Ezekiel26
1Cham takhangra kowi anging uowi mih lailowk ning nga la uown kowi kowh ni uown khe CHAKRAMANG laiklow dow ang tut-e uang ting khai.2CHAKRAMANG tek ang mih, “Aw maru chapa, Jerusalem piak mih lawnguan kowi Sur maru-uüa dow lainowmma awmrawm khai. Amatni dow, ‘Jerusalem tapiak mih iung lai bowt kowbow! Chenchapuüa kowh kun changra tapplawt dow takhue khai bowt. Naiawng rakowi kawmat dow anging kowh kun changra tiama akuangma tauow khai bowt. Marow dow tapiak khai bowt. Naiawng rakowi khaleng dow anging naiuksown bowt kown,’ pakhai.3Naiawng rakowi aw Turauüa, ang CHAKRAMANG Thurai tek khowk, ang nakingküa en kown. Nasen en kownkow chenchap akawmma ang nauang pawla en kown, now amatni dow sata kowi kowh tuilowng iawng nauang büah kown.4Now nami ang uang pawla mih maru-uüa dow en kowh tap nakhueta en kown, now en kowh kangchawngra kimkrowng paw napiakta en kown. En kowh dinchow pat ang nahenta en kown, now huaklu kiakukma mih iawng dow ang natowta en hüah kown.5En dow sata pang kowi kowh lawk dia rah en nachowng kown. Tawngplawng kowchow panow ang CHAKRAMANG Thurai mami laiklow ang tek khowk. En dow akeng chenchapuüa tut-e cham rupah mih dawngthawnguan iawng en naown kown.6En kowh kuachakuüa dow saidawng hown nakowng kown. Nami khin khe dow ang chowtaih CHAKRAMANG Thurai pami naiawngün kowi kowh maru-uüa natuk bowt kown.7“Aw Sur, nauang sen en kownkow en uowi rah tawngphak hownia kawrnga, kawrnga kari, kawrnga kowi kowh chowm mih hai siphai hawmh akawmma hown mang maten kowi kowh lang kri mih mang Nebuknezar kowi ang nauang pawla en kown.8Amatni dow en pren lak kowi kowh kua achachow miuüa kowi narik piakta bowk kown. Now nauang senla en kownkow naklawla tap kown mih bawn alowngma nachun büah parah kown, now nachawnla tap kown mih paw arema nathawp büah parah kown. Amatni kowh kawngma dow alowngma chi nadowkah büah hanow natatungla büah kown.9Amatni dow tap piak müa uanh hown nakhue en tap kown, now marek hown en kowh kimkrowng ün napiakta en büah kown.10Amatni kowh kawrnga dow lainowmma nahu kown. Naiawngün kawrnga mang khe kowh dinchow khowm padow nathiata en mup kown. Tasen müa kawrnga, uanh pawk müa kari hai kawrnga kari nauang pawla hanow en kowh tapplawt akhuema mih hownia nauang kup büah kown. Nami khin khe kowh atün ateu dow en kowh tap khowm padow nachü lowlow kown chekhai.11Amatni kowh kawrnga khawk kung dow en kowh tiama maten kowi natasak kown. En maru-uüa kowi dow saidawng hown siphaiuüa nasaiah kown, now en kowh kimchüng akhawt akhawtma mih maten dow krawng kowi natakuak kown.12Amatni dow en kowh dawngthawnguan hai en kowh kun chang müa uan narupta en kown. Amatni dow nakhueta en tap kown, now en kowh kim klangiung klangiungma mih maten paw napiakta en bowk kown. Nami klen kowi en kowh singh dung kau klowk, huaklu hai dinchow khowm padow alawi uowi dowi pat asaima sata kowi nacham kuakta en büah kown.13En kowh meng klow dow ang narimta en bowt kown, en kowh taraw tün paw nata kown nadowi bowt.14Huaklu kiakukma mih iawng dow ang natowta en hüah kown, now dam pawk miuüa kowh lawk dia rah en nachowng kown. En kowi dow nathawp en iawk