Tarüa24
1Israeluüa kowi CHAKRAMANG peah prasi kown nau mih Balam tuk hanow aia dow akeng ni khe kowh iawng chang mantan dowi chekhai. Aia dow kung prakowi taplan hanow süngrüp süngkangma prakowi haimü khai.2Now Israeluüa dow amatni chowlowkkow krungchak iawng khup tangbung mih Balam haikhi khai. Nakhowk khe aia dow ka Thurai Lümla khai.3Now aia dow Thurai peah mih laiklow maiawng tek khai,“Mami dow Beur kowh chapa Balam tekah mih laiklow chekhai,mami dow achima ang khi-ah mih lawnguan kowi kowh ang tekah mih chekhai.4Mami laiklow dow Thurai hownia kowh uang ting mih chekhai,mami dow lang kri lang kraing mih Thurai hownia kowh ang taah mih chekhai.Aia kowi dow tabawkah krawm now ang chupah khai,now aia dow Israeluüa lawnguan kowi uang tüng ang mukmang khai.5Aw Jakawb, en kowh tangbung dow klangiung lai kowbow!Aw Israel, en kowh uowi rah dow klangiung lai kowbow!6Naiawngün tangbung dow alaingma mih thaing singh iawng,aw pang kowi kowh bakan iawng chekhai.Naiawngün tangbung dow CHAKRAMANG chowkah mih sasua singh iawng,aw pang kowi kowh sidar singh iawng chekhai.7Enni dow nakhawr tui kown nadowi,enni sawtah mih liu dow ahuma naka tui kown.Enni kowh mang dow Agag mang lak-e nalang kri kown,enni kowh mang dow ringkawra nalang uowi kown.8Enni kowi dow Aigupta pren hownia Thurai uang lawtla enni khai,aia dow akürma mih chiarowngla iawng tawi uowila enni khai.Amatni kowh hut dow aia nadita pe nek kown,amatni kowi dow leba sek hown taplawn pat aia naap-ah kown.9Enni dow krangsila hai krangsima iawng natabawk hanow namawk kown.Nakhowk khe amia iawng mih chow nauam krüng enni kown?Pe enni prasi mih dow pacham ka prasi lah;pe enni piati mih dow pacham ka piati lah,” pakhai.10Naiawngün laiklow ta hanow Balak dow Balam luk kowi lainowmma kunmarau khai. Aia dow aia matia rut kowi tila se tek pe Balam mih, “Ang kowh ransu-uüa kowi napeah piati kownkow ang uang hawla en mih nadowi bow? Tawngplawng kowchow kowbüah kowi en tuk peah prasi khai? Mami hown sum kat khowk Israeluüa kowi en peah prasi!11Mami hownia kawmat mat kim kowi kowpowt prang! Ahuma ang pe en awmrawm sung kown mih ang tek en khowk chowdiah. Tawkchedow nami awmrawm sung dow CHAKRAMANG pe ka en dowi chekhai,” pakhai.12Nakhowk khe Balam tek pe Balak mih, “Kuh hai tai atekma mih kim en pe ang chepaw ang matia low hown aiung angak lup ang ia chang dowi tham pami en uang chinah mih maru-uüa kowi ang krawi tek pe khowk nadowi bow? Now CHAKRAMANG kowh ana klen kowi tawng lup paw ang ia chang dowi tham; CHAKRAMANG tek ang mih chowtaih ang natek kown pami paw amatni kowi ang krawi tek pe khowk manow.14Kawmat dow ang maru-uüa tut-e ang kowplan kown towbowt; tawkchedow ang plan dowi khowkchow tak khe Israel chenchapuüa mih pur prakowi tawng iawng chow en chenchapuüa kowi nachangah kown mih lawnguan ang tekla en tak,” pakhai.15Now aia dow Thurai peah mih laiklow maiawng uang tek khai,“Mami laiklow dow Beur kowh chapa Balam tek mih chekhai,Mami dow achima ang khi-ah mih lawnguan kowi kowh ang tek mih chekhai.16Mami laiklow dow Thurai hownia kowh uang ting mih chekhai,lang kri lang kraing mih Thurai hownia dow ang ka prengia khai.Aia kowi dow tabawkah krawm now ang chupah khai,aia dow Israeluüa lawnguan kowi uang tüng ang mukmang khai.17Mukmang kowi kowh ang khi-ah mih iawng kawmat naphaw kown nadowi tak.Nachenganchepaw pur prakowi CHAKRAMANG nape phawah kown mih ang khi chekhai.Jakawb kowh krungchak hownia krek iawng nauang lawt lowk ia kown,Israel krungchakuüa hownia kruitown mih nauang uowi lowk ia kown.Aia dow Moabuüa kowh chauüa kowi napawkta pe lu nak kown,aia dow Setuüa kowh chauüa kowi paw nadita pe lu nak kown.18Israeluüa dow Edawmuüa kowh pren napowngta pe kown,Amatni dow Edawm pren kowi kowh Seir süng paw nakhünta pe kown.Israeluüa dow tasen kiakma mih iawng nachang lup kown.19Jakawb kowh krungchak hownia dow kruitown mih nauang uowi lowk ia kown,aia dow marow kowi kowh ta sing uowi mih Edawmuüa kowi nakowngta bowk kown,” pape khai.20Balam dow Amalekuüa pra haimü hanow Thurai peah mih laiklow maiawng uang tek khai,“Chenchap maten lak-e Amalekuüa dow lang kür chekhai.Nachenganchepaw akung kowi dow nakowng büah kown,” pakhai.21Nami kung kowi Balam dow Kenisuüa prakowi haimü hanow Thurai kowh laiklow mih maiawng uang tek khai,“Kenisuüa low, enni dow huamang luk kowi kowh chang kim mih iawng chekhai,enni kowh uowi rah dow thaulangma chekhai.22Nachenganchepaw enni dow achur kowi napiak kown,Enni kowi dow Asuriauüa natow enni nar kown,” pakhai.23Nami kung kowi Balam dow Thurai kowh laiklow maiawng uang tek khai,“Uh! Maiawng Thurai nauang chang kown mih khin nauowi kown lowmow.Nami khin khe dow naia sing kown mih amia chow nauowi kown chow?24Kittim hownia chawnlawng ahuma nauang kown,amatni dow Asuriauüa hai Eberuüa kowi nauang senah hanow nanowngta kown;nachenganchepaw akung kowi dow Kittimuüa paw nachum bowk kown,” pakhai.25Nami kung kowi dow Balam mih awr rü hanow kim prakowi mang khai, now Balak paw aiamat tiama prakowi mang khai bowt.
The Seed Company