2 Krungchakuüa29
1Juda pren kowi Hezekia dow 25 ning khe chowm mang khai. Aia dow 29 ning mowr Jerusalem marow kowi chowmla mang khai. A-u dow Zekaria chama Abija chekhai.2Hezekia dow a-pu David iawng CHAKRAMANG mik kowi aiungma mih lup chang reng chekhai.3Aia chowm mang mih ning uown kowi kowh la uown khe aia dow CHAKRAMANG kim kowi kowh kimplawt uowi mih maten krawi uowah khai, now naiawngün kimplawt dow aia rawah khai.4Aia dow CHAKRAMANG kim satlawt prakowi kowh viadawng kowi uamow hai Leviuüa kowi arasang kuaah lawmah khai. Now uamowuüa kowi mang Hezekia tek pe mih,5“Leviuüa low, ang laiklow sünta büah. Enni mih tachim tasai büa diah, now CHAKRAMANG enni pipu-uüa kowh Thurai chup kim paw chimsaiah büa diah. Nami chimsaima mih kim kowi kowh asür alawkma mih uanh maten henta büa diah.6A-i kowh pipu-uüa dow CHAKRAMANG kaah sakowm dowi iawng uowi khai; amatni dow CHAKRAMANG a-i kowh Thurai mik kowi angakma mih lup chang reng chekhai, now CHAKRAMANG kowi nuata büah khai. Amatni dow CHAKRAMANG uowi rah hownia cham dangta lumowr büah khai, now CHAKRAMANG pra dow dangta kung büah khai.7Amatni dow kimpuk prakowi kowh kimplawt ün paw büngta khai, now maibu ün paw mitta büah khai. Nami chimsaima mih arah kowi dow Israeluüa kowh Thurai vüi nam iungma mih maikhük towk büah dowi chekhai, now tikah mih uanap paw chang büah dowi chekhai.8Naiawng rakowi Juda pren hai Jerusalem marow luk kowi dow CHAKRAMANG kowh kunmaraura uang ting khai. Kramra uowima hai suiiai kaniaima amatni kowi CHAKRAMANG changah mih dow enni matia mik hown enni khi khowk chekhai. Maru kawmuüa dow amatni kowi khi hanow takrow khai.9Naiawng rakowi a-i kowh pipu-uüa dow tasenra kowi kowng khai, now a-i kowh masi hai chauüa paw cham takhang khai.10Naiawng rakowi a-i luk kowi kowh CHAKRAMANG kowh kunmaraura natahenla kownkow kawmat mih CHAKRAMANG Israeluüa kowh Thurai hown tatow sangbowk laitawm kown ang nau.11Ang chapauüa low, kawmat mih hang uowi phülü büah tham bowt. Tawngplawng kowchow panow CHAKRAMANG dow aia pur kowi naiowng kown mih, aia lup nachang kown mih hai nachang phuchua kown mih lang klota enni khowk chekhai,” pakhai.12Nami kung kowi Levi chenchapuüa dow naiawng hai lup chang prakowi tabak büah khai. Kohat machak hownia dow Amasai kowh chapa Mahat hai Azaria kowh chapa Joel iüah, Merari krungchak hownia dow Abdi kowh chapa Kis hai Jehalel kowh chapa Azaria iüah, Gersawn krungchak hownia dow Zima kowh chapa Joa hai Joa kowh chapa Eden iüah,13Elizafan krungchak hownia dow Simri hai Jeiel iüah, Asaf krungchak hownia dow Zekaria hai Matania iüah,14Heman krungchak hownia dow Jehiel hai Simei iüah, Jeduthun krungchak hownia dow Semaia hai Uziel iüah chekhai.15Amatni dow amatni tainau Leviuüa kowi kuaah lawmah hanow CHAKRAMANG vüi kowi chimsaima towah khai. Nami kung kowi dow naiawngün maru-uüa mih mang Hezekia kowi CHAKRAMANG peah ana iawng CHAKRAMANG kim chimsaima nachang kownkow alak kowi kowkup büah khai.16Uamowuüa dow CHAKRAMANG kim kowi kowh towklak kowi uowi mih asür alawkma mih uanh maten CHAKRAMANG kim viadawng kowi uang lawtla khai. Now naiawngün uanh dow Leviuüa mih kawtla hanow Kidrawn lawngrawi kowi pawla khai.17Amatni dow la uown kowi kowh lacher ani hownia CHAKRAMANG kim nachimsai kown mih tarowng khai bowt, now lacher raiat ni khe dow CHAKRAMANG kim kimpuk mowr uang ting büah khai bowt. Nami kung kowi amatni dow CHAKRAMANG kim krawi chimsai raiat ni tak chekhai. Now la uown kowi kowh laitaruk ni khe dow CHAKRAMANG kim krawi chimsai mih churta büah khai bowt.18Nami kung kowi amatni dow mang Hezekia tut-e kowkowiah now kowtek pe mih, “Tikah mih uanap chang müa phuchuara hai nakowi kowh bia hailawm CHAKRAMANG kim dow anging chimsaita khowk. Nami klen kowi CHAKRAMANG kim kowi kowh chimsaima mih kawmpah towk rah pawitang hai nami pawitang kowi kowh uanh maten paw anging chimsaita khowk chekhai.19Mang Ahaz dow aia chowm mang mih khin khe CHAKRAMANG kaah sakowm dowi mih lup chang khai. Nakhowk khe kowh aia cham henta mih uanh maten anging chimsaita hanow kamrütta khowk. Naiawngün uanh dow kawmat