangma ang nathawpah kown.Chaing kuh khe kowh iawng dow amatni kowi ang chaingah kown.Amatni lüklau ang mih khin khe ang naklangah kown,‘Kowbüah dow ang maru,’ padow ang nakhamah kown.Amatni paw, ‘CHAKRAMANG chowtaih anging kowh Thurai,’ padow natek büah kown,” napa kown.
The Seed Company