kown nadowi bowt. Tawngplawng kowchow panow ang CHAKRAMANG Thurai mami laiklow ang tek khowk.15“Aw Sur, en piak mih klow, ka arau mih en maru-uüa kowh nguk klow hai en lak kowi kowh maru-uüa kowi nakowngta kown mih klow ta hanow sata ria kowi kowh uowi mih akeng prenchakuüa kram hai chür dowi tham ü?16Nami khin khe sata ria kowi kowh uowi mih akeng pren manguüa dow amatni kowh mang chowm rah hownia nadowm kown, now amatni kowh mang tawnguat hai sawt pe bawng mih uanh dow naklüpta büah kown. Lainowmma takrow takrai hai amatni dow bawn dawng kowi nachowm büah kown, atungma chür hown nauowi büah kown, now mü en hanow amawlawma naphaw büah kown.17Nami khin khe amatni dow maiawng natek en kar meng büah kown,
“‘Aw anang lang iuk mih marow, matawng iawng chow en tuk tapiak khai!En maru-uüa dow sata kowi nau iawng ia mang ia kat chowdiah mowna.En hai en maru-uüa dow sata kowi kowh lang kür mih chowdiah mana;sata ria kowi kowh uowi mih akeng prenchakuüa maten kram en reng chowdiah mowna.18Kawmat dow en kowh piak krang khi hanow sata ria kowi kowh uowi mih akeng prenchakuüa kram hai chür khai;en kowh piak krang khi hanow en ria kowi kowh süngdum kowi uowi miuüa lainowmma takrow khai’ napa kown.19“Aw Sur, ang CHAKRAMANG Thurai, akhaw aklaima mih marow iawng ang nachang en kown. Nakowi dow miapaw nauowi kown nadowi bowt. Ang nauang pawla en ransu hanow en luk kowi tuilowng iawng dow nauang kla kown.20Nami khin khe dow alai kowh rik piak miuüa kowi miapaw tukah dowi bowt mih iawng ang namata en kown. Alai kowh rik kowng miuüa hown ang nacham pe uowi en kown. En dow sing uowi mih maru-uüa pren kowi en natawi ka uowi rah kown nadowi bowt.21Kramra uowima hown ang nachurta en kown; en dow nauowi kown nadowi bowt. Maru nakrawi chet nakrawi cham en kown. Tawkchedow tawng nam ni khe paw nakrawi krum nakrawi ka en kown nadowi bowt. Ang CHAKRAMANG Thurai mami laiklow ang tek khowk,” pakhai.
“‘Aw anang lang iuk mih marow, matawng iawng chow en tuk tapiak khai!En maru-uüa dow sata kowi nau iawng ia mang ia kat chowdiah mowna.En hai en maru-uüa dow sata kowi kowh lang kür mih chowdiah mana;sata ria kowi kowh uowi mih akeng prenchakuüa maten kram en reng chowdiah mowna.18Kawmat dow en kowh piak krang khi hanow sata ria kowi kowh uowi mih akeng prenchakuüa kram hai chür khai;en kowh piak krang khi hanow en ria kowi kowh süngdum kowi uowi miuüa lainowmma takrow khai’ napa kown.19“Aw Sur, ang CHAKRAMANG Thurai, akhaw aklaima mih marow iawng ang nachang en kown. Nakowi dow miapaw nauowi kown nadowi bowt. Ang nauang pawla en ransu hanow en luk kowi tuilowng iawng dow nauang kla kown.20Nami khin khe dow alai kowh rik piak miuüa kowi miapaw tukah dowi bowt mih iawng ang namata en kown. Alai kowh rik kowng miuüa hown ang nacham pe uowi en kown. En dow sing uowi mih maru-uüa pren kowi en natawi ka uowi rah kown nadowi bowt.21Kramra uowima hown ang nachurta en kown; en dow nauowi kown nadowi bowt. Maru nakrawi chet nakrawi cham en kown. Tawkchedow tawng nam ni khe paw nakrawi krum nakrawi ka en kown nadowi bowt. Ang CHAKRAMANG Thurai mami laiklow ang tek khowk,” pakhai.
The Seed Company