CHAKRAMANG phuchuara re-e chowbowt,” pakhai.20Auai rau mur pah mang Hezekia dow marow kowi kowh maru iukuüa kowi kuala hanow CHAKRAMANG kim kowi kowkowi khai.21Amatni dow pren vüi, CHAKRAMANG kim vüi hai Juda maru-uüa vüi nachangla angak lawt lük müa kownkow chia ranit pum, ruapur ranit pum, ruapur chah ranit pum hai rua ranit pum uang pawla büah khai. Nami kung kowi dow naiawngün tawncher mih CHAKRAMANG phuchuara kowi naphuchuaah kownkow uamow Arawn krungchakuüa kowi mang Hezekia peah ana khai.22Naiawng rakowi uamowuüa dow naiawngün chiala rik ngenah hanow avi mih towngah khai, now nami vi dow phuchuara kowi krawi thetah khai. Nami kung kowi dow ruapurla mih ngenah hanow nami vi paw phuchuara kowi krawi thetah khai. Nami kung kowi dow ruapur chah mih ngenah hanow naiawngün vi paw phuchuara kowi krawi thetah büah khai.23Nami kung kowi uamowuüa mih angak lawt lük müa rua dow mang hai maru kawmuüa pur kowi uang pawla khai. Now amatni dow naiawngün rua lu kowi tang pe rut khai.24Now naiawngün rua mih uamow ngenah khai. Naiawngün rua vi hown dow Israeluüa maten kowh angak lawt lük müa uanap changla khai. Tawngplawng kowchow panow naiawng hai Israel maten vüi tikah mih uanap hai angak lawt lük müa uanap nachang kown mih ana pe mih dow mang hownia chekhai.25Now mang David, risi Gad hai risi Nathan büah ana pek iawng klingchow ün, taraw ün hai tingteng ün hown CHAKRAMANG kim kowi amatni chowlowkkow uowi rah towng nakrawi uowi kownkow mang Hezekia mih Leviuüa kowi tek pe khai.26Naiawng rakowi Leviuüa dow mang David kowh tünteu chang müa hai uamowuüa kowh baw ün pawla hanow nakowi kowiowng khai.27Nakhowk khe mang Hezekia dow phuchuara luk kowi tikah mih uanap pawi nachang kown mih lawt ana khai. Nami tikah mih uanap pawi tarowng hanow meng tek miuüa paw CHAKRAMANG vüi tawi tarowng meng tek khai bowt. Now Israel mang David kowh tünteu chang müa hown tünteu chang miuüa paw tawi chang tünteu hai tawi tum baw khai.28Now maru maten CHAKRAMANG kowi chupiia khai. Meng tek miuüa dow tek meng khai, now baw tum miuüa dow tum baw khai. Naiawng hai amatni dow tikah mih uanap chur dowi mowr chang büah khai.29Tikah mih uanap pawi chur kung kowi dow mang hai aia tut-e kowh uowi miuüa maten tua kung se CHAKRAMANG kowi chupiiaah khai.30Nami kung kowi dow David ruiah mih meng hai risi Asaf ruiah mih meng hown CHAKRAMANG kowi nakiowla kownkow mang Hezekia hai aia kowh maru iukuüa mih Leviuüa kowi peah ana khai. Nakhowk khe amatni dow awmrawm kowh tek Thurai kiow meng khai, now krawng kowi tabawk krawm se CHAKRAMANG kowi chupiiaah khai.31Nami kung kowi Hezekia tek pe maru kawmuüa mih, “Kawmat dow CHAKRAMANG vüi enni tachim tasai khowk. Naiawng rakowi khaleng dow CHAKRAMANG kim kowi kowh tawncher phuchua hai tekla awmrawm lai kown mih uanap chang müa uanh uang pawla büa diah,” pakhai. Nahanow amatni bowkbowk dow naiawngün uanh uang pawla büah khai, now sak nau miuüa dow tikah mih uanap chang müa uanh paw uang pawla büah khai.32Amatni dow tawncher uanap chang müa chiala 70 pum, ruapur 100 pum hai ruapur chah 200 pum uang pawla khai. Naiawngün tawncher dow CHAKRAMANG vüi kowi kowh tikah mih uanap chang müa chekhai.33Uanap chang müa vüi kowi kowh lang kraah mih tawncher dow chiala 600 pum hai rua 3,000 pum chekhai.34Tawkchedow tachim tasai mih uamowuüa e lai rakowi tikah mih uanap kowi kowh tawncher maten pik mih nowng kleu büah dowi chekhai. Naiawng rakowi lup chur dowi mowr hai akeng mih uamowuüa ia tachim tasai dowi mowr amatni tainau Leviuüa mih amatni kowh lup kowi tawi khowngah khai. Tawngplawng kowchow panow kowmatia chimsaima natowah kown mih lawnguan kowi uamowuüa lak-e Leviuüa mih lang towsak khai.35Naiawngün tikah mih uanap maten klen kowi paw taking tasangra uanap kowi kowh sau tik pawi, tikah mih uanap pawi hai hüngah mih uanap pawi hailawm ahuma chang pawi büah khai. Naiawng hai CHAKRAMANG kim kowi kowh lup chang dow plan tarowng büah khai.36Thurai dow maiawngün lup mih aia maru-uüa vüi alenma chang pe khai rakowi mang Hezekia hai maru kawmuüa mih lainowmma awmrawm khai.
The Seed Company