Tarüa25
1Sittim marow kowi uowi büah reng tak khe Moab prenchak masiuüa hown Israeluüa mih uown chang iang ne khai.2Naiawngün masiuüa maten dow amatni kowh arup aren kowi tawncher hown chang pe phuchua reng chekhai, now uang tawi cha pawi kownkow amatni dow Israeluüa kowi hawla reng chekhai. Naiawng rakowi Israeluüa paw tawi cha pawi reng chekhai, now kowbüah kowh arup aren kowi paw tawi chup tawi iia khai.3Naiawng hai Israeluüa dow Peur hungh kowi kowh Baal thurai rup kowi tawi chup tawi iia khai. Naiawng rakowi Israeluüa luk kowi CHAKRAMANG kowh kunmaraura dow lün pluplup khai. CHAKRAMANG dow Israeluüa pungmadawng kowi uang chin pe makowng hawi khai.4CHAKRAMANG tek pe Mosi mih, “Israeluüa kowh aluchowuüa maten kowi uang pawla diah, now ang pur kowi ni-e khe kowngta bowk diah. Nakhowk khe chiang Israeluüa luk kowi kowh ang kowh kunmaraura akraingma mih naprowng kown,” pape khai.5Nakhowk khe Israeluüa kowh tara chet miuüa kowi Mosi tek pe mih, “Peur hungh kowi kowh Baal thurai rup kowi tawi chup tawi iia miuüa maten kowi enni nakowngta ngengche kown takla,” pakhai.6Now Mosi hai Israeluüa maten taklowp taklangra te plawt re-e kar hown nguk hown uowi büah khai. Nami khin khe amatni pur iawng Israel chenchap kachakuüa lowk ia mih Midian prenchak masiuüa lowk ia kowi aia kim kowi uang pawla khai.7Nami dow Eleazar kowh chapa Finehas khita khai. Finehas kowh pu dow uamow Arawn chekhai. Nami khita hanow Finehas dow Israeluüa pungmadawng hownia lawt khai. Aia dow pawla reh apung hanow nami kachakuüa kowi kowkawi krawi khai, now tangbung lak kowi kowkup hown krowksang nami Israel chenchap kachakuüa hai Midian prenchak masiuüa kowi reh hown mu kowi kowsawtah khai. Nami hownia bowt now Israeluüa pungmadawng kowi kowh makowng hawi mih taing khai bowt.9Nachenganchepaw nami makowng hawi hown mih maru iun 24,000 ia kowng khai.10Nami kung kowi CHAKRAMANG tek pe Mosi mih,11“Eleazar kowh chapa Finehas mih Israeluüa luk kowi kowh ang kowh kunmaraura prowngta ang khai bowt. Ang khowrbown dawma iawng aia dow ang vüi kowi khowrbown dawma chekhai. Naiawng rakowi ang dow khowrbown dawma chepaw amatni kowi ang piakah dowi chekhai.12Naiawng rakowi Finehas kowi tek pe diah: Aia vüi taking tasangra sangbowk laitawm ang towta pe khowk chekhai.13Aia hai aia kowh krungchakuüa dow chowngchowng saksakma naka uamow rah kown; nami dow aia kowi kowh ang tow pe mih sangbowk laitawm chekhai. Tawngplawng kowchow panow Thurai khowrbown dawma mih iawng aia dow Thurai vüi kowi khowrbown dawma chekhai. Naiawng hai aia dow Israeluüa kowh angak nalawtta pe kownkow chang pe khai,” pakhai.14Midian prenchak masiuüa hailawm sawtah now kowngta mih Israel chenchap kachakuüa ming dow Zimri chekhai. Zimri dow Simiawn krungchak kowi kowh aluchow Salu kowh chapa chekhai.15Midian prenchak masiuüa ming dow Kawzbi chekhai. Kawzbi dow Midian prenchak Zur kowh chama chekhai. Zur dow aia krungchak kowi kowh aluchow chekhai.16Nami kung kowi CHAKRAMANG tek pe Mosi mih,17“Midian prenchakuüa kowi dow enni kowh ransu pahai enni natuakah reng kown, now amatni kowi dow nasenah hanow enni napiakah reng kown takla.18Tawngplawng kowchow panow amatni dow prengia hown Peur hungh kowi kowh arup pe chupiia enni khai, now Kawzbi kowi paw pe paw enni khai. Kawzbi dow Midian prenchak aluchow mih kowh chama chekhai. Peur hungh kowi enni tawi chupiia arup rakowi enni pungmadawng kowi makowng hawi uang ting khe enni kowngta mih masiuüa dow nami Kawzbi chekhai,” pakhai.
The Seed Company