Meng Lai109
Mami dow David kowh meng chekhai.
1Aw Thurai, ang dow kiow en reng chekhai;naiawng rakowi ririmma hang uowi diah.2Maru ngakuüa dow ang lawnguan kowi tek dai lai khai,amatni dow ang lawnguan kowi küa dai khai.3Amatni dow suiiai kaniaima mih laiklow hing tekta ang hüah khai,alow akan uowi dowi matchang amatni dow kingküa ang khai.4Ang sakrauah chepaw amatni dow changla ang ransu khai.Tawkche amatni vüi kowi dow ang chupla pe Thurai reng chekhai.5Ang changah iung chepaw amatni dow chang ang ngak khai,ang sakrauah chepaw amatni dow sui ang khai.6Naiawng rakowi amatni luk kowi angakma mih tara chet mih uang tow pe lowk diah,now nami tara chet mih dow amatni kowh ngak pacham tüng pe lah.7Amatni kowi dow tara chetra kowi pacham dowk pe angak lah,amatni kowh Thurai chup paw angak pahai pacham dowk pe lah.8Amatni kowh chownglawng dow pacham town lah,amatni kowh aiukma mih arah dow maru pacham khünta pe lah.9Amatni kowh chauüa dow hang pacham ka pa lah,amatni kowh masi hawmh paw pacham chowng mamaimow lah.10Amatni kowh chauüa dow tiama rawng towng pacham krawi lü lu lah,now amatni kowh piaknama mih kim hownia alakma kowi pacham krawi kram chakkham lah.11Pe lowi miuüa dow amatni kowh uowi mih maten pacham pawla pe bowk lah,amatni kowh kawm rak dow akeng maru-uüa pacham pawla pe bowk lah.12Amatni kowi saksing sanaah kown mih maru hang pacham uowi lah,amatni kowh saratchow chauüa kowi amiapaw hang pacham sanaah lah.13Amatni kowh krungchakuüa kowi pacham kowngta bowk lah,amatni kowh krungchakuüa ming dow maru pacham tamata bowk lah.14Amatni pipu-uüa kowh angak dow CHAKRAMANG sak kowi pacham uowi reng lah,amatni u-uüa kowh angak paw aia hangkow pacham tamata lah.15Naiawngün angak dow CHAKRAMANG mih sak kowi pacham towah reng lah,nahanow lusa hownia amatni kowh ming dow natama kown towbowt.16Tawngplawng kowchow panow amatni dow maru kowi saksing sana dowi;amatni dow maru kowi nasaksing sana kown mih katpaw tuak dowi chekhai,natuak lak dow tuak kawm tuak krat mih, ngaraima mih hai sak piak miuüa kowinakowngta kownkow changah nowng büah khai.17Amatni dow maru kowi nape piati kown mih lang nau khai.Naiawng rakowi nami piati dow amatni luk kowi uang kla khai.Amatni dow maru kowi nape prasi kown mih nau dowi chekhai.Naiawng rakowi amatni dow ka prasi dowi chekhai.18Amatni kowh piati pek kiang dow tawnguat khup iawng hing tekta hüah chekhai;nami kiang dow tui kham iawng towbowt,now kow kowi phawk sau mih iawng towbowt.19Nami piati dow amatni khupah mih uanchow iawng amatni tut-e pacham uowi lah,now amatni kowh kekawm iawng amatni tut-e atungma pacham uowi reng lah.20Ang ransu-uüa kowi dow CHAKRAMANG pacham ripah lah.Tawngplawng kowchow panow amatni dow ang lawnguan kowi tek lai ngak khai.21Tawkche aw CHAKRAMANG ang kowh Thurai,en kowh ming iung nang iung naia townla kownkow saksing sana ang diah.En kowh achur uowi dowi mih sakraura dow aiungma chekhai.Naiawng rakowi uang lawng ang diah.22Tawngplawng kowchow panow ang dow tuak kawm tuak kratma chekhai,now ang dow ngaraima mih maru chekhai.Ang kowh dow sak kowi arau kangowh chekhai.23Ang kowh chownglawng dow sat kowi khe kowh klim uang takuak iawng uang kowi khai bowt,now prüt plawng hawmh khe kowh iawng prütta ang khai bowt.24Cha dowi kham dowi lai bowt kowh ang kowh kung paw uak khai bowt,now ang dow rawng lai bowt kowh pik hai hut kangowh towbowt uowi.25Ang ransu-uüa tut-e dow ang chowng rensi kau khai bowt,amatni dow khi ang hanow pe ang rukrai khai bowt.26Aw CHAKRAMANG ang kowh Thurai, uang khowng ang diah,en kowh achur uowi dowi mih sakraura hown uang takhula ang diah.27Aw CHAKRAMANG, lawng ang mih dow en chowtaih.Nami dow en kowh lup pami ang ransu-uüa pacham tuk lah.28Amatni dow pacham pe ang piati lah taih.Tawkche en dow nape ang prasi kown.Amatni dow kingküa ang hanow naka rukrai kown.Tawkche en nar ang dow naawmrawm kown.29Ang kowh ransu-uüa dow rukrai rakowi pacham kla lah,nami rukraira dow amatni khup uanchow khe kowh iawng pacham uowi lah.30CHAKRAMANG kowi dow maru kawmuüa pur kowi ang natek pe awmrawm lai kown,aia kowi dow maru kawmuüa pungmadawng kowi ang nakiowah kown.31Tawngplawng kowchow panow aia dow ngarai miuüa kowi tawi tangila reng chekhai,now chet tara nowm dowi miuüa hownia amatni kowi aia lawngah reng chekhai.The Seed Company