Isai57
1Maru iunguüa kowng khe miapaw sak kowi rau dowi chekhai;tawng rakowi chow kowng mih miapaw tuk kown paw nau dowi chekhai.Amatni luk kowi angak nauang ting kown mih howniaThurai rik henah mih pami miapaw tuk dowi chekhai.2Tiama nowm kowi mang miuüa dow naka thaulangra kown,amatni dow kowng hanow thaulangma nauowi kown.3CHAKRAMANG tek mih, “Maiaklese sarauüa kowh chauüa low, uang büa diah.Iang chang mih hai chawkkrawma kowh chauüa low, mami re-e uang büa diah.4Enni khareah mih mia kowi chow?Enni chowi pe nawr hai lawt pe dai mih mia kowi chow?Lup ngak chang miuüa kowh krungchak nadowi bow enni?Now dailalu-uüa kowh chauüa enni nadowi bow?5Enni dow sasua singh hai amia hown aram chakma mih singh krüa maten kowi krawi taphua taiua khai.Enni dow enni kowh chauüa kowi hungh towng rak towng enni cham changla phuchua müa khai.6Aw Israel, en dow lawngrawi hown tale mih huaklu kowi en cham chupiia khai.Naiawng rakowi naiawngün huaklu dow en kowh dawngthawnguan chekhai.Naiawngünuüa tut-e hüngah mih uanap hai kawmdi uanap en krawi chang khai.Naiawngün maten ang khi chepaw rarimma ang nauowi reng tak kown bow?7En dow en kowh phangbek mih hungh alowngma mih luk kowi en krawi be khai,now en nachang phuchua pawi kownkow naiawngün hungh kowi en krawi pün khai.8En kim lak kowi en changah phuchua mih uanh en towah khai;en nuata ang hanow akeng mih kowi en cham ka kowh mawk rah kowi en phüt khai,now en kowh phangbek aiukma mih kowi maru akawmma hown en uowi khai.Amatni hown nataiua uowi kown mih en tatow sangbowk laitawm khai;amatni hown nataiua uowi kown mih en lang nau khai,now amatni tengiow tengklaima mih mü kown en lang nau khai.9Phawkla kanrawn sau hanow Molek thurai tut-e en kowkowi khai,now paingbawng paw ahuma en phawkla khai.En kowh chintak miuüa kowi pren lakma kowi en cham chinah khai,amatni kowi dow makownguüa uowi rah kowi pat en cham chinah khai.Tawngplawng kowchow panow nakrawi cham thurai sar hanow nachupiiaah kown en nau khai.10En krawi cham akeng thuraiuüa rakowi en bowm khowk chekhai;en krawi ka dowi rakowi en tanai dowi reng tak.En kowh sakkraira mih pe en kür sar reng chekhai.Naiawng rakowi mapaw en kowh kow uak dowi.11“Mia kowi chow en kram kowh ang tut-e en tek dai lai?En tamata ang hai en tow ang sak dowi bowt mih tawng rakowi chow?Ririmma hown akrama ang uowi khai.Naiawng rakowi bow en kram ang dowi?12En changah mih lup dow anama pahai en ka tuak khai.Tawkche aching kowi dow en tachi tanawm dowi mih ang naphuangah kown.En kowh tachi tanawmra lup dow en vüi tawngpaw mrawkra nauowi kown nadowi.13Naka khowng kownkow en kar mih khin khe en kuaah mih arup arenuüa pacham khowng en lah.Amatni kowi dow li hai kawli ditchow mih nacham rownla bowk kown.Nachenganchepaw ang tut-e tatung tanim miuüa dow naka powng pren kown;amatni dow ang kowh chimsaima mih hungh naka powng kown,” pakhai.14CHAKRAMANG tek mih, “Thawp tiama büa diah, kamrüt tiama büa diah.Hawt tahang mih maten kowi ang maru-uüa pur hownia henta büa diah,” pakhai.15CHAKRAMANG dow kri kraingma hai rowsira atekma chekhai.Aia dow chowngchowng saksakma Thurai chekhai,now aia kowh ming dow chimsaima chekhai.Aia tek mih, “Ang dow akroma hai chimsaima mih rah kowi ang uowi khai.Tawkche sak piak mih hai khamsum khamdaw miuüa hown paw ang tawi uowi khai.Khamsum khamdaw mih hai sak piak miuüa kowi ang plan peah chownglawng sar khai,now dia sar miuüa kowi dow ang plan peah sakkraingra khai.16Chowngchowng saksakma vüi maru kowh angak ang nadowk pe kown nadowi,now ang kowh kunmarau paw atungma amatni luk kowi nauowi kown nadowi.Naiawng nadowi now ang thawpah mih maru-uüa ang pur kowi napiak kown chekhai.17Amatni lawpha lai rakowi ang kunmarau mih chekhai,amatni kowi ang ripah hanow ang cham dangta khai.Nachenganchepaw amatni dow nau iawng uowi büah khai.18“Israeluüa kowh chowm krang uowi krang maten ang khi khowk.Nachenganchepaw amatni kowi ang naiungah kown.Amatni kowi ang nakruitownah kown,now uowila uiting uangtak miuüa kowi ang napeah sakklamra kown.19Atawnchow hai alakma kowi uowi mih maten pacham ka iungra lah,” pahaiamatni kowi iungah mih CHAKRAMANG tek khai.20Nachenganchepaw maru ngakuüa dow sata tuilowng iawng chü lowlow chekhai,amatni dow sütla se reng mih sata tuilowng iawng chekhai.21Ang kowh Thurai tek mih, “Maru ngakuüa kowh dow mapaw thaulangra uowi dowi,” pakhai.
The Seed Company