Ezekiel27
1Nami kung kowi CHAKRAMANG kowh laiklow dow ang tut-e uang ting khai. Aia tek ang mih,2“Aw maru chapa, Tura marow vüi tek kar meng diah.3Sata kowi kowh mangla mih tiama, sata pang kowi kowh maru kawmuüa kun changra marow Sur kowi maiawng kowtek pe diah: CHAKRAMANG Thurai tek mih,“‘Aw Sur, en lang klangiung padow en tatek khai.4Sata kowi kowh kun chang miuüa luk kowi en chang low khai;en dow klangiungma mih chawnlawng iawng chekhai.En kowi dow klangiungma laksmauüa thawp en mih chekhai,en kowh klangiungra atekma mih dow amatni thawp en mih chekhai.5Hermawn hungh hownia uang pawla en karpowng singh büah khai,amatni dow nami singh hown thawpla en phen büah khai.Lebanawn hungh hownia dow sidar singh uang pawla en büah khai,nami hown dow lawng kowi kowh uaniang müa chüng thawpla en khai.6Amatni dow Basan pren hownia uang pawla en Sasua singh khai,nami singh hown dow thawpla en lawng hai müa büah khai.Saipras süngdum hownia dow painglang singh uang pawla en büah khai,nami hown dow thawpla en aphai hanow ngasai sa hown tawng en khai.7En kowh uaniang dow Aigupta pren kowi kowh uan klangiungma mih chekhai,nami uan dow la asinchow mih hown kawngah now sawt pe bawng mih chekhai.Nami khi hanow alakma hownia paw maru tuk mat en reng chekhai.Elisa pren hownia kowh arua hai mintau pau rawng uan dow en changla chaingchua khai.8En kowh lawng hai miuüa dow Sidawn hai Arvad marow maru-uüa chekhai,en kowh chawnlawng te miuüa dow akiakma mih maru-uüa kangowh chekhai.9En kowh lawng rawk miuüa dow Gebal pren kowi kowh lawngtanguüa chekhai,naiawngün maru-uüa dow arawk kiakma mih aluchowuüa kangowh chekhai.Lowra hownia kowh chawnlawng te miuüa dow en hown uang chang kun khai,naiawngün chawnlawng hai maru-uüa dow en kowh uanh pawk mih hai uanh sak mih chekhai.10“‘En kowh tasen müa siphai hawmh dow Persia, Lidia hai Libia pren hownia kowh chekhai. Amatni batta hüah mih kawngma hai lawngha lukruk dow en kowh klangiungra pe huah khai.11En kowh tap luk kowi kowh achawng miuüa dow Arvad hai Kilikia maru-uüa chekhai, now kimkrowng kowi kowh chawng en miuüa dow Gamad maru-uüa chekhai. Amatni kowh kawngma dow en kowh tap tapat lut mih kowi batah büah khai. En kowh klangiungra akümma chang en mih dow naiawngün maru-uüa chekhai.12“‘En kowh dawngthawnguan dow lainowmma hu khai. Naiawng rakowi Tarsis marow kowi kowh maru-uüa paw en hown uang tawi chang kun khai. En kowh uanh pawla büah mih takcha dow tai, lawngha, saingpru hai sisa pela en büah khai.13Javan, Tubal hai Mesek prenchak maru-uüa paw en hown tawi chang kun khai. Amatni dow pawla en uanh mih takcha kri puh, narma hai narla pela en büah khai.14Bet-Togarma marow kowi kowh maru-uüa paw pawla en kowh uanh mih takcha kawrnga, tasen müa kawrnga, kawrngaramchük pela en büah khai.15Dedan maru-uüa paw en hown tawi chang kun khai, nami klen kowi sata pang kowi kowh akeng prenchakuüa paw akawmma uang ran en kowh uanh khai, now en kowh uanh sung dow ngasai sa hai asung khakma mih singh pela en büah khai.16En marow hownia kowh lawt mih uanh dow lainowmma hu khai. Naiawng rakowi Siria prenchakuüa paw en hown tawi chang kun khai. En kowh uanh sung dow sawt pe bawng mih uan, aruama mih uan hai la asinchow mih uan pela en büah khai. Nami klen kowi asung khakma mih hua asingkrüuchow mih hai ing ruachow mih hua pela en büah khai.17Juda hai Israel prenchakuüa paw pawla en kowh uanh mih takcha Minnit hownia kowh püm, uidut uih, kuai tui, kanrawn sau hai chakhang uang mih singh pun pela en büah khai.18En marow hownia dow uanh iung hai dawngthawnguan ahuma lawt khai. Naiawng rakowi Damaska marowchakuüa paw Helbawn hownia kowh arak hai akawma mih chak pawi hown uang tawi chang kun büah khai.19Vedan hai Javan prenchak maru-uüa paw Uzal pren hownia kowh lawngha pheng ia, singh ding pik hai mawsala ün uang pawla hanow en kowh uanh takcha kowi pela en büah khai.20Dedan prenchak dow kawrnga kumlawng dau müa uan aiungma mih hown en tut-e uang tawi chang kun khai.21Arab pren hai Kedar pren aluchowuüa paw en kowh kun chang iua chekhai; amatni dow en kowh uanh takcha kowi ruapur chah, ruapur iuk hai rua uang krawi sa en büah khai.22Seba hai Rama marow hownia kowh kun chang miuüa paw pawla en kowh uanh mih takcha aiung aiungma mih mawsala, asung khakma mih hua hai kuh pela en büah khai.23Asuria pren kowi kowh Haran, Kanne, Eden, Seba, Asur hai Kilmad marow hownia kowh kun chang miuüa paw en hown uang tawi chang kun khai.24Amatni dow dawnguan klangiung klangiungma mih, aruama mih uan, sawt pe bawng mih uan, rawng klangiung klangiungma mih khawla hai leng aiungma mih ün uang pawla büah now en kowh chi kowi uang tawi sum büah khai.25En kowh chawnlawng aiukma mih uang tawnla en uanh reng chekhai, now sata dawnglang kowi dawngthawnguan atekma en uowi khai.26“‘En kowh lawng hai miuüa dow sata tui abüpma prakowi pawla en khai,sata dawnglang kowi dow satlawt li uang hut en hanow en tapiak nak khai.27En kowh uowi mih maten dow sata kowi nathim bowk kown:en kowh dawngthawnguan hai kun chang müa uanh maten natama bowk kown.En kowh chawnlawng te miuüa, arawk miuüa hai siphaiuüa maten paw nalim bowk kown;amatni bowkbowk dow sata dawnglang kowi natamir kown.28En kowh chawnlawng te miuüa dow lainowmma napla kown,nami klow hown sata ria kowi kowh süng ün dow nachü lowlow kown.29Lawng hai miuüa dow towla lawng hüah hanow napowt bowk kown,akeng pren chawnlawng te miuüa dow sata pang hownia natang mü en kown.30Amatni dow napla hanow lainowmma nanguk nakar en kown,lu kowi naphawk dinchow büah hanow plawi kowi nataiüa büah kown.31En rakowi amatni dow nakhaita sam kown,en rakowi amatni dow nakhup sala uan kown.Amatni dow lainowmma nakar nanguk büah kown,naiawng hai amatni sak kowi rau mih dow natüng en kown.32Amatni dow atün atünma kar hown nauowila en uiting uangtak kown,amatni dow maiawng hai natek en kar meng büah bowt kown,“Tura iawng mih marow dow tawng kowi paw uowi dowi chowdiah.Nachenganchepaw kawmat dow aia mih sata thing kowi rim khai bowt nowm,” pabüah kown.33“‘En kowh uanh dow pren ahuma kowi cham ting reng chowdiah,en kowh kun chang müa uanh hown pren kawmma chak tawi duh reng chowdiah.En kowh dow uanh hai dawngthawnguan lainowmma hu chowdiah,en kowh uanh hown dow pren kawmma manguüa pat tawi kurengla chowdiah.34Kawmat dow sata tui abüpma mih kowi en tapiak khai bowt,en kowh uanh hai en kowh maru maten en hown tawi thim khai bowt.35Sata ria kowi kowh akeng prenchakuüa khi en hanow amawlawma kangowh chekhai,naiawngün pren manguüa dow kram hai chür hown lumowr akangma kangowh chekhai.36Akeng prenchak kun chang miuüa dow khi en hanow chit en khai bowt.Tawngplawng kowchow panow kramra uowima hown en piak khai bowt,now en dow chowngchowng saksakma nauowi kown nadowi bowt,’ pape dit,” pakhai.
The Seed Company